Armej ro Rekwojarjar rej Em̧makūtļo̧k n̄an Kirtland, jān Sam Lawlor

Eprōļ 12–18

Katak im Bujen Ko 37–40

“Eļan̄n̄e Kom̧ij Jab Juon Kom̧ij Jab Aō”

Anij ejeļā ta eo ajri ro ilo kūlaaj eo am̧ aikuj n̄an ekkatak. Kōm̧m̧an bwe En tōl eok ilo am̧ kāālōt jet pedped in katak ko im m̧akūtkūt ko n̄an jipan̄ eok katakin er.

Je En̄jake ko Rej Im̧we Eok

Pija eo ej Bōk Jikin Kajjitōk n̄an Kwaļo̧ke

Jaketok jaketak juon kape in jeje ko rekwojarjar. Ilo an kajjojo ajri jibwe jeje ko rekwojarjar, kōm̧m̧an bwe ajri eo en kwaļo̧k juon men e ļaddik eo ak e leddik eo ej keememej katak eo an wiik eo ļo̧k ak jān riiti jeje ko rekwojarjar ilo m̧weo ilo wiik in.

Katakin Katak ko: Ajri ro Reddikļo̧k

Katak im Bujen Ko 38:24–27

Imaron̄ iakwe ro jet.

Irooj eaar kōņaan bwe Armej ro Rekwojarjar ren aiintok doon ilo Ohio im n̄an iakwe doon jokkuun wōt juon. Ekōjkan am̧ maron̄ jipan̄ ajri ro en̄jake ippān doon ippān im iakwe n̄an ro jet?

M̧akūtkūt ko Maron̄ Kōm̧m̧ani

• Kōjerbal peij in m̧akūtkūt eo an wiik in n̄an kwaļo̧k n̄an ajri ro bwe ke Kabun̄ in eaar lukkuun in kāāl wōt, Irooj eaar kajjitōk ippān membōr ro n̄an em̧m̧akūt ippān doonļo̧k n̄an Ohio (lale barāinwōt māb eo ilo unin tōl eo an wiik in ilo Itok, Ļoor Eō—N̄an Kajjojo im Baam̧le ko). Anij eaar kōņaan bwe ren ekkatak ekōjkan iakwe im mour ippān doon. Kajjitōk ippān ajri ro kōn ļōmņak ko kōn ekōjkan aer maron̄ kwaļo̧k iakwe n̄an doon.

• Riiti Katak im Bujen Ko 38:25 n̄an ajri ro, im jiron̄ er ilo naan ko am̧ make ta meļeļe in n̄an kautiej eo jeiūm̧ ak eo jatūm̧ āinwōt kwe make (lale barāinwōt Matu 7:12). Jipan̄ er bar āliji eoon eo, bōk jikin “ļeo jein ak jatin” kōn etaer kajjojo.

• Al juon al kōn iakwe im ekoba ro jet, ko āinwōt “I’ll Walk with You” ak “We Are Different” (Children’s Songbook, 140–41, 263). Ilo ami al, kōm̧m̧an bwe ajri ro ren jibwe pija in ajri ro jān jikin ko jet ilo laļ in.

• Jipan̄ er kōm̧m̧ane juon m̧akūtkut in juon jekjek eo me juon eo ekāāl ej kobaļo̧k ilo kūlaaj in Būraimere eo aer. Ekōjkan ad maron̄ jipan̄ e ļaddik eo ak e leddik eo en̄jake ruwainene? Ajri ro remaron̄ lem̧ōņōņō ilo kōm̧m̧ane kōl in kōn puppet addi in pā ko ak pija ko m̧wijiti.

Katak im Bujen Ko 38:30

Eļan̄n̄e ij pojak, Ijjab aikuj in mijak.

Juon wāween Jemedwōj Ilan̄ ej jipan̄ kōj n̄an jab mijak ej kōn katakin kōj n̄an pojak.

M̧akūtkūt ko Maron̄ Kōm̧m̧ani

• Āliji jejjo kattōn eoon in “Eļan̄n̄e kom̧ij pojak kom̧ jamin mijak” (verse 30). Ālkin jejjo kattōn, jeorļo̧k juon naan, im kōm̧m̧an bwe ajri ro ren ba naan eo ejako. Jiron̄ ajri ro kōn juon iien ke kwar kōpooj juon men im kōn m̧aanjabpopo ekar jipan̄ eok n̄an jab mijak.

