M̧aaj 15–21

Katak im Bujen ko 27–28

“Aolep Men Aikuj in Kōm̧m̧an ilo Koņ”

Elder D. Todd Christofferson eaar ba bwe ilo am̧ ekkatak jeje ko rekwojarjar im je im̧we ko, “kwonaaj kōm̧m̧an jikin ilo būruwōm̧ naan eo an Anij, im E naaj ekōnono n̄an kwe” (“When Thou Art Converted,” Ensign ak Liaona, Māe 2004, 11).

Je En̄jaake ko Rej Im̧we Eok

Revelesōn ekar baj wōt juon katak ekāāl n̄an Armej ro Rekwojarjar ke Jepļaaktok eo ekar wōnm̧aanļo̧k wōt in mejaļļo̧k. Ro uwaan Kabun̄ in m̧okta raar jeļā bwe Rikanaan Josep Smith emaron̄ kar bōk revelesōn n̄an Kabun̄ in, bōtaab ro jet remaron̄ ke kar? Kajjitōk ko āinwōt in raar erōm̧ nana ke Hiram Page, juon iaan Rikam̧ool ro Ruwalitōk an pileij kooļ ko, kar tōmak ekar bōk revelesōn ko n̄an Kabun̄ in. Elōn̄ Armej ro Rekwojarjar retiljek raar tōmak bwe revelesōn kein raar jān Anij. Irooj eaar uwaak kōn katakin bwe ilo Kabun̄ eo An, “aolep men aikuj in kōm̧m̧an ilo koņ” (Katak im Bujen ko 28:13), eo ekar meļeļe in ewōr wōt juon “jitōn̄e n̄an bōk kien ko im revelesōn ko” n̄an aolepān Kabun̄ in (Katak im Bujen ko 28:2). Mekarta āindein, ro jet remaron̄ bōk revelesōn an juon make n̄an m̧ōttan eo aer ilo jerbal eo an Irooj. Ilo m̧ool, naan ko an Irooj n̄an Oliver Cowdery rej juon kakeememej n̄an kōjwōj aolep: “Naaj lewōj e … ta kwo naaj kōm̧m̧ane” (Katak im Bujen ko 28:15).

Lale barāinwōt “All Things Must Be Done in Order,” Revelations in Context, 50–53.

Ļōmņak ko n̄an Ekkatak Jeje ko Rekwojarjar Ippam̧ Make

Katak im Bujen ko 27:1–4

Ij aikuj bōk kwojkwoj eo kōn juon mejōk n̄an aiboojoj eo an Anij.

Sally Knight im Emma Smith kar peptaij ilo Juun ilo 1830 eo, bōtaab iien kapene ko aer raar kakkure jān juon kumi in rikakkure. Ruo allōn̄ tokālik, Sally im ļeo pāleen, Newel, kar loļo̧k Emma im Josep, im kar kāālet bwe iien kapene ko aikuj in kiiō kōm̧m̧an im bwe kumi eo aikuj in bōk m̧ōttan kwojkwoj eo ippān doon. Ilo iaļ eo an ļo̧k n̄an bōk wain eo n̄an kwojkwoj eo, kar kabōjrak Josep jān juon enjeļ. Ta eo enjeļ eo eaar katakin e kōn kwojkwoj eo? (lale Katak im Bujen o 27:1–4).

Ta eo eoon kein rej katakin eok kōn ekōjkan an Rilo̧mo̧o̧r eo kōņaan bwe kwon kepaakkwojkwoj eo? Ta eo kwoj en̄jaake im̧we n̄an kōm̧m̧ane kōnke kōn ta eo kwoj ekkatak?

Kwojkwoj eo ej kakeememej kōj kōn en̄taan eo an Rilo̧mo̧o̧r eo.

Katak im Bujen ko 27:15–18

Kein tariņae eo an Anij enaaj jipan̄ eō jutak ņae nana.

Būreejtōn M. Russell Ballard eaar ba: “Ejjeļo̧k juon men eļap im kileplep jemaron̄ kōm̧m̧ane n̄an kōjparok kōj make ilo jetōb. Kajoor eo em̧ool ilo jetōb ej pād ilo elōn̄ jerbal ko reddik kobaik ippān doon ilo juon ed in jetōb ekajoor me ej kōjparok im bōbrae jān aolep nana” (“Be Strong in the Lord,” Ensign, Juļae 2004, 8).

Ilo am̧ riiti Katak im Bujen ko 27:15–18, komaron̄ kōm̧m̧ane juon jaat āinwōt eo itulaļ. Ta eo kwoj kōm̧m̧ane n̄an kōņak kajjojo m̧ōttan kein tariņae eo an Anij?

M̧ōttan kein tariņae eo	M̧ōttan ānbwin eo kar kōjparoke	Ta m̧ōttan ānbwin eo emaron̄ in jutak kake
Pālpel in weppān	Bōro	Ikdeelel ko ad im jelet ko
At in lo̧mo̧o̧r	Bar ak ļōmņak

Lale barāinwōt Epesōs 6:11–18; 2 Nipai 1:23.

Katak im Bujen ko 28

Rikanaan eo emour ej rikōnono an Anij n̄an Kabun̄ eo An.

