Iaļ in Independence Missouri

Independence, Missouri, jān Al Rounds

Māe 24–30.

Katak im Bujen Ko 58–59

“Kanooj M̧ōņōņō in Poub kōn Tokjān”

Būreejtōn Dallin H. Oaks eaar katakin, “Jeje ko rekwojarjar renaaj jipan̄ kōj ņa mejļan aolep kajjitōk ko ad make kōnke jān riiti er jej karuwaineneik im kōkarbōb kōj make n̄an im̧we eo an Jetōb Kwojarjar, eo enaaj tōl kōj n̄an aolep m̧ool” (ilo David A. Edwards, “Are My Answers in There?” New Era, Māe 2016, 42).

Je En̄jake ko Rej Im̧we Eok

Ke elder ro an Kabun̄ in raar m̧oktata lo jikin kweilo̧k Zaion—Independence, Missouri—ekar jab ta eo raar kōtmene. Jet raar ļōmņak renaaj kar lo juon jukjuk in pād eddōk, elōn̄ jikin jerbal ippān juon kumi in Armej ro Rekwojarjar rekajoor. Ijello̧kin raar lo juon jikin ejjab lōn̄ armej ie, ejjab bwe kitōltōl in armej āinwōt aer kōn iminene kake im kar obrak kōn armej ro raar pād ie jān jinoin ijello̧kin Armej ro Rekwojarjar. Ekar alikkar bwe Irooj ekar jab kajjitōk ippāer n̄an baj itok wōt n̄an Zaion—Ekar kōņaan bwe ren kalōk e.

N̄e kōtmene ko ad rejjab jetjet n̄an lukkuun, jemaron̄ keememej an Irooj jiron̄ Armej ro Rekwojarjar ilo 1831 eo: “Kom̧ij jab maron̄ lo kōn mejān kanniōk ko mājāmi, bwe ilo iien in, karōk eo an ami Anij … im wōj eo enaaj itok ālikin eļap en̄taan” (Katak im Bujen Ko 58:3). Aaet, mour in eobrak kōn en̄taan, em̧ool nana, bōtaab jemaron̄ “im kwaļo̧k eļap em̧m̧an; bwe kajoor eo epād ilo [kōj]” (eoon 27–28).

Lale barāinwōt Saints, 1:114–19

pija ej bōk jikin ekkatak ippam̧ make

Ļōm̧ņak ko n̄an Ekkatak Jeje Ko Rekwojarjar Ippam̧ Make

Katak im Bujen Ko 58:1–5, 26–33, 44; 59:23

Kōjeraam̧m̧an ko rej itok ekkar n̄an iien eo an Anij im ad niknik.

Armej ro Rekwojarjar raar door pedped eo an Zaion ilo Jackson Kaunty, Missouri, ijo raar niknik ilo elōn̄ mālijjon̄ ko. Em̧ool raar kōjatdikdik bwe ilo iien mour ko aer jikin in enaaj kar eddōkļo̧k n̄an juon jikin ijo aolep Armej ro Rekwojarjar maron̄ koba. Ijowōt ke, Armej ro Rekwojarjar raar kadiwōjļo̧k er jān Jackson Kaunty ilowaan wōt jejjo iiō ko, im Irooj ekar kwaļo̧k bwe armej ro An renaaj aikuj in “kōttar ium̧win jidik tōrean n̄an lo̧mo̧o̧ren eo an Zaion” (Katak im Bujen Ko 105:9).

Ilo am̧ ekkatak eoon kein, pukōt un ko kōjeraam̧m̧an ko remaron̄ in kōttar ium̧win juon tōre. Kajjitōk ko itulaļ remaron̄ jipan̄ eok kejekļo̧kjeņ

Katak im Bujen Ko 58:1–5; 59:23. Ta ennaan ko ilo eoon kein rej kōkajoorļo̧k maron̄ eo am̧ n̄an niknik ilo en̄taan kōn eļapļo̧k kijenmej? Ta kōjeraam̧m̧an ko kwar būki ālkin en̄taan eo? Etke kwoj ļōmņak jet kōjeraam̧m̧an ko rej itok wōt ālkin en̄taan eo?

