To All Worthy Male Members [Sa Tanan nga Nagakaangay nga Lalaki nga Miyembro], ni Emma Allebes

Disyembre 6–12

Ang Mga Artikulo sang Pagtuo kag Opisyal nga Pahayag 1 kag 2

“Nagapati Kami”

Samtang imo ginatun-an ang Mga Artikulo sang Pagtuo kag Opisyal nga Pahayag 1 kag 2, pamensara ang epekto sang mga ini sa Simbahan. Ano ang nanamian mo parte sa mga kamatuoran nga ginatudlo sang mga ini?

Isulat Ang Imo Mga Panghunahuna

Sa 200 ka tuig halin sang Unang Panan-awon ni Joseph Smith, padayon nga nagahatag ang Dios sang “rebelasyon dugang sa rebelasyon, ihibalo dugang sa ihibalo” sa mga lider sang Iya Simbahan (Doktrina kag mga Kasugtanan 42:61). Sa pila ka mga kaso, ang ina nga rebelasyon nagatudlo sa mga lider sang Simbahan sa paghimo sang mga pagbag-o sa mga polisiya kag mga ginahimo sa Simbahan, “suno sa pagbuot sang Ginuo nga nagapabagay sang iya mga kaluoy suno sa mga sitwasyon sang mga anak sang katawhan” (Doktrina kag mga Kasugtanan 46:15). Ang Opisyal nga Pahayag 1 kag 2 nagarepresentar sini nga rebelasyon—ang isa nagresulta sa pag-untat sang pagpangasawa sing madamo, kag ang isa nagbukas sang mga bugay sang priesthood, lakip na ang mga bugay sang templo, sa tanan nga tawo sa tanan nga rasa. Ang amo sini nga mga pagbag-o kabahin sang ginasiling nga “matuod kag buhi nga simbahan” (Doktrina kag mga Kasugtanan 1:30), nga may matuod kag buhi nga propeta.

Pero may mga butang man nga wala nagabag-o—ang pundasyon, wala katapusan nga mga kamatuoran. Kag kon kaisa ang katuyuan sang rebelasyon amo ang maghatag kasanagan sa sining mga kamatuoran, nga ginabuligan kita nga mas maintiendihan naton ini. Ang Mga Artikulo sang Pagtuo—13 ka malip-ot nga mga pahayag ni Joseph Smith parte sa mga ginapatihan sang mga Santos sa Ulihing mga Adlaw—daw nagakaigo sa sining katuyuan nga magklaro. Ang ining duha ka klase sang mga rebelasyon nagagiya kag nagabugay sa Simbahan, Simbahan nga mapag-on nga natukod sa wala katapusan nga kamatuoran pero may ikasarang sa pagtubo kag pagbag-o samtang ginadugangan sang Ginuo ang aton pag-intiendi agud buligan kita nga masarangan ang mga hangkat sa karon nga panahon. Buot silingon, “Nagapati kami sa tanan nga ginpahayag sang Dios, sa tanan nga Iya ginapahayag subong, kag nagapati kami nga magapahayag pa Sia sang madamo nga dalagko kag importante nga mga butang parte sa Ginharian sang Dios” (Mga Artikulo sang Pagtuo 1:9).

Mga Ideya para sa Personal nga Pagtuon sang Balaan nga mga Kasulatan

Ang Mga Artikulo sang Pagtuo

Ang Mga Artikulo sang Pagtuo nagaunod sang pundasyon nga kamatuoran sang ginpanumbalik nga ebanghelyo.

Isa ka paagi nga imo matun-an ang Mga Artikulo sang Pagtuo amo ang paglista sang mga kamatuoran nga makita sa kada isa kag dayon pangitaon ang balaan nga mga kasulatan mahiangot sa sining mga kamatuoran. Paano bala ginapasangkad sining balaan nga mga kasulatan ang imo pag-intiendi sang mga kamatuoran sa Mga Artikulo sang Pagtuo?

Mga Artikulo sang Pagtuo 1:9; Opisyal nga Pahayag 1 kag 2

Ang Simbahan ni Jesucristo ginagiyahan paagi sa rebelasyon.

“Nagapati kami nga ang [Dios] magapahayag pa sang madamo nga dalagko kag importante nga mga butang parte sa Ginharian sang Dios” (Mga Artikulo sang Pagtuo 1:9), bisan nga nagakahulugan ang mga ini nga bag-uhon ang mga polisiya kag mga ginahimo sang Simbahan. Nga ginapanumdom ining prinsipyo, rebyuha ang Opisyal nga Pahayag 1 kag 2, kag pangitaa ang mga tinaga kag mga dinalan nga nagapabakod sang imo pagtuo sa nagapadayon nga rebelasyon. Ano ang iban pa nga mga ehemplo sang nagapadayon nga rebelasyon sa propeta sang Ginuo ang imo madumduman? Paano nagaapekto ining mga rebelasyon sa imo kabuhi? Paano sini ginapaabante ang buluhaton sa ginharian sang Amay nga Langitnon?

