Eprōļ 19–25

Katak im Bujen Ko 41–44

“Aō Kien n̄an Tōl Kabun̄ in Aō”

Ilo iien m̧aanjabpopo eo am̧ wiik in, likkuun lale im̧we ko kwoj būki jān Jetōb. Ta eo kwoj en̄jake ajri ro rej aikuji n̄an ekkatak jān Katak im Bujen Ko 41–44?

Je En̄jake ko Rej Im̧we Eok

Kajjitōk bwe ren Kwaļo̧k

Joļo̧k juon bo̧o̧ļ n̄an juon ajri, im kajjitōk ippān ajri eo n̄an kwaļo̧k juon kien me ejeļā kake. Jaketo jaketak bo̧o̧ļ eo m̧ae iien eo aolep raar bōk kuņaere n̄an kwaļo̧k juon men.

Katakin Katak ko: Ajri ro Reddikļo̧k

Katak im Bujen Ko 42:2

Imaron̄ pokake kien ko an Anij.

Ke Kabun̄ in eaar eddōkļo̧k im membōr ro raar aiintok doon ilo Kirtland, Ohio, Irooj eaar kwaļo̧k n̄an Rikanaan Josep Smith ta eo Eaar ņa etan “kien” eo An im kar kakiene Armej ro Rekwojarjar n̄an “eo̧ron̄ im ron̄jake im pokake” e. Ekōjkan am̧ maron̄ jipan̄ ajri ro meļeļe bwe jej jeram̧m̧an n̄e jej pokake?

M̧akūtkūt ko Maron̄ Kōm̧m̧ani

• Riiti Katak im Bujen Ko 42:2, kōmejajaik naan eo “pokake.” Leļo̧k n̄an ajri ro jet waanjon̄ak in jekjek ko me juon ajri ej kāālet n̄an pokake ak jab pokake juon kien ak kakien. Kajjitōk ippān ajri ro n̄an kanooj in ron̄jake im ettōn̄ dikdik eļan̄n̄e armej eo ilo bwebwenato eo ej pokake im kōmmōn̄ eļan̄n̄e armej eo ejjab pokake. Kwaļo̧k kōjeraam̧m̧an ko kwar būki ke kwar pokake kien ko an Anij.

• Ikkure juon ikkure kōn leļo̧k n̄an ajri ro juon kakien n̄an ļoor e. N̄an waanjon̄ak, komaron̄ jiron̄ er bwe rej aikuj kajutak peier im naaj kūr n̄an uwaake kajjitōk ko. Innām kōm̧m̧an bwe ren kōmālmel pokake kōn kajjitōk ippāer kajjitōk ko im kūr n̄an ro rej kajutak peier. Ta kien ko Anij eaar litok n̄an kōj?

• Kadedeļo̧k peij in m̧akūtkūt eo ippān ajri ro, ak al juon al kōn pokake kien ko an Anij, eo āinwōt “I Want to Live the Gospel” (Children’s Songbook, 148). Jiron̄ ajri ro ekōjkan an pokake kien ko an Anij kar bōktok n̄an eok m̧ōņōņō.

  

  Jej ekkatak kien ko an Anij ilo Būraimere.

Katak im Bujen Ko 42:38

Ij jerbal n̄an Jisōs Kraist n̄e ij jerbal n̄an ro jet.

Irooj ej kōņaan bwe Armej ro Rekwojarjar An ren lale rijeram̧ōl im riaikuj ro. Jipan̄ ajri ro meļeļe bwe n̄e rej jerbal n̄an armej ro rej pād ilo aikuj, rej barāinwōt jerbal n̄an Rilo̧mo̧o̧r eo.

M̧akūtkūt ko Maron̄ Kōm̧m̧ani

• Eļan̄n̄e Jisōs Kraist eaar pād ilo kūlaaj in ad rainin, ta eo jenaaj kar ba n̄an E? Ekōjkan ad naaj kar kōm̧m̧an n̄an E? Kwaļo̧k juon pija in Rilo̧mo̧o̧r eo, im kōmeļeļeik katakin eo an Jisōs bwe n̄e jej kwaļo̧k iakwe n̄an ro jet, jej barāinwōt kwaļo̧k iakwe n̄an E. Jipan̄ ajri ro āliji eoon 38 ippam̧, jet naan ko ilo juon iien.

