Eprōļ 26–Māe 2

Katak im Bujen Ko 45

“Kallim̧ur ko … Renaaj Kūrm̧ool”

Āinwōt juon rūkaki, m̧aanjabpopo eo am̧ eaorōk tata ej ilo jetōb. Ijjino ilo ekkatak Katak im Bujen Ko 45 im jar kōn tōl eo an Jetōb Kwojarjar. Unin tōl in ej letok ļōmņak ko me remaron̄ in jipan̄ eok. Komaron̄ barāinwōt lo ļōmņak ko ilo unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko ak ilo Liaona ak Eo Mōtta.

Je En̄jake ko Rej Im̧we Eok

Kajjitōk bwe ren Kwaļo̧k

Kajjitōk ippān ajri ro eļan̄n̄e rekōņaan kwaļo̧k juon men raar ekkatak jān jeje ko rekwojarjar wiik in. Kāālet juon n̄an kwaļo̧k, im kajjitōk ippān ajri ro jet n̄an kajutak peier eļan̄n̄e raar ekkatak kōn juon men āinļo̧k wōt.

Katakin Katak eo: Ajri ro Reddikļo̧k

Katak im Bujen Ko 45:32

Imaron̄ “jutak ilo jikin ko rekwōjarjar.”

Ilo Katak im Bujen Ko 45:32, Irooj eaar katakin bwe rikaļoor ro An renaaj lo ineem̧m̧an ilo raan ko āliktata jān jutak ilo jikin ko rekwōjarjar—jikin ko me rej aorōk ippan Irooj. Ekōjkan ad maron̄ jipan̄ ajri ro kile jikin ko rekwojarjar ilo mour ko aer?

M̧akūtkūt ko Maron̄ Kōm̧m̧ani

• Likūt pijain juon em̧, juon m̧ōn jar, im juon tampeļ ilo jikin ko roktak jān doon ilo aolepān ruum̧ eo. Leļo̧k jipan̄ ko rej kōmeļeļeik jikin kein, im kajjitōk ippān ajri ro n̄an jutak epaakeļo̧k pija eo kwoj kōmeļeļeik. Riiti ļain eo m̧oktata jān Katak im Bujen Ko 45:32. Kam̧ool bwe jej jeraam̧m̧an n̄e jej joļo̧k iien ilo jikin ko rekwojarjar āinwōt m̧ōko im̧ōd, im̧ōn jar ko, im tampeļ eo. Kajjitōk ippān ajri ro n̄an kōnono kōn ekōjkan aer en̄jake n̄e rej pād ilo jikin ko rekwojarjar āinwōt kein.

• Kajjitōk ippān ajri ro n̄an kadedeikļo̧k peij in M̧akūtkūt eo an wiik in. Jipan̄ er je “Imaron̄ jipan̄ m̧weo im̧ōn erom juon jikin ekwōjarjar” im “Katak im Bujen Ko 45:32” ioon jin̄a eo aer. Ta eo remaron̄ kōm̧m̧ane n̄an jipan̄ m̧ōko im̧wer erom juon jikin ekwōjarjar?

• N̄an jipan̄ ajri ro ļōmņak kōn ta meļeļe in n̄an “jab em̧m̧akūt,” kajjitōk ippāer n̄an jutak wōt ilo ejjeļo̧k em̧akūtkūt ium̧win juon minit. Riiti ļain eo m̧oktata jān Katak im Bujen Ko 45:32. Jipan̄ ajri ro meļeļe bwe n̄an “jutak ilo jikin ko rekwōjarjar, im … jamin em̧m̧akūt” ej meļeļe in n̄an kāālet jim̧we ilo aolep iien ko, jekdo̧o̧n ta eo ej waļo̧k. Kajjitōk ippāer n̄an “jamin em̧m̧akūt” jān ļōmņak ko im m̧akūtkūt ko rejim̧we.

Katak im Bujen Ko 45:44–45

Jisōs Kraist enaaj bar itok.

Ke Armej ro Rekwojarjar ilo Kirtland, Ohio, kar ron̄ revelesōn eo loe ilo Katak im Bujen Ko 45, eo ej ekōnono kōn raan ko āliktata im Itok eo Kein Karuo an Rilo̧mo̧o̧r eo, raar bōke kōn lan̄lōn̄. Ļōmņak kōn ekōjkan am̧ naaj jipan̄ ajri ro m̧aanjabpopo ilo lan̄lōn̄ n̄an Itok eo Kein Karuo.

