“Eprōļ 12–18. Katak im Bujen ko 37–40: ‘Eļan̄n̄e Kom̧ij Jab Juon Kom̧ij Jab Aō,’” Itok, Ļoor Eō—N̄an Kajjojo Armej im Baam̧le ko: Katak im Bujen ko 2021 (2020)
“Eprōļ 12–18. Katak im Bujen ko 37–40,” Itok, Ļoor Eō—N̄an Kajjojo Armej im Baam̧le ko: 2021
Armej ro Rekwojarjar rej Em̧m̧akūtļo̧k n̄an Kirtland, jān Sam Lawlor
Eprōļ 12–18
Katak im Bujen ko 37–40
“Eļan̄n̄e Kom̧ij Jab Juon Kom̧ij Jab Aō”
Je im̧we ko ilo am̧ ekkatak ej juon iaan wāween ko komaron̄ pokake kapilōk eo an Anij n̄an “ko̧koņ mālōtlōt” (Katak im Bujen ko 38:30).
Je En̄jake ko Rej Im̧we Eok
N̄an Armej ro Rekwojarjar im̧aan tata, Kabun̄ in eaar ļapļo̧k jān juon jikin n̄an ron̄jake jet kwaļo̧k ilo Jabōt. Ilo aolepān revelesōn ko An n̄an Josep Smith, Irooj eaar kōmeļeļeik Kabun̄ in kōn naan ko āinwōt kōm̧m̧an, aelōn̄ in kiin̄, Zaion, im, ebwe an emakijkij, jerbal. Bōlen emaron̄ in kar m̧ōttan ta eo ekar kan̄ōltok elōn̄ ro uwaan Kabun̄ in im̧aan tata. Ekar toon wōt aer iakwe katak ko an Kabun̄ eo kōjepļaaktok, elōn̄ raar barāinwōt kōņaan juon men remaron̄ in kar ajeļo̧k mour ko aer n̄ane. Em̧ool kōn menin, ilo kean̄ eo an Irooj ilo 1830 eo n̄an Armej ro Rekwojarjar n̄an ain doon ilo Ohio eaar jab pidodo n̄an jet n̄an ļoore. N̄ān armej ro āinwōt Phebe Carter, eaar meļeļein ilo̧k jān kapijuknen eo an em̧m̧an n̄an juon jikin eo jab jeļā kake (lale “Ainikien ko an Jepļaaktok eo” ilo jem̧ļo̧k in unin tōl in). Rainin jemaron̄ lo ilo alikkar ta eo Armej ro Rekwojarjar remaron̄ in kar loe wōt kōn mejān tōmak: Elōn̄ kōjeraam̧m̧an ko rem̧m̧an an Irooj rej kōttar er ilo Ohio.
Aikuj eo n̄an aiin doonļo̧k n̄an Ohio ekar etto wōt ke eaar mootļo̧k, bōtaab Armej ro Rekwojarjar rainin rej koba wōt ilo ejjab jibadbad eo wōt, jerbal eo wōt: n̄an “kōjerkak tok Zaion” (Katak im Bujen ko 39:13). Ejja āinwōt Armej ro Rekwojarjar im̧aan tata, jej meļo̧klo̧k “waan ko an laļ” (Katak im Bujen ko 40:2) kōnke jej lōke kallim̧ur eo an Irooj: “Kwo naaj bōk … kōjeraam̧m̧an eo ekanooj ļap im kwo jan̄in kar jeļā kake” (Katak im Bujen Ko 39:10).
Lale barāinwōt Saints, 1:109–11.
Ļōmņak ko n̄an Ekkatak Jeje ko Rekwojarjar Ippam̧ Make
Ta eo Josep Smith ekar ukōte ilo 1830 eo?