Katak im Bujen Ko 58:26–33. Ta jerbal eo an erom āinwōt “kanooj m̧ōņōņō in poub kōn tokjān” ej kōm̧m̧ane ilo kakūrm̧ool kallim̧ur ko an Anij? Ta eddo eo an pokake eo am̧ ej kōm̧m̧ane?

Katak im Bujen Ko 58:44. Ta kadkad eo ikōtaan “jar in tōmak” im ankilan Irooj n̄an kōj?

Katak im Bujen Ko 59, taitōļ eo an jekjōn

Wōn eo kar Polly Kinight?

Polly Knight im ļeo pāleen, Joseph Knight Sr., raar jet iaan rittōmak ro m̧oktata ilo kūr in rikanaan eo an Josep Smith. Polly im Josep raar rejtak eo emenin aikuj n̄an Rikanaan eo ilo jerbal in ukok eo an Bok in Mormon. Baam̧le eo an Knight raar em̧m̧akūt jān Colesville, New York, n̄an koba ippān Armej ro Rekwojarjar ilo Ohio im tok ālik raar kakien er n̄an ilo̧k n̄an Jackson Kaunty, Missouri. Ke raar em̧m̧akūtļo̧k, ājmour eo an Polly ekar jino an ļapļo̧k an nana, bōtaab liin ekar jōk ilo e n̄an lo Zaion m̧okta jān an mej. Liin ekar pād ilo Missouri jejjo wōt raan ko ke liin ekar mej (lale Saints, 1:127–28, 132–33). Katak im Bujen Ko 59 kar bōke ioon raan eo kar jako ie, im eoon 1 im 2 eaar āinwōt kōnono eļap tata n̄an e.

Katak im Bujen Ko 59:9–19

Kōkwojarjar Jabōt ej bōktok kōjeraam̧m̧an ko ilo kanniōk im jetōb.

Ālkin kallim̧ur n̄an kōjeraam̧m̧an Armej ro Rekwojarjar ilo Zaion “kōn kien ko rej jab jet wōt,”Irooj ekar leļo̧k kōmejaja eo eaorōk n̄an juon kien eļap tata: kakien eo n̄an kautiej “raan eo ekwōjarjar” An (Katak im Bujen Ko 59:4, 9). Ilo am̧ ekkatak Katak im Bujen Ko 59:9–19, kejekļo̧kjeņ kōn etke kautiej Jabōt ekar kanooj in aorōk n̄an Armej rein Rekwojarjar ilo aer kar kappukōt n̄an kalōk Zaion.

Komaron̄ barāinwōt kejekļo̧kjeņ kōn kajjitōk ko āinwōt kein: Ij kōjerbal ke raan in Jabōt ilo wāween eo Irooj ekar kōņaan? Ekōjkan an kōkwojarjar Jabōt jipan̄ kōjparok eō “jān libbijinjin jān laļ”? (eoon 9). Ta eo imaron̄ kōm̧m̧ane n̄an kalimjōk wōt “nebar ko am n̄an eo Eo Eutiejtata”? (eoon 10).

Ālkin riiti eoon kein, ta eo kwoj im̧we n̄an kōm̧m̧ane n̄an kōļapļo̧k kōjparok im kōkwojarjar raan in Jabōt? Jenesis 2:2–3; Exodus 20:8–11; 31:13, 16; Duteronomi 5:12–15; Aiseia 58:13–14; Mark 2:27; Jon 20:1–19; Jerbal 20:7.

Komaron̄ barāinwōt jeraam̧m̧an jān juon iaan pija in alooj ko rellōn̄ ak kein jipan̄ ko jet kōn Jabōt loe ilo sabbath.ChurchofJesusChrist.org.

