“M̧aaj 8–14. Katak im Bujen Ko 23–26: ‘Kōkajoorļo̧k Kabun̄ in,’” Itok, Ļoor Eō—N̄an Kajjojo Armej im Baam̧le ko: Katak im Bujen Ko 2021 (2020)
“M̧aaj 8–14. Katak im Bujen Ko 23–26,” Itok, Ļoor Eō—N̄an Kajjojo Armej im Baam̧le ko: 2021
M̧aaj 8–14
Katak im Bujen Ko 23–26
“Kōkajoorļo̧k Kabun̄ in”
Ilo am̧ riiti Katak im Bujen Ko 23–26, kōm̧m̧an kakeememej ko kōn im̧we ko kwoj būki jān Jetōb Kwojarjar eo. Ekōjkan am̧ maron̄ kōjerbal kapilōk eo ilo revelesōn kein n̄an kōkajoorļo̧k rikaļoor eo am̧ make im barāinwōt Kabun̄ in?
Je En̄jake ko Rej Im̧we Eok
Ālkin an Kabun̄ in kar ejaak, Armej ro Rekwojarjar raar jelm̧ae juon idajon̄jon̄ ekāāl—n̄an kajeeded gospel eo im kōkajoorļo̧k ro me em̧ōj kadede aer kar koba ippān Kabun̄ in, aolep ke kaen̄taanan eaar wōnm̧aanļo̧k wōt ilo an ļapļo̧k. Emma Smith eaar kam̧oole kōn e make jum̧ae eo. Ilo Juun in 1830 eo, Emma im ro uwaan baam̧le eo an Knight ro raar kōņaan peptaij. Bōtaab rikōjedāt ro an Kabun̄ raar kajjieon̄ kakkure ta eo aikuj in kar juon iien ekwojarjar. M̧oktata raar kakkure wall in dān eo me kar kalōke n̄an leļo̧k ebwe dān n̄an peptaij ko. Men̄e jekdo̧o̧n ālkin an wall in dān eo kar bar kōm̧m̧ane, rikakkure ro raar aiintok doon n̄an lam̧ōj in kamijak ko im kajirere kōn ro raar peptaij. Innām, ke Josep eaar pojak in kapene membōr ro rekāāl, kar kalbuuji kōn an kainepataik jukjuk in pād eo kōn kwaļo̧k kōn Bok in Mormon. Ekar āinwōt juon ijjino eo ejjab em̧m̧an n̄an Kabun̄ eo ekāāl kar kōjepļaaktok an Irooj. Bōtaab ilo iien eo kōn jab jeļā eo im oktak eļap, Irooj eaar letok naan in kapilōk ko raorōk im kōketak, eo ej jutak kōn “Ainikiō n̄an aolep” (Katak im Bujen Ko 25:16).
Lale barāinwōt Saints, 1:89–90, 94–97.
Ļōm̧ņak ko n̄an Ekkatak Jeje Ko Rekwojarjar Ippam̧ Make
Imaron̄ jipan̄ kōkajoorļo̧k Kabun̄ eo an Irooj.
Rainin, enan̄in 200 iiō ko ālkin an Kabun̄ eo kōjepļaaktok kar ejaak, aikuj eo “n̄an kōkajoorļo̧k kabun̄ in” ej wōnm̧aanļo̧k wōt (Katak im Bujen Ko 23:3–5). Im jerbal in ejjab n̄an wōt Josep Smith, Oliver Cowdery, ak ritōl ro ad an Kabun̄ kiiō—ej n̄an kōjwōj aolep. Ilo aolepān ekkatak eo am̧ kōn Katak im Bujen Ko 23–26, kejōkļo̧kjeņ kōn kapilōk eo Irooj eaar leļo̧k n̄an ro uwaan Kabun̄ m̧okta n̄an jipan̄ er kōkajoorļo̧k Kabun̄ in. Ta eo kwoj en̄jake Irooj ej kōņaan bwe kwōn kōm̧m̧ane n̄an bōk kuņaam̧ ilo kijejeto in?
Rilo̧mo̧o̧r eo emaron̄ kotakļo̧k eō “jān en̄taan ko [aō].”