Ilo eoon in, Irooj ej kōnono kōn jerbal eo an Josep Smith kōn juon bar je kakobaba ko (revision) an Baibōļ eo, eo ekar kōnono kake āinwōt juon “ukok.” Ke Josep ekar bōk revelesōn eo kar je ilo jekjōn 37, ekar kadedeļo̧k jet jepta ko an bok in Jenesis im ekar ekkatak kōn Inōk im an jikin kweilo̧k an Zaion (lale Jenesis 5:18–24; Moses 7). Jet iaan pedped in katak ko Irooj ekar katakin Inōk rej āinļo̧k wōt ko Ekar kwaļo̧ki ilo jekjōn 38.
Lale barāinwōt Bwebwenato an Kabun̄ in Unin Kōnono ko, “Joseph Smith Translation of the Bible,” ChurchofJesusChrist.org/study/topics.
Josep Smith ej jerbal ippān Sidney Rigdon kōn bar je kakobaba (revision) eo eim̧we an Baibōļ eo. Kōmeļeļe jān Annie Henrie Nader
Anij ej aiin kōj n̄an kōjeraam̧m̧an kōj.
Irooj ekar kōjem̧ļo̧k kean̄ eo An n̄an aiin doonļo̧k n̄an Ohio kōn ba, “Lo, en̄in ej mālōtlōt” (Katak im Bujen ko 37:4). Bōtaab ejjab aolep raar lo mālōtlōt eo ilo iien eo em̧ōkaj tata. Ilo jekjōn 38, Irooj eaar kwaļo̧k mālōtlōt eo An ilo eļapļo̧k kōmeļeļe ko. Ta eo kwoj ekkatak jān eoon ko 11–33 kōn kōjeraam̧m̧an eo an aiin doon eo? Ro uwaan Kabun̄ in rainin ejako kakien er n̄an aiin doon kōn em̧m̧akūt n̄an juon jikin; ilo wāween ta ko jej aiintok doon rainin? Ekōjkan an kōjeraam̧m̧an kein jerbal n̄an kōj? (lale Russell M. Nelson, “The Gathering of Scattered Israel,” Ensign ak Liahona, Nob. 2006, 79–81).
Ilo am̧ riiti aolepān jekjōn in, kappukōt naan ko me remaron̄ in kar jipan̄ Armej ro Rekwojarjar bōk juon tōmak eo raar aikuji n̄an pokake kien eo an Anij n̄an aiin doon ilo Ohio. Bōrāinwōt ļōmņak kōn kien ko em̧ōj An liwaj n̄an eok im tōmak eo kwoj aikuj n̄an pokaki. Kajjitōk kein remaron̄ tōl ekkatak eo am̧:
-
Ta eo kwoj loe ilo eoon ko 1–4 me ej lewaj n̄an eok lōke eo ilo Irooj im kien ko An?
-
Ekōjkan an eoon 39 maron̄ jipan̄ eok pokake kien ko an Anij jekdo̧o̧n n̄e rej aikuji kaarmejete eo?
Bar ta eo kwoj loe?
Katak im Bujen ko 38:11–13, 22–32, 41–42
Eļan̄n̄e ij pojak, Ijjab aikuj in mijak
Armej ro Rekwojarjar em̧ōj kadede aer jelm̧ae eļap jum̧ae, im Irooj eaar jeļā eļapļo̧k ekar itok wōt (lale Katak im Bujen ko 38:11–13, 28–29). N̄an jipan̄ er jab mijak, Eaar kwaļo̧k juon pedped in katak eoarōk: “Eļan̄n̄e kom̧ij pojak kom̧ jamin mijak” (Katak im Bujen ko 38:30). Bōk juon minit n̄an kejōkļo̧kjeņ kōn apan̄ ko kwoj jelm̧ae. Innām ilo am̧ ekkatak jekjōn 38, ron̄jake im̧we ko jān Jetōb kōn wāween ko kwomaron̄ m̧aanjabpopo n̄an apan̄ ko bwe kwon jab aikuj mijak.
Lale barāinwōt Ronald A. Rasband, “Kom̧win Jab Lōļn̄o̧n̄,” Ensign ak Liaona, Nob. 2018, 18–21.
Waan ko an laļ raikuj jab kōm̧ad eok jān pokake naan an Anij.