Lale barāinwōt Russell M. Nelson, “Jabōt Ej Juōn Men In Lan̄lōn̄,” Ensign ak Kweilo̧k eo Eļap, Māe 2015, 129–32; Bible Dictionary, “Sabbath.”

pilawe im kab in kwojkwoj ko

Bōk m̧ōttan kwojkwoj eo ej m̧ōttan wōt kōjparok im kōkwojarjar raan in Jabōt.

pija eo ej bōk jikin ekkatak an baam̧le

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Katak im Bujen Ko 58:26–29.Bōlen ro uwaan baam̧le eo remaron̄ kōm̧m̧ane juon laajrak in jet iaan men ko rej “kanooj m̧ōņōņō” ie. Aolepāer rej ke “poub kōn tokjān[ko]”? Etke Irooj ekōņaan bwe jen kōm̧m̧ane “elōn̄ men ko kōn wōt anemkwōj in kāālet eo [ad]”? Kajjitōk ippān kajjojo ro uwaan baam̧le eo n̄an ļōmņak kōn ta eo remaron̄ kōm̧m̧ane wiik in n̄an “kwaļo̧k eļap em̧m̧an.” Tok ālik remaron̄ kwaļo̧k kōn ta eo raar kōm̧m̧ane.

Katak im Bujen Ko 58:42–43Ta eo ro uwaan baam̧le eo rej en̄jake n̄e rej riiti eoon kein? Ekōjkan an eoon kein maron̄ jipan̄ juon eo me ej aikuj in ukweļo̧k?

Katak im Bujen Ko 59:3–19.Ta eo emaron̄ in meļeļe in n̄an “pālik … kōn kien ko”? (eoon 4). Ilo am̧ riiti kien ko ilo eoon 5–19, ekōnono kōn kōjeraam̧m̧an ko kwar būki jān pokake kajjojo iaan kien kein.

Komaron̄ barāinwōt kile ekōjkan an naan ko āinwōt “lan̄lōn̄,” “lo̧udin̄din̄,” “lem̧ōņōņō,” im “m̧ōņōņō” rej kōjerbali n̄an kōmeļeļeik kien eo n̄an kauteij raan in Jabōt. Ekōjkan am̧ maron̄ kōm̧m̧an bwe Jabōt eo am̧ en ļapļo̧k an kōlan̄lōn̄? Bōlen baam̧le eo am̧ emaron̄ kōm̧m̧ane juon ikkure in kōmāājāj kōn kaaj ko me rej kwaļo̧k men ko kom̧ maron̄ kōm̧m̧ani n̄an kōjparok im kōkwojarjar raan in Jabōt.

Katak im Bujen Ko 59:18–21.Ta eo jemaron̄ kōm̧m̧ane n̄an “kile … pein [Anij] ilo men ko otemjeļo̧k”? (eoon 21). Ļōmņak in etal in etetal laļ ak lale pija ko, kile men ko me rej “kam̧ōņōņō māj … kalan̄lōn̄ bōro (eoon 18). Komaron̄ bōk pija ak jin̄aik pija ko kōn ta eo kwoj loi innām kōnono kōn ekōjkan am̧ maron̄ kwaļo̧k am̧ kam̧m̧oolol kōn men kein. Ekōjkan ad kar lo pein Anij ilo mour ko ad?

Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar elmakote: “Choose the Right,” Hymns, nō. 239.

Kōkōm̧anm̧anļo̧k Ad Katakin

Kwaļo̧k eoon ko. Leļo̧k n̄an ro uwaan baam̧le eo iien n̄an kwaļo̧k eoon ko an jeje ko rekwojarjar raar loi ilo ekkatak eo aer make me eļap meļeļe in n̄an er.

leddik eo ej jar ilo iien kwojkwoj eo.

Kōmeļeļeik jān Marti Major