“Juun 21–27. Katak im Bujen Ko 67–70: ‘Aorōk …M̧weie ko an Aolepān Laļ,’” Itok, Ļoor Eō—N̄an Kajjojo Armej im Baam̧le Ko: Katak im Bujen Ko 2021 (2020)
“Juun 21–27. Katak im Bujen Ko 67–70,” Itok, Ļoor Eō—N̄an Kajjojo Armej im Baam̧le ko: 2021
Juun 21–27
Katak im Bujen Ko 67–70
“Aorōk …M̧weie ko an Aolepān Laļ”
Men̄e elōn̄ revelesōn ko ilo Katak im Bujen Ko raar kōnono n̄an armej ro rejeno̧lok ilo jekjek ko rejeno̧lok, rej “em̧m̧anļo̧k eo an aolep” (“Naan in kam̧ool eo an Rijjilōk ro Jon̄oulruo kōn M̧ool eo an Bok in Katak im Bujen ko,” kadkad in n̄an Katak im Bujen Ko). Ilo am̧ ekkatak, kappukōt m̧ool ko im pedped in katak ko me rej em̧m̧anļo̧k eo n̄an kwe.
Je En̄jake ko Rej Im̧we Eok
Jān 1828 eo n̄an 1831 eo, Rikanaan Josep Smith ekar bōk elōn̄ revelesōn ko jān Irooj, ekoba kapilōk eo ekwojarjar n̄an kajjojo armej, naan in kōmeļeļe ko kōn tōl Kabun̄ eo, im visiōn ko reim̧we ilo raan ko āliktata. Bōtaab elōn̄ wōt iaan Armej ro Rekwojarjar raar jab riiti. Revelesōn ko rejjan̄in kar pojak n̄an aolep, im jet wōt kape ko raar pojak kar jeje kōn pā ioon peba ko me raar litok litak ilubwilijin membōr ro im būkitok būkitak jān mijenede ro.
Innām, ilo Nobōmba 1831 eo, Josep ekar kūr juon ko̧o̧njeļ an ritōl ro an Kabun̄ in n̄an ekōnono kōn likūt ilo bok revelesōn ko. Ālkin kappukōt ankilan Irooj, ritōl rein raar kōm̧m̧ani karōk ko n̄an likūt ilo bok Bok in Kien ko—eo ekar itok m̧okta n̄an Katak im Bujen Ko rainin. Ejjab to aolep raar maron̄ in riiti kōn er make naan an Anij kar kwaļo̧ki kōn juon rikanaan emour, kein kam̧ool ealikkar me “kii ko an ittiņo ko an aelōn̄ in kiin̄ eo an ad Rilo̧mo̧o̧r rej bar juon alen leļo̧k eddo n̄an armej. Kōn un kein im elōn̄ un ko jet, Armej ro Rekwojarjar m̧okta im kiiō rej watōk revelesōn kein bwe rej “aorōk …m̧weie ko an aolepān Laļ” (Katak im Bujen Ko 70, kōmeļeļe ko ijibbōran jekjōņ).
Lale Saints, 1:140–43.
Ļōm̧ņak ko n̄an Ekkatak Jeje Ko Rekwojarjar Ippam̧ Make
Katak im Bujen Ko 67:1–9; 68:3–6
Anij ej rejtake ro Rikarejeran im naan ko rej ekōnono kaki ilo Etan.
Jokāālet eo n̄an likūt ilo bok revelesōn ko kar bōke jān Josep Smith eaar āinwōt juon eo epidodo, bōtaab jet iaan ritōl ro an Kabun̄ in m̧okta raar jab lo bwe ekar juon ļōmņak em̧m̧an. Juon n̄ūrbōkta eaar kōn jab jetjet eo an kajin eo Josep Smith ekar kōjerbale n̄an je revelesōn ko. Revelesōn eo ilo jekjōn 67 eaar itok n̄an uwaake n̄ūrbōkta eo. Ta eo kwoj ekkatak kōn rikanaan ro im revelesōn ko jān eoon 1–9? Ta dam̧oļo̧k in kōļmenļo̧kjeņ ko kwoj būki jān 68:3–6?
M̧okta jān an kar būriin Bok in Kien ko, jejjo ritōl ro an Kabun̄ in raar jaini juon naan in kam̧ool kar je bwe revelesōn ko ilo bok eo rej m̧ool. N̄an lo juon kape in naan in kam̧ool eo aer, lale “Testimony, circa 2 November 1831,” Revelation Book 1, 121, josephsmithpapers.org.
Im̧we jān Jetōb Kwojajrar ej kwaļo̧k ankilan Irooj.
Naan ko ilo eoon kein raar ekōnono kaki n̄an Orson Hyde im ro jet raar kūr “n̄an kabun̄bun̄ļo̧k gospel eo ejjeļo̧k jem̧ļo̧kin, jān Jetōb eo an Anij emour, jān armej n̄an armej, im jān aelōn̄ n̄an aelōn̄” (eoon 1). Ekōjkan an kean̄ eo ilo eoon 4 maron̄ jipan̄ juon eo kar jilkinļo̧k n̄an kwaļo̧k gospel eo? Ekōjkan an naan kein iookwaj kwe? Ļōmņak kōn juon iien ke kwar “kōm̧akūtkūt jān Jetōb Kwōjarjar” (eoon 3) n̄an ba ak kōm̧m̧ane juon men. Ta eo kwoj loe ilo eoon kein me emaron̄ lewaj n̄an eok lōke eo n̄an ļoor im̧we ko ilo jetōb?
Ro jinen im jemen rej eddo n̄an katakin ajri ro nejier.
