mijenede ro m̧oktata an Kabun̄ in

Eprōļ 5–11

Katak im Bujen Ko 30–36

“Em̧ōj Kūr Eok n̄an Kwaļo̧k Naan kōn Gospel eo Aō”

Ilo am̧ lukkuun in jar im ekkatak Katak im Bujen Ko 30–36 ippān ajri ro ilo kūlaaj eo am̧ ilo ļōmņak, Jetōb emaron̄ lewaj n̄an eok ļōmņak ko kōn ekōjkan katakin er. Kappukōt ļōmņak ko rellōn̄ļo̧k ilo unin tōl in.

Je En̄jake ko Rej Im̧we Eok

pija ej bōk jikin kwaļo̧k

Kajjitōk Bwe Ren Kwaļo̧ke

Kotak juon pija in mijenede ro, im kajjitōk ippān ajri ro n̄an kwaļo̧k ta eo rejeļā kōn jerbal in mijenede.

pija ej bōk jikin katakin

Katakin Katak eo: Ajri ro Reddikļo̧k

Katak im Bujen Ko 33:2–3, 6–10

Imaron̄ kwaļo̧k gospel eo an Jisōs Kraist.

Bar ajri ro reddik remaron̄ kwaļo̧k kam̧ool eo aer kōn gospel eo an Jisōs Kraist. Ekōjkan am̧ maron̄ kōjerbal eoon kein n̄an im̧we er n̄an kōm̧m̧an āindein?

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an kajjieon̄ ba juon eoon āinwōt “Anij ej iakwe eok” ilo an lo̧n̄ier kilōk. Kalikkare bwe jemaron̄ jab katakin armej ro kōn gospel eo eļan̄n̄e jejjab kōpeļļo̧k lo̧n̄iid. Riiti Katak im Bujen Ko 33:8–10, im kajjitōk ippān ajri ro n̄an kōpeļļo̧k lo̧n̄ier aolep iien rej ron̄ naan eo “kōpeļļo̧k lo̧n̄imi.” Etke Jemedwōj Ilan̄ ekōņaan bwe jen kōpeļļo̧k lo̧n̄iid im kwaļo̧k gospel eo n̄an ro jet?

• Lukkuun in jidik wōt am̧ unojdikdikiļo̧ke juon men n̄an ajri ro, eo āinwōt “Josep Smith eaar juon Rikanaan an Anij,” im kajjitōk ippāer n̄an āliji ta eo kwar ba. Innām ba ejja eoon eo wōt ilo juon ainikien eļaaj. Riiti Katak im Bujen Ko 33:2. Jipan̄ ajri ro meļeļe bwe “kotak [e] [ainikied]” meļeļe in ejjab n̄an mijak n̄an jiron̄ ro jet kōn Jisōs Kraist, Bok in Mormon, im m̧ool ko jet an gospel eo.

• Likūt peba to̧ļe ko ak pija in armej ro ipeļaakin ruum̧ eo. Kajjitōk ippān ajri ro n̄an pukōt armej ro im aiintok er n̄an itum̧aan in ruum̧ eo. Riiti Katak im Bujen Ko 33:6, im kōmeļeļeik ta meļeļe in bwe Irooj enaaj “aini ro [An] rikāālet.” Kam̧ool bwe jemaron̄ jipan̄ aiintok armej ro n̄an Irooj ilo ad kwaļo̧k gospel eo.

• Al juon al kōn kwaļo̧k gospel eo, eo āinwōt “I Want to Be a Missionary Now” (Children’s Songbook, 168). Jipan̄ ajri ro ļōmņak kōn wāween ko remaron̄ jipan̄ armej ro jet ekkatak kōn Jisōs Kraist.

Katak im Bujen Ko 33:12–17

Imaron̄ kalōk mour eo aō ioon gospel eo an Jisōs Kraist.

Kapilōk eo Irooj eaar leļo̧k n̄an Ezra Thayer im Northrop Sweet emaron̄ jipan̄ ajri ro kwoj katakin er kalōk mour ko aer ioon gospel eo an Jisōs Kraist.