• Jipan̄ ajri ro ļōmņak kōn juon men Jemedwōj Ilan̄ ej kōņaan bwe ren m̧aanjabpopo n̄an e, ko āinwōt kōppopo n̄an peptaij ak etal n̄an tampeļ. Kōjerbal pija ko ak men ko n̄an lelo̧k n̄an er ļōmņak ko. Ekōnono kōn wāween ko remaron̄ m̧aanjapbobob, im kōm̧m̧an bwe ren jin̄aik pija ko kōn er make aer m̧aanjabpopo n̄an ak bōk kuņaer ilo men ko raar ļōmņak kaki.

Katak im Bujen Ko 39:6, 23

Ij bōk menin letok eo an Jetōb Kwojarjar n̄e ij kapen.

Ta eo ajri ro ilo kūlaaj eo am̧ raikuj meļeļe kōn bōk menin letok eo an Jetōb Kwojarjar? Naan in kōmeļeļe eo an Irooj n̄an James Covel kōn kain̄i in emaron̄ in jipan̄.

M̧akūtkūt ko Maron̄ Kōm̧m̧ani

• Kwaļo̧k juon pija in juon eo ekar peptaij im juon eo kar kapene (lale Bok in Gospel Pija, nō.,104, 105). Riiti Katak im Bujen Ko 39:23, im kajjitōk ippān ajri ro n̄an kwaļo̧k pija eo ejim̧we n̄e rej ron̄ am riit kōn peptaij ak kapen.

• Riit ippān doon Katak im Bujen Ko 39:6, im kwaļo̧k n̄an ajri ro pija ko ak men ko me rej jutak kōn wāween ko Jetōb Kwojarjar eo ej kōjeraam̧m̧an kōj (ekoba men ko kar kōnono kaki ilo eoon 6). Kōm̧m̧an bwe ajri ro ren bōk kuņaer kajjojo jibwe pija ko ak men ko, im ilo aer kōm̧m̧ane, kwaļo̧k naan in kam̧ool kōn ekōjkan an Jetōb Kwojarjar eo kar kōjeraam̧m̧an eok ilo wāween kein. Jipan̄ ajri ro kile iien ko me remaron̄ en̄jake kareel eo an Jetōb.

Katakin Katak ko: Ajri ro Rerūttoļo̧k

Katak im Bujen Ko 37; 38:31–33

Anij ej aiintok kōj n̄an kōjeraam̧m̧an kōj.

aiintok doon eo ilo Ohio eaar juon kaarmejete eļap n̄an elōn̄ iaan Armej ro Rekwojarjar m̧oktata. Rainin jab jiron̄ kōj n̄an aiintok doon ilo juon wōt jikin, bōtaab jej aiintok doon āinwōt baam̧le ko, ward ko, im stake ko.

M̧akūtkūt ko Maron̄ Kōm̧m̧ani

• Kwaļo̧k n̄an ajri ro peij in m̧akūtkūt eo an wiik in ak māb eo ilo unin tōl eo an wiik ilo Itok, Ļoor Eō—N̄an Kajjojo im Baam̧le ko. Riiti ippān doon Katak im Bujen Ko 37, im jipan̄ ajri ro kappukōt ilo māb eo jikin ko kar kōnono kaki ilo revelesōn eo. Ta eo Irooj eaar jiron̄ Armej ro Rekwojarjar n̄an kōm̧m̧ane?

• Kāālōt juon eoon eaorōk ak jentōj jān Katak im Bujen Ko 38:31–33 me kwoj en̄jake ej kōmeļeļeik etke Irooj eaar kōņaan bwe armej ro an ren aiintok doon ippān doon. Kōjepelōklōki naan ko jān jentōj in ipeļaakin ruum̧ eo, im kajjitōk ippān ajri ro n̄an aini, likūt er ilo laajrak eo ejim̧we, im lale ia eo jentōj eo ej waļo̧k ilo eoon ko. Etke Irooj ej kōņaan bwe jen aiintok doon?

Katak im Bujen Ko 38:24–27

Anij ekōņaan bwe armej ro An ren koba ippān doon.

