Disyembre 13–19

Ang Panimalay: Isa ka Proklamasyon sa Kalibutan

“Ang Panimalay Labing Importante sa Plano sang Tagtuga”

Si Pangulong Dallin H. Oaks nagsiling: “Nagapati ako nga ang aton pamatasan kag paggamit sang proklamasyon sa pamilya [isa ka pagtilaw] sa sining henerasyon. Ginapangamuyo ko nga ang tanan nga Santos sa Ulihing mga Adlaw mangin mabakod sa sinang pagtilaw” (“The Plan and the Proclamation,” Ensign ukon Liahona, Nob. 2017, 31). Binagbinaga ining mga pulong samtang imo ginatun-an ang proklamasyon sa pamilya sining semana.

Isulat Ang Imo Mga Panghunahuna

Antes pa kita mabun-ag, parte kita sang isa ka pamilya—ang pamilya sang aton Ginikanan nga Langitnon. Sang oras na nga bayaan ang Ila presensya, siguro nakapaumpaw sa balatyagon nga sa kalibutan, ang mga pamilya parte man sang plano sang Dios. Ang sulundan sa duta gintuyo nga sundon ang perpekto nga sulundan sang langit.

Wala sang garantiya nga ang dutan-on nga mga pamilya mangin perpekto ukon wala sing problema. Pero sa gintudlo ni Pangulong Henry B. Eyring, ang mga pamilya “nagahatag sa mga anak sang Dios sang pinakamaayo nga oportunidad nga abiabihon sa kalibutan sa gugma nga daw amo-amo sa aton nabatyagan sa langit—gugma sang ginikanan” (“Gathering the Family of God,” Ensign ukon Liahona, Mayo 2017, 20). Bangud nakahibalo nga ang mga pamilya indi perpekto kag magaeksperiyensya sang mga pag-atake sang kaaway, ginpadala sang Dios ang Iya Hinigugma nga Anak para tubuson kita kag paayuhon ang aton mga pamilya. Kag nagpadala Sia sang mga propeta sa ulihing adlaw upod sang proklamasyon agud pangapinan kag pabakuron ang mga pamilya. Kon aton sundon ang mga propeta kag magtuo sa Manluluwas, bisan nga kulabos ang mga pamilya sa diosnon nga talaksan, may paglaum para sa mga pamilya—sa duta kag sa langit.

Mga Ideya para sa Personal nga Pagtuon sang Balaan nga mga Kasulatan

“Ang panimalay labing importante sa plano sang Tagtuga.”

“Ang Panimalay: Isa ka Proklamasyon sa Kalibutan” klaro nga parte sa mga pamilya. Pero parte man ini sa plano sang kaluwasan sang Dios. Isa ka paagi para tun-an ang proklamasyon amo ang pangitaon kon ano ang ginatudlo sini parte sa kabuhi-antes-sa-duta, kabuhi sa duta, kag kabuhi pagkatapos sang kamatayon. Ano ang imo matun-an kon tun-an mo ang proklamasyon sa sini nga paagi? Paano ka ginabuligan sini nga maintiendihan kon ngaa ang pag-asawahay kag pamilya importante sa plano sang Dios?

“Ang kalipayan sa kabuhi sang panimalay laban-laban nga malab-ot kon napasad sa mga pinanudlo sang Ginuong Jesucristo.”

Hunahunaa ang parapo anum kag pito sang ang proklamasyon sa pamilya bilang sulundan sang “kalipayan sa kabuhi sang panimalay.” Samtang ginabasa mo ining mga parapo, hibaloa ang mga prinsipyo sang “madinalag-on nga mga pag-asawahay kag mga panimalay.” Dayon hunahunaa ang relasyon sang pamilya nga gusto ninyo pabakuron. Ano ang nainspirar ka nga himuon? Paano mo ilakip ang Manluluwas sa imo mga pagpaninguha?

Ako “may salabton sa atubang sang Dios” sa akon pagtratar sa akon pamilya.

Ang proklamasyon sa pamilya nagalakip sang matahum nga mga bugay nga ginapromisa sang Amay nga Langitnon sa mga nagasunod sang Iya laygay. Nagalakip man ini sang mabaskog nga mga paandam sa mga wala nagasunod. Pamensara ang paglista sang mga bugay kag mga paandam nga imo makita.