• Jipan̄ ajri ro ļōmņak kōn wāween ko remaron̄ jerbal n̄an Jisōs jān jerbal n̄an ro jet. Remaron̄ lo jet ļōmņak ko jān pija in alooj eo “Pass It On” (ChurchofJesusChrist.org) ak jān pija ko an Rilo̧mo̧o̧r eo ej jipan̄ ro jet, eo āinwōt pija ko kōn An kemour rinan̄inmej ak jouj n̄an ajri ro (lale Bok in Pija an Gospel nō. 42, 47). Kam̧ool bwe n̄e rej jerbal n̄an ro jet, rej barāinwōt jerbal n̄an Jisōs.

Katak im Bujen Ko 43:1–7

Irooj ej tōl Kabun̄ in An kōn rikanaan eo An.

Komaron̄ jipan̄ ajri ro bwe ren jab m̧o̧ņe er ilo aolepān mour ko aer jān katakin er, ilo aer iddik wōt, jon̄ak eo an Irooj kōn tōl Kabun̄ in An kōn rikanaan eo emour.

M̧akūtkūt ko Maron̄ Kōm̧m̧ani

• Kwaļo̧k pija ko an armej ro roktak jān doon, ekoba juon pija in rikanaan eo kiiō. Kajitlaļļo̧k pija ko, im kōm̧m̧an bwe ajri ro rej kōjedtaki pija ko juon illo̧k juon m̧ae iien eo rej lo pija in rikanaan eo. Kōmeļeļeik katak eo an Irooj bwe rikanaan eo wōt ej “jitōn̄ e n̄an kom̧ n̄an bōki kein ko im revelesōn ko jān [Irooj]” n̄an tōl Kabun̄ in (Katak im Bujen Ko 43:2).

• Al ippān doon juon al kōn rikanaan ro, eo āinwōt eoon eo āliktata an “Follow the Prophet” (Children’s Songbook, 110–11). Kwaļo̧k naan in kam̧ool eo am̧ bwe rikanaan eo ej tōl Kabun̄ in.

Katakin Katak ko: Ajri ro Rerūttoļo̧k

Katak im Bujen Ko 41:5

Juon rikaļoor ej juon eo ej bōk kien eo an Anij im pokake e.

Ajri ro kwoj katakin er rejeļā ke ta meļeļe in n̄an erōm̧ juon rikaļoor an Jisōs Kraist? Katak im Bujen Ko 41:5 emaron̄ jipan̄ er meļeļe ekōjkan n̄an erōm̧ rikaļoor ro rem̧m̧anļo̧k.

M̧akūtkūt ko Maron̄ Kōm̧m̧ani

• Je Katak im Bujen Ko 41:5 ioon juon m̧ōttan peba, jab kanne kobban būļāān̄ ko ijo naan eo “rikaļoor” aikuj in kar pād ie. Kajjitōk ippān ajri ro n̄an kanne būļāān̄ ko, lale ilo Katak im Bujen Ko 41:5 eļan̄n̄e rej aikuj jipan̄. Ta meļeļe in n̄an erōm̧ juon rikaļooran Jisōs Kraist? Kwaļo̧k ekōjkan am̧ kajjieon̄ in erōm̧ juon rikaļoor em̧m̧anļo̧k an Kraist.

• Ālkin ekōnono kōn Katak im Bujen Ko 41:5, kajjitōk ippān ajri ro n̄an ļōmņak kōn kien ko jaar būki jān Irooj. Kajjitōk ippāer n̄an bōk kuņaer ikkure kōn pokake juon iaan kien ko ilo an aolepān kūlaaj eo kajjieon̄ n̄an kajidedeik ta kien eo.

• Leļo̧k n̄an kajjojo ro uwaan kūlaaj eo juon peba aidikdik, im kajjitōk ippāer n̄an je ioon juon wāween remaron̄ erōm̧ juon rikaļoor em̧m̧anļo̧k. Kajjitōk ippān kajjojo ajri n̄an kwaļo̧k ta eo raar je, innām tepe peba aidikdik ko ippān doon n̄an ejake juon jeen in peba.

Katak im Bujen Ko 42:61, 68

Anij ej kwaļo̧k mālōtlōt n̄an ro rej kajjitōk.

