Si Joseph Smith nga nagatudlo sa Nauvoo

Joseph Smith in Nauvoo, 1840 [Si Joseph Smith sa Nauvoo, 1840], ni Theodore Gorka

Nobyembre 8–14

Doktrina kag mga Kasugtanan 129–132

“Kon Makabaton Kita sing Bisan Ano nga Bugay halin sa Dios, Ini Bangod sa Pagtuman”

Ang mga seksyon 129–32 nagatudlo sang madamo nga malahalon nga mga prinsipyo, pila lang ang gintutokan sa sining outline. Ano ang iban pa nga mga kamatuoran ang imo makita?

Isulat Ang Imo Mga Panghunahuna

Si Brigham Young naghambal sadto parte kay Joseph Smith, “Sarang niya ipaathag ang langitnon nga mga butang sa paghangop sang mga mortal” (sa Teachings of Presidents of the Church: Joseph Smith, 499–500). Daw labi gid nga matuod ini sa mga pinanudlo sang Propeta sa Nauvoo sang tinuig sang 1840, ang pila sini nasulat sa Doktrina kag mga Kasugtanan 129–32. Daw ano ang Manluluwas? “Isa sia ka tawo pareho sa aton.” Daw ano ang langit? “Inang amo man nga pag-inupdanay nga nagaluntad sa aton diri magaluntad sa aton didto” (Doktrina kag mga Kasugtanan 130:1–2), kag ang aton pinalangga nga pang-pamilya nga mga kaangtanan sa sining kalibutan, kon maselyohan sang husto nga awtoridad, “mangin lubos ang gahum” sa pihak nga kabuhi (Doktrina kag mga Kasugtanan 132:19). Ang mga kamatuoran nga pareho sini nagahimo sang langit nga daw indi gawa malayo—mahimayaon, pero malab-ot.

Ugaling, kon kaisa mahimo nga pangabayon kita sang Dios sa paghimo sang mga butang nga indi komportable tungod daw indi ini malab-ot. Para sa nauna nga mga Santos, ang pagpangasawa sing madamo isa sa amo nga mga kasuguan. Ang kasuguan nga magpangasawa sing dugang nga mga asawa isa ka grabe nga pagtilaw sang pagtuo para kay Joseph Smith, sa iya asawa nga si Emma, kag sa halos tanan nga nagbaton sini. Para malampuwasan ining pagtilaw, kinahanglan nila sang masobra pa sangsa paborable nga mga balatyagon para sa ginpanumbalik nga ebanghelyo; kinahanglan nila sing pagtuo sa Dios nga mas madalom pa sangsa bisan ano nga personal nga mga handum ukon ginapasulabi. Wala na ining kasuguan sa karon, pero ang matinuohon nga ehemplo sang mga nagpangabuhi sini ara sa gihapon. Kag ang ehemplo nga ina nagainspirar sa aton kon ginapangabay kita sa paghimo sang aton kaugalingon nga “mga sakripisyo sa pagtuman” (Doktrina kag mga Kasugtanan 132:50).

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Doktrina kag mga Kasugtanan 130–31

Ginpahayag ni Joseph Smith ang mga kamatuoran parte sa Pangulohan sang Dios kag sa “kalibutan nga magaabot.”

Mahimo nga natalupangdan mo nga ang mga seksyon 130–31 lain gawa basahon sangsa iban nga mga seksyon sa Doktrina kag mga Kasugtanan. Ini tungod ang mga seksyon 130–31 nabase sa mga sinulatan ni William Clayton, isa sa mga sekretaryo ni Joseph Smith, nga iya gintipigan parte sa iya mga nabatian nga gintudlo sang Propeta. Bilang resulta, ining mga seksyon mas makabig nga koleksyon sang mga kamatuoran imbes nga nagaalangot, gindikta nga mga rebelasyon. Wala sapayan sini, may pila ka komon nga mga tema sa madamo sining mga kamatuoran. Halimbawa, mahimo mo basahon ang mga seksyon 130–131 upod ining mga pamangkot sa imo kaisipan: Ano ang akon matun-an parte sa Dios? Ano ang matun-an ko parte sa kabuhi pagkatapos sang mortalidad? Sa ano nagaapekto ining ihibalo sa akon kabuhi?

Doktrina kag mga Kasugtanan 131:1–4; 132:7, 13–25

Ginpatigayon sang Amay nga Langitnon nga mangin posible para sa mga pamilya nga mangin wala katapusan.

Isa sa pinakamakaulumpaw nga mga kamatuoran nga ginpanumbalik paagi sa Propeta nga si Joseph Smith amo nga ang pag-asawahay kag mga relasyon sa pamilya sarang nga mangin sa katubtuban. Paagi kay Joseph Smith, ginpanumbalik sang Ginuo ang mga ordinansa kag awtoridad nga kinahanglanon agud mangin wala katapusan ining mga kaangtanan (tan-awa sa Doktrina kag mga Kasugtanan 132:7, 18–19). Hunahunaa ang mga relasyon mo sa pamilya subong ukon ang ginalauman mo nga maangkon sa palaabuton samtang imo ginabasa ang Doktrina kag mga Kasugtanan 131:1–4; 132:7, 13–25. Paano makaapekto ining mga bersikulo sa imo panghunahuna parte sining mga kaangtanan?

