Us with Them and Them with Us [Kita upod sa Ila kag Sila upod Kita], ni Caitlin Connolly

Nobyembre 1–7

Doktrina kag mga Kasugtanan 125–128

“Tingug sang Kalipay para sa mga Buhi kag sa mga Patay”

Tandai nga isulat ang imo mga balatyagon samtang imo ginatun-an ang Doktrina kag mga Kasugtanan 125–28 para mapanghunahuna mo ini kag mapaambit sa iban.

Isulat Ang Imo Mga Panghunahuna

Sang Agosto 1840, ang nagakalisud nga si Jane Neyman namati kay Propetang Joseph nga naghambal sa lubong sang iya abyan nga si Seymour Brunson. Ang tin-edyer nga anak ni Jane nga si Cyrus wala lang man dugay napatay. Nagdugang sa iya kalisud amo nga si Cyrus wala pa mabunyagi, kag nabalaka si Jane kon ano ang madangtan sang iya wala katapusan nga kalag. Nahibal-an ni Joseph kon ano ang iya nabatyagan; amo man sina ang iya ginapamensar para sa iya pinalangga nga utod nga si Alvin, nga napatay man antes mabunyagan. Gani nagdesisyon ang Propeta nga ipaambit kay Jane, kag sa tanan nga ara sa lubong, kon ano ang ginpahayag sang Ginuo sa iya parte sa mga nagkalamatay nga wala makabaton sang mga ordinansa sang ebanghelyo—kag kon ano ang sarang naton himuon para buligan sila.

Ang doktrina sang bunyag para sa patay nagpalipay sa mga Santos; ang ila mga hunahuna gilayon nga nagliso sa patay na nga mga ginikanan, kalolohan, kag iban pa nga mga miyembro sang pamilya. Karon may paglaum na para sa ila! Pareho man ang kalipay ni Joseph sa ila, kag naggamit sia sing malipayon, mapagsik nga lenggwahe para ipabutyag ang kon ano nga gintudlo sang Ginuo sa iya parte sa kaluwasan sang mga patay: “Pahugyawa sa kalipay ang kabukiran, kag kamo tanan nga kapatagan magsinggit sing mabaskog; kag kamo tanan nga kadagatan kag mga mala nga duta isugid ang katilingalahan sang inyo Wala’y Katapusan nga Hari!” (Doktrina kag mga Kasugtanan 128:23).

Tan-awa sa Saints, 1:415–27.

Mga Ideya para sa Personal nga Pagtuon sang Balaan nga mga Kasulatan

Doktrina kag mga Kasugtanan 126

Luyag sang Ginuo nga atipanon ko ang akon pamilya.

Pagpauli halin sa pinakaulihi sang madamo nga mga misyon sa England, nakabaton si Brigham Young sang isa pa ka importante nga tawag halin sa Ginuo—nga “[tatapon] ang [iya] pamilya” (bersikulo 3), nga nag-antos sang wala sia. Samtang ginabinagbinag mo kon paano ini kag ang iban pa nga laygay sa seksyon 126 magamit sa imo, pamensara ining mga pulong ni Sister Bonnie L. Oscarson, anay Pangkabilogan nga Pangulo sang Young Women:

“Tandai nga ang pila sa pinakadalagko nga panginahanglan mahimo nga ara lang sa inyo atubang. Sugdi ang inyo pag-alagad sa inyo mismo nga puluy-an kag sa sulod sang inyo mismo mga pamilya. Amo ini ang mga kaangtanan nga sarang mangin wala katapusan. Bisan pa—kag basi ilabi na gid kon—ang sitwasyon sang inyo pamilya indi perpekto, makakita kamo sang mga paagi nga magserbisyo, mag-alsa, kag magpabakod. Magsugod kon diin ka, palanggaa sila sa kon ano sila, kag maghanda para sa pamilya nga gusto ninyo sa palaabuton” (“The Needs before Us,” Ensign ukon Liahona, Nob. 2017, 27).

Doktrina kag mga Kasugtanan 127:2–4

Nahibal-an sang Ginuo ang akon mga kalipay kag mga kasubo.

