“Nobyembre 15–21. Doktrina kag mga Kasugtanan 133–134: ‘Maghanda Kamo sa Pagkari sang Nobyo,’” Dali, Magsunod sa Akon—Para sa Mga Indibidwal kag Mga Pamilya: Doktrina kag mga Kasugtanan 2021 (2020)

“Nobyembre 15–21. Doktrina kag mga Kasugtanan 133–134,” Dali, Magsunod sa Akon—Para sa Mga Indibidwal kag Mga Pamilya: 2021

Litrato

lima ka maalam nga mga ulay

The Bridegroom Cometh [Ang Nobyo Nagapadulong], ni Elizabeth Gibbons

Nobyembre 15–21

Doktrina kag mga Kasugtanan 133–134

“Maghanda Kamo sa Pagkari sang Nobyo”

Si Pangulong Henry B. Eyring nagtudlo: “Ang Pagpanumbalik sang ebanghelyo nagsugod sa mapainubuson nga pamangkot nga ginbinagbinag sa kubos nga balay, kag makapadayon ini sa tagsa naton nga puluy-an” (“A Home Where the Spirit of the Lord Dwells,” Ensign ukon Liahona, Mayo 2019, 25).

Isulat Ang Imo Mga Panghunahuna

Sang ang Simbahan halos 19 ka bulan pa lamang, si Propetang Joseph Smith kag ang iban nga mga lider sang Simbahan nagplastar sang dalagko nga mga plano para tipunon ang mga rebelasyon sang Dios sa ulihing mga adlaw sa isa ka libro kag mag-imprinta sang 10,000 ka kopya—doble sa primero nga pag-imprinta sang Libro ni Mormon. Ang masubo, nangin sablag ang gasto sa sining mga plano, kag gin-atake sang malain nga mga tawo ang imprintahan sang Simbahan samtang nagasige ang pag-imprinta. Ginpanglapta nila ang wala pa mahugpong nga mga pahina, kag bisan pa nga gintago sang maisog nga mga Santos ang pila sang mga ini, wala gid sing kompleto nga kopya sang Libro sang mga Kasugoan ang nahibal-an nga nabilin.

Ang ginakilala naton karon nga seksyon 133 sang Doktrina kag mga Kasugtanan amo dapat ang appendix sang Libro sang mga Kasugoan, nga daw pareho sang mabaskog nga konklusyon sa katapusan sang ginpublikar nga mga rebelasyon sang Ginuo. Nagapaandam ini sang manug-abot nga adlaw sang paghukom kag ginasulit ang panawagan nga makita sa bilog nga moderno nga rebelasyon: magpalayo sa pagkadutan-on, nga ginasimbolo sang Babilonia; magpatindog sang Sion; maghanda para sa Ikaduha nga Pagkari; kag ipalapta ining mensahe “sa tagsa ka nasyon, kag kaliwat, kag lengguahe, kag katawhan” (bersikulo 37). Bisan nga ang orihinal nga mga plano para sa Libro sang mga Kasugoan wala matuman, ining rebelasyon isa ka pahanumdom kag saksi nga ang buluhaton sang Ginuo indi mapunggan, “kay pagahublasan niya ang iya balaan nga butkon…, kag ang tanan nga yara sa mga punta sang kalibutan makakita sang kaluwasan sang ila Dios” (bersikulo 3).

Litrato

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Doktrina kag mga Kasugtanan 133

Ang mga kamatuoran sa Doktrina kag mga Kasugtanan makahanda sa akon nga himuon ang buluhaton sang Dios.

Kon kaisa ang mga libro may konklusyon sa katapusan nga nagasulit ukon nagasuma sang mayor nga mga punto sang libro. Ang seksyon 133 orihinal nga gintuyo nga mangin konklusyon sang Libro sang mga Kasugoan, kag mahimo nga mapuslanon nga basahon mo ining seksyon nga ginatandaan ina. Ano nga mga punto ang ginasulit sang Ginuo parte sa Iya buluhaton? Ano ang ginatudlo sa imo sang mga bersikulo 57–62 parte sa papel nga gusto sang Ginuo nga imo himuon sa Iya buluhaton?

Doktrina kag mga Kasugtanan 133:1–19

Gusto sang Ginuo nga maghanda ako para sa Iya Ikaduha nga Pagkari.

Ang seksyon 1, ang pauna sang Ginuo sa Doktrina kag mga Kasugtanan, kag ang seksyon 133, ang orihinal nga appendix sang libro, nagasugod sa pareho nga pangabay halin sa Ginuo: “Dungga ninyo, O mga katawhan sang akon simbahan” (Doktrina kag mga Kasugtanan 1:1; 133:1). Ano ang buot silingon sang dungga? Ano nga mga imbitasyon ukon sugo ang gusto sang Ginuo nga imo pamatian sa Doktrina kag mga Kasugtanan 133:1–19? Ano ang nabatyagan mo nga dapat mo himuon para mas makahanda ka para sa Iya pag-abot? Paano mo buligan ang mga ara sa imo palibot?

Tan-awa man sa Mateo 25:1–13.