M̧akūtkūt ko Maron̄ Kōm̧m̧ani

• Kwaļo̧k n̄an ajri ro juon pija kōn pedped eo an juon em̧, im kajjitōk ippāer n̄an kōmeļeļeik. Etke juon em̧ aikuji juon pedped epen, kijin̄en̄e? Riiti ippān ajri ro Katak im Bujen Ko 33:12–13, im kōmeļeļeik bwe Irooj ekōņaan bwe jen kalōk mour ko ad ioon gospel eo An. Jipan̄ ajri ro ļōmņak kōn jet wāween ko remaron̄ kalōk mour ko aer ioon gospel eo an Jisōs Kraist.

• Leļo̧k n̄an ajri ro jet men ko me remaron̄ kōjerbali n̄an kalōk juon tawōr, ko āinwōt būļak ko ak kab būļajtik ko. Kakōļļeik kajjojo men kōn juon pija ej jutak kōn men ko Irooj eaar ba ilo Katak im Bujen Ko 33:14–17. Kajjitōk ippān ajri ro n̄an kalōk juon tawōr ilo am̧ ekōnono ippāer kōn ekōjkan an men kein jipan̄ kōj kalōk mour ko ad ioon gospel eo an Jisōs Kraist.

pija ej bōk jikin katakin

Katakin Katak eo: Ajri ro Rerūttoļo̧k

Katak im Bujen Ko 30:1–2

Ej aikuj ļapļo̧k aō kalimjōk wōt men ko an Anij jān wūj waan ko an laļ in.

Kapilōk eo an Irooj n̄an David Whitmer ilo jekjōn 30 emaron̄ jipan̄ ajri ro kwoj katakin er pād wōt ilo tiljek n̄an gospel eo an Jisōs Kraist.

M̧akūtkūt ko Maron̄ Kōm̧m̧ani

• Riiti Katak im Bujen Ko 30:1 ippān doon, im kajjitōk ippān ajri ro n̄an ba ilo tukadu in, ilo naan ko aer make, kapilōk eo Irooj eaar leļo̧k n̄an David Whitmer. Ilo wāween ta ko jemaron̄ jet iien “mijak armej,” ak inepata kōn ta eo ro jet remaron̄ ļōmņak kake, ijello̧kin kōm̧m̧ane ta eo jejeļā jej aikuj in?

• Kajjitōk ippān ajri ror n̄an kajjieon̄ kōm̧m̧ane ruo jerbal ko ilo juon wōt iien, eo āinwōt ba juon laajrak in tōmak ko ilo aer je etan aolep ajri ro ilo kūlaaj eo. Kajjitōk ippāer etke eaar pen n̄an kalimjōk wōt jerbal eo im̧aan tata. Ta jet iaan “men ko an laļ” (Katak im Bujen Ko 30:2) me remaron̄ kōm̧ad kōj jān keememej Jisōs Kraist im gospel eo An? Ekōjkan ad dāpij wōt ad kalimjōk wōt E ijello̧kin men ko edikļo̧k tokjāer?

Katak im Bujen Ko 30–34

Imaron̄ kwaļo̧k gospel eo an Jisōs Kraist.

Elōn̄ ajri ro ilo Kabun̄ in rej reim̧aanļo̧k n̄an jerbale juon mijen edipio ak service mijen. En̄jake ko an mijenede ro kar kōnono kaki ilo jekjōn 30–34 remaron̄ jipan̄ er m̧aanjabpopo.

M̧akūtkūt ko Maron̄ Kōm̧m̧ani

• Kajjitōk ippān juon uwaan ward eo n̄an ekkatak kōn juon iaan mijenede ro kar kūr ilo Katak im Bujen Ko 30–34 im n̄an kwaļo̧k ippān ajri ro ta eo raar ekatak (lale “Ainikien ko an Jepļaaktok eo: Naan in Kam̧ool ko an Rioktak ro Im̧aan tata” ilo Itok, Ļoor Eō—N̄an Kajjojo Armej im Baam̧le ko ak “The Faith and Fall of Thomas Marsh,” “Ezra Thayer: From Skeptic to Believer,” “Orson Pratt’s Call to Serve,” “Revelations in Context, 54–69).

• Jin̄aik juon lo̧n̄i kileplep ioon boot eo, im jipan̄ ajri ro pukōte ilo Katak im Bujen Ko 33:8–10 kallim̧ur ko an Irooj n̄an kōj n̄e jej kōpeļļo̧k lo̧n̄iid n̄an kwaļo̧k gospel eo. Kōm̧m̧an bwe ajri ro ren je kallim̧ur kein ioon boot eo, im jipan̄ er meļeļe ta meļeļe in kallim̧ur kein. Kajjitōk ippān kajjojo ajri n̄an je ilowaan lo̧n̄i eo juon m̧ool an gospel eo remaron̄ kwaļo̧ke ippān ro jet.

