Katak im Bujen Ko 2021
M̧aaj 15–21. Katak im Bujen Ko 27–28: “Aolep Men Aikuj in Kōm̧m̧an ilo Koņ”

“M̧aaj 15–21. Katak im Bujen Ko 27–28: ‘Aolep Men Aikuj in Kōm̧man ilo Koņ,’” Itok, Ļoor Eō—N̄an Būraimere: Katak im Bujen Ko 2021 (2020)

“M̧aaj 15–21. Katak im Bujen Ko 27-28,” Itok, Ļoor Eō—N̄an Būraimere: 2021

Pija
Josep Smith

M̧aaj 15–21

Katak im Bujen Ko 27–28

“Aolep Men Aikuj in Kōm̧man ilo Koņ”

M̧ool ko kar katakin ilo Katak im Bujen Ko 27–28 remaron̄ kōkajoorļo̧k naan in kam̧ool ko an ajir ro kwoj katakin. Ilo am̧ ļōmņak kōn aikuj ko an ajri ro, ewi wōt m̧ool ko kar im̧weik eok n̄an pedped kake ilo kūlaaj?

Je En̄jake ko Rej Im̧we Eok

Pija
pija ej bōk jikin kwaļo̧k

Pija eo ej Bōk Jikin Kajjitōk n̄an Kwaļo̧ke

Kwaļo̧k juon pija in Rikanaan Josep Smith im juon pija in rikanaan eo kiiō. Kajjitōk ippān ajri ro n̄an kwaļo̧k etan armej ro ilo pija ko im kwaļo̧k men ko me rikanaan ro rej kōm̧m̧ani.

Pija
pija ej bōk jikin katakin

Katakin Katak ko: Ajri ro Reddikļo̧k

Katak im Bujen Ko 27:1–2

Kwojkwoj eo ej jipan̄ eō keememej Jisōs Kraist.

Ajri ro reddik remaron̄ katak kōn aorōk eo an kwojkwoj eo im kappukōt wāween ko n̄an keememej Rilo̧mo̧o̧r eo ilo iien kean̄ in ekwojarjar.

M̧akūtkūt ko Maron̄ Kōm̧m̧ani

  • Kwaļo̧k n̄an ajri ro juon pija in an Jisōs leļo̧k kwojkwoj eo n̄an Rijilōk ro An (lale Bok in Gospel Pija, nō. 54). Ta eo emaron̄ in kar āinwōt n̄an bōk kwojkwoj eo ippān Rilo̧mo̧o̧r eo? (lale Katak im Bujen Ko 27:5). Riiti Katak im Bujen Ko 27:2, ijjino kōn “keememeje n̄an Jema,” im kajjitōk ippān ajri ro n̄an ron̄jake ta eo Rilo̧mo̧o̧r eo ej kōņaan bwe jen keememej n̄e jej bōk kwojkwoj eo.

  • Kwaļo̧k n̄an ajri ro jet pilawe im dān im juon pija in Rilo̧mo̧o̧r eo. Kōm̧m̧an bwe ajri ro ren jibwe pija eo ilo am̧ katakin er bwe kwojkwoj eo ej jipan̄ kōj keememej Jisōs Kraist.

  • Jipan̄ ajri ro ļōmņak kōn men ko remaron̄ kōm̧m̧ani n̄an keememej Jisōs ilo iien kwojkwoj eo. Ta eo baam̧le ko aer rej kōm̧m̧ani n̄an jipan̄ doon n̄an kautiej? Kajjitōk ippān ajri ro n̄an jin̄aik juon pija eo remaron̄ kalimjōke ilo iien kwojkwoj eo n̄an jipan̄ er keememej Rilo̧mo̧o̧r eo.

Katak im Bujen Ko 27:15–18

Kein tariņae eo an Anij ej kōjparok eō.

Ļōmņak kōn wāween ko komaron̄ jipan̄ ajri ro kwoj katakin er lo ekōjkan an kōjparok kien ko ej āinwōt kōņaki kein tariņae eo an Anij.