Tōl Kabun̄ in ilo juon tōre eo ekanooj in ļap kaen̄taanan aikuj in kar juon edodo eo eddo n̄an Josep Smith. Kappukōt naan in kōketak ko an Irooj n̄an e ilo Katak im Bujen Ko 24.
Ta eo eoon kein rej elmakoti n̄an eok kōn ekōjkan an Rilo̧mo̧o̧r eo maron̄ kotakļo̧k eok jān en̄taan ko am̧?
Ekōjkan an Jisōs Kraist kar kotakļo̧k eok jān en̄taan ko am̧? Ta eo komaron̄ wōnm̧aanļo̧k wōt in kōm̧m̧ane n̄an kappukōt An jipan̄ ilo iien ko reppen?
Eaar Kōmour Elōn̄ jān Nan̄inmej ko wōj, jān J. Kirk Richards
Emma Smith ej “juon kōrā in kāālet.”
Ke Emma Hale ekar m̧areik Josep Smith, liin ekar bōlen jeļā enaaj kar aikuj kōm̧m̧ani kaarmejete ko. Liin eaar etal jeļmān kōņaan ko an jemen im ukōt juon mour eo ebwe an kar ineem̧m̧an n̄an juon mour jab jeļā kake. Liin emaron̄ in kar ļōmņak ta eo Irooj ekar kōtmene jān e ilo jerbal eo an Jepļaaktok eo. Kappukōt uwaak ko Irooj eaar liļo̧k ilo Katak im Bujen Ko 25. Lale naan ko an Irooj ilo eoon 16—kwoj ke lo jabdewōt men ilo jekjōn in me kwoj en̄jake ej “Ainikiō n̄an [kwe]”?
Barāinwōt lale “An Elect Lady” (pijaan alooj, ChurchofJesusChrist.org); “Thou Art an Elect Lady,” Revelations in Context, 33–39; Joy D. Jones, “Juon Kūr eo Elukkuun Utiej,” Ensign ak Liaona, Māe 2020, 15–18.
Ta in bōro wōt juon?
N̄e membōr ro rej bōk kūr ko ak ekkapit ko an priesthood eo ilo Kabun̄ in, ewōr ippād iien eo em̧m̧an n̄an rejtake er kōn kajutak peid āinwōt kwaļo̧k juon rie. Pedped in katak eo kōn kwaļo̧k rie eo ilobwilej im errā ej ņa etan bōro wōt juon. Āinwōt an Būreejtōn Gordon B. Hinckley kar katakin, “Jekjek eo an rejtake eļapļo̧k jān juon baj kajutak in pā iminene kake. Ej juon kallim̧ur n̄an leļo̧k rejtak, n̄an rie, n̄an jipan̄ ro me em̧ōj kar kāālet er” (“This Work Is Concerned with People,” Ensign, Māe 1995, 51).
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota
-
Katak im Bujen Ko 23:6.Etke Irooj ej kōņaan bwe jen jar “ilo baam̧le eo[ad], im ilubwiljin ro [jerad], im ilo jikin otemjeļo̧k”? Ta eo al eo “Love Is Spoken Here” (Children’s Songbook, 190)—ak bar juon al kōn jar—katakin kōj kōn kajoor in jar?
Lale bōrāinwōt 2 Nipai 32:8–9; 3 Nipai 18:18–23.
-
Katak im Bujen Ko 24:8.Enaaj ke kar jipan̄ n̄an an baam̧le eo am̧ kōnono kōn ta meļeļe in n̄an “ineem̧m̧an ilo en̄taan”? Eļan̄n̄e ewōr nejūm̧ ajri ro reddik, emaron̄ in kaitoktok limo n̄an bar-kōm̧m̧ane ekkatak eo me Būreejtōn Dieter F. Uchtdorf eaar kōmeļeļeiki ilo “Continue in Patience” (Ensign ak Liaona, Māe 2010, 56; lale barāinwōt pija in alooj eo ilo ChurchofJesusChrist.org). Ta eo Katak im Bujen Ko 24:8 ej katakin kōj kōn kijenmej? Ekōjkan an Irooj jipan̄ kōj kijenmej ilo en̄taan ko ad?
