“Nobyembre 29–Disyembre 5. Doktrina kag mga Kasugtanan 137–138: ‘Ang Panan-awon sang Pagtubos sang mga Patay,’” Dali, Magsunod sa Akon—Para sa Mga Indibidwal kag Mga Pamilya: Doktrina kag mga Kasugtanan 2021 (2020)

“Nobyembre 29–Disyembre 5. Doktrina kag mga Kasugtanan 137–138,” Dali, Magsunod sa Akon—Para sa Mga Indibidwal kag Mga Pamilya: 2021

Litrato

mga tawo sa kalibutan sang mga espiritu

Nakita ni Joseph ang iya amay, iloy, kag utod nga lalaki sa selestiyal nga ginharian. Joseph Smith’s Vision of the Celestial Kingdom [Panan-awon ni Joseph Smith sang Selestiyal nga Ginharian], ni Robert T. Barrett.

Nobyembre 29–Disyembre 5.

Doktrina kag mga Kasugtanan 137–138

“Ang Panan-awon sang Pagtubos sang mga Patay”

Si Pangulong M. Russell Ballard nagtudlo: “Ginaagda ko kamo nga basahon sing maid-id kag mahunahunaon ang [Doktrina kag mga Kasugtanan 138]. Samtang ginahimo ninyo ini, kabay nga bendisyunan kamo sang Ginuo nga mas maintiendihan sing lubos kag magpasalamat sa pagpalangga sang Dios kag sa Iya plano sang kaluwasan kag kalipayan para sa Iya mga anak” (“The Vision of the Redemption of the Dead,” Ensign ukon Liahona, Nob. 2018, 73).

Isulat Ang Imo Mga Panghunahuna

Ang mga rebelasyon nga nasulat sa Doktrina kag mga Kasugtanan 137 kag 138 may lang-at nga masobra 80 ka tuig kag 2,400 ka kilometro. Ang seksyon 137 nabaton sang Propeta nga si Joseph Smith sang 1836 sa wala pa matapos nga Templo sang Kirtland, kag ang seksyon 138 nabaton ni Joseph F. Smith, ika-anum nga Pangulo sang Simbahan, sang tuig 1918 sa Salt Lake City. Pero base sa doktrina, ining duha ka panan-awon dapat mag-updanay. Pareho ini nga nagasabat sang mga pamangkot parte sa kapalaran sang mga anak sang Dios sa madason nga kabuhi. Kag pareho nga may dugang nga kadalumon sa kahulugan kon pamensaron naton ang mga eksperiyensya sa kabuhi sang mga propeta nga nagbaton sang mga ini.

Ang panan-awon ni Joseph Smith nakabulig sa iya nga maintiendihan ang wala katapusan nga kapalaran sang iya pinalangga nga utod nga si Alvin, nga napatay anum ka tuig antes ginpanumbalik ang awtoridad sa pagbunyag. Ang mga pamangkot parte sa wala katapusan nga kaluwasan ni Alvin nagpabilin kay Joseph halin sadto. Ang panan-awon ni Joseph F. Smith nagpahayag sang mahimayaon nga mga kamatuoran parte sa kalibutan sang mga espiritu—pat-od nga makapaumpaw nga rebelasyon sa nagakalisud sa kamatayon sang madamo nga suod nga mga miyembro sang pamilya. Napatay ang amay ni Joseph F. Smith, nga si Hyrum Smith, sang 5 ang iya edad kag ang iya iloy, nga si Mary Fielding Smith, sang 13 ang iya edad. Sang tion sang iya panan-awon sang 1918, nagakasubo sia sa pagkapatay sang 13 ka kabataan.

Madamo sa mga pamangkot sang mga tawo parte sa kabuhi pagkatapos sang kamatayon ang ginasabat sa sining mga rebelasyon. Ang seksyon 137 nagahatag sang pauna nga ihibalo sa amo nga mga pamangkot, kag ang seksyon 138 mas nagbukas pa gid sang ihibalo parte sini. Ululupod, nagasaksi ang mga ini “sang tunay kag dalayawon nga gugma nga ginpahayag sang Amay kag sang Anak” (Doktrina kag mga Kasugtanan 138:3).

Litrato

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Doktrina kag mga Kasugtanan 137

Ang tagsa ka kalag may oportunidad nga magpili sang selestiyal nga himaya.

Ang komon nga paghangop sang mga Kristiyano sang 1836 amo nga kon ang tawo mapatay nga wala mabunyagi—pareho sa utod ni Joseph Smith nga si Alvin—ina nga tawo indi makasaka sa langit. Pero nakita ni Joseph si Alvin sa isa ka panan-awon parte sa selestiyal nga ginharian. Samtang imo ginabasa ang seksyon 137, binagbinaga ang imo matun-an parte sa Amay nga Langitnon, sa Iya plano sang kaluwasan, kag sa selestiyal nga ginharian.