M̧akūtkūt ko Maron̄ Kōm̧m̧ani

  • Kwaļo̧k n̄an ajri ro juon pija in kein tariņae (lale unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko). Ilo am̧ riiti Katak im Bujen ko 27:15–18, jipan̄ ajri ro puko̧t m̧ōttan ko an kein tariņae eo ilo pija eo. Jiron̄ ajri ro ekōjkan an kein tariņae eo an Anij kar jipan̄ eok “jutak ņae raan eo enanan” (eoon 15).

  • Unin tōl eo n̄an riEpesōs ilo Itok Ļoor Eō—N̄an Būraimere: Kallim̧ur Ekāāl 2019 ewōr juon an peij in m̧akūtkūt kōn kein tariņae eo an Anij. M̧ūjitiļo̧k m̧o̧ttan ko an kein tariņae eo, im kōm̧m̧an bwe ajri ro ren likūt er ilo juon iaan pija ko ilo am̧ riiti Katak im Bujen Ko 27:15–18. Jipan̄ ajri ro meļeļe men ko remaron̄ kōm̧m̧ani n̄an likūt kein tariņae eo an Anij, āinwōt jar, kāālet jim̧weo eo, jerbal n̄an ro jet, im ko eierļo̧k.

    Pija
    ajri ro rej ikkure

    Imaron̄ kōņak kein tariņae eo an Anij.

Katak im Bujen Ko 28:2, 6–7

Rikanaan eo ej tōl Kabun̄ in.

Ajri ro kwoj katakin er rejeļā ke etke ewōr ad rikanaan ro? Kōjerbal Katak im Bujen Ko 28 n̄an jipan̄ er jeļā bwe rikanaan eo ej e wōt juon me emaron̄ tōl Kabun̄ in.

M̧akūtkūt ko Maron̄ Kōm̧m̧ani

  • Riiti ak ba ilo naan ko am̧ make bwebwenato eo an Hiram Page (lale “Chapter 14: The Prophet and Revelations for the Church,” Doctrine and Covenants Stories, 56–57). Kwaļo̧k naan in kam̧ool eo am̧ bwe Jemedwōj Ilan̄ im Jisōs Kraist raar kāālet Josep Smith n̄an tōl Kabun̄ in ilo tōre eo an (lale Katak im Bujen Ko 28:2). Kwaļo̧k naan in kam̧ool eo am̧ bwe rikanaan eo kiiō ej kūr n̄an jipan̄ Irooj tōl Kabun̄ eo An ilo tōre in ad.

  • Kajjitōk ippān ajri ro n̄an ikkure kōn “ļoor ritōl eo”—juon ajri emaron̄ jutak ilo im̧aan ruum̧ eo, im aolepān ajri ro remaron̄ anōk jabdewōt men ej kōm̧m̧ane. Menin emaron̄ tōlļo̧k n̄an juon ekōnono kōn etke jej ļoor rikanaan eo. Komaron̄ kwaļo̧k juon pija in Jisōs Kriast im kōmejajaik bwe jej ļoor rikanaan eo kōnke ej ļoor Rilo̧mo̧o̧r eo im ej ekōnono naan ko an Rilo̧mo̧o̧r eo.

Pija
pija ej bōk jikin katakin

Katakin Katak ko: Ajri ro Rerūttoļo̧k

Katak im Bujen Ko 27:1–2

Kwojkwoj eo ej jipan̄ eō keememej Jisōs Kraist.

Ekōjkan an ekkatak kōn pedped in katak ko ilo Katak im Bujen Ko 27:1–2 maron̄ jipan̄ ajri ro kwoj katakin wōr juon en̄jake eļap meļeļe in ilo bōk kwojkwoj eo?

M̧akūtkūt ko Maron̄ Kōm̧m̧ani

  • Kajjitōk ippān ajri ro n̄an je men ko rej ļōmņak Rilo̧mo̧o̧r eo enaaj kar kōņaan bwe ren jeļā kōn kwojkwoj eo. Elan̄n̄e emenin aikuj, remaron̄ riiti “Sacrament” ilo Unin Tōl eo n̄an Jeje Ko Rekwōjarjar (scriptures.ChurchofJesusChrist.org). Kwaļo̧k n̄an er jet iaan men ko raar je, im kajjitōk ippāer n̄an kobaikļo̧k n̄an laajrak ko aer ālkin riiti Katak im Bujen Ko 27:1–2. Ekōjkan an naaj men ko ilo laajrak ko aer jelet ekōjkan aer bōk kwoj kwojkwoj eo kajjojo Jabōt?