-
Katak im Bujen Ko 25:11–12.Bōlen kom̧ maron̄ al kajjojo al ko em̧m̧an tata ippān ro uwaan baam̧le eo ak al im ekōnono kōn etke ej “al eo an būruwōn.” Ekōjkan an al kein āinwōt “juon jar n̄an [Anij]”?
-
Katak im Bujen Ko 26:2.Emaron̄ in jipan̄ n̄an lale “Bōro Wōt Juon” ilo Unin Tōl Eo N̄an Jeje Ko Rekwojarjar(scriptures.ChurchofJesusChrist.org). Ekōjkan ad kwaļo̧k ad rie n̄an ritōl ro ad?
Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Al eo kar elmakote: “Lift Up Your Voice and Sing,” Children’s Songbook, 252 (lale “Ļōmņak ko n̄an Kōkōm̧anm̧anļo̧k Ekkatak Jeje ko Rekwojarjar an Baam̧le eo Am̧”).
Ainikien ko an Jepļaaktok eo
Emma Hale Smith
Naan ko an Irooj n̄an Emma Smith kar jei ilo Katak im Bujen Ko 25 kwaļo̧k ekōjkan An kar en̄jake kōn e im jipan̄ ko eaar maron̄ kōm̧m̧ani n̄an jerbal eo An. Bōtaab ekōjkan kar Emma? Ta eo jejeļā kōn m̧wilin, kadkad ko an, kajoor ko an? Juon wāween n̄an jeļā kōn in“kōrā in kāālet” (Katak im Bujen Ko 25:3) ej n̄an riiti naan ko an armej ro me raar jeļā kajjien.
Emma Smith, jān Lee Greene Richards
Josep Smith Jr., ļeo pāleen
“Kōn lo̧udin̄din̄ eo epen kōnono kake, iaar en̄jake obrak kōn lan̄lōn̄, ke kar jibwe eō kōn pein, ilo bon̄ōn eo, aō Emma jitōn bōro—ekar lio pāleō eo, em̧ool lio pāleō jāņ ke iaar likao; im armej eo me eļap tata aō iakwe. Ekar lōn̄ aō ļōmņak ko ke iaar kōļmenļo̧kjeņ ium̧win jidik iien kōn elōn̄ en̄jake ko kōm kar aikuj dibuk er. Kam̧ōkm̧ōk ko, im jerbal ko reppen im aitok, būrom̧ōj ko, im en̄taan ko, im lan̄lōn̄ ko im kallim̧ur ko jān iien n̄an iien raar waļo̧k ilo aolepān mour ko am im kar kōjeraam̧m̧an mour ko am. O! ij keememej aolep em̧m̧an ko im nana ko ium̧win jidik iien, Bōtaab liin ej pād wōt ijin, em̧ool jekdo̧o̧n ta mālijjon̄ ko ewōr ippām, jab ebbweer, dim, im jab pere, jab okoktak, kar jelet Emma.”1
Lucy Mack Smith, lio jinen ļeo pāleen
“Ke liin ekar dik, im, kōn ikdeelel, liin eaar kōm̧aatļo̧k an n̄an jerbal eo an Irooj, im kar lukkuun kallim̧ur n̄an kabun̄ in im un eo an m̧ool eo. Jabdewōt men pein emaron̄ in loe n̄an kōm̧m̧ane, eaar kōm̧m̧ane kōn an maron̄ im kar jab ļōmņak kōn e make ‘Enaaj ke ļapļo̧k aō jeraam̧m̧an jān bar jabdewōt?’ Eļan̄n̄e elder ro kar jilkinļo̧k er n̄an kwaļo̧k, ekar eo m̧oktata n̄an baļintier e jipan̄ ko an n̄an jipan̄ ilo kōpooj nuknuk ko aer ilo iaļ eo aer, jekdo̧o̧n ta mālijjon̄ ko eaar jelm̧ai e make.”2
“Ijjan̄in kar jeļā kōn juon kōrā ilo mour eo aō, eo ekōn kijenmej ilo aolep kain m̧ōk im apan̄, jān allōn̄ n̄an allōn̄, im jān iiō n̄an iiō, kōn peran eo eliok titbok, kijejeto im kijenmej, eo liin ekar iien otemjej kōm̧m̧ane; bwe ijeļā bwe men eo me liin ekar aikuj in kar nikniki n̄an jem̧ļo̧kin kake, bwe liin ekar niknik n̄an jem̧ļo̧kin ilo men ko jab jeļā kaki; bwe liin eaar niknik ilo men ko reppen an kaen̄taanan, im anjo̧ ioon matōrtōr an armej im nana ko, m̧ae iien liin eaar anjo̧ im niknik n̄an jem̧ļo̧kin ilo elōn̄ mālijjon̄ ko me renaaj [kar] kakkure ro jet.”3
Josep Smith Sr., eo jemen-jemen ļeo pālen
Kōjeraam̧m̧an in petriak eo an Emma, kar kwaļo̧k jān Josep Smith Sr. eo eaar jerbal āinwōt petriak eo an Kabun̄ in.
