“Eprōļ 26–Māe 2. Katak im Bujen Ko 45: ‘Kallim̧ur ko … Renaaj Kūrm̧ool,’” Itok, Ļoor Eō—N̄an Kajjojo Armej im Baam̧le Ko: Katak im Bujen Ko 2021 (2020)

“Eprōļ 26–Māe 2. Katak im Bujen Ko 45,” Itok, Ļoor Eō—N̄an Kajjojo Armej im Baam̧le Ko: 2021

Pija

jodikdik ro rej pād nam̧ōj in tampeļ

Eprōļ 26–Māe 2.

Katak im Bujen Ko 45

“Kallim̧ur ko … Renaaj Kūrm̧ool”

Būreejtōn Russell M. Nelson eaar katakin: “Je ļōmņak ko me rej itok n̄an kōļmenļo̧kjeņ eo am̧. Ļo̧o̧ke en̄jake ko am̧ im wōnm̧aanļo̧k wōt kōn m̧akūtkūt ko me kwōj bōk” (“Revelesōn n̄an Kabun̄ eo, Revelesōn n̄an Mour ko Ad,” Ensign ak Liaona, Māe 2018, 95).

Je En̄jake ko Rej Im̧we Eok

Jej mour ilo iien ko renana, im bwe emaron̄ in juon jorrāān. Jekdo̧o̧n rikaļoor ro an Jisōs, ke raar ron̄ kanaan eo An kōn jerata ko me renaaj kar waļo̧k ilo tōre in ad, “raar lōļn̄o̧n̄” (Katak im Bujen Ko 45:34). Armej ro Rekwojarjar m̧oktata ilo Kirtland, Ohio, raar barāinwōt inepata kōn iien ko renana me raar mour ie. Ibwilijin men ko jet, ekar “elōn̄ ennaan ko rej jab m̧ool … im bwebwenato ko rebwebwe” me raar kōmōjņo̧ikļo̧k ennaan eo an gospel eo (Katak im Bujen Ko 45, taitōļ an jekjōn). Bōtaab uwaak eo an Irooj, jem̧aan im kiiō, ej “kom̧ij jab lōļn̄o̧n̄” (eoon 35). Aaet, ewōr nana, bōtaab ebarāinwōt wōr kein kam̧ool bwe Anij ej kōm̧ōkaj jerbal eo An. Aaet, ewōr nana ko reļļap kar kajjimeļeļeik rej waļo̧k m̧okta jān Itok eo Kein Karuo, im jej aikuj ekkōl kaki. Bōtaab men kein raar jab wōt kakōļļe in kauwōtata ko; rej barāinwōt kakōļļe ko bwe kallim̧ur ko an Anij rej jino in kūrm̧ool. Bōlen menin ej etke Katak im Bujen Ko 45—juon revelesōn me ej kōmeļeļeik elōn̄ iaan kakōļļe kein ilo tipdikier—kar būki “n̄an lan̄lōn̄ eo an Ro Rekwōjarjar” (taitōl an jekjōn).

Pija

pija ej bōk jikin ekkatak ippam̧ make

Ļōm̧ņak ko n̄an Ekkatak Jeje Ko Rekwojarjar Ippam̧ Make

Katak im Bujen Ko 45:1–5

Jisōs Kraist ej ad Rijojomar ippān Jemān.

Kwonan̄in ke kar en̄jake likjab ak jej tokjān im̧aan Anij? Komaron̄ in lo bar kam̧ool eo ilo Katak im Bujen Ko 45:1–5. Ta eo naan ko āinwōt “jojomar” im “akweļap” rej kwaļo̧k n̄an eok? Ekōjkan an Rilo̧mo̧o̧r eo rijojomar n̄an kwe, ak akweļap kōn jerbal eo am̧? Ta meļeļe in n̄an kwe n̄an jeļā bwe Kraist ej am̧ Rijojomar?

