“Nobyembre 22–28 Doktrina kag mga Kasugtanan 135–136: ‘Iya “Ginselyohan ang Iya Misyon kag Iya mga Binuhatan sang Iya Kaugalingon nga Dugo,”’” Dali, Magsunod sa Akon—Para sa Mga Indibidwal kag Mga Pamilya: Doktrina kag mga Kasugtanan 2021 (2020)

“Nobyembre 22–28 Doktrina kag mga Kasugtanan 135–136,” Dali, Magsunod sa Akon—Para sa Mga Indibidwal kag Mga Pamilya: 2021

Litrato

gwa sang Bilanggoan sang Carthage

Bilanggoan sang Carthage

Nobyembre 22–28

Doktrina kag mga Kasugtanan 135–136

Iya “Ginselyohan ang Iya Misyon kag Iya mga Binuhatan sang Iya Kaugalingon nga Dugo”

Sa imo pagtuon sang Doktrina kag mga Kasugtanan 135–36, mahimo nga ipabatyag sa imo sang Ginuo ang mga paghangop nga makabulig sa imo nga ipangabuhi ang imo nabasa. Kon matabo ina, isulat ang Iya ginatudlo sa imo.

Isulat Ang Imo Mga Panghunahuna

Sang hapon sang Hunyo 27, 1844, napriso liwat si Joseph kag Hyrum Smith, kaupod sila ni John Taylor kag Willard Richards. Nagapati sila nga inosente sila sa bisan ano nga krimen, pero nagpaidalom sila sa pag-aresto, nga nagalaum nga mapunggan ang kapintas batok sa mga Santos sa Nauvoo. Indi ini ang una nga tion nga ginpapriso sang mga kaaway sang Simbahan ang Propeta nga si Joseph, pero sini nga tion daw nahibal-an niya nga indi na sia makabalik nga buhi. Gintinguhaan niya kag sang iya mga abyan nga paumpawan ang kada isa paagi sa pagbasa halin sa Libro ni Mormon kag sa pagkanta sang mga himno. Dayon nabatian ang linupok, kag sa sulod sang pila ka minutos ang mortal nga mga kabuhi nanday Joseph Smith kag sang iya utod nga si Hyrum natapos.

Pero sa gihapon indi ato ang katapusan sang diosnon nga kawsa nga ila lubos nga ginbaton. Kag indi ato ang katapusan sang Pagpanumbalik sang ebanghelyo ni Jesucristo. May madamo pa nga dapat buhaton kag madamo pa nga rebelasyon nga magagiya sa Simbahan paabante. Ang pagpatay sa Propeta indi makapatay sa buluhaton sang Dios.

Litrato

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Doktrina kag mga Kasugtanan 135; 136:37–39

Ginselyohan nanday Joseph kag Hyrum Smith ang ila mga testimonya sang ila dugo.

Hunahunaa kon ano ayhan ang imo mabatyagan kon nagaistar ka sa Nauvoo sang si Joseph kag Hyrum Smith ginpatay. Gintinguhaan mo ayhan nga tungkaron ang kahulugan sining masubo nga hitabo? Ang Doktrina kag mga Kasugtanan 135, nga orihinal nga ginpublikar wala pa tatlo ka bulan pagkatapos sang pagpatay, mahimo nga nakabulig kuntani. Mahimo mo markahan ang mga tinaga kag mga dinalan nga nakahatag sa imo sang paghangop kag pasalig. Ano ang imo ihambal sa tawo nga magpamangkot, “Ngaa tugtan sang Dios nga patyon ang Iya Propeta?”

Tan-awa man sa Doktrina kag mga Kasugtanan 5:21–22; 6:29–30.

Doktrina kag mga Kasugtanan 135:3

Si Joseph Smith nakahimo sing mas labaw pa bisan kay sin-o para sa aton kaluwasan magluwas lamang kay Jesucristo.

Hunahunaa ang mga bugay nga nag-abot sa imo bilang miyembro sang Simbahan ni Jesucristo. Pila sa mga ini ang resulta sang misyon nga nahuman sang Propeta nga si Joseph Smith? Ang Doktrina kag mga Kasugtanan 135:3 nagalista sang pila sa dalagko nga mga butang nga nahuman ni Joseph Smith sa sulod sang 24 ka tuig matapos ang Unang Panan-awon. Paano nakaapekto ining mga butang sa imo kag sa imo relasyon sa Amay nga Langitnon kag kay Jesucristo? Pamensara nga isulat ang imo testimonya parte sa Propeta nga si Joseph Smith. Sin-o ayhan ang nagakinahanglan nga makabati sang imo testimonya?

