Campfire on the Missouri, jān Bryan Mark Taylor

Māe 31–Juun 6.

Katak im Bujen Ko 60–62

“Aolep Kanniōk Ej ilo Peiū”

Būreejtōn Ezra Taft Benson eaar katakin bwe n̄e jej ekkatak jeje ko rekwojarjar, “naan in kam̧ool ko renaaj ļapļo̧k. Kijejeto enaaj kajoorļo̧k. Baam̧le ko renaaj kijin̄en̄eļo̧k. Revelesōn an juon make naaj jiōbtok” (“The Power of the Word,” Ensign, Māe1986, 81).

Je En̄jake ko Rej Im̧we Eok

Ilo Juun in 1831 eo, Josep Smith ekar kōm̧m̧ane juon kweilo̧k ippān elder ro an Kabun̄ in ilo Kirtland. Ijo, Irooj ekar ejake jet iaan elder ro n̄an m̧ōttā im jilkinļo̧k er n̄an Jackson Kaunty, Missouri, kōn kappe in: “Kwaļo̧k naan ilo iaļ eo” (Katak im Bujen Ko 52:10). Elōn̄ iaan elder ro raar kōm̧m̧ane ilo niknik, bōtaab ro jet raar jab. Kōn menin ke iien eo ekar itok n̄an bar jepļaakļo̧k Kirtland, Irooj eaar ba, “Ippān jet [elder ro] Ij jab m̧ōņōņō, bwe reban kōpeļļo̧k lo̧n̄ier, ak rej ņooje kapeel eo me Iaar leļo̧k n̄an er, kōnke remijak armej” (Katak im Bujen Ko 60:2). Elōn̄ iaad remaron̄ en̄jake tūriam̧o kake n̄an elder rein—jemaron̄ barāinwōt en̄jake aipedped n̄an kōpeļļo̧k lo̧n̄iid im kwaļo̧k gospel eo. Bōlen jebarāinwōt abor kōn “mijak armej.” Bōlen jej pere wōr tojken ko im maron̄ ko ad. Jekdo̧o̧n ta un ko ad, Irooj “jeļā m̧ōjņo̧ an armej im wāween jipan̄ [kōj]” (Katak im Bujen Ko 62:1). Ilo elōn̄ jikin ko ilo revelesōn kein n̄an mijenede ro im̧aan tata rej bar kallim̧ur ko me remaron̄ jipan̄ kōj anjo̧ ioon mijak ko ad kōn kwaļo̧k gospel eo—ak ro jet rej mijak jemaron̄ in jelm̧ae:, “N̄a, Irooj, ij irooj ilo lan̄ ko ilōn̄.” “N̄a imaron̄ kōm̧m̧an bwe kom̧in ekwōjarjar.” “Aolep kanniōk ej ilo peiū.” Im “kom̧in m̧ōņōņō, ajri reddik; bwe N̄aij pād ilubwiljimi.” (Katak im Bujen Ko 60:4, 7; 61:6, 36.)

Ļōm̧ņak ko n̄an Ekkatak Jeje Ko Rekwojarjar Ippam̧ Make

Katak im Bujen Ko 60; 62

Irooj ej m̧ōņōņō n̄e ij kōpeļļo̧k lon̄iū n̄an kwaļo̧k gospel eo.

Ewōr adwōj en̄jake ko me jemaron̄ kar kwaļo̧ki ippān ro jet, bōtaab kōn jet un ko, jaar jab. Ilo am̧ riiti naan ko an Irooj n̄an mijenede ro m̧oktata me raar likjab n̄an “kōpeļļo̧k lo̧n̄ier,” ļōmņak kōn iien ko rem̧m̧an am̧ make n̄an kwaļo̧k gospel eo. Ekōjkan an naan in kam̧ool eo am̧ kōn gospel eo āinwōt juon “tōļan,” ak juon menin aorōk jān Anij? Ilo wāween ta jej jet iien “ņooje tōļan eo [ad]”Katak im Bujen Ko 60:2; lale barāinwōt Matu 25:14–30).

Irooj ekar kajim̧we mijenede rein m̧oktata, bōtaab Eaar barāinwōt kajjieon̄ im̧we er. Ta ennaan in kōketak ko jān E kwoj loi ilo jekjōn 60 im 62? Ekōjkan an ennaan kein kalōk lōke eo am̧ ilo kwaļo̧k gospel eo? Ilo raan ko im̧aan, kappukōt iien ko rem̧m̧an n̄an kōpeļļo̧k lo̧n̄ūm̧ im kwaļo̧k ta eo ekar lōke eok kake.

Lale barāinwōt Katak im Bujen Ko 33:8–10; 103:9–10; Dieter F. Uchtdorf, “Jerbal In Mijenede: Kwaļo̧k Ta eo Kwoj Lukkuun Tōmak im En̄jake,” Ensign ak Liaona, Māe 2019, 15–18.

Anij ekōņaan bwe in kwaļo̧k gospel eo n̄an ro jet.

Katak im Bujen Ko 61:5–6, 14–18

Aolep dān ko kar ko̧o̧li jān Irooj ke?

Kakkōl eo an Irooj ilo Katak im Bujen Ko 61 eaar, ilo jidik in, juon kakkōl kōn kauwōtata ko armej ro An remaron̄ kar jelm̧ai ilo aer ilo̧k n̄an Zaion ioon Missiouri Reba, eo kar jeļā kake ilo iien eo kōn an kauwōtata. Kakkōl in aikuj in jab (ukok?) bwe en meļeļe in bwe jej aikuj jab itok itak ilo dān. Irooj ewōr ippān “aolep kajoor,” ekoba kajoor ioon dān ko (eoon 1).

