Annan̄ in Kraist

M̧aaj 29–Eprōļ 4

Ijtō

“N̄aij E Eo Ej Mour, N̄aij E Eo Kar M̧ane”

Kūlaaj eo an Būraimere ilo Jabōt in Ijtō ej juon iien ekanooj in em̧m̧an n̄an jipan̄ ajri ro kōkajoorļo̧k tōmak eo aer ilo Jisōs Kraist im Pinmuur eo An. Kappukōt tōl eo an Irooj kōn ekōjkan kōm̧m̧ane men jab in. Komaron̄ lo jet ļōmņak ko rejipan̄ ilo unin tōl in.

Je En̄jake ko Rej Im̧we Eok

pija ej bōk jikin kwaļo̧k

Pija eo ej Bōk Jikin Kajjitōk n̄an Kwaļo̧ke

Kōm̧m̧an bwe ajri ro ren kwaļo̧k ippam̧ ta eo rejeļā kōn un eo jej keememe Ijtō. Kajjitōk ippāer ta eo baam̧le ko aer rej kōm̧m̧ane n̄an keememe Jerkakpeje eo an Jisōs Kraist ilo iien Ijtō. Ak kōm̧m̧an bwe ren kwaļo̧k ta eo rej ekkatak kōn Jisōs Kraist ilo m̧weo im ilo jeje ko rekwojarjar.

pija ej bōk jikin katakin

Katakin Katak ko: Ajri ro Reddikļo̧k

Katak im Bujen Ko 138:11–17

Kōnke kōn Jisōs Kraist, Inaaj jerkakpeje.

Ilo am̧ katakin ajri ro kōn Jerkakpeje eo an Jisōs Kraist, Katak im Bujen Ko 138:11–17 emaron̄ in jipan̄ eok kōmeļeļeik ta meļeļe in n̄an jerkakpeje. Eoon kein remaron̄ barāinwōt jipan̄ kalōk ļōmņak eo aer bwe renaaj jerkakpeje juon raan.

M̧akūtkūt ko Maron̄ Kōm̧m̧ani

• Kwaļo̧k pija in mej eo, kallūb eo, im Jerkakpeje eo an Rilo̧mo̧o̧r eo (lale Bok in Gospel Pija, nō. 57, 58, im 59). Kajjitōk ippān ajri ro ta eo rejeļā kōn iien kein. Kam̧ool bwe Jisōs eaar mej kōn kōj im kar jerkak jān mej bwe jen maron̄ aolep jerkakpeje ālkin ad mej.

• Ļōmņak kōn juon men n̄an katak eo me emaron̄ jipan̄ ajri ro meļeļe ta eo ej waļo̧k n̄e jej mej (jetōb ko ad im ānbwin ko rej jepeļļo̧k jān doon) im n̄e jej jerkakpeje (jetōb ko ad im ānbwin ko rej bar koba ippān doon). N̄an waanjon̄ak, ta eo ej waļo̧k n̄e jej kōm̧akūt pātre eo jān juon ten̄ki ak iin̄ eo jān juon pen? Ta eo ej waļo̧k n̄e men kein rej bar koba?

• Riit n̄an ajri ro jān Katak im Bujen Ko 138:17: “Jetōb eo im ānbwin eo [renaaj] bar koba ippān doon im n̄an jāmin bar ajej, bwe ren maron̄ bōk juon dipiio in m̧ōņōņō.” Etke jej kam̧m̧oolol kōn ānbwin ko ad? Kwaļo̧k lan̄lōn̄ eo kwoj en̄jake n̄an jeļā bwe jenaaj aolep jerkakpeje im bar bōk ānbwin ko ad.

• Al ippān doon juon al kōn Jerkakpeje eo, ko āinwōt “Did Jesus Really Live Again?” ak “Jesus Has Risen” (Children’s Songbook, 64, 70). Leļo̧k n̄an ajri ro pija ko me rej jutak kōn naan ko an eoon ko ilo al eo (n̄an waanjon̄ak, lale Bok in Gospel Pija, nō. 59, 60, im 61), im kajjitōk ippāer n̄an kajutak pija ko aer n̄e rej al naan ko.

Katak im Bujen Ko 76:11–24; 110:1–7; Josep Smith—Bwebwenato 1:14–17

Rikanaan Josep Smith eaar lo Jisōs Kraist.