  • Jipan̄ ajri ro ļōmņak kōn ta meļeļe in n̄an bōk kwojkwoj eo “kōn juon wōt erreim̧aanļo̧k n̄an aiboojoj eo an [Anij]” (eoon 2). Ekōnono kōn kajjitōk ko āinwōt kein: Ta jet iaan kōm̧ad ko māj ko mejād ak ļōmņak ko ad remaron̄ in kalimjōki ilo iien kwojkwoj eo? Ta eo jemaron̄ kōm̧m̧ane n̄an pedped wōt ad ioon Rilo̧mo̧o̧r eo ilo ad bōk kwojkwoj eo? Ekōjkan an naaj menin jipan̄ kōj ļoor E aolep raan?

Katak im Bujen Ko 27:15–18

Kein tariņae an Anij ej jipan̄ n̄a jutak ņae nana.

Ajri ro kwoj katakin er renaaj jelm̧ae elōn̄ kareel ko renana ilo aolepān mour ko aer. Jemedwōj Ilan̄ ekōņaan jipan̄ er jutak ņae nana. Ekōjkan am̧ maron̄ im̧we er n̄an kōņak kein tariņae an Anij?

M̧akūtkūt ko Maron̄ Kōm̧m̧ani

  • Kajjitōk ippān ajri ro n̄an riiti Katak im Bujen Ko 27:15–18 im jin̄aik m̧ōttan ko an kein tariņae eo kar kōnono kake (eļan̄n̄e emenin aikuj, remaron̄ lale pija eo ilo unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko). Ta eo naan ko rej kōmeļeļeik kajjojo m̧ōtta an kein tariņae eo katakin kōj kōn ta eo jej aikuji n̄an tariņaik devil eo ipeļaakid (n̄an waanjon̄ak, jim̧we, tōmak, lo̧mo̧o̧r, im ko eierļo̧k)?

  • Kajjitōk ippān ajri ro n̄an ļōmņak kōn men ko remaron̄ kōm̧m̧ani n̄an jutak ņae kapo ko ipeļaakier. Kajjitōk ippāer n̄an kadedeļo̧k jāntōj eo “Jej kōņak kein tariņae an Anij aolep raan kōn …” kōn ļōmņak ko aer. Jipan̄ er lo ekōjkan an kijejeto ko aer n̄an itok n̄an Kraist jipan̄ er kōņak kein tariņae an Anij.

Katak im Bujen Ko 28:1–7, 15

Jemedwōj Ilan̄ ej tōl eō kōn Jetōb Kwojarjar eo.

Katak im Bujen Ko 28:1–7, 15 emaron̄ jipan̄ ajri ro kwoj katakin er meļeļe bwe aolep kajjojo remaron̄ in tōl jān Jetōb Kwojarjar eo, bōtaab revelesōn n̄an Kabun̄ in enaaj iien otemjej letok kōn rikanaan eo.

M̧akūtkūt ko Maron̄ Kōm̧m̧ani

Pija
pija ej bōk jikin ekkatak

Kōketak Ekkatak ilo M̧weo

Kajjitōk ippān ajri ro n̄an kajjitōk ippān jināer im jemāer eļan̄n̄e remaron̄ katakin juon katak in nokon in jota kōn juon men raar ekkatak ilo kūlaaj.

Kōkōm̧anm̧an Ad Katakin

Kōjerbal al. Al ko an Būraimere im al in jar ko remaron̄ jipan̄ ajri ro an aolep iiō ko meļeļe im kobaik m̧ool ko an gospel eo ilo juon wāween ememļo̧kjeņ. Remaron̄ barāinwōt dāpij itok limo ilo bōk kuņaan eo an ajri ro ilo ekkatak.

Pija
peij in m̧akūtkūt: Anij ej tōl Kabun̄ eo an

Būriin