Nativity in Copper and Umber [Ang Pagkabun-ag sa Saway kag Umber, ni J. Kirk Richards

Disyembre 20–26

Paskwa

Ang Indi Matupungan nga Dulot sang Balaan nga Anak sang Dios

Isa ka paagi agud magtutok ang inyo mga panghunahuna sa Manluluwas sining Paskwa amo ang tun-an ang “Ang Buhi nga Cristo: Ang Panaksihon sang mga Apostoles.” Ining outline nagapanugyan sang mga paagi agud mahimo mo ining testimonya sang propeta nga bahin sang imo personal kag pang-pamilya nga pagtuon sang ebanghelyo.

Isulat Ang Imo Mga Panghunahuna

Sang 1838, ang Propeta nga si Joseph Smith nagsiling, “Ang pundasyon nga mga prinsipyo sang aton relihiyon amo ang testimonya sang mga Apostoles kag mga Propeta, nahanungod kay Jesucristo, nga Sia napatay, ginlubong, kag nabanhaw sang ikatatlo nga adlaw, kag nagkayab pa-langit; kag ang tanan nga may kaangtanan sa aton relihiyon mga sanga lamang sini” (Teachings of Presidents of the Church: Joseph Smith, 49). Tinuig pagkatapos sadto, si Pangulong Russell M. Nelson nagsiling nga “ang ini mismo nga pahayag sang Propeta ang naghatag sang rason sa 15 ka mga propeta, manugpanan-aw, kag mga manugpahayag sang rebelasyon nga magpagwa kag magpirma sang ila testimonya para saulugon ang ika-2,000 nga tuig nga anibersaryo sang pagkatawo sang Ginuo. Inang makasaysayan nga testimonya gintig-ulohan nga ‘Ang Buhi nga Cristo.’ Madamo sa mga miyembro ang nagsaulo sang mga kamatuoran sini. Ang iban haluson nakahibalo nga may ari sini. Sa inyo handum nga mas magtuon pa gid parte kay Jesucristo, ginapaisog ko kamo nga tun-an ang ‘Ang Buhi nga Cristo’” (“Drawing the Power of Jesus Christ into Our Lives,” Ensign ukon Liahona, Mayo 2017, 40).

Bilang mga Santos sa Ulihing mga Adlaw, nagakalipay kita sa bugay sang nagapadayon nga rebelasyon paagi sa moderno nga mga propeta kag mga apostoles. Nagapasalamat kita sa ila inspirado nga mga pulong sang paglaygay, pagpaandam, kag pagpaisog. Pero labaw sa tanan, ginbugayan kita sang ila mabaskog nga mga testimonya kay Jesucristo—sa tion sang Paskwa kag sa bilog nga tuig. Masobra ini sangsa makatalandog lamang nga mga tinaga sang sagad nga mga manunulat ukon manughambal sa publiko ukon mga panghunahuna sang mga eksperto sa balaan nga mga kasulatan. Mga pulong ini sang pinili, gintawag, kag awtorisado sang Dios nga “espesyal nga mga saksi sang ngalan ni Cristo sa bilog nga kalibutan” (Doktrina kag mga Kasugtanan 107:23).

Mga Ideya para sa Personal nga Pagtuon sang Balaan nga mga Kasulatan

“Wala na sing iban pa nga may subong nga indi-matungkad nga impluwensya.”

Ano nga mga panghunahuna ang nagaabot sa imo samtang imo ginabasa ang Lucas 2:10–11 upod ang una nga parapo sang “Ang Buhi nga Cristo”? Ano ang imo mahambal bilang suporta sa pahayag nga “Wala na sing iban pa nga may subong nga indi-matungkad nga impluwensya [pareho kay Jesucristo] sa tanan nga nagkabuhi kag magakabuhi pa sa ibabaw sang duta”? Pangitaa ang mga kamatuoran sa “Ang Buhi nga Cristo” nga nagalaragway sang dako nga impluwensya sang Manluluwas. Paano Sia nag-impluwensya sa imo kag nagdala sa imo sang “dakong kalipay”? (Lucas 2:10).

“Nabanhaw Sia gikan sa lulubngan.”

Sa “Ang Buhi nga Cristo,” nagsaksi ang mga Apostoles parte sa Pagkabanhaw sang Manluluwas, nga nagasambit sang tatlo ka pagpakita sang nabanhaw nga Ginuo (tan-awa sa parapo lima). Pamensara nga basahon ang parte sa sining mga pagbisita sa Juan 20–21; 3 Nefi 11–26; kag Joseph Smith—Kasaysayan 1:14–20. Ano ang imo matun-an parte sa Manluluwas sa Iya mga pulong kag mga aksyon sa sining mga pagpakita?

“Ang Iya pagkapari kag ang Iya Simbahan napanumbalik na.”

Sang tion sang imo pagtuon sang Doktrina kag mga Kasugtanan sini nga tuig, may oportunidad ka nga matun-an pa gid kon paano ang “pagkapari [sang Manluluwas] kag ang Iya Simbahan [ginpanumbalik].” Diin sa ginpanumbalik nga mga kamatuoran kag mga prinsipyo ang labi nga makahulugan para sa imo? Pamensara nga rebyuhon ang pila sa masunod nga balaan nga mga kasulatan nga nagatudlo parte sa Pagpanumbalik: Doktrina kag mga Kasugtanan 1:17–23; 13; 20:1–12; 65; 110; 112:30–32; 124:39–42; 128:19–21. Binagbinaga kon paano ang mga kamatuoran sang ginpanumbalik nga ebanghelyo nagabulig sa imo nga makilala kag simbahon si Jesucristo (tan-awa sa Doktrina kag mga Kasugtanan 93:19).

