“Oktubre 4–10. Doktrina kag mga Kasugtanan 111–114: ‘Ipahanabo Ko ang Tanan nga Butang para sa Inyo Kaayohan,’” Dali, Magsunod sa Akon—Para sa Mga Indibidwal kag Mga Pamilya: Doktrina kag mga Kasugtanan 2021 (2020)

“Oktubre 4–10. Doktrina kag mga Kasugtanan 111–114,” Dali, Magsunod sa Akon—Para sa Mga Indibidwal kag Mga Pamilya: 2021

Litrato

Si Joseph Smith nga nagawali

Oktubre 4–10

Doktrina kag mga Kasugtanan 111–114

“Ipahanabo Ko ang Tanan nga Butang para sa Inyo Kaayohan”

Pangayoa sing mapinangamuyuon ang giya sang Espiritu samtang imo ginabasa ang Doktrina kag mga Kasugtanan 111–14, kag isulat ang imo mga panghunahuna. Dayon pamensara ang mga paagi nga sarang mo aksyunan inang mga pagpabatyag.

Isulat Ang Imo Mga Panghunahuna

May espirituhanon nga eksperiyensya ka na bala sa diin nakabatyag ka sang pagsalig kag kasigurado sa imo pagtuo—pero gintilawan sang mga kasakit sa kabuhi ang imo pagtuo, kag nakita mo ang imo kaugalingon nga ginbudlayan nga mabawi ang paghidaet nga imo nabatyagan sadto? Daw pareho sini ang natabo sa mga Santos sa Kirtland. Wala matuigi pagkatapos sang espirituhanon nga pagbubo mahiangot sa pagdedikar sang Templo sang Kirtland, nag-abot ang mga problema. Krisis sa pinansyal, pagbinaisay sa Korum sang Dose, kag iban pa nga mga pagtilaw ang nangin rason nga mauyog sa pagtuo ang iban.

Indi naton malikawan ang mga pagtilaw, gani paano naton punggan nga tay-ugon sini ang aton pagtuo kag testimonya? Basi bahin sang sabat makita sa laygay sang Ginuo sa Doktrina kag mga Kasugtanan 112, nga ginhatag samtang nagadako ang kabudlayan sa Kirtland. Siling sang Ginuo, “Tinloi ang inyo mga tagipusuon sa akon atubang” (bersikulo 28), “Indi magrebelde” (bersikulo 15), “Wagkosi ang imo balikawang para sa buluhaton” (bersikulo 7), kag “Mangin mapainubuson” (bersikulo 10). Kon sundon naton ining laygay, ang Ginuo “magatuytuy sa [aton] sa kamot” sa tunga sang mga kabudlayan padulong sa pag-ayo kag paghidaet (tan-awa sa mga bersikulo 10, 13).

Litrato

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Doktrina kag mga Kasugtanan 111

Ang Ginuo sarang “magpahanabo sang tanan nga butang para sa [akon] kaayohan.”

Sang 1836, nakaangkon ang Simbahan sang dalagko nga kautangan sa paghimo sang buluhaton sang Ginuo. Samtang si Joseph Smith kag ang iban pa nagakabalaka parte sining kautangan kag nagapamensar sang mga paagi nga mabayaran ini, nagbiyahe sila pa-Salem, Massachusetts, siguro tungod sa balita nga may kuwarta nga abandonado sa isa ka balay didto (tan-awa sa tig-ulo sang seksyon sang Doktrina kag mga Kasugtanan 111). Pag-abot nila sa Salem, nagsiling ang Ginuo, “Kay tuman ang manggad para sa inyo sa sining siyudad” (bersikulo 10)—manggad nga nagalakip sang katawhan nga Iya “pagapainon sa nagakaigo nga tion para sa kaayohan sang Sion” (bersikulo 2; tan-awa man sa Exodo 19:5). Bisan nga wala sing nakita nga kuwarta sa Salem, ang mga hinaylo nga nangin resulta sang ulihi tungod sa pangmisyonaryo nga pagpaninguha kabahin sang katumanan sang promisa sang Ginuo.

Samtang imo ginabasa ang seksyon 111, hunahunaa ang mga butang nga imo ginapaligban. Pamensara kon paano magamit ang mga pulong sang Ginuo kay Joseph sa imo. Paano ka ginbuligan sang Ginuo nga makakita sang wala ginapaabot nga “manggad”? (bersikulo 10). Hunahunaa kon ano ang Iya nahimo para “ipahanabo ang tanan nga butang para sa imo kaayohan” (bersikulo 11). Ano ang ginatudlo sa imo sang dinalan nga “pareho kadasig sang inyo pagbaton sang mga ini” parte sa Amay nga Langitnon?

Tan-awa man sa Mateo 6:19–21, 33.

Doktrina kag mga Kasugtanan 112:3–15

Pagagiyahan sang Ginuo ang mga mapainubuson nga nagapangita sang Iya pagbuot.