N̄an kōpooj Armej ro Rekwojarjar n̄an aiintok doon, Irooj eaar katakin er n̄an kalimjōk doon āinwōt jokkuun wōt juon im “kom̧in juon” (eoon 27). Ekōjkan an naan in kōmeļeļe in maron̄ kōjeraam̧m̧an ajri ro kwoj katakin er?

M̧akūtkūt ko Maron̄ Kōm̧m̧ani

• Riiti ippān doon Katak im Bujen Ko 38:24–27, im kajjitōk ippān ajri ro n̄an je naan ko jān eoon kein me rej en̄jake rej aorōk, ekoba naan ko me rej āliji. Etke Irooj emaron̄ in kar āliji naan kein? Kōm̧m̧an bwe ren kwaļo̧k ta eo raar je, im ekōnono kōn ta eo rej ekkatak jān naan ko.

• Jipan̄ ajri ro ļōmņak kōn jekjek ko me juon emaron̄ in en̄jake an jab kobaļo̧k, ko āinwōt erōm̧ juon uwaan Kabun̄ in ekāāl ak em̧m̧akūtļo̧k n̄an juon jikin eo ekāāl ak jikuuļ. Ta eo Katak im Bujen Ko 38:24–27 ej elmakote kōn ekōjkan ad aikuj kōm̧m̧an n̄an juon eo ilo jekjek kein? Kōm̧m̧ane juon m̧akūtkūt in jet iaan jekjek ko.

• Kwaļo̧k juon men in katak me ej kwaļo̧k ekōjkan an men ko maron̄ koba ak koba ippān doon n̄an erom juon wōt, ko āinwōt m̧ōttan nuknuk ko me rej kōm̧m̧ane juon quilt ak iiōk ko me rej kōm̧m̧an juon ļoob in pilawe. Ta eo waanjon̄ak kein rej katakin kōj kōn erōm̧m juon āinwōt armej ro an Anij?

Katak im Bujen Ko 39–40

Imaron̄ kōjparok kallim̧ur ko aō.

James Covel eaar kōm̧m̧ane juon kallim̧ur n̄an pokake Irooj, bōtaab eaar jab kōjparok kallim̧ur eo an. Ekkatak kōn en̄jake eo an emaron̄ jipan̄ ajri ro n̄an keememej aorōk eo an pokake.

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an riiti jekjōn taitōļ ko n̄an Katak im Bujen Ko 39 im 40, im kajjitōk ippāer n̄an kwaļo̧k ilo tukadu in ilo naan ko ak jin̄a ko ta eo rej ekkatak kōn James Covel.

• Je kajjitōk ko ioon boot eo me renaaj jipan̄ ajri ro meļeļe jekjōn 40, ko āinwōt Ta eo James Covel eaar bujen n̄an kōm̧m̧ane? Etke eaar jab dāpij wōt bujen eo an? Kajjitōk ippān ajri ro n̄an kappukōt uwaak ko ilo jekjōn 40.

• Jipan̄ ajri ro keememej kallim̧ur ko raar kōm̧m̧ani ke raar peptaij (lale Mosaia 18:8–10). Jipan̄ ajri ro kōllaajrake jet mijak ko ak “wōjwaan ko an laļ” (Katak im Bujen Ko 40:2) me remaron̄ bōbrae juon armej jān an dāpij wōt kallim̧ur kein. Kajjitōk ippān ajri ro n̄an jeje n̄an er make juon ennaan ekadu āinwōt juon kakeememej bwe pokake kien ko an Jemedwōj Ilan̄ enaaj jipan̄ er anjo̧ ioon mijak ko ak wōjwaan ko an laļ in. Kōketak er n̄an kakon kakeememej eo aer juon jikin ijo emaron̄ emakijkij aer loe.

Kōketak Ekkatak ilo M̧weo

Kajjitōk ippān ajri ro n̄an ekōnono ippān ro jinier im jemeer ak ro jet uwaan baam̧le eo ekōjkan an maron̄ ļapļo̧k aer ippān doon āinwōt juon baam̧le.

Kōkōm̧anm̧anļo̧k Ad Katakin

Kakilōklōke juon eoon. Ļōmņak in kāālōte juon eoon in jeje ko rekwojarjar me kwoj ļōmņak emaron̄ kōkajoorļo̧k naan in kam̧ool ko an ajri ro, im jipan̄ er kakilōklōk e. Ajri ro reddikļo̧k remaron̄ kakilōklōke jidik in juon eoon ak juon naan epidodo.