Riiti jekjōn 39–40, ekoba bwebwenato eo an ilo jekjōn heading ko, im ļōmņak kōn wāween ko en̄jaake ko an James Covel remaron̄ jerbal n̄an eok. N̄an waanjon̄ak, ļōmņak kōn iien ko ke būruwōm̧ “ekar … jim̧we im̧aan [Anij]” (Katak im Bujen ko 40:1). Ekōjkan am̧ kar jeraam̧m̧an kōn am̧ tiljek? Barāinwōt ļōmņak kōn ta “wōj waan ko an laļ” kwoj jelm̧ae (Katak im Bujen ko 39:9; 40:2). Ta eo kwoj leo ilo jekjōn kein me rej im̧we eok n̄an an ļapļo̧k am̧ jab m̧ūjkōk ilo pokake?
Lale barāinwōt Matu 13:3–23.
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota
-
Katak im Bujen ko 37:3.N̄an jipan̄ baam̧le eo am̧ meļeļe kaarmejete eo Armej ro Rekwojarjar raar kōm̧m̧ane n̄an aiin doon n̄an Ohio, komaron̄ lale mab eo me ej itok ippān unin tōl in.
-
Katak im Bujen ko 38:22.Ekōjkan ad maron̄ kōm̧m̧an bwe Jisōs Kraist en an baam̧le eo ad “rileļo̧k kien”? Ekōjkan an ļoor kien ko An kōm̧m̧an bwe jen “juon armej reanemkwōj”?
-
Katak im Bujen ko 38:24–27.N̄an katakin ajri ro ta meļeļe in n̄an “”kom̧in juon,” komaron̄ jipan̄ er bwine ro uwaan baam̧le eo am̧ im ekōnono kōn etke kajjojo armej ej aorōk n̄an baam̧le eo am̧. Likkuun kōmeļeļeik bwe ippān doon kom̧ij juon baam̧le. Komaron̄ jipan̄ ajri ro nejūm̧ jin̄aik juon 1 kileplep ioon juon peba kileplep im kainōknōke kōn āt ko im jin̄a ko ak pija ko kōn kajjojo uwaan baam̧le eo. Komaron̄ barāinwōt je ioon peba kileplep eo men ko kwonaaj kōm̧m̧ani n̄an an ļapļo̧k ippān doon āinwōt juon baam̧le. Komaron̄ barāinwōt alooje pija in alooj eo “Love in Our Hearts” (ChurchofJesusChrist.org) ak riiti Moses 7:18.
-
Katak im Bujen ko 38:29–30.Komaron̄ ekōnono kōn en̄jaake ko an baam̧le eo ak an juon make rej kab waļo̧k me raar aikuj m̧aanjabpopo. Ekōjkan an m̧aanjabpopo eo am̧ kar jelet en̄jaake eo? Ta eo Irooj ej kōņaan bwe jen m̧aanjabpopo n̄an e? Ekōjkan an maron̄ m̧aanjabpopo jipan̄ kōj n̄an jab mijak? Ta eo jemaron̄ kōm̧m̧ane n̄an m̧aanjabpopo?
-
Katak im Bujen ko 40.Ta meļeļe in naan eo “wōj waan ko an laļ” (eoon 2) n̄aj kōj? Elōn̄ ke iaan wōj waan ko an laļ me rej bōbrae kōj jān bōk naan eo an Anij “kōn m̧ōņōņō”? Ekōjkan ad naaj anjo̧ ioer?
Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Al eo kar elmakote: “Jesus Said Love Everyone,” Children’s Songbook, 61.
Ainikien ko an Jepļaaktok eo
Aiin Doonļo̧k n̄an Ohio
Jukjuk in Pād eo ilo Kirtland, jān Al Rounds
Ilubwiljin elōn̄ Armej ro Rekwojarjar me raar aiin doonļo̧k n̄an Ohio ilo 1830 ko eaar Phebe Carter Woodruff. Liin eaar kobatok ilo Kabun̄ in ilo ituiōn̄ iturear in United States ke eaar ron̄oul jim̧an iiō dettan, men̄e ro jinen im jemen raar jab. Liin eaar je tokālik kōn jokāālet eo an n̄an em̧m̧akūtļo̧k n̄an Ohio n̄an koba ippān Armej ro Rekwojarjar.
