M̧weo Im̧ōn Piter Whitmer, jān Al Rounds

M̧aaj 1–7

Katak im Bujen Ko 20–22

“Wanlōn̄tak eo an Kabun̄ eo an Kraist”

Ilo am̧ ekkatak Katak im Bujen Ko 20–22 wiik in, aitia in katakin ko remaron̄ itok n̄an kōļmenļo̧kjeņ eo am̧. Komaron̄ lo dam̧oļo̧k in aitia in katakin ko ilo unin tōl in.

Je En̄jake ko Rej Im̧we Eok

Pija eo ej Bōk Jikin Kajjitōk n̄an Kwaļo̧ke

Kwaļo̧k pija eo ilo unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko, im kajjitōk ippān ajri ro n̄an kwaļo̧k ta eo rejeļā kōn ejaak eo an Kabun̄ in. N̄an jipan̄, lale “Chapter 9: Organization of the Church of Jesus Christ” (Doctrine and Covenants Stories, 40–42).

Katakin Katak ko: Ajri ro Reddikļo̧k

Katak im Bujen Ko 20–21

Kabun̄ eo an Jisōs Kraist em̧ōj an bar jepļaaktok.

Ilo Eprōļ 5, 1830 eo, Josep Smith im Oliver Cowdery raar koba ippān ro jet n̄an ejaake Kabun̄ eo an Jisōs Kraist kar bar kōjepļaaktok. Ekōjkan am̧ maron̄ jipan̄ ajri ro kwoj katakin er meļeļe aorōk eo an iien in?

M̧akūtkūt ko Maron̄ Kōm̧m̧ani

• Kōjerbal jekjōn heading eo n̄an Katak im Bujen Ko 21 ak jebta 9 in Doctrine and Covenants Stories n̄an kwaļo̧k ilo tukadu in n̄an ajri ro ta eo eaar waļo̧k ilo raan eo Kabun̄ in eaar ejaak. N̄an jipan̄ er meļeļe iien in, kwaļo̧k pija in alooj eo “Organization of the Church” (ChurchofJesusChrist.org).

• Jiron̄ ajri ro etke kwoj kam̧m̧oolol bwe ewōr ippād Kabun̄ eo an Jisōs Kraist im Armej ro Rekwojarjar ilo Raan-ko Āliktata. Kōmeļeļeik bwe erōm̧ juon uwaan Kabun̄ in ej kōpooj kōj n̄an mour bar juon alen ippān Anij. Jipan̄ er āliji eoon eo “Ij uwaan Kabun̄ eo an Jisōs Kraist im Armej ro Rekwojarjar ilo Raan-ko Āliktata” jet alen ak al “The Church of Jesus Christ” (Children’s Songbook, 77).

Katak im Bujen Ko 20:37, 71–74

Ij m̧aanjabpopo n̄an peptaij.

Ajri ro kwoj katakin er rej m̧aanjabpopo n̄an peptaij. Jipan̄ er meļeļe ta meļeļe in n̄an peptaij im ta eo remaron̄ kōm̧m̧ane n̄an pojak.

M̧akūtkūt ko Maron̄ Kōm̧m̧ani

• Kwaļo̧k juon pija in an juon ajri kar peptaij (lale Bok in Pija an Gospel, nō. 104), im kajjitōk ippān ajri ro n̄an kwaļo̧k men ko rej kili. Riiti ak ba ilo tukadu in Katak im Bujen Ko 20:71–74, n̄an jipan̄ ajri ro lo ekōjkan an pija eo jetjet n̄an naan in kōmeļeļe ko ilo eoon kein. Kam̧ool bwe jej aikuj ļoor waanjon̄ak eo an Rilo̧mo̧o̧r eo im peptaij ilo wāween Eaar kakien e.

• Ba ilo tukadu in Katak im Bujen Ko 20:37. Ta eo jej ekkatak jān eoon in kōn armej ro me rej kōņaan peptaij? Kwaļo̧k pija ko kōn wāween ko ajri ro remaron̄ m̧aanjabpopo n̄an peptaij, ko āinwōt jerbal n̄an ro jet im jar.

• Al juon al kōn peptaij, ko āinwōt “When I Am Baptized” (Children’s Songbook, 103), ak alooje “The Baptism of Jesus” (biblevideos.ChurchofJesusChrist.org). Kajjitōk ippān ajri ro n̄an kwaļo̧k en̄jake ko aer kōn aer kar peptaij.