Doktrina kag mga Kasugtanan 133:19–56

Ang Ikaduha nga Pagkari mangin masadya para sa matarong.

Sa imo pagbasa sang Doktrina kag mga Kasugtanan 133:19–32 parte sa mga hitabo nga magaupod sa Ikaduha nga Pagkari sang Manluluwas, pwede mo binagbinagon kon ano ang ginapahangop sang mga paglaragway sining mga hitabo sa imo parte sa Manluluwas kag sa Iya buluhaton. Ano ang posible nga espirituhanon nga paggamit ang imo makita sa sining mga paglaragway?

Samtang imo ginabasa ang paglaragway sang pagbalik sang Manluluwas sa bersikulo 32–56, ano ang nagatulod sa imo nga magpaabot sinang dako nga adlaw? Ano nga mga tinaga ukon mga dinalan ang nagalaragway sang pagpalangga sang Ginuo sa Iya katawhan? Pamensara ang pagsulat sang imo personal nga mga eksperiyensya parte sa “ang mapinalanggaon nga kaayo sang [imo] Ginuo, kag ang tanan nga iya ginhatag sa [imo] suno sa iya kaluoy” (bersikulo 52).

Doktrina kag mga Kasugtanan 134

“Ginpahamtang sang Dios ang mga gobyerno para sa benepisyo sang tawo.”

Ang relasyon sang nauna nga mga Santos sa gobyerno komplikado. Sang pilit nga gintabog ang mga Santos pa-gwa sa Jackson County, Missouri, sang 1833, wala sila makabaton sang suporta ukon bayad halin sa lokal ukon nasyunal nga gobyerno wala sapayan sang ila mga pangabay para buligan. Sa amo man, ginhangop sang mga tawo sa gwa sang Simbahan ang mga pagpanudlo parte sa Sion nga nagakahulugan nga ginsikway sang mga Santos ang awtoridad sang dutan-on nga mga gobyerno. Ang Doktrina kag mga Kasugtanan 134 ginsulat, sa isa ka bahin, para athagon ang tindog sang Simbahan parte sa gobyerno.

Ano dapat ang mabatyagan sang mga miyembro sang Simbahan parte sa mga gobyerno? Samtang imo ginatun-an ang seksyon 134, pamensara ang paghimo sang duha ka listahan: isa ka lista parte sa mga prinsipyo nga imo matun-an parte sa gobyerno kag ang isa para sa mga responsibilidad sang mga pumuluyo. Paano ayhan ining mga ideya nakabulig sa nauna nga mga Santos? Paano magamit ang mga ini sa lugar nga imo ginaistaran?

Tan-awa man sa Mga Artikulo sang Pagtuo 1:11–12.

Litrato

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 133:4–14.Ang espirituhanon nga kabaliskaran sang Sion amo ang Babilonia—ang dumaan nga siyudad sa bilog nga balaan nga kasulatan nga nagasimbolo sang kalainan kag espirituhanon nga pagkabihag (tan-awa sa D. Todd Christofferson, “Come to Zion,” Ensign ukon Liahona, Nob. 2008, 37. May kinahanglan bala kamo himuon bilang pamilya para, sa espirituhanon nga punto, “maggwa … sa Babilonia” (bersikulo 5) kag “maglakat … [padulong] … sa Sion”? (bersikulo 9).

Doktrina kag mga Kasugtanan 133:20–33.Samtang inyo ginabasa ining mga bersikulo sing ululupod, pwede drowingon sang inyo pamilya ang sa banta nila mangin kahimtangan sa Ikaduha nga Pagkari. Hambali kon ano ang sarang himuon sang inyo pamilya para maghanda sa Iya Pagkari.

Doktrina kag mga Kasugtanan 133:37–39.Masadyahan ayhan ang inyo pamilya nga basahon ining mga bersikulo “sa mabaskog nga tingug”? (bersikulo 38). Ano ang buot silingon sang ipaambit ang ebanghelyo sa mabaskog nga tingug? Ano nga mga kamatuoran ang sarang naton ipaambit?

Doktrina kag mga Kasugtanan 134:1–2.Para buligan ang imo pamilya nga maintiendihan ang importansya sang gobyerno, pwede ninyo hambalan ang mga pamangkot pareho sini: Paano ginbugayan ang aton pamilya bangud sa mga patakaran? Paano ginbugayan ang aton pungsod paagi sa pag-angkon sang mga layi? Pwede man kamo maghimo ukon magkolor sang larawan sang bandera sang inyo pungsod ukon saulohon ang ika-onse kag ika-dose nga mga artikulo sang pagtuo.

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Come, Ye Children of the Lord [Inanak sang Ginuo],” Mga Himno kag mga Ambahanon sang Kabataan, no. 4.

Pagpauswag sang Personal nga Pagtuon

Magtudlo sang maathag kag simple nga doktrina. Ginalaragway sang Ginuo ang Iya ebanghelyo sa mga tinaga nga “maathag” kag “simple” (Doktrina kag mga Kasugtanan 133:57). Ano ang ginapahangop sining mga tinaga sa imo parte sa pagtudlo sang ebanghelyo sa imo pamilya?