Naan kein jān Rikanaan Josep Fielding Smith remaron̄ jipan̄ eok kejekļo̧kjeņ kōn eoon kein: “Jisōs [ej] ad rijojomar, akweļap kōn kōj ilo jerbal eo an āinwōt juon rijojomar kōn jerbal in karejar eo an im jerbal ko n̄an etale ippād, n̄an bōktok n̄an kōj juon koņ ippān Anij” (in Conference Report, Oct. 1953, 58).

Lale barāinwōt 2 Nipai 2:8–9; Mosaia 15:7–9; Moronai 7:27–28; Katak im Bujen Ko 29:5; 62:1.

Katak im Bujen ko 45:9–10

Gospel eo ej juon jon̄ak n̄an laļ ko.

Etto, juon jon̄ak ekar juon m̧ōttan nuknuk kileplep ak būļāāk kar ineke n̄an tariņae. Ekar kakuktok im kaippān doon ritariņae ro im kar jipan̄ er jeļā ia eo n̄an aindoon ie im ta eo n̄an kōm̧m̧ane. Jon̄ak ej barāinwōt juon waanjon̄ak ak kakien me men ko jet remaron̄ in keidi n̄an e. Ilo am̧ riiti Katak im Bujen Ko 45:9–10, kejekļo̧kjeņ kōn ekōjkan an bujen gospel eo kar juon jon̄ak n̄an kwe. Ekōjkan an naaj kar mour eo am̧ oktak eļan̄n̄e eaar ejjeļo̧k bujen kein ippam̧?

Lale barāinwōt Aiseia 5:26; 11:10–12; Katak im Bujen Ko 115:5–6.

Katak im Bujen Ko 45:11–15

Kallim̧ur ko an Irooj renaaj kūrm̧ool.

Tariņae, nana, im jorrāān renaaj itok m̧okta jān Itok eo Kein Karuo an Rilo̧mo̧o̧r eo. Bōtaab “kom̧in jab lōļn̄o̧n̄,” Irooj eaar ba, “bwe, n̄e aolep men kein renaaj waļo̧k, kom̧ maron̄ jeļā ke kallim̧ur ko me kar kōm̧m̧ani n̄an kom̧ renaaj kūrm̧ool” (Katak im Bujen Ko 45:35).

Ilo am̧ ekkatak Katak im Bujen Ko 45:11–75, ļōmņak in jab pedped wōt iien ko rekōkleļn̄o̧n̄ me kar kanaan kaki ak barāinwōt ioon kōjeraam̧m̧an ko Irooj ej kallim̧ur kaki (n̄an waanjon̄ak, kallim̧ur ko ilo eoon 54–59 kōn irooj in meļōniōm̧ eo an Rilo̧mo̧o̧r eo). Komaron̄ kōm̧m̧ane menin kōn ejake laajrak ko ak kōn lebōļe ak kakōļļeik eoon ko. Ta eo kwoj loe bwe ejipan̄ eok “jab leļn̄o̧n̄” kōn raan ko āliktata?

Katak im Bujen Ko 45:31–32, 56–57

“Jutak ilo jikin ko rekwōjarjar,” im jab em̧m̧akūt.

Juon un kōn an Riilo̧mo̧o̧r eo im rikanaan ro An katakin kōj kōn kakōļļe ko kōn Itok eo Kein Karuo ej n̄an jipan̄ kōj m̧aanjabpopo. Ta eo kwoj ekkatak ilo Katak im Bujen Ko 45:31–32, 56–57 kōn m̧aanjabpopo n̄an Itok eo Kein Karuo an Irooj? Emaron̄ in jipan̄ n̄an etale būrabōļ eo kōn bōjin ro jon̄oul, loe ilo Matu 25:1–13. Rilo̧mo̧o̧r eo eaar keidi oil eo ilo būrabōļ in n̄an m̧ool eo im n̄an Jetōb Kwojarjar eo (lale Katak im Bujen Ko 45:57). Ta kōļmenļo̧kjeņ ko kwoj būki n̄e kwoj riiti būraibōļ eo ilo wāween in?

Parable of the Ten Virgins, jān Dan Burr

Katak im Bujen Ko 45:11–15, 66–71

Zaion ej juon jikin kōjparok n̄an Armej ro Rekwojarjar an Anij.