Doktrina kag mga Kasugtanan 136

Nagahatag ang Ginuo sa akon sang laygay para sa akon “mga pagpanglakaton” sa kabuhi.

Pagkatapos nga tabugon sa Nauvoo, nangatubang ang mga Santos sang malawig nga pagpanglakaton pakadto sa Salt Lake Valley, kag ang una nga ginatos ka kilometro nangin mahinay kag mabudlay kaayo. Si Brigham Young, nga karon nagapanguna sa Simbahan bilang Pangulo sang Korum sang Dose ka Apostoles, nabalaka kon paano malampuwasan sang mga Santos ang kabilugan sang biyahe. Nagbutang sia sang temporaryo nga ilistaran nga gintawag Winter Quarters kag nagpangayo sang giya. Bilang sabat, ginhatagan sia sang Ginuo sang rebelasyon, nga karon amo ang seksyon 136. Upod sa iban nga butang, ining rebelasyon nagpadumdom sa mga Santos “nga ang ila pamatasan sa sining pagpanglakaton pareho kaimportante sa ila destinasyon” kag “nakabulig baylo sang biyahe pa-weste halin sa isa ka indi mapalaron nga panginahanglan sa isa ka importante nga espirituhanon nga eksperiyensya nga naangkon sing ululupod.”

Tandai ining konteksto samtang imo ginatun-an ang seksyon 136. Ano nga laygay ang imo makita nga makabulig sa imo nga baylohan ang mabudlay nga pagtilaw sa imo kabuhi sang “importante … nga espirituhanon nga eksperiyensya”? Pwede mo man binagbinagon kon paano ka mabuligan sang laygay nga matuman ang pagbuot sang Ginuo sa imo kaugalingon nga kabuhi, pareho nga nabuligan sini ang nauna nga mga Santos nga matapos ang mabudlay nga biyahe pa-Weste.

Litrato

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 135:1, 3. Ano ang nanamian mo parte sa sining mga bersikulo? Paano kita mangin mas tampad sa aton mga testimonya, bisan pa nga wala ginapangayo sa aton nga ihatag ang aton mga kabuhi para sa mga ini?

Doktrina kag mga Kasugtanan 135:3.Para hambalan kon ano ang buot silingon sang pahayag nga si Joseph Smith nakahimo “sing mas labi pa, luwas lamang kay Jesus, para sa kaluwasan sang mga tawo sa sining kalibutan sangsa iban nga tawo,” pamensara nga rebyuhon kon ano ang natun-an sang inyo pamilya parte kay Joseph Smith sini nga tuig. Pwede ka maggamit sang mga litrato halin sa sining manwal para buligan sila nga madumduman kon ano ang ila natun-an kag hagara sila nga ipaambit ang paborito nila nga mga istorya ukon pinanudlo. Ngaa nagapasalamat kita sa Propeta nga si Joseph Smith kag sa nahimo sang Ginuo paagi sa iya?

Doktrina kag mga Kasugtanan 136.Sang ginpahayag sang Ginuo ang seksyon 136, ang mga Santos may malawig, mabudlay nga biyahe sa ila atubang, sa idalom sang direksyon ni Brigham Young. Samtang inyo ginabasa ang seksyon 136 sing ululupod, pamensara ang mabudlay nga mga bagay nga mahimo atubangon sang inyo pamilya. Ano nga laygay ang makita naton sa sining rebelasyon nga makabulig sa aton nga mabaton ang bulig kag gahum sang Ginuo?

Doktrina kag mga Kasugtanan 136:4.Ano ang buot silingon sang “magalakat sa tanan nga ordinansa sang Ginuo”? Paano ang mga ordinansa nga aton nabaton makaapekto sang aton adlaw-adlaw nga pangabuhi?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Praise to the Man [Dayawon ang Tawo],” Mga Himno kag mga Ambahanon sang Kabataan, no. 50–51.

Pagpauswag sang Personal nga Pagtuon

Pangitaa ang gugma sang Dios. Si Pangulong M.Russell Ballard nagtudlo, “[Ang] ebanghelyo isa ka ebanghelyo sang gugma—gugma sa Dios kag gugma para sa kada isa” (“God’s Love for His Children,” Ensign, Mayo 1988, 59). Samtang imo ginabasa ang balaan nga mga kasulatan, pamensara nga pat-inan ukon markahan ang mga ebidensya sang pagpalangga sang Dios.