Katak im Bujen Ko 61–62

Irooj ekajoor otem kajoor im emaron̄ kōjparok eō.

Ilo iaļ eo an ļo̧k Kirtland, Josep Smith im ritōl ro jet an Kabun̄ in rekar en̄jake juon kamijak n̄an mour ko aer ioon Missouri Reba eo (lale Armej ro Rekwojarjar, 1:133–34). Irooj ekar kōjerbal iien in em̧m̧an n̄an kakkōl im katakin ro Rikarejeran. Ta eo kwoj loe ilo Katak im Bujen Ko 61 me ej kōketak eok n̄an likūt am̧ lōke ilo Irooj ilo am̧ jelm̧ae apan̄ ko am̧ make? N̄an waanjon̄ak, etke ej aorōk n̄an jeļā bwe Anij ej “jān indeeo n̄a indeeo”? (eoon 1).

Ewōr kōļmenļo̧kjeņ ko reier wōt juon ilo jekjōn 62. Ta eo Irooj ej katakin eok kōn E make im An kajoor ilo revelesōn in?

Kejekļo̧kjeņ kōn en̄jake ko rej kalōk tōmak ewōr ippam̧ kōn iien eo Irooj ekar jipan̄ eok anjo̧ ioon apan̄ ilo jetōb ak kanniōk.

Katak im Bujen Ko 62

Irooj ej kōņaan bwe in kōm̧m̧ane jet jokāālet ko “āinwōt an em̧m̧an n̄an [n̄a].”

Jet iien Irooj ej letok n̄an kōj juon tōl ainjuon, im men ko jet Ej likūti n̄an kōj n̄an jokāālet. Ekōjkan am̧ lo pedped in katak in kar kōmeļeļeik ilo Katak im Bujen Ko 62? (lale barāinwōt Katak im Bujen Ko 60:5; 61:22). Ekōjkan am̧ kar loe pedped in katakin ilo mour eo am̧? Etke ej em̧m̧an n̄an kōj n̄an kōm̧m̧ane jet jokāālet ko ilo an ejjeļo̧k juon tōl ainjuon jān Irooj?

Lale barāinwōt Ether 2:18–25; Katak im Bujen Ko 58:27–28.

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota

Katak im Bujen Ko 60:2–3.Etke jet iaan mijenede ro m̧oktata raar aliklik in kwaļo̧k gospel eo? Etke jet iien jej ālikliik? Ļōmņak in kōm̧m̧ane juon ikkure in kwaļo̧k kilen ekōjkan an ro uwaan baam̧le eo maron̄ kwaļo̧k gospel eo ilo eļōn̄ jekjek ko.

Katak im Bujen Ko 61:36–39.Ta un ko jej loi ilo eoon kein n̄an “kom̧in m̧ōņōņō”? (lale bar Jon 16:33). Bōlen baam̧le eo emaron̄ je ak jin̄aik pija ko kōn men ko me rej bōktok n̄an er lan̄lōn̄ im aini ilo juon “kom̧in m̧ōņōņō” bato. (Kanooj lale bwe en koba pija in Rilo̧mo̧o̧r eo im kakeememej ko kōn iakwe eo An n̄an kōj.) Ilo aolepān wiik eo n̄e ro uwaan baam̧le eo rej aikuji juon kakeememej n̄an m̧ōņōņō, remaron̄ kāālet juon men jān bato eo.

Katak im Bujen Ko 61:36.Ekōjkan am̧ maron̄ jipan̄ baam̧le eo am̧ keememej bwe Rilo̧mo̧o̧r eo ej “pād [ilubwilijid]”? Ekōjkan am̧ maron̄ jokāālet ippān doon ia eo n̄an likūt pija eo An ie ilo m̧we im̧ōmi me enaaj pād wōt ie. Ekōjkan ad maron̄ karuwaineneiktok Rilo̧mo̧o̧r eo n̄an mour ko ad raan otemjej?

Katak im Bujen Ko 62:3.Bōlen komaron̄ kōm̧m̧ane juon iien kweilo̧k in kwaļo̧k naan in kam̧ool an baam̧le eo ālkin riiti eoon in. N̄an kōmeļeļeik ta eo naan in kam̧ool, komaron̄ kwaļo̧k jidik in ennaan eo an Būreejtōn M. Russell Ballard “Pure Testimony” (Ensign ak Liahona, Nob. 2004, 40–43). Etke ej em̧m̧an n̄an je naan in kam̧ool ko ad?

Katak im Bujen Ko 62:5, 8.Etke Irooj ejjab letok kien ko kōn aolep jekjek ko an mour ko ad? Ekkar n̄an eoon 8, ekōjkan ad kōm̧m̧ani jokāālet ko?

Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar elmakote: “Testimony,” Hymns, nō. 137.

Kōkōm̧anm̧anļo̧k Am̧ Ekkatak Ippam̧ Make

Kōm̧m̧an bwe Jetōb eo en tōl ekkatak eo am̧. Kōm̧m̧an bwe Jetōb Kwojarjar eo en tōl eok. En m̧ōkaj am̧ kile unojdikdik ko An ilo An tōl m̧aanļo̧k eok n̄an men ko me kwoj aikuji n̄an ekkatak kajjojo raan, jekdo̧o̧n eļan̄n̄e unojidikdik ko An rej kwaļo̧k bwe kwon riit ak ekkatak juon unin kōnono eoktak jān am̧ kijon̄ ak ilo juon wāween eoktak

Good Shepherd, jān Del Parson