Ajri ro rej kajjitōk elōn̄ kajjitōk ko ilo aer rūttoļo̧k ilo jeļāļo̧kjeņ eo aer kōn laļ in im gospel eo. Ekōjkan am̧ maron̄ kōjerbal Katak im Bujen Ko 42:61, 68 n̄an jipan̄ er jeļā ekōjkan n̄an bōk mālōtlōt jān Irooj?

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an kwaļo̧k ippam̧ juon men me ejipan̄ er en̄jake aenōm̧m̧an im juon men eo me ejipan̄ er en̄jake m̧ōņōņō. Kajjitōk ippāer n̄an riiti Katak im Bujen Ko 42:61 kappukōt naan ko “aenōm̧m̧an” im “m̧ōņōņō.” Jipan̄ ajri ro ļōmņak kōn m̧ool ko Anij eaar kwaļo̧k me rej bōktok aenōm̧m̧an im lan̄lōn̄ nan er.

• Riiti Katak im Bujen Ko 42:61, 68 ippān ajri ro, kōmejajaik eoon eo “revelesōn ioon revelesōn, jeļāļo̧kjeņ ioon jeļāļo̧kjeņ.” Kōmeļeļeik bwe Anij ejjab kwaļo̧k men otemjeļo̧k ilo juon wōt iien; ijello̧kin, Ej letok n̄an kōj jidik ilo juon iien. Kwaļo̧k ekōjkan an juon bajōļ ejaak jidik kōn jidik, ak kōjerbal juon men eo ainļo̧k wōt n̄an jipan̄ ajri ro meļeļe pedped in katak in. Kwaļo̧k juon en̄jake ke kwar bōk juon revelesōn me eaar kōjeraam̧m̧an eok.

Katak im Bujen Ko 43:1–7

Rikanaan eo wōt emaron̄ bōk revelesōn n̄an aolepān Kabun̄ in.

Ilo an ajri ro rūttoļo̧k, renaaj bōlen ioon armej ro me rej kōņaan tōlļo̧k er ilo jōbwābwe. Ekōjkan am̧ maron̄ jipan̄ ajri ro lōke jon̄ak eo an Anij kōn tōl ajri ro Nejin kōn rikanaan eo An kar kāālete?

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an pijaikļo̧k bwe juon ej jutakļo̧k ilo kweilo̧k in kwaļo̧k naan in kam̧ool eo im jiron̄ ward eo bwe ear bōk juon revelesōn n̄an Kabun̄ in (n̄an waanjon̄ak, bwe jej jab bar aikuj in idaak milik ak bwe jej aikuj jino kōm̧m̧ani kweilo̧k in kwojkwoj ko ilo Juje ko ijello̧kin Jabōt ko). Ej ba bwe jej aikuj ron̄jake ta eo ej ba ijello̧kin rikanaan eo. Ta eo enaaj kar bōd ilo men jab in? Jipan̄ ajri ro etale Katak im Bujen Ko 43:1–7 n̄an kappukōt ekōjkan an Irooj letok kien ko n̄an Kabun̄ in An.

• Kwaļo̧k juon pija in rikanaan eo emour, im kajjitōk ippān ajri ro n̄an kwaļo̧k juon men eaar katakin kiiō epaak. Eļan̄n̄e rej aikuj jipan̄, kwaļo̧k juon pijaan aloojekadu ak riiti juon eoon jān juon ennaan an kweilo̧k eo eļap ejkab kōm̧m̧an. Etke ej juon kōjeraam̧m̧an n̄an an wōr juon rikanaan emour rainin?

Kōketak Ekkatak ilo M̧weo

Kajjitōk ippān ajri ro n̄an kāālet juon kakien ak kien rej en̄jake rej aikuj in pedped wōt ioon ilo wiik in. Kōketak er n̄an kwaļo̧k kōttōpar eo aer ippān baam̧le ko aer.

Kōkōm̧anm̧anļo̧k Ad Katakin

Katakin ajri ro n̄an je im̧we ko rej en̄jake. Jekdo̧o̧n ajri ro remaron̄ ekkatak iminene eo an ļo̧o̧ki im̧we ko ilo jetōb. Remaron̄ ļo̧o̧ke im̧we ko jān kōkaļļeik jeje ko rekwojarjar, jin̄aik pija ko, ak kōm̧m̧ani men ko rej je reļem waan ilo jōnōļ eo.