“Eprōļ 5–Eprōļ 11. Katak im Bujen Ko 30–36: ‘Em̧ōj Kūr Eok n̄an Kwaļo̧k Naan kōn Gospel eo,’” Itok, Ļoor Eō—N̄an Kajjojo Armej im Baam̧le ko: 2021 (2020)
“Eprōļ 5–Eprōļ 11. Katak im Bujen Ko 30–36,” Itok, Ļoor Eō—N̄an Kajjojo Armej im Baam̧le ko: 2021
Eprōļ 5–Eprōļ 11.
Katak im Bujen Ko 30–36
“Em̧ōj Kūr Eok n̄an Kwaļo̧k Naan kōn Gospel eo”
Ilo jeje ko rekwojarjar, jemaron̄ lo kōļmenļo̧kjeņ ko n̄an jekjek ko ad rein juon. Kajjitōk ippān Irooj n̄an jipan̄ eok lo juon ennaan eļap meļeļe in n̄an kwe ilo Katak im Bujen ko 30–36.
Je En̄jake ko Rej Im̧we Eok
Parley P. Pratt ekar juon uwaan Kabun̄ in ium̧win juon allōn̄ ke ekar kūr “ļo̧k ilo āne jem̧aden” n̄an kwaļo̧k gospel eo (Katak im Bujen ko 32:2). Thomas B. Marsh ekar juon membōr ium̧win em̧ool jidik iien ke kar jiron̄ e, “Awa eo an mijen eo am emoottok” (Katak im Bujen ko 31:3). Orson Pratt, Edward Partridge, im ebar lōn̄ ro jet āinwōt rej kab tōn kar peptaij ke mijen kūr ko aer raar itok. Bōlen iien in eaar aolep menin aikuj—ilo fall in 1830 eo, ejjeļo̧k juon ekar juon uwaan Kabun̄ in elōn̄ļo̧k jān jiljino allōn̄ ko. Bōtaab ebarāinwōt wōr juon katak ilo jon̄ak in n̄an kōj rainin: eļan̄n̄e kwojeļā jidik n̄an bōk gospel eo kar kōjepļaaktok kōn peptaij, ebwe am̧ jeļā n̄an kwaļo̧ke ippān ro jet. Aaet jej iien otemjej kōņaan kōļapļo̧k jeļāļo̧kjeņ eo ad kōn gospel eo, bōtaab Anij ejjan̄in kar itweļo̧k n̄an kūr ioon “ro rej jab rijeļāļo̧kjeņ” n̄an kwaļo̧k gospel eo (Katak im Bujen ko 35:13). Ilo m̧ool, Ej kūr kōjwōj aolep, “Kōļļo̧ke lo̧n̄ūm n̄an kwaļo̧k gospel eo Aō” (Katak im Bujen ko 30:5). Im jej kōm̧m̧ane men jab in ilo em̧m̧an tata ejjab jān māletlet eo ad make im en̄jake eo ak “jān kajoor in Jetōb [eo]” (Katak im Bujen ko 35:13).
Lale barāinwōt “The Faith and Fall of Thomas Marsh,” “Ezra Thayer: From Skeptic to Believer,” “Orson Pratt’s Call to Serve,” Revelations in Context, 54–69.
Ļōmņak ko n̄an Ekkatak Jeje ko Rekwojarjar Ippam̧ Make
Kar kūr eō n̄an kwaļo̧k gospel eo an Jisōs Kraist.
Mekarta kwar ak jab bōk juon kūr jeļā kake āinwōt juon mijenede, Irooj ej kōņaan bwe kwon kwaļo̧k gospel eo An, im elōn̄ iaan naan ko An n̄an mijenede ro im̧aan tata an tōre in iien bōk eddo in rej barāinwōt n̄an kwe. Ilo am̧ ekkatak Katak im Bujen ko 30–36, je ta eo kwoj ekkatak kōn kūr eo n̄an kwaļo̧k gospel eo. Komaron̄ kōm̧m̧ane juon laajrak in men ko Irooj ej kajjitōk jān mijenede ro An (n̄an waanjon̄ak, lale Katak im Bujen ko 30:8) im bar juon laajrak in men ko Irooj ej kallim̧uri er (n̄an waanjon̄ak, lale Katak im Bujen ko 30:11).