Ang pag-isa sa Korum sang Dose naghuyang sang tig-ilinit sang 1837. May mga pagbinaisay parte sa mga responsibilidad, kag ang iban nga mga miyembro nagapakalain sa Propeta nga si Joseph Smith. Si Thomas B. Marsh, anay Pangulo sang Korum sang Dose, nabalaka, kag nagkadto sia sa Missouri halin sa Ohio, nga nagapangayo sing laygay halin sa Propeta. Nabaton ini ni Brother Marsh paagi sa rebelasyon sa seksyon 112. Paano ayhan nakabulig ang laygay sang Ginuo sa iya kag sa iya korum? Ano ang mga leksyon sini para sa imo samtang ginapakigbatuan mo ang pagbinaisay kag kalain sang buot?

Ilabi na gid, mahimo nga binagbinagon mo ang bersikulo 10. Ano ang buot silingon sang ang Ginuo magatuytuy sa imo “sa kamot”? Ngaa kinahanglan ang pagpaubos sa sining klase sang giya?

Kon kita mapainubuson, pagagiyahan kita sang Ginuo kag pagasabton ang aton mga pangamuyo.

Doktrina kag mga Kasugtanan 113

Si Joseph Smith “alagad sa mga kamot ni Cristo.”

Gintumod ni Isaias ang isa sa kaliwatan ni Jesse bilang “tuod” kag “gamot” (Isaias 11:1,10). Sa seksyon 113, ginpaathag sang Ginuo nga ining kaliwat, isa ka alagad ni Cristo, ang mangin instrumento sa pagtipon sang katawhan sang Ginuo sa ulihing mga adlaw (tan-awa sa Doktrina kag mga Kasugtanan 113:4, 6)—isa ka propesiya nga nagalaragway sing maayo sa Propeta nga si Joseph Smith. Paano ayhan ini kag ang iban pa nga mga kamatuoran sa seksyon 113 nagpapagsik sa mga Santos sa tunga sang kinagamo nga ila naeksperiyensyahan sa Kirtland? Ano ang imo nakita sa sining rebelasyon nga nagainspirar sa imo nga magpartisipar sa buluhaton sang Ginuo karon?

Tan-awa man sa 2 Nefi 21:10–12; Joseph Smith—Kasaysayan 1:40.

Litrato

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 111:2, 9–11.Ining mga bersikulo pwede magsugod sang diskusyon parte sa kon paano ginahatagan bili sang imo pamilya ang wala katapusan nga mga manggad. Pwede kamo maghimo sang treasure hunt paagi sa pagtago sang mga butang sa palibot sang balay nga nagatiglawas sang mga butang nga ginahatagan bili ukon ginapakamahal sang Ginuo. Kon makita sang inyo pamilya ang tagsa ka butang, hambali kon paano ninyo ipakita nga ginahatagan ninyo ini sing bili.

Doktrina kag mga Kasugtanan 112:10.Ginlaragway ni Elder Ulisses Soares ang mapainubuson nga mga tawo sa sining paagi: “Ang mapainubuson matudloan, nga nagakilala kon daw ano nila kakinahanglan ang Dios kag nagahandum nga magpaidalom sa Iya pagbuot. Ang mapainubuson mapailubon kag may ikasarang nga impluwensyahan ang iban nga mangin amo man” (“Be Meek and Lowly of Heart,” Ensign ukon Liahona, Nob. 2013, 10). Pamensara ang mga paagi nga mabuligan mo ang imo pamilya nga maintiendihan kon ano ang buot silingon sang mangin mapainubuson. Pwede kamo magkanta sang kanta parte sa pagkamapainubuson ukon magpaambit sang mga eksperiyensya sang gingiyahan sang Ginuo ang mga miyembro sang inyo pamilya “sa kamot” kag naghatag sang “sabat sa [ila] mga pangamuyo.”

Doktrina kag mga Kasugtanan 112:11–14, 26.Ano ang kinalain sang paghibalo sang ngalan sang isa ka tawo kag sang pagkilala sa ila? Ano ang aton matun-an sa mga bersikulo 11–14 parte sa kahulugan sang kilalahon ang Ginuo?

Doktrina kag mga Kasugtanan 112:15.Ano ang buot silingon sang “magrebelde” batok sa propeta? Ano ang aton makita sa sining bersikulo nga nagabulig sa aton nga gustuhon ang pagsakdag sa propeta?

Doktrina kag mga Kasugtanan 113:7–8.Anong aton matun-an sa bersikulo 8 nga makabulig nga “ibalik liwat ang Sion” kag tubuson ang Israel?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Praise to the Man [Dayawon ang Tawo],” Mga Himno kag mga Ambahanon sang Kabataan, no. 50–51.

Pagpauswag sang Aton Pagpanudlo

Ipangabuhi ang imo testimonya. “‘Ginatudlo mo kon ano ka,’ gintudlo ni Elder Neal A. Maxwell. Ang imo mga pamatasan mas madumduman … sangsa isa ka partikular nga kamatuoran sa isa ka leksyon’” (Teaching in the Savior’s Way, 13).