“Sa pila ka adlaw magabalik Sia sa duta.”

Ang Paskwa tion sa pareho pagpanumdom sang adlaw nga natawo si Jesucristo kag sa pagpaabot sang adlaw nga magabalik Sia liwat. Ano ang imo matun-an parte sa Iya pagbalik sa ika-duha halin sa katapusan nga parapo sang “Ang Buhi nga Cristo”? Mahimo nga masadya man ang pagbasa, pagkanta, ukon pagpamati sang mga himno nga nagatudlo parte sa Ikaduhang Pagkari, pareho sang “Now Let Us Rejoice [Magkalipay Ta]” Mga Himno kag mga Ambahanon sang Kabataan, no. 32–33).

“Sia ang kasanag, ang kabuhi, kag ang paglaum sang kalibutan.”

Sa katapusan nga parapo sang “Ang Buhi nga Cristo,” tandai ang mga kinaiya kag mga titulo nga ginhatag sa Manluluwas. Ang masunod nga balaan nga mga kasulatan makabulig sa imo nga binagbinagon kon paano si Jesucristo nangin “ang kasanag, ang kabuhi, kag ang paglaum sang kalibutan”: Lucas 2:25–32; 1 Mga Taga-Corinto 15:19–23; Moroni 7:41; Doktrina kag mga Kasugtanan 50:24; 84:44–46; 93:7–10. Paano Sia nangin imo nga kasanag, kabuhi, kag paglaum? Ano ang iban pa nga mga kinaiya kag mga titulo sang Manluluwas nga makahulugan gid para sa imo?

Paano ang imo pagtuon sang “Ang Buhi nga Cristo” nakaapekto sang imo pagtuo kag pagpalangga sa Manluluwas?

Light of the World [Kasanag sang Kalibutan], ni Howard Lyon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

“Ang Buhi nga Cristo.”Para buligan ang imo pamilya nga maintiendihan ang mga kamatuoran nga nagatudlo parte sa Manluluwas sa “Ang Buhi nga Cristo,” pwede kamo magpili sang pila ka mayor nga mga dinalan kag magbuligay sa pagpangita ukon pagdrowing sang mga larawan nga nagapakita sinang mga dinalan. Pwede ninyo dayon himuon inang mga larawan kag mga dinalan sa isa ka libro.

“Ginadulot namon ang amon panaksihon.”Ano ang aton matun-an sa “Ang Buhi nga Cristo” parte sa kon ano ang kahulugan sang magpaambit sang testimonya? Basi gusto mo nga isulat ang imo mga testimonya parte kay Cristo para saulugon ang pagkabun-ag sang Manluluwas.

“Naglibot Sia nga nagahimo sing kaayohan.”Paano ayhan sundon sang inyo pamilya ang ehemplo sang Manluluwas sa pagserbisyo sini nga Paskwa? Paano ninyo ipalapnag ang “paghidaet kag maayong kabubut-on” sa inyo pamilya kag komunidad? Paano kamo magbulig dala sang “pagpang-ayo [sa] mga masakiton”?  

“Pasalamatan naton ang Dios tungod sa indi matupongan nga dulot sang Iya [balaan] nga Anak.”Ano nga mga regalo ang aton nabaton bangud kay Jesucristo? Basi pwede magpangita ang mga miyembro sang pamilya sang mga sabat sa “Ang Buhi nga Cristo” dayon putson ang mga bagay nga nagatiglawas sinang mga regalo halin sa Manluluwas. Pwede nga buksan sang inyo pamilya ang mga regalo sa adlaw sang Paskwa ukon sa bilog nga semana kag basahon ang balaan nga mga kasulatan nga may kaangtanan sa kada isa. Ari ang pila ka posible nga balaan nga mga kasulatan, bisan nga madamo sang iban pa nga pwede makita ang inyo pamilya: Lucas 2:10–14; 1 Pedro 2:21; Mosias 3:8; Alma 11:42–43; Doktrina kag mga Kasugtanan 18:10–12. Pwede man kamo magkanta sang kalantahon parte sa Manluluwas, pareho sang “Redeemer of Israel [Manunubos sang Israel” (Mga Himno kag mga Ambahanon sang Kabataan, 5), para mangita sang iban pa nga mga regalo nga nagahalin sa Iya.

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Far, Far Away on Judea’s Plains [Sa Malayong Patag sang Judea],” Mga Himno kag mga Ambahanon sang Kabataan, no. 52.

Pagpauswag sang Personal nga Pagtuon

Magtutok sa Manluluwas. “Ang pagtuon sang ‘Ang Buhi nga Cristo’ sing mainampuon daw pareho sang pagbasa sang mga testimonya nanday Mateo, Marcos, Lucas, Juan, kag sang mga propeta sa Libro ni Mormon. Patubuon sini ang imo pagtuo sa Manluluwas kag buligan ka nga magpadayon nga nagatutok sa Iya” (M. Russell Ballard, “Return and Receive,” Ensign ukon Liahona, Mayo 2017, 65).