Ekōjkan an eoon kein kōketak juon eo kwojeļā kajjien me ej jerbal ak m̧aanjabpopo n̄an jerbale juon mijen ej ito-itak ak juon Church-service mijen? Ta eo kwoj loe bwe eim̧we eok n̄an kwaļo̧k gospel eo?
Lale barāinwōt Katak im Bujen ko 35:13–15; Russell M. Nelson and Wendy W. Nelson, “Hope of Israel” (worldwide devotional for youth, June 3, 2018), HopeofIsrael.ChurchofJesusChrist.org; Silvia H. Allred, “Go Ye Therefore,” Ensign ak Liaona, Nob. 2008, 10–12.
Jej aolep mijenede ro n̄an Kabun̄ eo an Jisōs Kraist.
Katak im Bujen ko 31:1–2, 5–6, 9, 13
Irooj emaron̄ jipan̄ eō kōn kadkad ko an baam̧le eo aō.
Baam̧le ko ilo 1830 ko raar kakkōt kōn elōn̄ ejja men ko wōt me baam̧le ko rej jelm̧ae rainin. Ta tōl im kallim̧ur ko Irooj eaar kōm̧m̧ani kar leļo̧k n̄an Thomas B. Marsh im baam̧le eo an? Ekōjkan an naan ko An maron̄ jipan̄ eok ilo kadkad ko an baam̧le eo am̧?
Kōn elōn̄ļo̧k meļeļe ko kōn Thomas B. Marsh, lale Saints, 1:79–80, 119–20.
Mijen eo n̄an kar ippān Rileman ro kar juon eo eaar jab tōprak?
Ke Oliver Cowdery, Peter Whitmer Jr., Parley P. Pratt, im Ziba Peterson raar ilo̧k n̄an kwaļo̧k n̄an Riindian Riamedka ro iturilik in Missouri, raar tōmak raar kakūrm̧ool kanaan ko an Bok in Mormon eo kōn an Rileman ro bōk gospel eo ilo raan ko āliktata (lale, n̄an waanjon̄ak, 1 Nipai 13:34–41; Enōs 1:11–18). Im aaet ilo jem̧ļo̧k in mijen eo aer, em̧ool men̄e eaar wōr iien ippān doon ko rem̧m̧an ippān jet kumi ko, raar jab peptaiji juon Riindian Riamedka. Bōtaab raar peptaiji elōn̄ļo̧k jān buki armej ro repaake Kirtland, Ohio, ijo raar bōjrak ilo iaļ eo aer ļo̧k n̄an Missouri. Ilubwiljin rioktak ro eaar ritōl ro an Kabun̄ in eļap kilaer jekļaj, ekoba Sidney Rigdon, im Kirtland tok ālkin eaar juon jikin koba eaorōk n̄an Kabun̄ in. Ta eo en̄jake in ej katakin eok kōn ekōjkan an Irooj kadedeļo̧k jerbal eo An?
Lale barāinwōt “A Mission to the Lamanites,” Revelations in Context, 45–49.
Eļan̄n̄e ij kalōk mour eo aō ioon gospel eo an Rilo̧mo̧o̧r eo, Ijjamin naaj wōtlo̧k.
Katak im Bujen ko 33 kar iookļo̧k Northrop Sweet im Ezra Thayer, ruo rioktak ro rekāāl. Northrop kar ilo̧k jān Kabun̄ in ejjab to ālkin an revelesōn in kar leļo̧k. Ezra eaar jerbal tiljek ium̧win jet iien ko, bōtaab eaar barāinwōt āliktata wōtlo̧kļo̧k. Menin emaron̄ in kar juon iien em̧m̧an n̄an bar etale ewi pen in am̧ kar ekkal “ioon ejm̧aan [eo]” (eoon 13) an gospel eo. Ta m̧ool ko ilo eoon kein remaron̄ jipan̄ eok pād wōt ilo tiljek n̄an Rilo̧mo̧o̧r eo?