Juon wāween n̄an jipan̄ ajri ro kōkajoorļo̧k tōmak eo aer ilo Rilo̧mo̧o̧r eo ej n̄an kwaļo̧k ippāer naan in kam̧ool eo an Josep Smith: “E emour! Bwe kōm ar lo E, em̧ool ituanbwijmaron̄ in Anij” (Katak im Bujen Ko 76:22–23).

M̧akūtkūt ko Maron̄ Kōm̧m̧ani

• Kwaļo̧k n̄an ajri ro pija in Visōn eo Kein Kajuon an Josep Smith (lale unin tōl eo an Jānwōde 4–10 ilo Itok, Ļoor Eō—N̄an Kajjojo Armej im Baam̧le ko). Kajjitōk ippān ajri ro n̄an jiron̄ eok ta eo ej waļo̧k ilo pija eo, im kajjitōk ippāer n̄an pukōt Jisōs Kraist. Kajjitōk ippān ajri ro eļan̄n̄e rejeļā kōn iien ko jet Josep Smith eaar lo Rilo̧mo̧o̧r eo. Ilo naan ko am̧ make, kwaļo̧k kōn en̄jake ko kar kōmeļeļeik ilo Katak im Bujen Ko 76:11–24; 110:1–7. Jiron̄ ajri ro ekōjkan an eoon kein kalōk tōmak eo aer ilo Jisōs Kraist.

• Ilo an ajri ro kōļare peij in m̧akūtkūt eo an wiik in, riit n̄an er eoon ko rej iookļo̧k. Kalikkar tipdik in meļeļe ko ilo pija ko me rej kōmeļeļeik ilo eoon ko. Kam̧ool n̄an ajri ro bwe Rikanaan Josep Smith eaar lo Jisōs Kraist, im en̄in ej juon un jejeļā bwe Jisōs emour.

pija ej bōk jikin katakin

Katakin Katak ko: Ajri ro Rerūttoļo̧k

Katak im Bujen Ko 76:11–24; 110:1–10; Josep Smith—Bwebwenato 1:14–17

Rikanaan Josep Smith eaar kam̧ool bwe Jisōs Kraist emour.

Mijen eo eaorōk tata an juon rikanaan ej n̄an kam̧ool kōn Jisōs Kraist. Jipan̄ ajri ro kalōk tōmak eo aer ilo Rilo̧mo̧o̧r eo kōn ekkatak jān naan in kam̧ool eo an Josep Smith kōn E.

M̧akūtkūt ko Maron̄ Kōm̧m̧ani

• Eoon kein rej kōmeļeļeik iien ko ke Jisōs Kraist eaar waļo̧kļo̧k n̄an Josep Smith: Katak im Bujen Ko 76:11–24; 110:1–10; Josep Smith—Bwebwenato 1:14–17. Ioon boot eo, kōllaajrak jet m̧ool ko jej ekkatak kōn Rilo̧mo̧o̧r eo jān eoon kein. Kajjitōk ippān ajri ro n̄an kwaļo̧k ewi wōt eoon ko rej katakin m̧ool ko kar kōllaajraki ioon boot eo. Bar ta eo jej ekkatak kōn Jisōs Kraist jān en̄jake ko an Josep Smith?

• Ilo peij in m̧akūtkūt eo an wiik in, jipan̄ ajri ro kajetjetļo̧k pija ko n̄an eoon ko an jeje ko rekwojarjar. Etke ej juon kōjeraam̧m̧an n̄an jeļā bwe Josep Smith eaar lo Rilo̧mo̧o̧r eo ekar jerkakpeje? Kwaļo̧k naan in kam̧ool eo am̧ bwe Jisōs Kraist emour im bwe Jospe Smith ej juon rikanaan.

Katak im Bujen Ko 63:49; 88:14–17, 27; 138:11, 14–17

Kōnke kōn Jisōs Kraist, Inaaj jerkakpeje.

Ekōjkan am̧ naaj jipan̄ ajri ro kam̧wilaļļo̧k kam̧m̧oolol eo aer kōn menin letok eo an jerkakpeje an Rilo̧mo̧o̧r eo n̄an kōj wōj aolep?

M̧akūtkūt ko Maron̄ Kōm̧m̧ani

• Kappeik kajjojo ajri juon iaan eoon kein an jeje ko rekwojarjar: Katak im Bujen Ko 63:49; 88:14–17, 27; 138:11, 14–17. Kajjitōk ippān ajri ro n̄an etale eoon ko aer n̄an kappukōt juon eoon me rej en̄jake ej kwaļo̧k ennaan eo an Ijtō. Kōm̧m̧an bwe ren kwaļo̧k ļōmņak ko aer. Eļan̄n̄e ewōr iien, kōm̧m̧an bwe ren kōm̧m̧an kaat ko me ej kwaļo̧k eoon ko raar loi me remaron̄ leļo̧k n̄an ro uwaan baam̧le ko aer ak ro m̧ōttāer.