Katak im Bujen Ko 20:75–79

Kwojkwoj eo ej jipan̄ eō keememej Jisōs Kraist.

Ekōjkan aō maron̄ jipan̄ ajri ro em̧m̧anļo̧k aer meļeļe etke jej bōk m̧ōttan kwojkwoj eo kajjojo wiik?

M̧akūtkūt ko Maron̄ Kōm̧m̧ani

• Riiti Katak im Bujen Ko 20:77 n̄an ajri ro. Kajjitōk ippāer n̄an jutak n̄e rej ron̄ ta eo jej aikuj keememej n̄e jej m̧ōn̄ā pilawe in kwojkwoj eo. Kōm̧m̧ane ejja āinwōt kōn eoon 79. (Komaron̄ kōņaan kwaļo̧k bwe jej idaak aibōj ijello̧kin wain.) Ekōjkan ad maron̄ kwaļo̧k bwe jej keememej Jisōs?

• Jiron̄ ajri ro kōn juon iien ke kwar kōm̧m̧ane juon kallim̧ur im kar kōjparok e. Kajjitōk ippāer n̄an kwaļo̧k kōn ejja bwebwenato rōt in wōt ko aer make. Kōmeļeļeik bwe n̄e jej bōk kwojkwoj eo, jej kōm̧m̧ani kallim̧ur ko. Riiti Katak im Bujen Ko 20:77, kōmejajaik kallim̧ur ko jej kōm̧m̧ani n̄an “keememej e iien otemjej” im “kōjparok kien ko an.” Kajjitōk ippān ajri ro n̄an kwaļo̧k juon iien me raar keememej Rilo̧mo̧o̧r eo ak kar pokake juon kien.

  

  Kwojkwoj eo ej kakeememej eō n̄an ļōmņak kōn Jisōs Kraist.

Katakin Katak ko: Ajri ro Rerūttoļo̧k

Katak im Bujen Ko 20–21

Kabun̄ eo an Jisōs Kraist em̧ōj an bar jepļaaktok.

Ilo pokake kean̄ eo an Irooj, Josep Smith, Oliver Cowdery, im ro jet raar ejaake Kabun̄ eo an Jisōs Kraist kar kōjepļaaktok ilo Eprōļ 6, 1830 eo. Ļōmņak kōn wāween ko n̄an jipan̄ ajri ro lo ekōjkan an iien in kar kōjeraam̧m̧an mour ko aer.

M̧akūtkūt ko Maron̄ Kōm̧m̧ani

• Kakeememej ajri ro kōn jet iaan iien ko raorōk raar ekkatak kaki—ko āinwōt jepļaaktok eo an priesthood eo im ukook eo an Bok in Mormon. Etke men kein raar aikuj in kōm̧m̧an m̧okta jān an Kabun̄ in maron̄ in kar ejaak?

• Kwaļo̧k pija ko an men ko jej kōm̧m̧ani ilo Kabun̄ in me kar kōmeļeļeik ilo jekjōn 20, ko āinwōt ekkatak kōn Anij im Jisōs Kraist, jerbal in karejar, peptaij, im bōk kwojkwoj eo. Jipan̄ ajri ro kōkkari pija kein ippān eoon ko me rej kōmeļeļeik er, ko āinwōt Katak im Bujen Ko 20:17–21, 47, 70, 72–74, 75–79, im heading eo n̄an jekjōn 21. Ta kōjeraam̧m̧an ko ewōr ippād kōnke jej membōr ro an Kabun̄ in?

• Al ippān doon “The Church of Jesus Christ” (Children’s Songbook, 77).

Katak im Bujen Ko 20:37, 77, 79

Ke iaar peptaij, iaar kallim̧ur n̄an ļoor Jisōs Kraist.

Elōn̄ iaan ajri ro ilo kūlaaj eo am̧ raar peptaij. Kakeememej er kōn bujen eo raar kōm̧m̧ane “in bōk ioer etan Jisōs Kraist” (Katak im Bujen Ko 20:37).