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le
-
Katak im Bujen ko 30:2.Ekōjkan ad kōm̧m̧ane āinwōt juon baam̧le ilo kalimjōk wōt men ko an Anij ijello̧kin “men ko an laļ in”?
-
Katak im Bujen ko 31.Ilo am̧ riiti kallim̧ur ko an Irooj n̄an Thomas B. Marsh kōn baam̧le eo an, komaron̄ ekōnono kake kōjeraam̧m̧an ko me raar itok n̄an baam̧le eo am̧ kōnke kōn jerbal in mijenede. Kwomaron̄ barāinwōt al juon al eiookļo̧k wōt, eo āinwōt “Emaron̄ Jab Ion Tol Eutiej” (Al Ko Al In Ajri, nō.36). Ekōjkan an baam̧le eo am̧ kar jeraam̧m̧an jān kwaļo̧k gospel eo ippān ro jet?
-
Katak im Bujen ko 33:7–10.Ta ļōmņak eo Irooj eaar kōjerbale ilo eoon kein n̄an kōmeļeļeik kwaļo̧k gospel eo? Ta pija ko jet ak naan ko baam̧le eo am̧ emaron̄ ļōmņak kaki? Bōlen pija kein remaron̄ jipan̄ baam̧le eo am̧ ļōmņak kōn wāween ko rem̧m̧an n̄an kwaļo̧k gospel eo. Innām ekōnono in emaron̄ bōkļo̧k n̄an juon karōk n̄an kwaļo̧k gospel eo. Ļōmņak in tieta kōn jet iaan jekjek ko remaron̄ waļo̧k.
-
Katak im Bujen ko 34:10.Kāālet juon naan jān eoon 10, im kūr juon uwaan baam̧le eo n̄an unoojdikdiki. Ro jet uwaan baam̧le eo remaron̄ kajjieon̄ kajidedeik naan eo. Innām kajjitōk ippān juon uwaan baam̧le eo n̄an ba naan eo ilo juon ainikien eļap. Ta eo m̧akūtkūt in ejipan̄ kōj meļeļe etke Irooj ej kakiene kōj n̄an “kotak ainikiōm̧”?
Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Al eo kar elmakote: “I Hope They Call Me on a Mission,” Children’s Songbook, 169.
Ainikien ko an Jepļaaktok eo
Rioktak ro Im̧aan tata
Jekdo̧o̧n m̧okta jān an Kabun̄ in kar ejaak, “Meļaaj eo emouj epojak n̄an m̧adm̧ōd” (Katak im Bujen ko 4:4). Enaan in ekar kam̧ool m̧ool eo ilo allōn̄ ko ālkin wōt, kōnke elōn̄ rikappukōt m̧ool eo raar tōl jān Jetōb eo an Anij n̄an kappukōt Kabun̄ eo an Jisōs Kraist ekar jepļaaktok.
Elōn̄ iaan rioktak rein im̧aan tata raar juon m̧ōttan eoarōk ilo likūt pedped eo an Jepļaaktok eo, im bwebwenato in oktak ko aer rej aorōk n̄an kōj rainin. Tōmak eo raar kwaļo̧ke ejjeļo̧k oktak jān tōmak eo jej aikuji n̄an erōm̧ rioktak n̄an gospel eo an Jisōs Kraist.