Ugaling kon kaisa, ang prinsipyo sang wala katapusan nga mga pamilya indi gid gawa makapaumpaw—mahimo nga magadala ini sang kabalaka, bisan pa gani kasubo, kon ang aton sitwasyon sa pamilya sa karon indi bagay sa selestiyal nga talaksan. Sang nagakabalaka si Pangulong Henry B. Eyring parte sa amo nga sitwasyon sa iya kaugalingon nga pamilya, nabaton niya ining maalam nga laygay halin sa isa ka miyembro sang Korum sang Dose ka Apostoles: “Magpangabuhi lang kamo nga nagakaangay sa selestiyal nga ginharian, kag ang mga kahimtangan sa pamilya mangin mas manami sangsa imo ginahunahuna” (sa “A Home Where the Spirit of the Lord Dwells [Isa ka Puluy-an Sa Diin ang Espiritu sang Ginuo Nagapuyo],” Ensign ukon Liahona, Mayo 2019, 25). Paano ka ayhan mabugayan sa pagsunod sining laygay sa sitwasyon sang inyo pamilya sa karon?

lalaki kag babayi sa gwa sang Templo sang Accra Ghana

Ang mga kaangtanan sa pamilya sarang nga mangin wala katapusan paagi sa mga ordinansa sa templo.

Doktrina kag mga Kasugtanan 132:1–2, 29–40

Ang pagpangasawa sang madamo ginabaton lamang sang Dios kon Sia ang nagsugo sini.

Ang bisan sin-o nga nakabasa sang Daan nga Katipan siguro natingala nga si Abraham, Jacob, Moises, kag ang iban pa madamo sing asawa. Ini balang maayo nga mga tawo nakahimo sang pagpanglahi? Ukon gintugtan bala sang Dios ang ila mga aksyon? Pangitaa ang mga sabat sa Doktrina kag mga Kasugtanan 132:1–2, 29–40.

Ang pag-asawahay sang isa ka lalaki kag isa ka babayi amo ang pagsulundan sang Dios sa pagpakasal (tan-awa sa tig-ulo sang seksyon sang Opisyal nga Pahayag 1; tan-awa man sa Jacob 2:27, 30). Ugaling, may mga tion sa kasaysayan nga ginsugo sang Dios ang Iya mga anak nga himuon ang pagpangasawa sing madamo.

Ang una nga tinuig sang ginpanumbalik nga Simbahan isa sining pinasahi nga mga panahon. Pagkatapos nga mabaton ining kasuguan, si Joseph Smith kag ang iban pa nga mga Santos sa Ulihing mga Adlaw nagpangasawa sing madamo. Kon gusto mo nga magtuon sing dugang parte sa pagpangasawa sing madamo sang mga Santos sa Ulihing mga Adlaw, tan-awa sa “Mga Tingug sang Pagpanumbalik” sa katapusan sining outline.

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 130:2, 18–19; 132:13, 19.Paano mo ayhan gamiton ining mga bersikulo para buligan ang inyo pamilya nga unahon ang mga butang nga nagadugay sa wala katapusan? Basi pwede kamo mag-empake ukon magsulod sa backpack sang mga bagay nga nagarepresentar sang mga butang nga, suno sa Doktrina kag mga Kasugtanan 130:2, 18–19; 132:19, madala naton sa dason nga kinabuhi, pareho sang mga litrato sang pamilya ukon balaan nga mga kasulatan. Ano ang ginatudlo sa aton sang Doktrina kag mga Kasugtanan 132:13 parte sa mga butang sang kalibutan? Mahimo nga magsugod ini sa paghinambalanay parte sa pagtutok sa mga butang nga may importansya sa katubtuban.

Doktrina kag mga Kasugtanan 130:20–21.Pwede kamo magkanta sang kalantahon parte sa pagpasalamat, pareho sang “Count Your Blessings [Kon Sa Balod sang Kabuhi]” (Mga Himno kag mga Ambahanon sang Kabataan, no. 8–9), kag maghimo sang listahan sang mga bugay nga nabaton sang inyo pamilya bangud sang pagtuman sang mga kasuguan sang Dios. Ano nga mga bugay ang ginalauman naton nga mabaton? Paano naton mabaton inang mga bugay?

Doktrina kag mga Kasugtanan 131:1–4; 132:15–19.  Ano ang balatyagon sang Ginuo parte sa pag-asawahay? Paano naton—bisan kasado na ukon solo-lawas—handaan nga makaangkon sang wala katapusan nga pag-asawahay?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Love at Home [Gugma sa Balay],” Mga Himno kag mga Ambahanon sang Kabataan, 44.

Pagpauswag sang Personal nga Pagtuon

Pangitaa ang mga kamatuoran sang ebanghelyo. Kon kaisa ang mga kamatuoran sang ebanghelyo ginahambal sing direkta; kon kaisa ginapahangop paagi sa halimbawa ukon istorya. Samtang nagabasa ka, pamangkuta ang imo kaugalingon, “Ano nga wala katapusan nga kamatuoran ang gintudlo sa sining mga bersikulo?”

kuwarto sang pagselyo sa Templo sang Paris France

Isa ka kuwarto sang pagselyo sa Templo sang Paris France.