mangunguma upod ang mga baka

First Furrow [Una nga Idas], ni James Taylor Harwood

Mayo 17–23

Doktrina kag mga Kasugtanan 51–57

“Ang Tampad, Matarong, kag Mainandamon nga Tulugyanan”

Ang pagtuon sang balaan nga mga kasulatan nagabulig sa imo nga makilala ang tingug sang Ginuo, kay ang balaan nga mga kasulatan ginhatag Niya paagi sa Iya Espiritu (tan-awa sa Doktrina kag mga Kasugtanan 18:34–36).

Isulat Ang Imo Mga Panghunahuna

Para sa mga miyembro sang Simbahan sang tinuig sang 1830, ang pagtipon sang mga Santos kag ang pagtukod sang siyudad nga Sion espirituhanon kag temporal nga mga buluhaton, nga may madamo nga praktikal nga mga butang nga kinahanglan atendiron: May kinahanglan magbakal kag magpanagtag sang duta kon diin mag-istar ang mga Santos. May kinahanglan nga mag-imprinta sang mga libro kag sang iban pa nga mga balasahon. Kag may kinahanglan nga magbukas sang tindahan para magbaligya sang mga kinahanglanon sang mga ara sa Sion. Sa mga rebelasyon nga nasulat sa Doktrina kag mga Kasugtanan 51–57, ginpili kag gintulinan sang Ginuo ang mga tawo nga magkapot sining mga buluhaton, kag Iya ginpili ang Independence, Missouri, nga “sentro nga lugar” sang Sion (Doktrina kag mga Kasugtanan 57:3).

Pero bisan nga ang ikasarang sa paghimo sang mga butang pareho sang pagbakal sang duta, pag-imprinta, kag pagdumala sang tindahan importante sa temporal nga buluhaton sa pagtukod sang Sion, ining mga rebelasyon nagatudlo man nga gusto sang Ginuo nga ang Iya mga Santos mangin espirituhanon nga nagakabagay agud tawgon nga katawhan sang Sion. Ginatawag niya ang kada isa sa aton nga mangin “tampad, matarong, kag mainandamon nga tulugyanan,” may mahinulsulon nga espiritu, “matutum” sa mga palangakuan nga ginhatag sa aton (tan-awa sa Doktrina kag mga Kasugtanan 51:19; 52:15; 54:2). Kon mahimo naton ina—wala sapayan sang aton temporal nga mga ikasarang—magamit kita sang Ginuo sa pagtukod sang Sion, kag Iya “padalion ang pagtukod sang siyudad sa iya sini tion” (Doktrina kag mga Kasugtanan 52:43).

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Doktrina kag mga Kasugtanan 51

Gusto sang Ginuo nga mangin tampad, matarong, kag mainandamon ako nga tulugyanan.

Kon miyembro ka sang Simbahan sang 1831, mahimo nga gin-imbitar ka nga ipangabuhi ang layi sang pagkonsagrar paagi sa pagpirma agud itugyan ang imo propiyedad sa Simbahan paagi sa bishop. Dayon iya ibalik sa imo, sa kalabanan sang mga kaso, ang imo gindonar, kon kaisa nga may sobra pa. Pero wala mo lamang ini ginapanag-iyahan—ikaw ang tinugyanan.

Sa karon lain na ang mga proseso, pero ang mga prinsipyo sang pagkonsagrar kag pagkatulugyanan importante sa gihapon sa buluhaton sang Ginuo. Pamensara ining mga pulong ni Elder Quentin L. Cook: “Nagakabuhi kita sa peligroso nga mga panahon kon sa diin madamo ang nagapati nga wala kita sing salabton sa Dios kag wala kita sang personal nga responsibilidad ukon pagkatulugyanan sa aton kaugalingon ukon sa iban. Madamo sa kalibutan ang nagatutok sa pagpalipay-sang-kaugalingon … [kag] wala nagapati nga sila tig-amlig sang ila kauturan. Sa Simbahan, ugaling, nagapati kita nga ang ining pagkatulugyanan sagrado nga pagsalig” (“Stewardship—a Sacred Trust,” Ensign ukon Liahona, Nob. 2009, 91).

Samtang imo ginabasa ang seksyon 51, hunahunaa kon ano ang ginsalig sang Dios sa imo. Ano ang kahulugan sang mga tinaga nga “tulugyanan” (bersikulo 19) kag “ginkonsagrar” (bersikulo 5), kag ano ang buot silingon sini parte sa mga ginapaabot sang Dios sa imo? Ano nga mga prinsipyo ang imo makita sa seksyon 51 kag sa mga pulong ni Elder Cook nga nagatudlo sa imo kon ano ang buot silingon sang mangin tulugyanan? (tan-awa ilabi na gid sa mga bersikulo 9, 15–20).

Doktrina kag mga Kasugtanan 52:14–19

Naghatag ang Dios sang sulundan para makalikaw nga maintuan.