Abigail Calkins Leonard
Ke Abigail Calkins Leonard eaar tōpar Jiln̄uul jim̧a iiō dettan, eaar en̄jake ikdeelel n̄an jerļo̧ke jerawiwi ko an. Emakijkij an riit jān Baibōļ eo, im armej ro jān m̧ōn jar ko an Rikirijin kar loļo̧ke ilo m̧weo im̧ōn, bōtaab liin eaar pok kōn ta eo ekar oktakint juon kabun̄ bar jān juon. “Juon jibbon̄,” liin eaar ba, “Iaar bōk Baibōļ eo aō im ilo̧k n̄an wōjke ko, ke iaar jubukwe ioon bukiiō.” Liin eaar dim ilo an kar jar n̄an Irooj. “Ilo iien eo em̧ōkaj iaar lo juon visōn ,” liin eaar ba, “im kabun̄ ko roktak raar eļļaļo̧k juon ālkin eo juon jān n̄a, im juon ainikien eaar kūr eō, ba: ‘Men kein kar jutak n̄an bōk bun̄bun̄.’ Innām, m̧aanļo̧k wōt, imaron̄ in kar lo juon meram eļap, im juon ainikien jān lan̄ kwaļo̧k: ‘Inaaj kotak juon armej, eo inaaj lo̧udin̄din̄ n̄an bōke im kōjeraam̧m̧an.’” Juon iien ekadu tokālik, Abigail eaar ron̄ kōn Bok in Mormon Em̧ool jekdo̧o̧n liin ejjan̄in kar de wōr juon an kape, liin eaar kappukōt n̄an “jeļā m̧ool eo kōn bok in, kōn menin letok eo im kajoor eo an Jetōb Kwojarjar,” im liin “ilo iien eo em̧ōkaj tata kar en̄jake paotokin.” Ke liin eaar āliktata maron̄ in riiti Bok in Mormon, liin eaar “pojak in bōke.” Liin im ļeo pālen, Lyman, kar peptaij ilo 1831 eo.1
Thomas B. Marsh
Ke Thomas B. Marsh eaar juon rūm̧m̧an ded, eaar ekkatak kōn Baibōļ eo im kar kobaļo̧k ilo juon kabun̄ an Rikirijin. Bōtaab eaar jab ju būruwōn, āliktata eaar bōjrak jān aolep kabun̄ ko. “Ekar wōr jidik ippa jetōb in kanaan,” eaar ba, “im kar jiron̄ [juon ritōl in kabun̄] iaar kōtmene bwe juon kabun̄ kāāl enaaj kar jutak, eo enaaj kar pād ie m̧ool eo ilo erreo eo an.” Ejjab to ālkin menin, Thomas eaar wōr juon an im̧we ilo jetōb n̄an em̧m̧akūt jān m̧weo im̧ōn ilo Boston, Massachusetts, im ilo̧k iturilikļo̧k. Ālkin joļo̧k jilu allōn̄ ko ilo iturilik in New York ilo an jab lo ta eo eaar kappukōte, eaar jino jibadōk m̧weo im̧ōn. Ilo iaļ eo ļo̧k, juon kōrā eaar kajjitōk ippān Thomas eļan̄n̄e ekar ron̄ kōn “Bok eo Jeje ilo Piliej Kooļ kar loe jān jodikdik eo kar etan Josep Smith.” Kar reel jān ļōmņak in, Thomas ejjab to ekar ilo̧k n̄an Palmyra im ioon Martin Harris ilo jikin būriin eo, ke peij ko 16 im̧aan tata an Bok in Mormon kar diwōjļo̧k jān kein būriin eo. Kar kōtļo̧k an Thomas bōk juon kape in peij ko 16, im kar būki ippānļo̧k n̄an m̧weo im̧ōn n̄an lio pālen, Elizabeth. “Liin ekar kanooj in m̧ōņōņō” ippān bok eo, eaar ba, “tōmake bwe ej jerbal in Anij.” Thomas im Elizabeth tokālik kar em̧m̧akūtļo̧k n̄an New York kōn ajri ro nejier im kar peptaij.2 (Kōn elōn̄ļo̧k meļeļe ko kōn Thomas B. Marsh, lale Katak im Bujen ko 31.)
