Aolep Bukwe Renaaj Bukwelōlō, jān J. Kirk Richards

M̧aaj 22–28.

Katak im Bujen Ko 29

Jisōs Kraist Enaaj aiintok Armej ro An

Kwojeļā kajjien ajri ro kwoj katakin er, im elōn̄ m̧ool ko ilo Katak im Bujen Ko 29 me remaron̄ kōjeraam̧m̧an er. Ļoor im̧we eo an Jetōb ilo am̧ ekaktak kōn jekjōn 29, im ļooke im̧we ko kōn ekōjkan am̧ naaj katakin ajri ro m̧ool kein.

Je En̄jake ko Rej Im̧we Eok

Pija eo ej Bōk Jikin Kajjitōk n̄an Kwaļo̧ke

Ļōmņak in kajjitōk ippān jejjo ajri ro n̄an kwaļo̧k jet iaan wāween ko rej ekkatak gospel eo ilo m̧weo—kajjojo ļak iaer ak ippān baam̧le ko aer. Kajjitōk ippān juon ak ļōn̄ļo̧k ajri ro n̄an kwaļo̧k naan in kam̧ool eo aer kōn juon men eo raar ekkatak ilo wiik in ilo m̧weo.

Katakin Katak ko: Ajri ro Reddikļo̧k

Katak im Bujen Ko 29:1–2

Jisōs Kraist enaaj aiintok armej ro An m̧okta jān An bar itok.

Jej aiintok doon jān Rilo̧mo̧o̧r eo n̄e jej bōk im ļoor katak ko An.

M̧akūtkūt ko Maron̄ Kōm̧m̧ani

• Kōm̧m̧an bwe ajri ro ren kōļare peij in m̧akūtkūt eo an wiik in ilo am̧ kwaļo̧k pija in alooj eo “Chicks and Hens” (ChurchofJesusChrist.org). Kajjitōk ippān ajri ro n̄an ron̄jake ekōjkan an lo̧lo̧ eo kōjparok jojo ko.

• Ālkin riiti Katak im Bujen Ko 29:1–2, kōm̧m̧an kōļ kōn keidi eo kōn an Jisōs aiintok armej ro An “āinwōt juon lo̧lo̧ ej aini jojo ko nejin.” Juon ajri emaron̄ arin juon lo̧lo̧ im kāālet juon kona in ruum̧ eo n̄an jutak ie. N̄e e ļaddik eo ak e leddik eo ej “kōm̧m̧an ainikien lo̧lo̧ eo,” kōm̧m̧an bwe aolep ajri ro ren aiintok doon ipeļaakin e ļaddik eo ak e leddik eo. Ajri ro remaron̄ kajojo bōk kuņaer āinwōt lo̧lo̧ eo. Kotak juon pija in Rilo̧mo̧o̧r eo im kajjitōk ippān ajri ro n̄an aiintok doon n̄an E. Kwaļo̧k ippān ajri ro ekōjkan an Jisōs jipan̄ kōj n̄e jej aiintok doon n̄an E.

  

  Ewi Lōn̄ In, jān Liz Lemond Swindle

Katak im Bujen Ko 29:2–11

Imaron̄ m̧aanjabpopo n̄an ioon Rilo̧mo̧o̧r eo.

Juon raan, kajjojo iaad naaj pād ilo im̧aan mejān Jisōs Kraist. Ilo an raan jab eo maron̄ ettoļo̧k wōt ilo ilju im jekļaj, ajri ro remaron̄ in wōt ļōmņak kōn ta eo enaaj āinwōt im ekōjkan aer m̧aanjapbobo n̄an e.

M̧akūtkūt ko Maron̄ Kōm̧m̧ani

• Kwaļo̧k juon pija in Itok eo Kein Karuo (lale Bok in Gospell Pija, nō. 66), im jipan̄ juon ajri riiti Katak im Bujen Ko 29:11. Jipan̄ ajri ro kile eoon ko ilo jeje ko rekwojarjar me rej kōmeļeļeik ta eo rej loe ilo pija eo. Kwaļo̧k ippān ajri ro ekōjkan am̧ en̄jake kōn itok eo an Jisōs Kraist n̄an laļ in bar juon alen.

• Āinwōt juon kūlaaj, al juon al kōn Itok Eo Kein Karuo, eo āinwōt “When He Comes Again” (Children’s Songbook, 82–83). Kwaļo̧k n̄an ajri ro pija ko kōn men ko remaron̄ kōm̧m̧ani n̄an m̧aanjabpopo n̄an ioon Rilo̧mo̧o̧r eo im mour Ippān n̄an indeeo (lale Bok in Gospel Pija n̄an jet ļōmņak ko). Jipan̄ er pukōt wāween ko jet n̄an m̧aanjabpopo ilo Katak im Bujen Ko 29:2–10.