M̧akūtkūt ko Maron̄ Kōm̧m̧ani

• Jipan̄ ajri ro ļōmņak kōn ekōjkan aer en̄jake ke rej jeļā bwe juon eo eaorōk ej itok n̄an lotok er, āinwōt būbū im jim̧m̧an ak juon m̧ōttaer. Ekōjkan aer kōppopo n̄an lotok eo? Kwaļo̧k juon pija in Rilo̧mo̧o̧r eo, im riiti jidik in ak aolepān Katak im Bujen Ko 45:44–45. Jiron̄ ajri ro ekōjkan am̧ en̄jake kōn bar itok eo an Rilo̧mo̧o̧r, im kōm̧m̧an bwe ren kwaļo̧k en̄jake ko aer.

• Kwaļo̧k juon pija in Itok eo Kein Karuo an Rilo̧mo̧o̧r eo (lale unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko), im kajjitōk ippān ajri ro n̄an kwaļo̧k ta eo rej en̄jake n̄e rej lo pija eo. Kwaļo̧k naan in kam̧ool eo am̧ bwe Jisōs Kraist enaaj bar itok.

• Al juon al kōn Itok eo Kein Karuo an Rilo̧mo̧o̧r eo, eo āinwōt “When He Comes Again” (Children’s Songbook, 82–83). Kōjerbal al eo n̄an ekōnono kōn wāween ko jemaron̄ m̧aanjabpopo n̄an an Jisōs bar itok, ko āinwōt kōm̧anm̧an ankilan Anij im kōm̧m̧an bwe meram eo ad en romaakļo̧k n̄an ro jet.

Katakin Katak eo: Ajri ro Rerūttoļo̧k

Katak im Bujen Ko 45:3–5

Jisōs Kraist ej ad Rijojomar ippān eo Jemen.

Ekōjkan am̧ naaj jipan̄ ajri ro kōkajoorļo̧k tōmak ko aer bwe Jisōs Kraist ej aer Rijojomar? Ekōjkan am̧ kar ekkatak menin kōn kwe make?

M̧akūtkūt ko Maron̄ Kōm̧m̧ani

• Je jejjo naan ak eoon ko loi ilo Katak im Bujen Ko 45:3–5 ioon peba jiddik ko rōjenolo̧k jān doon. Leļo̧k n̄an ajri ro juon minit n̄an ekkatak kōn eoon kein ilo jeje ko rekwojarjar aer, innām kajjitōk ippāer n̄an kiil jeje ko rekwojarjar im likūt naan ko ioon peba ko ilo ellaajrak eo ej waļo̧k ilo eoon eo. Ekkar n̄an eoon kein, ta eo Rilo̧mo̧o̧r eo ej ba n̄an maron̄ owar kōn un eo ad im̧aan Jemedwōj Ilan̄?

• Jipan̄ ajri ro kōmeļeļeik naan eo rijojomar, bōlen jān kappukōte ilo tikjinede eo. Ta eo Rilo̧mo̧o̧r eo ekar kōm̧m̧ane bwe en kar kapidodoik n̄an E bwe en ad Rijijomar? Kwaļo̧k en̄jake ko am̧ kōn ta eo Jisōs Kraist ekar kōm̧m̧ane n̄an kōj, im kōm̧m̧an bwe ajri ro ren kwaļo̧k en̄jake ko aer.

Katak im Bujen Ko 45:9

Gospel eo an Jisōs Kraist ej juon meram n̄an laļ in.

Jipan̄ ajri ro kwoj katakin er ļōmņak kōn wāween ko gospel eo ej kōpooj laļ in n̄an Itok Eo Kein Karuo an Rilo̧mo̧o̧r eo.

M̧akūtkūt ko Maron̄ Kōm̧m̧ani

• Kwaļo̧k pija ko kōn juon meram im juon būļāāk, ak jin̄aik men kein ioon boot eo. Kajjitōk ippān ajri ro n̄an riiti Katak im Bujen Ko 45:9 im ļōmņak kōn wāween ko gospel eo ej āinwōt juon meram, juon jon̄ak (ak būļāāk), im juon rikwoj meļan. Komaron̄ kōmeļeļeik bwe ilo etto, juon jon̄ak eaar juon m̧ōttan nuknuk ekilep ak būļāāk ineeke n̄an pata. Eaar jipan̄ ritariņae ro jeļā ia eo n̄an koba ie im ta n̄an kōm̧m̧ane.