Paano mo ginaaktohan ang laygay sang Dios sa proklamasyon? Kon magtindog ka sa atubang sang Dios subong, ano ang ihambal mo sa Iya sing may kompiyansa parte sa imo mga relasyon sa pamilya? Ano ang kinahanglan mo pauswagon?

Tan-awa man sa Alma 5:15–22; Doktrina kag mga Kasugtanan 42:22–25; 93:39–44.

Dapat padakuon sang mga ginikanan ang ila mga kabataan sa pagpalangga kag pagkamatarong.

Mabaton ko bala ang ginpangako nga mga bugay kon ang kahimtangan sang akon pamilya kabos sangsa perpekto?

Si Elder D. Todd Christofferson nagtudlo: “Ang pagdeklarar sang panguna nga mga kamatuoran parte sa pag-asawahay kag panimalay wala nagabale-wala ukon nagapakanubo sang mga sakripisyo kag kadalag-an sadtong mga indi pa huwaran ang kahimtangan sang ila kabuhi. … Ang tanan may mga dulot; ang tanan may mga talento; ang tanan makabulig sa katumanan sang diosnon nga plano sa tagsa ka henerasyon. Madamo sinang mga maayo, madamo sinang mga kinahanglanon—bisan kon kaisa ang tanan nga kinahanglanon para subong—sarang maangkon sa indi gawa huwaran nga mga kahimtangan. Nagapamatuod kita sing may kompiyansa nga ang Pagbayad-Sala ni Jesucristo nakapangaman na kag, sa katapusan, magapuno sang tanan nga kulang kag nadula sa ila nga nagapalapit sa Iya. Wala sang bisan sin-o nga gintalana nga magbaton sing kubos sangsa tanan nga gintigana sang Amay para sa Iya mga anak” (“Why Marriage, Why Family,” Ensign ukon Liahona, Mayo 2015, 52).

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

“Ang diosnon nga plano sang kalipayan.”Para buligan ang imo pamilya nga makita ang importansya sang mga pamilya sa plano sang Amay nga Langitnon, pwede mo isulat ang kabuhi antes mabun-ag, mortal nga kabuhi, kag kabuhi pagkatapos sang kamatayon sa tatlo ka bahin sang papel. Usisaa ang proklamasyon nga ululupod, kag isulat sa papel ang inyo natun-an parte sa tagsa sining parte sang plano sang Dios. Ngaa importante ang mga pamilya sa Dios?

“Kalipayan sa kabuhi sang panimalay.”Para hambalan kon paano malab-ot ang “kalipayan sa kabuhi sang [inyo] pamilya,” mahimo kamo magkanta sang isa ka kanta parte sa mga pamilya. Ano ang aton matun-an halin sa kanta kag halin sa proklamasyon sang pamilya nga magadala sang dugang nga kalipayan sa aton pamilya? Paano naton masiguro nga ang aton pamilya “napasad sa mga pinanudlo sang Ginuong Jesucristo”? Pamensara ang magpili sang isa ka pinanudlo nga gusto ninyo obrahon sini nga semana.

“[Pabakura ang] panimalay bilang tig-una nga yunit sang sosyedad.”Paano ginatinguhaan ni Satanas nga pahuyangon ang mga pamilya sa kalibutan? Paano naton himuon ang aton bahin para pabakuron ang mga pamilya?    

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Love at Home [Gugma sa Balay],” Mga Himno kag mga Ambahanon sang Kabataan, no. 44–45.

Pagpauswag sang Personal nga Pagtuon

Pangitaa ang gugma sang Dios. Si Pangulong M. Russell Ballard nagtudlo, “[Ang] ebanghelyo isa ka ebanghelyo sang gugma—gugma para sa Dios kag gugma para sa kada isa” (“God’s Love for His Children,” Ensign, Mayo 1988, 59). Samtang imo ginabasa ang proklamasyon sang pamilya, pamensara nga pat-inan kag markahan ang mga ebidensya sang gugma sang Dios nga makahulugan kaayo sa imo.