Tungod sa kadamo sang mga tawo nga nagaangkon sang espirituhanon nga mga pagpahayag, nabalaka ang nauna nga mga Santos nga maintuan. Paano nila mahibal-an kon sin-o ang “ginabaton sang [Dios]”? (bersikulo 15). Sa Doktrina kag mga Kasugtanan 52:14–19, naghatag ang Ginuo sang makabulig nga sulundan. Paano mo gamiton ining sulundan para mahibal-an ang indi husto nga mga mensahe sa kalibutan? Pwede mo man gamiton ining sulundan para takson ang imo kaugalingon: pamensara nga gamiton ang mga dinalan sa sining mga bersikulo sa pagsulat sang mga pamangkot pareho sang “Kon maghambal ako, mahinulsulon bala ang akon espiritu?”

Doktrina kag mga Kasugtanan 54

Makadangop ako sa Ginuo kon nasakit ako sang mga pagpili sang iban.

Bilang bahin sang pagtipon sa Ohio, isa ka grupo sang mga Santos nga ginpangunahan ni Newel Knight ang nag-abot halin sa Colesville, New York, kag nagakinahanglan sang lugar nga maistaran. Si Leman Copley may malapad nga uma malapit sa Kirtland, kag nakigsugot sia nga pasugtan ang mga Santos nga mag-istar sa iya duta. Ugaling, wala madugay sang nagsugod sila nga magplastar didto, nagluya ang pagtuo ni Copley, nagtalikod sa iya kasugtanan, kag ginpangtabog ang mga Santos sa iya propiyedad.

Sa nasulat sa seksyon 54, ginhambal sang Ginuo kay Newel Knight kon ano ang himuon sang mga Santos nahanungod sa ila sitwasyon. Ano ang imo makita sa sining rebelasyon nga makabulig sa imo kon maapektuhan ka sang pagtalikod sang isa ka tawo sa iya mga pangako ukon indi maalam nga mga pagpili?

berde nga uma

Ang lugar sang uma sa Ohio nga ginpromisa ni Leman Copley sa Simbahan.

Doktrina kag mga Kasugtanan 56:14–20

Bulahan ang mga putli sing tagipusuon.

Sa sining mga bersikulo, naghambal ang Ginuo sa pareho manggaranon kag imol; mangin manami nga ikumparar ang Iya laygay sa sining duha ka mga grupo. Ano sa sining mga bersikulo ang daw magamit gid sa imo sa personal? Paano “nagapalain” sa imo kalag ang pagtutok sa manggad? (bersikulo 16). Ano ang kahulugan sa imo sang mangin “putli sing tagipusuon” (bersikulo 18) parte sa materyal nga mga butang?

Tan-awa man sa Jacob 2:17–21.

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Doktrina kag mga Kasugtanan 51:9.Pwede kamo maghampang sang nasadyahan gid sang pamilya kag dayon hambalan kon ano ang mangin kinalain sa hampang kon may mangdaya. Ngaa important nga mangin “masaligan sa mga buhat” sa isa kag isa? Paano kita ginabuligan sang pagkamasaligan nga “mangin isa”?

Doktrina kag mga Kasugtanan 52:14–19.Samtang inyo ginahambalan ang sulundan nga ginlaragway sa sining mga bersikulo, basi masadyahan ang imo pamilya sa pagtan-aw sang iban pa nga mga sulundan nga inyo ginagamit—pareho sang mga sulundan sa pagtahi sang bayo ukon paghimo sang dekorasyon. Pwede kamo magbuligay sa paghimo sang isa ka butang gamit ang sulundan samtang ginahambalan ang sulundan nga ginhatag sang Ginuo para malikawan nga maintuan.

Doktrina kag mga Kasugtanan 53:1.Pamensara ang pag-istorya sa imo pamilya sang eksperiyensya sang ikaw, pareho kay Sidney Gilbert, namangkot sa Ginuo “parte sa imo pagkatawag.”

Doktrina kag mga Kasugtanan 54:2; 57:6–7.Ano ang buot silingon sang “mangin matutum” (Doktrina kag mga Kasugtanan 54:2) sa kon ano nga ginapahimo sang Dios sa aton? Mahimo mo imbitaron ang mga miyembro sang pamilya nga magtindog kag maglawag sang isa ka butang nga ginapahimo sang Dios sa ila.

Doktrina kag mga Kasugtanan 55.Paano gingamit sang Ginuo ang mga abilidad ni William Phelps bilang manunulat kag manug-imprinta? (halimbawa, tan-awa ang index sang manunulat sa libro sang mga himno para sa lista sang mga himno nga iya ginsulat). Basi pwede nga istoryahan sang mga miyembro sang pamilya ang mga talento kag mga abilidad nga ila nakita sa kada isa. Paano makabulig ang aton mga talento sa buluhaton sang Dios?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Dare to Do Right [Magmaisog],” Mga Himno kag mga Ambahanon sang Kabataan, 64.

Pagpauswag sang Personal nga Pagtuon

Magmentinar sang sululatan sang mga tinun-an. Mahimo nga makabulig ang paggamit sang journal ukon notbuk para sulatan sang mga panghunahuna, mga ideya, mga pamangkot, ukon mga pagpabatyag nga nagaabot samtang nagatuon ka.

mga miyembro nga nagahatag sang mga pagkabutang kay Edward Partridge

Bishop Partridge Receives Consecration [Si Bishop Partridge Nagabaton sang Ginakonsagrar], ni Albin Veselka