Parley im Thankful Pratt
Āinwōt Thomas Marsh, Parley im Thankful Pratt kar uwaake en̄jake ko rekajoor ilo jetōb n̄an ilo̧k jān jikin kallūb eo aer ejeraam̧m̧an ilo Ohio kōn kōttōpar eo n̄an kwaļo̧k gospel eo āinwōt aer kar meļeļe kake jān Baibōļ eo. Ke Parley eaar jiron̄ļo̧k būratōr eo an, “Jetōb eo an men kein ekar kanooj in kajoor an jerbal ilo ļōmņak eo aō jon̄an rum̧ij eo bwe iaar jab maron̄ in kakkije.”3 Ke raar tōkāākļo̧k iturear in New York, Parley eaar wōr juon an im̧we n̄an pād ke eaar pād ilo eria eo. Thankful, raar kāālet, naaj kar wōnm̧aanļo̧k wōt ilo an jako. “Ewōr juon aō jerbal n̄an kōm̧m̧ane ilo peļaak in an laļ in,” Parley eaar jiron̄ e, “im ta jerbal eo, ak ewi aitokan in naaj kar kōm̧m̧ane, ijjab jeļā; bōtaab inaaj iwōj n̄e ejerbal.”4 Ekar ilo ijo me Parley eaar kein kajuon in an ron̄ kōn Bok in Mormon. “Iaar en̄jake juon itok limo eo ekōjak ilo bok eo,” eaar ba.5 Ekar kajjitōk kōn juon kape im kar riiti ilo aolepān bon̄ōn eo. Ke ej jibbon̄, ekar jeļā bok eo eaar m̧ool, kaorōke “eļapļo̧k jān aolep m̧weie ko an laļ in.”6 Ilowaan wōt jet raan ko Parley eaar peptaij. Innām eaar bar jepļaakļo̧k n̄an Thankful, eo eaar barāinwōt peptaij. (N̄an eļapļo̧k meļeļe kōn Parley P. Pratt, lale Katak im Bujen Kk 32.)
Pija in Parley P. Pratt jān Jeffrey Hein
Sidney im Phebe Rigdon
Ilo iaļ eo an ļo̧k jān New York n̄an juon mijen ilo Missouri, Parley Pratt im rijerbal ro m̧ōttan raar bōjrak ilo Mentor, Ohio, ilo m̧weo im̧ōn Sidney im Phebe Rigdon—ro m̧ōttan Parley jān etto kar jeļā kajien jān raan ko an ilo Ohio. Sidney eaar juon rikwaļo̧k in Rikirijin, im Parley eaar ilo juon iien juon uwaan jarlepju eo an im kar watōke juon rūkaki ilo jetōb. Parley ekar kijooror in jiron̄ ro m̧ōttan kōn Bok in Mormon im Jepļaaktok eo an gospel eo an Jisōs Kraist. Sidney make eaar kappukōt jepļaaktok eo an Kabun̄ eo em̧ool me ekar lo kar kōmeļeļe kake ilo Kallim̧ur Ekāāl, mekarta eaar kōrraat kōn Bok in Mormon ilo jinoin. “Bōtaab inaaj riiti bok eo am̧,” eaar jiron̄ eo m̧ōttan Parley, “im enaaj kajjieon̄ pukōte, jekdo̧o̧n enaaj kōn juon revelesōn jān Anij ak jaab.”7 Ālkin ruo wiik ko in ekkatak im jar, jim̧or e im Phebe raar tōmak bok eo eaar m̧ool. Bōtaab Sidney eaar barāinwōt jeļā bwe kobaļo̧k ilo Kabun̄ in enaaj kar juon kaarmejete kileplep n̄an baam̧le eo an. Ealikkar enaaj kar luuji jerbal eo an āinwōt juon rikwaļo̧k, ippānļo̧k paotok ko an ilo jukjuk in pād eo. Ke e im Phebe kar ekōnono kōn menin emaron̄ in waļo̧k, Phebe eaar kwaļo̧k, “Iaar ļōmņak kōn men ko renaaj jako, im … ej aō ikdeelel n̄an kōm̧m̧ane ankilan Anij, men̄e mour ak men̄e mej.”8
Ilo̧k n̄an Āne Jem̧aden, jān Robert T. Barrett