Katakin Katak ko: Ajri ro Rerūttoļo̧k

Katak im Bujen Ko 29

Jemedwōj Ilan̄ eaar kōpoooj juon karōk in lo̧mo̧o̧r n̄an eō.

An ļapļo̧k an juon ajri jeļā kōn karōk in lo̧mo̧o̧r eo an Anij, eļapļo̧k an e ļaddik eo ak e leddik eo maron̄ kōjerbal tōmak ilo Jemedwōj Ilan̄ im Jisōs Kraist n̄an ļoor karōk jab eo. Ta m̧ōttan ko an karōk eo jej en̄jake im̧we n̄an pedped ioon?

M̧akūtkūt ko Maron̄ Kōm̧m̧ani

• Kajjitōk ippān jet ajri ro n̄an kwaļo̧k juon waanjon̄ak kōn juon iien me eaar wōr juon aer karōk, eo āinwōt juon tūreep ak kadedeļo̧k juon jerbal. Komaron̄ barāinwōt kwaļo̧k waanjon̄ak ko kōn karōk ko, ko āinwōt juon kōļōnta kōn m̧akūtkūt ko kar je ioon ak naan in kōmeļeļe ko n̄an kōm̧m̧ane juon men. Etke karōk ko ewōr tokjāer? Kwaļo̧k ippān ajri ro bwe Jemedwōj Ilan̄ ewōr juon an karōk me enaaj kōtļo̧k bwe jen erōm̧ļo̧k āinwōt E.

• N̄an jipan̄ ajri ro meļeļe karōk eo an Anij, kōm̧m̧an kakōļļe ko kōn naan kein: mour eo m̧okta, Kōm̧anm̧an eo, Wōtlo̧k eo, mour in ioon laļ in, im Itok eo Kein Karuo. Ālkin kōmeļeļeik kajjojo naan (lale Katak im Buen Ko 29:9–45, leļo̧k n̄an kajjojo kakōļļe ko n̄an ajri ro, im kajjitōk ippāer n̄an jutak ilo juon ļain ilo ellaajrak eo ejim̧we n̄an kwaļo̧k n̄eet kajjojo iien ko rej waļo̧k ilo karōk eo an Jemedwōj Ilan̄. Kajjojo ajri remaron̄ kwaļo̧k ta eo e ļaddik eo ak e leddik eo kōn ta eo ilo kakōļļe eo an ļaddik ak an leddik eo. Jipan̄ ajri ro lo ekōjkan jeļā kōn karōk eo an Jemedwōj Ilan̄ jipan̄ kōj erōm̧ļo̧k āinwōt E im Rilo̧mo̧o̧r eo.

• Kōjerbale juon ak elōn̄ļo̧k in m̧akūtkūt ko itulaļ n̄an katakin m̧ool ko kōn karōk eo im ekōjkan aer jerbal n̄an kōj. Ļōmņak in kajjitōk ippān jejjo ajri ro n̄an itok ilo aer pojak n̄an jipan̄ eok katakin.

  • Anemkwoj in kāālōt. Jipan̄ ajri ro meļeļe bwe Jemedwōj Ilan̄ eaar letok n̄an kōj menin letok eo an anemkwoj in kāālōt—anemkwoj eo n̄an kāālōt—im kōm̧m̧an bwe jen eddo kōn kāālōt ko ad (lale Katak im Bujen Ko 29:39–40). Kōm̧m̧ane ruo kakōļļe ko n̄an kajjojo ajri: juon eo me ej jutak kōn kōm̧m̧ane juon kāālōt em̧m̧an (n̄an waanjon̄ak, juon turin māj etōn̄ dikdik) im juon eo me ej jutak kōn kōm̧m̧ane juon kāālōt nana (n̄an waanjon̄ak, juon turin māj jaimeme). Kwaļo̧k waanjon̄ak ko kōn kāālōt ko rem̧m̧an im kāālōt ko renana, im kajjitōk ippān ajri ro n̄an kajutak kakōļļe eo ejim̧we. Kajjitōk ippān ajri ro n̄an kwaļo̧k kōjeraam̧m̧an ko me rej itok n̄e jej ļoor Jisōs Kraist. Etke Jemedwōj Ilan̄ ej kōtlo̧k bwe jen kōm̧m̧ani kāālōt ko ad make?