“Emma, lio nejū-pālen ļeo nejū, kwe kar kōjeraam̧m̧an eok jān Irooj, kōn am̧ tiljek im m̧ool: kwonaaj jeraam̧m̧an ippān ļeo pālem̧, im lan̄lōn̄ ilo aiboojoj eo me enaaj itok ioon: Jetōb eo am̧ ekar en̄taan kōnke kōn nana eo an armej ilo pukōt kakkure an ļeo m̧ōttam̧, im aolepān am̧ ekar ilo jar kōn deeor eo an: lem̧ōņōņō, bwe Irooj am̧ Anij em̧ōj an ron̄ kajjitōk eo am̧.
“Kwar būrom̧ōj kōn pen in bōro an baam̧ļe eo an jemam̧, im kwar jan̄ in iuwade kōn lo̧mo̧o̧r eo aer. Irooj enaaj kautiej kajjitōk ko am̧, im kōn ekajet ko an enaaj kōm̧m̧an bwe jet iaer ren lo likjab eo aer im ukweļo̧k jān jerawiwi ko aer; bōtaab enaaj kōn kaen̄taanan bwe renaaj lo̧mo̧o̧r. Kwonaaj lo elōn̄ raan ko; aaet, Irooj enaaj kōjparok eok m̧ae iien eo ebun̄ būruwōm̧, bwe kwonaaj lo am̧ Ripinmuur. Būruwōm̧ enaaj lan̄lōn̄ ilo jerbal eo eļap an Irooj, im ejjeļo̧k juon naaj bōk am̧ lan̄lōn̄ jān eok.
“Kwonaaj indeeo keememej kautiej eo eļap an am Anij ilo kōtļo̧k am̧ ļoror ļeo nejū ke enjeļ eo eaar liļo̧k ļo̧o̧k eo an riNipai ro n̄an kōjparok eo an. Kwar lo eļap būrom̧ōj kōnke Irooj eaar bōk jān kwe jilu nejūm̧ ajri: ilo menin ejjab kwe n̄an kar jekpen ņae, bwe ejeļā ikdeelel ko am̧ rerreo n̄an karūttoļo̧k juon baam̧le, bwe etan ļeo nejū emaron̄ in kar jeraam̧m̧an. Im kiiō, lo, ij ba n̄an eok, bwe Irooj ej ba, eļan̄n̄e kwonaaj tōmak, kwonaaj jeraam̧m̧an ilo men in im kwonaaj bōktok ajri ro jet, n̄an lan̄lōn̄ eo im bun̄ bōro eo an am̧ jetōb, im n̄an lem̧ōņōņō kōn ro jeram̧.
“Kwonaaj jeraam̧m̧an kōn meļeļe, im wōr am̧ kajoor n̄an katakin kōrā ro jet. Katakin baam̧le eo am̧ jim̧we, im ro nejūm̧ reddik wāween mour, im enjeļ ro rekwojarjar naaj mije eok: im kwonaaj lo̧mo̧o̧r ilo aelōn̄ in kiin̄ eo an Anij, em̧ool āindein. Amen.”4
Emma Smith ippān ajri ro nejin. Iien Ettōn̄, jān Liz Lemon Swindle
Al ko an Emma, jān Liz Lemon Swindle