“Ro m̧ōtta raar bwilōn̄ kōn jokāālet eo aō, ke iaar kōm̧m̧ane, bōtaab juon men itulowa eaar im̧we eō n̄an wōnm̧aanļo̧k. Jinō eaar būrom̧ōj kōn aō em̧m̧akūt jān m̧weo ekar kanooj in ļap jān jon̄an eo imaron̄e; im n̄e ekar jab kōn jetōb eo itulowa inkar aikujin itweļo̧k āliktata. Jinō eaar jiron̄ eō em̧m̧anļo̧k n̄e eaar lo aō kallib jān etal makeļo̧k iaaō n̄an juon laļ ewaan.
“‘[Phebe],’ liin eaar ba, ilo kabwilōn̄, ‘kwonaaj ke bar jepļaaktok n̄an eō eļan̄n̄e kololo bōd ippān Rimormon raņ?’
“Iaar uwaak ‘aaet, m̧am̧a; inaaj.’ … Uwaak eo aō eaar kaenōm̧m̧an inepata eo an; bōtaab ekar ļap am wōjbūrom̧ōj n̄an jenolo̧k Ke iien eo eaar itok n̄an aō em̧m̧akūt, iaar jab peran make n̄an ao ba naan in iak-iakwe; kōn menin iaar je naan in iak-iakwe ko aō, im likūt er ioon tebōļ eo aō, ettōr laļļo̧k ilo jikūnwe eo im keļo̧k n̄an lowaan wa eo. Kōn menin iaar ilo̧k jān kapijuknen eo eutiej aō jān ke iaar ajri n̄an kobaik mour eo aō ippān armej ro rekwojarjar an Anij.”1
Ilo juon iaan naan in iak-iakwe ko, Phebe eaar je:
“Ro jinō im jema rejitōnbōro—Ij kiiō pojak in ilo̧k jān m̧weo im̧ōn jinō im jema ium̧win juon iien … Ijjab jeļā ewi aitokan—bōtaab ejjab kōn ejjeļo̧k en̄jaake in kam̧m̧oolol ko kōn jouj eo me iaar bōke jān ke iaar ajri m̧ae iien in kiiō—bōtaab āinwōt Anij ekar karōke eļan̄n̄e ejjab kiiō jān kar m̧okta. Jen aolep ajeļo̧k aolep men kein n̄an pein Anij im kam̧m̧oolol bwe kar kōtļo̧k bwe jen kar mour ippān doon ilo juon iien eo aitok ium̧in jekjek ko rem̧m̧an n̄an kōj āinwōt ilo ad kar, tōmak bwe aolep men renaaj jerbal n̄an em̧m̧an eo ad eļan̄n̄e jej iakwe Anij ilo jekjek eo eutiej tata. Kōm̧m̧an bwe jen kile bwe jemaron̄ jar n̄an juon Anij eo enaaj ron̄jake jar ko rem̧ool an aolep menin kōm̧anm̧an ko an im letok n̄an kōj ta eo me em̧m̧an tata n̄an kōj. …
“Jinō, ij tōmak bwe ej ankilan Anij n̄an n̄a n̄an ilo̧k n̄an iturilik im ikar tōmak bwe ekar ilo juon iien aitok. Kiiō iaļ eo epeļļo̧k … ; ij tōmak bwe ej jetōb eo an Irooj me eaar kōm̧m̧an menin eo ebwe n̄an aolep men ko. O kwon jab inepata kōn ajri eo nejūm̧; Irooj enaaj kaenōm̧m̧an eō. Ij tōmak bwe Irooj enaaj kōjparok eō im letok n̄an eō men eo me n̄an em̧m̧an tata eo. … Ij ilo̧k kōnke kōn kūr ko an Irooj eo aō—E ekar kallikar jerbal jerbal eo aō.”2