Sister Joy D. Jones, Būreejtōn eo Eutiej an Būraimere eaar katakin, “[Juon] n̄an jipan̄ ajri ro n̄an anjo̧ jān jerawiwi ej ijjino ilo iiō ko aer reddik n̄an katakin er katak ko an gospel—jān jeje ko rekwojarjar, Laajrak in Tōmak ko, N̄an kōkajoorļo̧k Jodikdik ro bok jidikdik eo, al ko an Būraimere, al ko, im naan in kam̧ool ko ad make—me enaaj tōl ajri ro nejid n̄an Rilo̧mo̧o̧r” (“Epepen in Armej ro Remaron̄ Anjo̧ jān Jerawiwi,” Ensign ak Liaona, Māe 2017, 88).
Ekkar n̄an Katak im Bujen Ko 68:25–28, Ta jet iaan “pedped in katak ko an gospel eo” me Sister Jones ekar kōnono kaki me ro jinen im jemen rej aikuj katakin ajri ro nejier? Etke eddo in eaorōk kar leļo̧k n̄an ro jinen im jemen? Ta eo kwonaaj kar ba n̄an juon jinen ak jemen me ejjab en̄jake ekar karbōb n̄an katakin men kein n̄an leddik ak ļaddik eo nejin?
Lale barāinwōt Tad R. Callister, “Ro Jinen im Jemān: Rūkaki in Ko̧jpeļ ro M̧oktata an Ajri ro Nejier,” Ensign ak Kweilo̧k eo Eļap, Nob. 2014, 32–34.
M̧weo ej jikin eo epo ļōmān n̄an an ajri ro ekkatak gospel eo.
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota
-
Katak im Bujen Ko 67:10–14.Ekōjkan an junm̧aade, mijak, im utiej bōro bōbrae kōj jān eddōk epaakeļo̧k Irooj? Etke juon “armej ilo lukkuun paotokin” ejjab maron̄ pād ilo im̧aan mejān Irooj? (eoon 12; lale barāinwōt Mosaia 3:19). Ta eo jej loe ilo eoon kein me ej im̧we kōj n̄an “wōnm̧aanļo̧k wōt ilo kijenmej m̧ae [ad] weeppān”? (eoon 13).
Āinwōt juon baam̧le, kom̧ maron̄ etale ennaan eo an Elder Jeffrey R. Holland “Em̧ool—Kom̧ Naaj Weeppān” (Ensign ak Liaona, Nob. 2017, 40–42).
-
Katak im Bujen Ko 68:3–4.Ro uwaan baam̧le eo remaron̄ kwaļo̧k en̄jake ko me rekar kōkajoorļo̧k tōmak eo aer bwe naan ko an ro rikarejeran Irooj rej “ankilaan Irooj,” im “ļōmņak eo an Irooj,” im “kajoor eo an Anij n̄an lo̧mo̧o̧r” (eoon 4). Ak remaron̄ kappukōt ennaan ko rekāāl tata an kweilo̧k eo eļap me rej jerbal n̄an juon apan̄ eo baam̧le eo ami emaron̄ in jelm̧ae.
-
Katak im Bujen Ko 68:25–35.Eoon kein repād ie kapilōk eo eaorōk n̄an “ro rej pād ilo Zaion” (eoon 26). Ta eo jej im̧we n̄an kōkōm̧anm̧anļo̧k ālkin riiti eoon kein? Emaron̄ in kam̧ōņōņō n̄an ejaki pija ko rej kwaļo̧k juon iaan pedped in katak ko ilo eoon kein im ņooji ilo aolepān m̧weo. Innām, ilo raan ko rej itok wōt n̄e juon ej lo juon pija, komaron̄ kōjerbale āinwōt juon iien em̧m̧an n̄an katakin kōn pedped in katak eo. Etke m̧weo ej jikin eo em̧m̧an tata n̄an ajri ro n̄an ekkatak men kein?
-
Katak im Bujen Ko 69:1–2.Oliver Cowdery kar jilkinļo̧k n̄an Missouri kōn kape ko kar je kōn revelesōn ko an Rikanaan eo n̄an aer būriin, ippān jāān ko n̄an jipan̄ kalōk Kabun̄ in ijo. Ta kapilōk eo Irooj ej leļo̧k ilo eoon 1 kōn iaļ eo an Oliver? Etke ej aorōk n̄an pād ippān armej eo “enaaj m̧ool im tiljek”? (eoon 1). Ro m̧ōttad rej ke kareel kōj n̄an kōm̧m̧ane jokāālet ko rem̧m̧an ak renana? Ekōjkan ad maron̄ juon kareel em̧m̧an ioon ro jet?
-
Katak im Bujen Ko 70:1–4.Irooj ekar letok n̄an elder ro jet eddo ko n̄an bōk eddo in likūt ilo bok revelesōn ko. Jekdo̧o̧n n̄e ejako eddo eo ej iookļo̧k wōt, ilo jekjek ta maron̄ watōk kōj “rijerbal ro ioon revelesōn ko im kien ko”? (eoon 3).
Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Al eo kar elmakote: “Home Can Be a Heaven on Earth,” Hymns, nō. 298.
Kōkōm̧anm̧anļo̧k Ad Katakin
Kōjerbal jeje ko rekwojarjar n̄an mour ko ad. Ālkin riiti juon eoon in jeje ko rekwojarjar, kajjitōk ippān ro uwaan baam̧le eo n̄an kōjerbale ilo mour ko aer. N̄an waanjon̄ak, komaron̄ kajjitōk ippāer n̄an ļōmņak kōn jekjek ko reier wōt remaron̄ jelm̧ai me ekoba ejja pedped in katak ko wōt an gospel eo.
Bok in Kien ko, eo ekar itok m̧okta n̄an Katak im Bujen Ko, kar būriin ilo juon press āinwōt in.