  

  Taitōļ in Anemkwōj eo, jān Larry Conrad Winborg

• Jipan̄ ajri ro kakilōklōke aolepān ak jidik in eoon 9 kōn jeik ioon boot eo ak jere jejjo naan ko ilo juon iien.

Katak im Bujen Ko 45:37–38

Jisōs Kraist enaaj bar itok.

Emaron̄ in kamijak n̄an ajri ro n̄an riit kōn tariņae ko, nana, im kakkure eo me kar kanaan kake enaaj kar waļo̧k m̧okta jān Itok Eo Kein Karuo an Rilo̧mo̧o̧r eo. Ekōjkan am̧ maron̄ jipan̄ er reim̧aanļo̧k kōn lan̄lōn̄ n̄an rainin kar kallim̧ur kake?

M̧akūtkūt ko Maron̄ Kōm̧m̧ani

• Kajjitōk ippān ajri ro ekōjkan aer jeļā n̄āāt eo juon jijen (season) ekāāl epaaktok. Ta kakōļļe ko rej kappukōti? Kōmeļeļeik bwe ejja āinwōt wōt an wōr kakōļļe ko kōn juon jijen (season) kāāl, ewōr kakōļļe ko kōn Itok Eo Kein Karuo Riiti ippān doon Katak im Bujen Ko 45:37–38. Ta eo Jisōs ekar ba bwe kakōļļe ko kōn Itok Eo Kein Karuo An renaaj kar āinwōt? N̄an jipan̄ ajri ro lo kakōļļe ko jej aikuj in pukōti, kappe kajjojo ajri (ak kumi in ajri ro) n̄an riiti jejjo eoon ko jān Katak im Bujen Ko 45 me rej kōmeļeļeik kakōļļe kein. Eoon ko 26–27, 31–33, 40–42 remaron̄ kōjerbali, n̄an waanjon̄ak. Kōm̧m̧an bwe ajri ro ren kwaļo̧k ta eo raar loe. Ewi wōt kakōļļe kein rej kūrm̧ool rainin?

• Ilo m̧ōttan peba ko roktak jān doon, je jet iaan kallim̧ur ko ikkijen iien ko ilju jekļaj me kwar loi ilo ekkatak eo am̧ ilo jekjōn 45. Jet iaan waanjon̄ak kein remaron̄ in loi ilo eoon ko 44–45, 51–52, 55, 58–59, 66–71. Kōllaajrake ioon boot eo eoon kein ijo kallim̧ur ko rej loi ie. Leļo̧k n̄an ajri ro peba ko, im kajjitōk ippāer n̄an kōjerbal jeje ko rekwojarjar aer n̄an kajetjet eoon ko ioon boot eo n̄an kallim̧ur ko. Ekōnono kōn ta meļeļe in kallim̧ur kein, im kajjitōk ippān ajri ro n̄an kwaļo̧k ewi wōt kallim̧ur ko rejipan̄ er en̄jake itok limo kōn Itok Eo Kein Karuo an Rilo̧mo̧o̧r eo.

Kōketak Ekkatak ilo M̧weo

Kajjitōk ippān ajri ro n̄an ļōmņak kōn juon men raar ekkatak ilo iien kūlaaj me remaron̄ kwaļo̧ke ippān baam̧le ko aer. Kajjitōk jejjo ippāer n̄an kwaļo̧k ippān kūlaaj eo ta eo rekōņaan kwaļo̧ke ilo m̧weo.

Kōkōm̧anm̧anļo̧k Ad Katakin

Jipan̄ ajri ro kile Jetōb. Ilo am̧ katakin ajri ro, jiron̄ er n̄e kwoj en̄jake Jetōb Kwojarjar. Kōnono kōn ekōjkan am̧ kile An pād. N̄an waanjon̄ak, komaron̄ en̄jake aenōm̧m̧an ak lan̄lōn̄ ilo am̧ al juon al kōn Rilo̧mo̧o̧r eo. Kile en̄jake kein renaaj jipan̄ ajri ro jeļā n̄āāt eo rej en̄jake Jetōb.