M̧akūtkūt ko Maron̄ Kōm̧m̧ani

• Kajjitōk ippān jet ajri ro n̄an itok ilo m̧aanjabpopo n̄an kwaļo̧k ta eo raar en̄jake ak ioone ke raar peptaij. Bōlen remaron̄ bōktok juon pija jān raan in peptaij eo aer n̄an kwaļo̧k n̄an kūlaaj eo. Etke raar kāālet n̄an peptaij? Ekōjkan an kar peptaij im bōk Jetōb Kwojarjar eo kar kōjeraam̧m̧an er?

• Riiti ippān doon Katak im Bujen Ko 20:77, im kajjitōk ippān ajri ro n̄an kile kallim̧ur ko jej kōm̧m̧anin ilo iien kwojkwoj eo. N̄an jipan̄ ajri ro meļeļe bwe elōn̄ men ko remaron̄ kōm̧m̧ani aolep raan n̄an “keememej iien otemjej” Jisōs Kraist, kajjitōk ippān juon ajri n̄an kōm̧m̧an kōl in juon men eo emaron̄ kōm̧m̧ane n̄an keememej Rilo̧mo̧o̧r eo. Kajjitōk ippān ro jet n̄an kajidedeik ta m̧akūtkūt eo. Ekkar n̄an eoon 77, ekōjkan ad jeraam̧m̧an n̄e jej keememej Rilo̧mo̧o̧r eo iien otemjej?

• Jipan̄ ajri ro keidi Katak im Bujen Ko 20:37 ippān eoon 77 n̄an pukōt juon eoon me ej āliji ippāero jim̧or. Kwaļo̧k n̄an ajri ro juon men me ewōr juon āt ie (ko āinwōt etan juon m̧weiuk ak etan juon make). Ta eo āt eo ej jiron̄ kōj kōn aitem eo? Riiti ippān doon Katak im Bujen Ko 20:37 n̄an lo āt ko jej bōk iood make n̄e jej peptaij. Ta meļeļe in n̄an bōk iood etan Jisōs Kraist? Ekōjkan ad aikuj ļōmņak im m̧akūtkūt kōnke ewōr ippād āt in?

Katak im Bujen Ko 21:4–6

Ij jeraam̧m̧an n̄e ij ļoor rikanaan eo.

Ekōjkan am̧ naaj jipan̄ ajri ro bōk kōjeraam̧m̧an ko kar kallim̧ur kaki ilo eoon kein n̄an ro me rej ļoor rikanaan eo?

M̧akūtkūt ko Maron̄ Kōm̧m̧ani

• Je ioon boot eo Kien ko im kōjeraam̧m̧an ko. Kajjitōk ippān ajri ro n̄an riiti Katak im Bujen Ko 21:4–6, kappukōt kein ko Irooj eaar litok im kōjeraam̧m̧an ko Eaar kallim̧ur kaki. Kajjitōk ippāer n̄an je ioon boot eo ta eo rej loe.

• Kwaļo̧k juon pija in rikanaan eo kiiō, im kajjitōk ippān ajri ro n̄an kwaļo̧k jet men raar ekkatak ak ron̄ jān e kiiō epaak. Riiti ippān doon Katak im Bujen Ko 21:5. Kajjitōk ippān ajri ro n̄an je ak jin̄aiki juon men remaron̄ kōm̧m̧ane n̄an ļoor rikanaan eo. Kwaļo̧k naan in kam̧ool eo am̧ bwe n̄e jej ļoor rikanaan eo, jej ļoor Rilo̧mo̧o̧r eo.

Kōketak Ekkatak ilo M̧weo

Kajjitōk ippān ajri ro n̄an kōm̧m̧ane juon laajrak in un ko rej kam̧m̧oolol kake kōn Kabun̄ eo an Jisōs Kraist kar kōjepļaaktok. Kōketak er n̄an kwaļo̧k laajrak eo aer ippān juon uwaan baam̧le ak eo m̧ōttaer.

Kōkōm̧anm̧anļo̧k Ad Katakin

Kōjerbal bwebwenato ko n̄an katakin katak ko. “Bwebwenato ko rej jipan̄ ajri ro lo ekōjkan an gospel eo jerbal n̄an jekjek in mour aolep raan. … N̄e katakin ajri ro reddik, ļōmņaki wāween ko n̄an kobaik er ilo bwebwenato eo; n̄an waanjon̄ak, remaron̄ jibwe pija ko, āliji eoon ko, ak kōm̧m̧ani kōl ko an m̧akūtkūt eo” (Teaching in the Savior’s Way, 25).