  • Kien ko. Kajjitōk ippān ajri ro n̄an kōm̧m̧ane juon laajrak ioon boot eo kōn jet iaan kien ko. (N̄an waanjon̄ak, remaron̄ etale Exodus 20:3–17 im Bok in Gospel Pija, 103–15.) Etke Jemedwōj Ilan̄ ej letok n̄an kōj kien ko? Ta eo jej ekkatak jān Katak im Bujen Ko 29:35 kōn kien ko an Jemedwōj Ilan̄?

  • Pinmuur eo an Jisōs Kraist. Jipan̄ ajri ro lo bwe Jemedwōj Ilan̄ eaar kōpooj juon iaļ n̄an kōj n̄an jeorļo̧k ad bōd n̄e jej kōm̧m̧ani kāālōt ko rebōd. Kajjitōk ippān kajjojo ajri n̄an riiti juon iaan eoon ko ilo Katak im Bujen Ko 29:1, 42–43 im kwaļo̧k ta eo ej katakin kake kōn Pinmuur eo an Rilo̧mo̧o̧r. Kappukōt juon wāween em̧m̧an n̄an kajjitōk ippān ajri ro n̄an kwaļo̧k ta eo raar loe, āinwōt ilo laajrak in raan in ļotak ko aer, ak jān kadutata n̄an aitoktata, im ko eierļo̧k.

Katak im Bujen Ko 29:1–2

Jisōs Kraist enaaj aiintok armej ro An m̧okta jān An bar itok.

Ekōjkan am̧ maron̄ jipan̄ ajri ro kwoj katakin er itok limo kōn jipan̄ kōn aintok Israel?

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an riiti Katak im Bujen Ko 29:1–2 im kappukōt ta eo Irooj ej keidi E make n̄an. Ta eo ajri ro rej pijaikļo̧k n̄e rej riiti keidi in? Ta eo Irooj eaar ba jej aikuj kōm̧m̧ane n̄an aiintok doon jān E?

• Juon wāween n̄an kōm̧m̧an bwe ajri ro ren itok limo kōn aiintok doon eo ej n̄an kwaļo̧k bwebwenato eo an juon eo me eaar kobatok ilo Kabun̄ in. N̄an waanjon̄ak, eo eaar kwaļo̧k kadkad in baam̧le eo am̧ n̄an Kabun̄ in? Ļōmņak in kajjitōk ippān ajri ro m̧oktaļo̧k n̄an pukōt membōr eo m̧oktata an Kabun̄ in ilo baam̧le ko aer im kwaļo̧k e ļaddik eo ak e leddik eo bwebwenato eo ippān kūlaaj eo.

• Kajjitōk ippān ajri ro n̄an kōm̧m̧ane juon laajrak in wāween ko remaron̄ jipan̄ armej ro aiintok doon n̄an Rilo̧mo̧o̧r eo. N̄an waanjon̄ak, remaron̄ kajjitōk ippān eo m̧ōttāer ak ro uwaan baam̧le eo n̄an juon m̧akūtkūt an Būraimere ak n̄an juon nokon in jota ippān baam̧le ko aer.

• Laajrak in tōmak jon̄oul ej kōnono kōn aiintok doon eo an Israel. Elōn̄ ke iaan ajri ro kar kakilōklōke laajrak in tōmak in? Eļan̄n̄ rej, kajjitōk ippāer n̄an kōnono kake n̄an kūlaaj eo. Eļan̄n̄e jaab, jipan̄ er kōm̧m̧ane juon kōttōpar n̄an kakilōklōk e.

Kōketak Ekkatak ilo M̧weo

Kajjitōk ippān ajri ro n̄an je juon m̧ool raar ekkatak ilo kūlaaj eo. Kajjitōk kōn jejjo ļōmņak ko kōn ta eo renaaj kōm̧m̧an n̄an kwaļo̧k m̧ool in ippān baam̧le ko aer.

Kōkōm̧anm̧anļo̧k Ad Katakin

Kanooj leļo̧k am̧. Kanooj leļo̧k am̧ n̄an ekōjkan an ajri ro ilo kūlaaj eo am̧ uwaak n̄an ekkatak m̧akūtkūt ko. Eļan̄n̄e rej jino jab tōt wōt, emaron̄ in iien n̄an ilo̧k n̄an bar juon m̧akūtkūt ak n̄an etetal. Eļan̄n̄e kwoj kile bwe ajri ro rej bōk kuņaer im ekkatak, jab en̄jake kōņaan eo n̄an etal wōt.