• Kajjitōk ippān ajri ro ekōjkan aer naaj kar kōmeļeļeik n̄an juon jatier ajri edik ak juon m̧ōttaer ta meļeļe in n̄an bar jerkakpeje. Kōn ļōmņak ko, riiti ippān doon Katak im Bujen Ko 138:14–17, im ļōmņak kōn kajjitōk ko āinwōt kein: Ta ej waļo̧k n̄an jetōb ko ad im ānbwin ko n̄e jej mej? Ta ej waļo̧k n̄e jej jerkakpeje? Ekōjkan an Jisōs Kraist kar kōm̧m̧an bwe en weeppān jerkakpeje?

• Kwaļo̧k pija in alooj eo “Because He Lives” (ChurchofJesusChrist.org), im kōm̧m̧an bwe ajri ro ren kwaļo̧k ekōjkan ad en̄jake kōn ta eo Rilo̧mo̧o̧r eo eaar kōm̧m̧ane n̄an er

  Jisōs ej Jar

  Irooj in Jar, jān Yongsung Kim

Katak im Bujen Ko 18:10–13; 19:16–19; 45:3–5; 58:42–43

Kōnke kōn Jisōs Kraist, imaron̄ in jeorļo̧k jerawiwi ko aō.

Ilo kakobaba n̄an lo̧mo̧o̧ren kōj jān mej in kanniōk, Jisōs Kraist eaar letok juon iaļ n̄an kōj n̄an mour jān mej ilo jetōb—ilo bar juon wāween ba, n̄an jeorļo̧k jerawiwi ko ad im bar jepļaak n̄an im̧aan mejān Anij.

M̧akūtkūt ko Maron̄ Kōm̧m̧ani

• Je ioon boot eo ruo taitōļ ko reier wōt kein: Ta eo Rilo̧mo̧o̧r eaar kōm̧m̧ane im Ta eo ij aikuj kōm̧m̧ane. Kajjitōk ippān kajjojo ajri n̄an etale juon iaan eoon kein n̄an pukōt juon men me ej pād ium̧win taitōļ kein: Katak im Bujen Ko 18:10–13; 19:16–19; 45:3–5; 58:42–43. Kwaļo̧k lan̄lōn̄ im kam̧m̧oolol eo am̧ kōn ta eo Rilo̧mo̧o̧r eo eaar kōm̧m̧ane n̄an kōj.

• Jipan̄ ajri ro ekkatak laajrak in tōmak eo kein kajilu. Komaron̄ jipan̄ er kakilōklōke kōn kwaļo̧k pija ko me rej etal ippān naan ko raorōk.

• Kwaļo̧k pija in alooj eo “The Shiny Bicycle” (ChurchofJesusChrist.org), ak kwaļo̧k juon bwebwenato kōn eo am̧ make kōn juon ajri eo me eaar kōm̧m̧ane juon kāālōt ebōd innām kar ukweļo̧k. Jipan̄ ajri ro ekōnono kōn ta eo ajri eo ilo bwebwenato eo eaar kōm̧m̧ane n̄an bōk jeorļo̧k bōd. Ekōjkan an Rilo̧mo̧o̧r eo kar kōm̧m̧an bwe en pidodo n̄an kōj n̄an jeorļo̧k bōd?

pija ej bōk jikin ekkatak

Kōketak Ekkatak ilo M̧weo

Jipan̄ ajri ro ļōmņak kōn men ko jemaron̄ kōm̧m̧ane n̄an jiron̄ armej ro jet—eļap tata ro uwaan baam̧le eo aer—ta eo Jisōs Kraist eaar kōm̧m̧ane n̄an kōj. Iien eo tok juon kom̧ij ioon doon, kajjitōk ippāer n̄an kwaļo̧k ippam̧ ta eo raar kōm̧m̧ane.

Kōkōm̧anm̧anļo̧k Ad Katakin

Ajri ro rej jeraam̧m̧an jān bar āliji. Jab kōm̧tālik n̄an bar āliji m̧akūtkūt ko elōn̄ alen ko, eļap tata ippān ajri ro reddikļo̧k. Āliji im bar āliji enaaj jipan̄ ajri ro keememej ta eo rej ekkatak.

peij in m̧akūtkūt eo: Josep Smith eaar lo Jisōs Kraist.