Doktrina kag mga Kasugtanan 138:1–11, 25–30

Ang pagbasa kag pagbinagbinag sang balaan nga mga kasulatan nagahanda sa akon nga magbaton sang rebelasyon.

Kon kaisa ang rebelasyon nagaabot bisan pa nga wala naton ini ginapangita. Pero mas masami, nagaabot ini tungod matutom naton ini nga ginapangita kag ginahandaan. Samtang imo ginabasa ang Doktrina kag mga Kasugtanan 138:1–11, 25–30, tandai kon ano ang ginahimo ni Pangulong Joseph F. Smith sang “nabuksan ang mga mata sang [iya] paghangop” para mas maintiendihan ang nagatubos nga misyon sang Manluluwas. Dayon pamensara kon paano mo sundon ang ehemplo ni Pangulong Smith. Halimbawa, ano nga mga pagbag-o ang sarang mo himuon sa imo pagtuon sang balaan nga mga kasulatan para makaangkon sang dugang nga “pagbinagbinag sang balaan nga mga kasulatan” kag dugang nga “[pagpamalandong] sang dako nga halad sang pagbayad-sala sang [Manluluwas]”? (mga bersikulo 1–2).

Pamensara kon paano ka ginhanda para sa mga ginaeksperiyensya mo karon ukon pagaagyan sa palaabuton.

Joseph F. Smith, ni Albert E. Salzbrenner

Doktrina kag mga Kasugtanan 138:25–60

Ang buluhaton sang kaluwasan nagakatabo sa diri kag sa pihak nga kinabuhi.

Si Pangulong Russell M. Nelson nagtudlo, “Ang aton mensahe sa kalibutan simple kag sinsero: ginaagda naton ang tanan nga mga anak sang Dios sa diri kag sa pihak nga kinabuhi nga magpalapit sa ila Manluluwas, magbaton sang mga bugay sang balaan nga templo, mag-angkon sang nagadugay nga kalipay, kag mangin angayan para sa kabuhi nga wala katapusan” (“Let Us All Press On,” Ensign ukon Liahona, Mayo 2018, 118–19). Binagbinaga ining pahayag samtang imo ginabasa ang Doktrina kag mga Kasugtanan 138:25–60. Pwede mo man pamensaron ining mga pamangkot:

Ano ang imo matun-an sa sining mga bersikulo parte sa kon paano ginahimo ang buluhaton sang kaluwasan sa kalibutan sang mga espiritu? Ngaa importante nga imo mahibal-an nga ining buluhaton nagakatabo? Paano ginapabakod sining mga bersikulo ang imo pagtuo sa Pagbayad-Sala sang Manluluwas?
Ano ang ginatudlo sining mga bersikulo parte sa mga nagapartisipar sa buluhaton sang kaluwasan sa kalibutan sang mga espiritu? Ngaa importante nga maintiendihan nga ang buluhaton sang kaluwasan ginahimo sa magtimbang nga bahin sang belo?

Litrato

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 137:1–5.Hagara ang imo pamilya nga drowingon kon ano sa banta nila ang hitsura sang selestiyal nga ginharian base sa sining mga bersikulo. Ano ang inyo makita sa sining mga bersikulo nga nagabulig sa inyo nga maghandum nga mag-istar didto? Ano ang ginahimo naton sa karon para maghanda nga magpuyo sa selestiyal nga ginharian upod sa Amay nga Langitnon kag kay Jesucristo?

Doktrina kag mga Kasugtanan 137:5–10. Basi pwede man ninyo hambalan ang parte sa kilala ninyo nga napatay nga wala makaangkon sang kahigayunan nga mabunyagan. Ano ang ginatudlo sa aton sang Doktrina kag mga Kasugtanan 137:5–10 parte sa sina nga tawo?

Doktrina kag mga Kasugtanan 138:12–24.Ano ang ginatudlo sang Doktrina kag mga Kasugtanan 138:12–24 parte sa mga tawo nga ginbisitahan sang Manluluwas sa kalibutan sang mga espiritu? Ano nga mga bugay ang ila nabaton? Ano ang aton matun-an sa ila ehemplo?

Doktrina kag mga Kasugtanan 138:38–55.Ining mga bersikulo nagalaragway sang mga nakita ni Pangulong Joseph F. Smith sa kalibutan sang mga espiritu kag sang malip-ot nga mga detalye parte sa ila. Basi pwede maghimo ang inyo pamilya sang listahan sang inyo mga katigulangan nga ara na sa kalibutan sang mga espiritu, upod ang mga detalye sa ila mga kabuhi.

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Aton Pagtuon

Pagbinagbinag sang balaan nga mga kasulatan. Si Pangulong David O. McKay nagtawag sang pagpamalandog nga “isa sa … pinakasagrado nga mga pwertahan nga kinahanglan naton agyan padulong sa presensya sang Ginuo” (Teachings of Presidents of the Church: David O. McKay [2003], 32).