Tan-awa man sa Amos 3:7; 2 Nefi 28:30.

Opisyal nga Pahayag 1

Ang buluhaton sang Dios kinahanglan nga mag-abante.

Sa “Mga Bahin sang Mensahe halin saTatlo ka Pamulong-pulong ni Pangulong Wilford Woodruff parte sa Manifesto” (sa katapusan sang Opisyal nga Pahayag 1), ano nga mga rason ang ginhatag sang propeta nga ginpauntat sang Ginuo ang pagpangasawa sing madamo? Ano ang ginatudlo sini sa imo parte sa buluhaton sang Ginuo?

Wilford Woodruff, ni H.E. Peterson

Opisyal nga Pahayag 2

Makasalig kita sa Ginuo, bisan indi perpekto ang aton pag-intiendi.

Ang balaan nga mga kasulatan nagatudlo sa aton nga magsalig sa Ginuo (tan-awa sa Mga Hulubaton 3:5), kag amo ina ang ginhimo sang madamo nga mga miyembro sang Simbahan nga Aprikano ang lahi sang gindumili sa ila sang Simbahan ang ordinasyon sa priesthood kag ang mga ordinansa sang templo. Bisan nga wala nila maintiendihan kon ngaa may amo sini nga polisiya—kag masami nagakasaklaw sa mga paathag nga gintudlo sadto nga panahon, nga ginasikway karon sang Simbahan—madamo nga debotado nga mga miyembro nga Aprikano ang lahi ang nagsalig sa Ginuo kag padayon nga nangin matinuohon sa bilog nila nga kabuhi. Samtang imo ginabasa ang Opisyal nga Pahayag 2, binagbinaga kon paano mo natun-an nga magsalig sa Ginuo bisan nga indi perpekto ang imo pag-intiendi.

Ang magtuon parte sa pagtuo sang itom nga mga miyembro sang Simbahan mahimo nga makainspirar sa imo.  

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Ang Mga Artikulo sang Pagtuo.Pamensara kon paano maghimo ang inyo pamilya sang “gagmay-nga-leksyon” parte sa Mga Artikulo sang Pagtuo. Halimbawa, sa bilog nga semana, ang tagsa ka miyembro sang pamilya pwede nga mapili sang artikulo kag mangita sang naangot nga kasulatan, litrato, himno, ukon pangbata nga kanta ukon mag-istorya sang personal nga eksperiyensya.

Ukon pwede magbulos-bulos ang mga miyembro sang pamilya sa pagpamangkot sa kada isa parte sa Simbahan kag sa aton mga ginapatihan kag dayon sabton inang mga pamangkot sang isa ka artikulo sang pagtuo.

Opisyal nga Pahayag 1 and 2.Ang Opisyal nga Pahayag 1 kag 2 nagabulig sa aton nga maintiendihan ang papel sang moderno nga rebelasyon sa Simbahan. Samtang ginabasa ini sang inyo pamilya nga ululupod, pamensara nga hambalan kon paano kita ginagiyahan sang propeta “paagi sa inspirasyon sang Dios nga Makagagahum” (Opisyal nga Pahayag 1). Paano ginapabakod sining duha ka deklarasyon ang aton pagtuo sa buhi nga Dios nga personal nga nagagiya sang Iya Simbahan? Sa ano naton makita ang Iya impluwensya sa buluhaton sang Simbahan karon? Pwede kamo magdesisyon nga pangitaon sing ululupod ang pila ka mga bulig sa “Mga Ideya para sa Personal nga Pagtuon sang Balaan nga mga Kasulatan” sa ibabaw.

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Do What Is Right [Himoa ang Husto],” Mga Himno kag mga Ambahanon sang Kabataan, 34–35.

Pagpauswag sang Aton Pagpanudlo

Magpamangkot parte sa mga imbitasyon sa pag-akto. “Kon magpamangkot ka parte sa isa ka imbitasyon sa pag-akto, ginapakita mo [sa mga miyembro sang imo pamilya] nga nagaulikid ka sa ila kag kon paano ang ebanghelyo nagabugay sa ila mga kabuhi. Ginahatagan mo man sila sing oportunidad nga iistorya ang ila mga eksperiyensya” (Teaching in the Savior’s Way, 35).