Ang sala nga mga akusasyon kag ang pamahog nga dakpon liwat nagpwersa kay Joseph Smith nga magpanago sang Agosto 1842. Pero ang mga pulong nga iya ginsulat sa mga Santos sining tion (nga karon Doktrina kag mga Kasugtanan 127) puno sang paglaum kag kalipay. Ano ang ginatudlo sa imo sang bersikulo 2–4 parte sa Dios? kon paano mo atubangon ang imo personal nga mga pagtilaw?

Pamensara nga isulat kon paano ka ginasakdag sang Ginuo sa “madalom nga tubig” sa imo kabuhi.

Doktrina kag mga Kasugtanan 127:5–8; 128:1–8

“Ang tanan ninyo nga sinulatan masulat sa langit.”

Samtang imo ginabasa ang Doktrina kag mga Kasugtanan 127:5–8; 128:1–8, magpangita sang mga rason kon ngaa ginhatag sang Ginuo kay Joseph Smith ang amo kaid-id nga mga panulin parte sa paglista sang mga bunyag para sa patay. Ano ang ginatudlo sini sa imo parte sa Ginuo kag sa Iya buluhaton?

Ang pag-alagad sa templo para sa aton mga katigulangan nagabugkos sang aton mga tagipusuon sa ila.

Doktrina kag mga Kasugtanan 128:5–25

Ang kaluwasan sang akon mga katigulangan importante sa akon kaluwasan.

Maathag sa ginpahayag sang Dios kay Joseph Smith kon ngaa ang aton mga katigulangan nga wala pa mabunyagi sa sining kabuhi nagakinahanglan sang aton bulig para sa ila kaluwasan. Pero ngaa sa banta mo nga ang kaluwasan sang aton mga katigulangan “kinahanglanon kag importante sa aton kaluwasan”? (tan-awa sa Doktrina kag mga Kasugtanan 128:15–18; italics gindugang).

Ang bersikulo 5 nagatudlo nga ang ordinansa sang mga bunyag para sa patay “ginhanda antes pa gintuga ang kalibutan.” Ano ang ginatudlo sining kamatuoran sa imo parte sa Ginuo kag sa Iya plano?    

Gingamit ni Joseph Smith ang mga dinalan pareho sang “gahum sang paghugpong,” “kaw-id nga nagaangot,” kag “perpekto nga pag-isa” kon magtudlo parte sa mga ordinansa sang priesthood kag bunyag para sa patay. Pangitaa ang mga ini kag ang kaanggid nga mga dinalan samtang imo ginabasa ang Doktrina kag mga Kasugtanan 128:5–25. Ano ang pila sa mga butang nga, paagi kay Jesucristo, sarang hugpungon bangud sang mga ordinansa sang priesthood para sa patay? Ngaa ang “di-kinaandan” maayo nga tinaga para ilaragway ang doktrina sang kaluwasan para sa patay? (tan-awa sa bersikulo 9–11).

Ano ang nanamian mo sa mga pulong ni Joseph Smith sa mga bersikulo 19–25? Sa ano nakaapekto ining mga bersikulo sa imo nabatyagan parte sa pag-alagad sa templo para sa imo mga katigulangan? parte kay Jesucristo? Ano ang ginapabatyag sa imo nga imo himuon?

Tan-awa man sa 1 Mga Taga-Corinto 15:29.  

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 126.Ang pagbasa sining laygay kay Brigham Young mahimo nga makainspirar sa inyo pamilya nga hambalan kon paano kamo maghatag sing dugang nga tiyempo sa “pagtatap” (bersikulo 3) sa kada isa.

Doktrina kag mga Kasugtanan 128:15–18.Ano ang pila sa nagapangluwas kag nagaperpekto nga mga bugay sang buluhaton sa family history?  

Doktrina kag mga Kasugtanan 128:18.Pamensara ang paghimo sang papel nga kadena nga may mga ngalan sang mga miyembro sang pamilya kag mga katigulangan sa tagsa ka bahin para ipakita kon paano nagahimo sang “nagaalangot nga mga kaw-id” ang buluhaton sa family history kag templo agud iangot kita sa aton mga katigulangan. Pwede man kamo mag-research sang mga ngalan sini nga semana para mangita sang dugang nga mga miyembro sang pamilya kag tan-awon kon ano na kalaba ang inyo kadena.

