“Māe 10–16. Katak im Bujen Ko 49–50: ‘Men eo Ej jān Anij Ej Meram,’” Itok, Ļoor Eō—N̄an Kajjojo Armej im Baam̧le Ko: Katak im Bujen Ko 2021 (2020)
“Māe 10–16. Katak im Bujen Ko 49–50,” Itok, Ļoor Eō—N̄an Kajjojo Armej im Baam̧le ko: 2021
Māe 10–16
Katak im Bujen Ko 49–50
“Men eo Ej jān Anij Ej Meram”
Irooj ej kallim̧uri kōj: Bwe eo ej an Anij ej meram, im armej eo me ej bōk meram im wōnm̧aanļo̧k wōt ilo Anij ej bōk eļapļo̧k meram. Meram in ej ļapļo̧k an romak im romak m̧ae raan eo eweppān (Katak im Bujen ko 50:24). Ļōmņak kōn ekōjkan am̧ jān bōk meram im wōnm̧aanļo̧k wōt ilo Anij.
Je En̄jake ko Rej Im̧we Eok
Rilo̧mo̧o̧r eo ej ad “seperd eo em̧m̧an” (Katak im Bujen Ko 50:44). Kwojeļā bwe jet iien jiip ko rej jōbwābwe im bwe buļōn mar ebooļ kauwōtata ko. Kōn menin Ej iakwe ilo an tōlļo̧k kōj n̄an ineem̧m̧an an katak eo An, ettoļo̧k jān kauwōtata ko eo āinwōt “jetōb ko rejjab m̧ool, ko em̧ōj aer ajeeded ilo laļ in, im m̧oņe laļ in” (Katak im Bujen Ko 50:2). Ļoor E emakijkij an meļeļe in kōtlo̧k ļōmņak ko rebōd ak iminenen ko. Menin ekar m̧ool n̄an Leman Copley im ro jet ilo Ohio me raar bōk gospel eo kar kōjepļaaktok bōtaab raar dāpij wōt jet tōmak ko me raar jab jim̧we. Ilo Katak im Bujen Ko 49, Irooj ekar kean̄ kōn m̧ool ko me raar kajim̧we tōmak ko an Leman m̧oktaļo̧k kōn unini kōnono ko āinwōt m̧are im Itok Eo Kein Karuo an Rilo̧mo̧o̧r eo. Im ke rioktak ro ilo Oho raar “bōk … jetōb ko me [er] ar jab meļeļe,” Irooj eaar katakin er ekōjkan kile waļo̧ktok rem̧ool an Jetōb (Katak im Bujen Ko 50:15). Seperd eo Em̧m̧an ekar kijenmej; Eaar jeļā bwe Armej ro Rekwojarjar m̧okta raar—āinwōt kōjwōj aolep—“ajri reddik” me “aikuj eddek ilo jouj im ilo jeļā kōn m̧ool eo” (Katak im Bujen Ko 50:40).
Ļōm̧ņak ko n̄an Ekkatak Jeje Ko Rekwojarjar Ippam̧ Make
M̧ool ko an gospel eo remaron̄ jipan̄ eō kile katak ko rebōd.
M̧okta jān an kar kobatok ilo Kabun̄ in, Leman Copley ekar m̧ōttan juon kūrub in kabun̄ ebun̄bun̄ āinwōt juon United Society of Believers in Christ’s Second Appearing, barāinwōt jeļā kake er āinwōt Shakers (lale “Leman Copley and the Shakers,” Revelations in Context, 117–21). Ālkin juon iien bwebwenato ippān Leman, Josep Smith ekar kajjieon̄ in bōk kalikkar jān Irooj kōn jet iaan katak ko an Rishaker ro, im Irooj ekar uwaak kōn revelesōn eo ilo jekjōņ 49.
Komaron̄ lo jet iaan tōmak ko an Rishaker ro kar kōnono kaki ilo taitōļ an kōmeļeļe eo n̄an jekjōn 49. Ļōmņak in kakōļļeiik ak je m̧ool ko ilo eoon 5–23 me rej kajim̧we tōmak ko. Ļōmņak kōn katak ko rebōd ak iminene ko ilo laļ in rainin. Ta m̧ool ko an gospel eo remaron̄ jipan̄ kōjparok eok make ņai?
M̧are eo kōtaan em̧m̧aan im kōrā ej aorōk n̄an karōk eo an Anij.
Ta m̧ool ko kōn m̧are kwoj ekkatak jān Katak im Bujen Ko 49:15–17? Etke kwoj en̄jake m̧are eo ikōtaan juon em̧m̧aan im juon kōrā ej aorōk n̄an karōk eo an Jemedwōj Ilan̄? Elder David A. Bednar eaar letok ruo un ko: “Un 1: Lukkuun paotok in jetōb ko an em̧m̧aan im kōrā edipio im weppāān n̄an doon, im kōn menin em̧m̧aan ro im kōrā ro kar karōk wōt n̄an eddōkļo̧k ippān doon m̧aanļo̧k n̄an mour āinwōt Anij. … Un 2: Kōn karōk ekwojarjar, jim̧or juon em̧m̧aan im juon kōrā rej aikuj in keotak ajri ro n̄an mour in im n̄an leļo̧k n̄an er jekjek eo em̧m̧an tata n̄an karūttoļo̧k im kōkkajiririik ajri ro” (“Marriage Is Essential to His Eternal Plan,” Ensign, June 2006, 83–84).
Lale barāinwōt Jenesis 2:20–24; 1 Korint 11:11; “Baam̧le Eo: Juon Naan in Kean̄ n̄an Laļ in,” Ensign ak Liaona, Māe 2017, 145.