• Kwaļo̧k juon pija in juon jilel, im ekōnono kōn ta meļeļe in n̄an kwaļo̧k gospel eo “āinwōt ainikien juon jilel.” Ekōjkan ad “kotak” ainikied? (Katak im Bujen Ko 33:2; 34:6).

• Kajjitōk ippān ajri ro n̄an kwaļo̧k ekōjkan aer m̧aanjabpopo n̄an jerbali mijen ko juon raan? Eļan̄n̄e rejeļā juon eo (bōlen juon uwaan baam̧le eo) me ej jerbal, kajjitōk ippāer n̄an ba kake kōn en̄jake ko an ļaddik eo ak an leddik eo. Ak kajjitōk ippān mijenede ro, juon mijenede eaar ro̧o̧l, ak juon eo ej m̧aanjabpopo n̄an juon mijen n̄an kwaļo̧k lo̧udin̄din̄ eo an ļaddik eo ak an leddik kōn jerbal in mijenede. Kwaļo̧k jet iaan en̄jake ko am̧ kwaļo̧k gospel eo, ekoba en̄jake ko ilo mour ko am̧ raan otemjeļo̧k.

  Ļaddik ro rej ikkure

  Imaron̄ kwaļo̧k gospel eo ippān ro m̧ōtta.

Katak im Bujen Ko 33:12–17

Imaron̄ kalōk mour eo aō ioon gospel eo an Jisōs Kraist.

Eļan̄n̄e ajri ro remaron̄ ekkatak ilo iiō ko im̧aan tata ekōjkan kalōk mour ko aer ioon gospel eo an Jisōs Kraist, eļapļo̧k aer naaj pād wōt ilo tiljek n̄an E. Kapilōk eo kar letok ilo eoon kein emaron̄ jipan̄ er.

M̧akūtkūt ko Maron̄ Kōm̧m̧ani

• Bōktok n̄an kūlaaj eo aitam ko eoktak aer pen jān doon, ko āinwōt menin mour to̧le ko, juon matmat, im juon dekā. Kōtļo̧k bwe ajri ro ren jibwe kajjojo. Kajjitōk ippāer n̄an lale Katak im Bujen Ko 33:12–13 n̄an pukōt ekōjkan an Irooj kōmeļeļeik gospel eo An. Etke “dekā” eo ej juon aan em̧m̧an n̄an kōmeļeļeik gospel eo? Ekōjkan ad maron̄ kalōk mour ko ad ioon dekā eo an gospel?

• Jipan̄ ajri ro n̄an riiti Katak im Bujen Ko 33:12–17 im kappukōt men ko jemaron̄ kōm̧m̧ani n̄an kalōk mour ko ad ioon gospel eo an Jisōs Kraist? Kajjjitōk ippān ajri ro n̄an jin̄aik juon pija in juon men eo rej loe, im kōm̧m̧an bwe ren kajidedeik ta eo kajjojo pija ko an ro jet rej kwaļo̧ke.

pija ej bōk jikin ekkatak

Kōketak Ekkatak ilo M̧weo

Kajjitōk ippān ajri ro n̄an āinwōt mijenede ro kōn kwaļo̧k gospel eo ippān baam̧le ko aer juon men raar ekkatak ilo Būraimere rainin.

Kōkōm̧anm̧anļo̧k Ad Katakin

Kam̧ool kōn kōjeraam̧m̧an ko kar kallim̧ur kaki. N̄e kwoj kajjitōk ippān ajri ro n̄an mour kōn juon pedped an gospel eo, kwaļo̧k kallim̧ur ko Anij eaar kōm̧m̧ani n̄an ro me rej mour kōn pedped in katak jab eo. N̄an waanjon̄ak, komaron̄ kwaļo̧k naan in kam̧oool eo kōn kōjeraam̧m̧an ko me Irooj ej leļo̧k n̄an ro me rej kōpeļļo̧k lo̧n̄ier im kwaļo̧k gospel eo.

peij in m̧akūtkūt eo: Imaron̄ kwaļo̧k gospel eo