Doktrina kag mga Kasugtanan 128:19–23.Basi pwede ang mga miyembro sang pamilya magpangita sa sining mga bersikulo sang mga tinaga nga nagapakita sang kalangkag ni Joseph Smith sa ebanghelyo ni Jesucristo kag sa kaluwasan sang mga patay. Pwede mag-istorya ang mga miyembro sang pamilya sang mga eksperiyensya nga nagpalangkag man sa ila sa sining buluhaton.

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Mga Tingug sang Pagpanumbalik

Bunyag para sa Patay, “isa ka Bag-o kag Mahimayaon nga Topiko”

Ining drowing nagapakita sang tulugmawan sa Templo sang Nauvoo nga nagatungtong sa dose ka baka.

Phebe kag Wilford Woodruff

Si Phebe Woodruff nagaistar malapit sa Nauvoo sang nagsugod tudlo si Joseph Smith parte sa bunyag para sa patay. Ginsulat niya ini sa iya bana, nga si Wilford, nga nagaalagad sa misyon sa England:

“Natun-an ni Brother Joseph … paagi sa rebelasyon nga atong mga miyembro sining simbahan mahimo bunyagan para sa ila mga paryente nga napatay na kag wala nakaangkon sing pribelihiyo nga mabatian ining ebanghelyo, bisan para sa ila mga kabataan, mga ginikanan, mga utod nga lalaki, mga utod nga babayi, kalolohan, mga tiyo, kag mga tiya. … Sa tion nga mabunyagan na sila para sa ila mga abyan buy-an na ang mga ini sa prisuhan kag sarang nila sila makuha sa pagkabanhaw kag madala sila sa selestiyal nga ginharian—ining doktrina masadya nga ginbaton sang simbahan kag nagpalapit sila nga guban-guban, ang iban pagabunyagan bisan tubtob 16 ka beses … sa isa ka adlaw.”¹

Si Wilford Woodruff sang ulihi nagkomento parte sining prinsipyo: “Sang tion nga mabatian ko ini naglukso ang akon kalag sa kalipay. … Nagpalapit ako kag ginbunyagan para sa tanan ko nga paryente nga patay na nga akon madumduman. … Gusto ko maghambal Aleluia sang mag-abot ang rebelasyon nga nagapahayag sa amon sang bunyag para sa patay. Nabatyagan ko nga sarang kami magkalipay sa mga bugay sang Langit.”²

Vilate Kimball

Pareho kay Sister Woodruff, si Vilate Kimball nakabati parte sa bunyag para sa patay samtang ang iya bana, nga si Heber, ato sa malayo nga nagawali sang ebanghelyo. Ginsulatan niya sia:

“Si Pangulong Smith nagbukas sang bag-o kag mahimayaon nga topiko … nga nagtuga sang pagpagsik liwat sang pagtuo sang mga miyembro sa simbahan. Ina, amo ang pagbunyag para sa patay. Ginahambal ini ni Pablo, sa una nga Mga Taga-Corinto ika-15 nga kapitulo ika-29 nga bersikulo. Si Joseph nakabaton sang mas kumpleto nga paathag parte sini paagi sa Rebelasyon. … Pribelihiyo sining simbahan nga mabunyagan para sa tanan nila nga himata nga nagkalamatay na antes mag-abot ining Ebanghelyo; bisan tubtob pa sa ila Lolo kag Lola-sa-tuhod. … Sa paghimo sini, kita nagaakto bilang mga tiglawas para sa ila, kag maghatag sa ila sang pribelihiyo nga magbangon sa unang pagkabanhaw. Siling niya nga igawali ang Ebanghelyo sa ila … pero wala sang espiritu nga ginabunyagan. … Sugod sang ginwali inang pamaagi diri, wala na magpahuway ang mga tubig. Sa tion sang komperensya may ara kon kaisa walo tubtob napulo ka mga Elder sa suba sa tagsa ka tion nga nagabunyag. … Gusto ko nga mabunyagan para sa akon Nanay. Nahunahuna ko nga maghulat nga makapauli ka, pero sang katapusan nga naghambal si Joseph parte sa sining topiko, ginlaygayan niya ang kada isa nga indi na magpadugay-dugay, kag hilwayon na ang ila mga abyan halin sa pagkabihag sa madali nga panahon. Gani nahunahuna ko nga maglinya sini nga semana, kay may pila ka mga kaingod nga makadto man didto. Ang iban gani kapila na mabunyagan. … Gani makita mo nga may kahigayunan para sa tanan. Indi bala ini mahimayaon nga doktrina?”³