M̧are ikōtaan juon em̧m̧aan im juon kōrā ej ekkapit in Anij.
Katak ko an Irooj remaron̄ kōjparok eō jān m̧oņ ko an Setan.
Rioktak ro rekāāl ilo Ohio raar kijooror n̄an bōk waļo̧k ko kar kallim̧ur kake ilo jetōb ilo jeje ko rekwojarjar, bōtaab Setan ekar barāinwōt kijooror n̄an m̧oņe er. Raar kōļmenļo̧kjeņ, N̄e eo juon ej lam̧ōj ak ļōtļo̧k, ej ke kareel eo an Jetōb?
Baj ļōmņak bwe kar kajjitōk ippam̧ n̄an jipan̄ rioktak rein rekāāl meļeļe ekōjkan n̄an kile waļo̧k ko rem̧ool an Jetōb Kwojarjar eo im jab po jān aujiid ko an Setan Ta pedped in katak ko kwoj loi ilo Katak im Bujen Ko 50 me komaron̄ kwaļo̧k? (lale eļap tata eoon 22–25, 29–34, 40–46).
Lale barāinwōt 2 Timote 3:13–17.
Rūkaki ro im rikkatak ro rej ketak ippān doon jān Jetōb eo.
Juon wāween komaron̄ ekkatak Katak im Bujen Ko 50:13–24 ej n̄an jin̄aik juon pija in juon rūkaki āinwōt juon rūkkatak im, iturintok kajjojo, kōm̧m̧ane juon laajrak in naan ko im eoon ko jān eoon kein me rej katakin eok juon men kōn ekkatak im kwaļo̧k gospel eo. Ke ekar wōr am̧ en̄jake ko ko bwe raar katakin eōk aoroōk eo an Jetōb eo ilo katakin im ekkatak? Naat eo ekar lōn̄ am en̄jak ekar katakin eok kōn aorōk eo an Jetōb ilo katakin im ekkatak. Ļōmņak kōn ta eo komaron̄ kōm̧m̧ane n̄an kōkōm̧anm̧anļo̧k kijejejto ko am̧ āinwōt juon rūkkatak im juon rūkaki an gospel eo?
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota
-
Katak im Bujen Ko 49:2Ta meļeļe in n̄an “jeļā m̧ool eo ilo m̧ōttan, ak jab aolepān”? Bōlen komaron̄ kwaļo̧k jidik in pija eo pineje im kōm̧m̧an bwe ro uwaan baam̧le en kajidedeik ta eo. Ta eo ej waļo̧k n̄e jej bōk jidik in wōt m̧ool eo? (lale 2 Nipai 28:29). Ekōjkan an tarlep in gospel eo juon kōjeraam̧m̧an n̄an kōj?
-
Katak im Bujen ko 49:26-28Ekōjkan ad kar jeraam̧m̧an jān kallim̧ur eo an Irooj “Inaaj etal im̧aamiļo̧k am naaj pād ilikimi; im Inaaj pād ilubwiljimi”? Ro uwaan baam̧le eo remaron̄ kwaļo̧k en̄jake ko ke raar en̄jake an Irooj “etal [im̧aaerļo̧k]” ak kar en̄jake An kar “pād [ilubwilijier].”
-
Katak im Bujen ko 50:23–25.Kom̧ maron̄ aindoon ilo juon ruum̧ emarok n̄a riiti Katak im Bujen Ko 50:23–25 im jidik kōn jidik kobaiktok eļapļo̧k meram jān tile kāāntōļ ko ak kabbōl tōm̧a ko juon illo̧k juon. Kom̧ maron̄ barāinwōt riiti eoon ko ilo alooje an aļ eo tak ilo jibbon̄. Ta eo jemaron̄ kōm̧m̧ane n̄an an meram in gospel eo ad wōnm̧aanļo̧k wōt n̄an eddōkļo̧k? N̄e ro uwaan baam̧le eo rej ekkatak juon men ekāāl kōn gospel eo ilo wiik eo, kōketak er n̄an kwaļo̧ke ippān baam̧le eo kōn je juon kakeememej im kōddepe n̄an juon ļaam̧ ak tōm̧a ko jet ilo m̧weo.
-
Katak im Bujen Ko 50:40–46.Ālkin riiti Katak im Bujen Ko 50:40–46, komaron̄ kwaļo̧k pija eo an Rilo̧mo̧o̧r eo me ej itok ippān unin tōl in im kajjitōk kajjitōk ko āinwōt kein: Ekōjkan am̧ maron̄ ba ke Rilo̧mo̧o̧r eo ej iakwe jiip ko? Ekōjkan an Rilo̧mo̧o̧r ro āinwōt juon seperd n̄an kōj? Naan ta ko jān jeje ko rekwojarjar rej kwaļo̧k ļōmņak eo bwe Rilo̧mo̧o̧r eo ej juon seperd im jej An jiip?
Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Al eo kar elmakote: “Shine On,” Children’s Songbook, 144.
Kōkōm̧anm̧anļo̧k Ad Katakin
En ejjeļo̧k kapan̄pan̄ Iien in katakin ko rem̧m̧an tata, eļap tata ilo m̧weo, emakijkij aer make waļo̧k im jab kōtmene: juon iien m̧ōn̄ā an baam̧le emaron̄ in im̧we juon iien ekōnono kōn kwojkwoj ioon naan an Anij, im juon ļan̄ in wōt emaron̄ juon iien n̄an kam̧ool kōn dān in mour. Eļan̄n̄e kwoj pojak ilo jetōb, Irooj emaron̄ lewaj n̄an eok “ejja awa eo wōt, aaet, ilo iien eo wōt” (Katak im Bujen Ko 100:6).
Gentle Shepherd, jan Kim Yongsung