Armej ro Rekwojarjar ilo tōre eo an Josep Smith raar kijiooror in kalōk Zaion, Jerusalem eo Ekāāl, āinwōt kar kōmeļeļeik ilo Bok in Mormon (lale Ether 13:2–9) im ilo ukok eo ekāāl eim̧we an Josep Smith kōn Baibōļ eo (lale Moses 7:62–64). Ta eo kwoj ekkatak kōn Zaion—jim̧or jikin kweilo̧k an Enōk eo etto rainin im raan ko āliktata—jān Katak im Bujen Ko 45:11–15, 66–71?

Rainin kean̄ eo n̄an kajutak Zaion ej kōnono kōn kajutak aelōn̄ in kiin̄ eo an Anij jabdewōt jikin jej mour ie—jabdewōt jikin ajri ro nejin Anij rej aindoon ie n̄an kōjparok eo An “bujen eo ejjeļo̧k jem̧lokin” (eoon 9). Ta eo komaron̄ kōm̧m̧ane n̄an jipan̄ kalōk Zaion eo ijo kwoj pād ie?

Lale barāinwōt Gospel Topics, “Zion,” topics.ChurchofJesusChrist.org.

Pija

pija eo ej bōk jikin ekkatak an baam̧le

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Katak im Bujen Ko 45:3–5.Ta eo juon rijojomar ej kōm̧m̧ane n̄an kōj? kom̧ maron̄ alooje pija in alooj eo “The Mediator” (ChurchofJesusChrist.org) im kōnono kōn etke Rilo̧mo̧o̧r eo kar ņa etan Rijojomar.

Katak im Bujen 45:9–10.Eļan̄n̄e baam̧le eo am̧ ewōr juon an “jon̄ak,” ak buļāāk, n̄an jutak kōn kallim̧ur eo ami n̄an gospel eo, enaaj kar ewi jekjek in? Emaron̄ in kam̧ōņōņō n̄an kōm̧m̧ane juon būļāāk an baam̧le eo ippān doon im ekōnono kōn ekōjkan am̧ maron̄ jipan̄ ro jet ļoor jon̄ak ko an gospel eo.

Katak im Bujen Ko 45:32.Ta “jikin ko rekwojarjar” ad? Ta meļeļe in n̄an “jab em̧m̧akūt”? Ekōjkan ad maron̄ kōm̧m̧ani m̧ōko im̧ōd juon jikin ekwojarjar?

Katak im Bujen Ko 45:39–44.Ekōjkan am̧ maron̄ jipan̄ ro uwaan baam̧le eo meļeļe ta meļeļe in n̄an mije Itok eo Kein Karuo an Rilo̧mo̧o̧r eo? Bōlen komaron̄ ļōmņak kōn juon iien me kwoj kōtmene im kwaļo̧k wāween ko me kwoj “mije” iien eo. Ak komaron̄ iiōke juon men ippān doon im mije kakōļļe ko bwe ej pojak n̄an kan̄e. Ta eo jej kōm̧m̧ane n̄an mije Itok eo Kein Karuo an Rilo̧mo̧o̧r eo?

Katak im Bujen Ko 45:55.Riiti 1 Nipai 22:26 im Revelatiōn 20:1–3 emaron̄ jipan̄ baam̧le eo am̧ meļeļe ekōjkan an Setan “naaj lukwōje” ilo meļiniōm̧ eo. Ekōjkan ad maron̄ lukwōj Setan ilo mour ko ad?

Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar elmakote: “When He Comes Again,” Children’s Songbook, 82–83; lale barāinwōt “Ļōmņak ko n̄an Kōkōm̧anm̧anļo̧k Ekkatak Jeje Ko Rekwojarjar an Baam̧le eo Am̧.”

Kōkōm̧anm̧anļo̧k Am̧ Ekkatak Ippem Make

Kōjerbal kein jipan̄ ekkatak ko. Kōjerbal footnote ko, Topical Guide, Bible Dictionary, eo im Unin Tōl n̄an Jeje Ko Rekwōjarjar n̄an bōk kōļmenļo̧kjkeņ ko n̄an jeje ko rekwojarjar.