Phebe Chase

Sang mahuman na ang tulugmawan sa Templo sang Nauvoo, ang mga bunyag para sa patay ginhikot na didto imbes nga sa suba. Si Phebe Chase, isa ka pumuluyo sang Nauvoo, nagsulat sa iya iloy parte sa templo, nga ginalaragway ang tulugmawan bilang ang lugar kon diin “sarang kita mabunyagan para sa aton mga patay kag mangin mga manluluwas sa Bukid nga Sion.” Padayon niya nga ginpaathag nga sa sining tulugmawan, “Ginbunyagan na ako para sa akon pinalangga nga amay kag sa tanan nga kaabyanan ko nga patay na. … Karon gusto ko mahibal-an kon ano ang mga ngalan sang imo amay kag imo Iloy para mahilway ko na sila, kay handum ko nga paumpawan ang mga Patay na. … Naghambal na liwat ang Ginuo kag ginpanumbalik ang dumaan nga pamaagi.”⁴

Sally Randall

Sa pagsulat sa iya mga abyan kag pamilya parte sa bunyag para sa patay, ginsaysay ni Sally Randall ang pagtaliwan sang iya anak nga si George:

“O daw ano kabudlay sadto sa akon kag daw tubtob karon indi ko pa gid ini mabaton, pero … ang iya amay nabunyagan na para sa iya kag daw ano kamahimayaon nga butang nga nagpati kami kag nagbaton sang kabug-osan sang ebanghelyo suno sa pagwali sini sa karon kag mabunyagan para sa tanan naton nga patay na nga kaabyanan kag luwason sila tubtob sa malab-utan sang aton ihibalo parte sa ila.

“Luyag ko nga isulat mo sa akon ang mga ngalan sang tanan nga may kaangtanan sa aton nga patay na tubtob sa kalolohan kag kalolahan nga malab-utan. Handum ko nga himuon ang kutob sa masarangan ko para luwason ang akon mga abyan kag mangin malipayon gid ako kon makakadto ka kag buligan ako kay kadako sining buluhaton para sa isa lang ka tawo. … Ginapaabot ko na nga maghunahuna ka nga isa ini ka pinasahi nga doktrina pero mahibal-an mo nga ini matuod.”⁵

Mga Tanda

1. Phebe Woodruff letter to Wilford Woodruff, Okt. 6, 1840, Church History Library, Salt Lake City; tigbato kag punctuation ginmoderno.

2. Wilford Woodruff, “Remarks,” Deseret News, Mayo 27, 1857, 91; punctuation ginmoderno.

3. Vilate Kimball sulat kay Heber C. Kimball, Okt. 11, 1840, Church History Library, Salt Lake City; tigbato kag punctuation ginmoderno.

4. Sulat ni Phebe Chase, wala sing petsa, Church History Library, Salt Lake City; tigbato kag punctuation ginmoderno. Sang ang mga Santos una nga naghikot sang mga bunyag para sa patay, ang mga indibidwal kon kaisa ginabunyagan para sa mga katigulangan nga pareho babayi kag lalaki. Sang ulihi ginpahayag nga ang mga lalaki dapat bunyagan para sa mga lalaki kag ang babayi para sa mga babayi.

5. Sulat ni Sally Randall, Abr. 21, 1844, Church History Library, Salt Lake City; tigbato kag punctuation ginmoderno.

Ang tulugmawan sa Templo sang Ogden Utah nagatungtong sa likod sang dose ka baka.