Ļōmņak kōn ta eo enaaj kar āinwōt eļan̄n̄e jabdewōt emaron̄ in kar bōk kien ko im revelesōn n̄an aolepān Kabun̄ in. Ke Hiram Page eaar ba ekar bōk kain revelesōn rōt in, ekar wōr tarpok ilubwijlin ro uwaan Kabun̄ in. Ilo Katak im Bujen ko 28, Irooj eaar kwaļo̧k juon koņ n̄an revelesōn ilo Kabun̄ eo An. Ta eo kwojkatak jān jekjōn in kōn jerbal eo ejenolo̧k an Būreejtōn eo an Kabun̄ in? Ta eo kwokatak jān naan ko an Irooj n̄an Oliver Cowdery ilo eoon 3? Ta eo kwokatak jān jekjōn in kōn wāween an Anij maron̄ tōl eok?

Lale barāinwōt Dallin H. Oaks, “Two Lines of Communication,” Ensign ak Liaona, Nob. 2010, 83–86.

Katak im Bujen ko 28:8–9

Etke mijen eo an Oliver Cowdery n̄an kar riLeman ro eaorōk?

Juon jibadbad an Bok in Mormon ej “bwe riLeman ro ren maron̄ itok n̄an jeļā eo kōn ro jemāer, im bwe ren maron̄ jeļā kallim̧ur ko an Irooj” (Katak im Bujen ko 3:20). Menin eaar jokkun wōt juon ippān kallim̧ur ko Irooj eaar kōm̧m̧ane n̄an elōn̄ rikanaan ro ilo Bok in Mormon (lale, n̄an waanjon̄ak, 1 Nipai 13:34–41; Enōs 1:11–18; Hilamōn 15:12–13). Ro uwaan Kabun̄ in im̧aan tata kar watōk American Indian ro n̄an ro ineen armej ro ilo Bok in Mormon. (Ijo ealikkar Kabun̄ in ej jutak ie rainin ej bwe riLeman ro “rej jet iaan ro jim̧m̧aan ri Indian ro ilo Amedka” [Kadkad in Bok in Mormon].)

N̄an riit eļapļo̧k kōn mijen eo an Oliver n̄an iturinļo̧k bwij ko an riIndia ro im riAmedka ro, lale “A Mission to the Lamanites” (Revelations in Context, 45–49). Ta eo mijen in ej katakin eok kōn Irooj im jerbal eo An?

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Katak im Bujen ko 27:1–2.Ekōjkan ad maron̄ em̧m̧anļo̧k ad keememej en̄taan eo an Rilo̧mo̧o̧r eo n̄an kōj ilo ad bōk m̧ōttan kwojkwoj eo?

Katak im Bujen ko 27:5–14.Ta eo jejeļā kōn rikanaan ro ilo eoon kein? Komaron̄ kappukōt meļeļe ko kōn er ilo Unin Tōl Eo N̄an Jeje Ko Rekwojarjar (scriptures.ChurchofJesusChrist.org). Ta kōjeraam̧m̧an ko em̧ōj aer peļļo̧k n̄an kōj kōn kii ko rej kabwijeri? N̄an elōn̄ļo̧k meļeļe kōn jet iaan kii kein, lale Matu 16:16–19; Katak im Bujen ko 110:11–16.

Katak im Bujen ko 27:15–18.Bōlen baam̧le eo am emaron̄ itok limouier ilo bajjōk kōm̧m̧ane juon tariņae ippān kakobabain nuknuk ko n̄an bōk jikin kein tariņae eo an Anij, ko āinwōt at ko, vest ko, eprōn ko, ak juuj ko. Ekōjkan an kein tariņae eo jipan̄ kōjparok kōj ilo pata? Ekōnono kōn jet iaan kareel ko an nana baam̧le eo am̧ ej jelm̧aik im men ko kom̧ maron̄ kōm̧m̧ani n̄an kōņak kein tariņae ko an jetōb. Ļōmņak in kwaļo̧k pija in alooj eo “Put on the Whole Armor of God” (ChurchofJesusChrist.org).

Katak im Bujen ko 28:2–7.Ta eo jej ekkatak jān eoon kein kōn kūr eo an rikanaan eo? Bōlen ro uwaan baam̧le eo am̧ remaron̄ etale enaan ko jem̧aan jān rikanaan eo ad ej mour im kwaļo̧k ekōjkan an kapilōk eo an jipan̄ kōj ļoor Jisōs Kraist.

Katak im Bujen ko 28:11.N̄e jej kōņaan leļo̧k n̄an juon armej kajjim̧we, etke ej aorōk n̄an kōm̧m̧ane “ikōtaan e im kwe makeļo̧k”?

Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar elmakote: “Come, Listen to a Prophet’s Voice,” Hymns, nō. 21.

Kōkōm̧anm̧anļo̧k Ad Ekkatak

Ekkatak naan ko an rikanaan im rijilōk ro ilo raan-ko āliktata. Riiti ta eo rikanaan ro im rijilōk ro ilo raan-ko āliktata kar katakin kōn pedped in katak ko kwoj loi ilo jeje ko rekwojarjar. Ļōmņak in etale unin kōnono index eo an kweilo̧k eo eļap ilo conference.ChurchofJesusChrist.org ak ilo Gospel Library app eo.