Juun 21–27

Katak im Bujen Ko 67–70

“Aorōk … M̧weie ko an Aolepān Laļ”

M̧okta jān am̧ riiti elmakot ko ilo laajrak in tōmak in, ekkatak Katak im Bujen Ko 67–70, im je im̧weo ko ilo jetōb kwoj būki. Im̧we kein renaaj jipan̄ eok ejake juon karōk in katakin eim̧we. Innām jipan̄ karōk eo ippān ļōmņak ko jān unin tōl in, Itok, Ļoor Eō—N̄an Kajjojo Armej im Baam̧le ko, ak jān māākjin ko an Kabun̄ in.

Je En̄jake ko Rej Im̧we Eok

Kajjitōk bwe ren Kwaļo̧k

Kajjitōk ippān ajri ro n̄an jin̄aik juon pija in juon men raar ekkatak jān jeje ko rekwojarjar eo aer ilo m̧weo ak ilo Būraimere. Eļan̄n̄e rej inepata in ļōmņak kōn ta eo rej jin̄aik, komaron̄ kakeememej er kōn juon iaan unin kōnono ko ilo Katakim Bujen Ko 67–70, ko āinwōt peptiaj, bōk juon naan in kam̧ool kōn jeje ko rekwojarjar, ak ro jinen im jemen katakin ajri ro gospel eo.

Katakin Katak eo: Ajri ro Reddikļo̧k

Katak im Bujen Ko 67

Katak im Bujen Ko epād ie revelesōn ko jān Anij.

Ilo Nobōm̧ba in 1831 eo, ritōl ro an Kabun̄ in raar jokāālet n̄an likūt revelesōn ko an Josep Smith ilo juon bok bwe aolep ren riiti. Rainin revelesōn ko raar jeje ilo Katak im Bujen Ko

M̧akūtkūt ko Maron̄ Kōm̧m̧ani

• Jiron̄ ajri ro kōn ekōjkan an revelesōn ko an Josep Smith kar kōm̧m̧an bwe ren jeje ilo juon bok (lale “Chapter 23: The Doctrine and Covenants,” Doctrine and Covenants Stories 90–92, ak pija in alooj eo ej iookļo̧k ilo ChurchofJesusChrist.org). Kwaļo̧k naan in kam̧ool eo am̧ bwe Katak im Bujen Ko epād ie revelesōn ko me remaron̄ jipan̄ kōj rainin. Kwaļo̧k juon iaan eoon ko rem̧m̧an tata ippam̧ jān Katak im Bujen Ko.

• Kwaļo̧k n̄an ajri ro kajjojo jeje ko rekwojarjar juon illo̧k juon, im ilo am̧ kwaļo̧k kajjojo kwaļo̧k jidik kōn ekōjkan ad kar bōke (lale bwebwenato eo an kajjojo bok ilo Unin Tōl Eo N̄an Jeje Ko Rekwōjarjar). N̄e kwoj kwaļo̧k Katak im Bujen Ko, kwaļo̧ke ippān ajri ro ta eo ej kōm̧m̧an bwe bok in en jeje ko rekwojarjar ejej uwaan (n̄an waanjon̄ak, epād ie revelesōn ko kar litok ilo tōre in ad).

Katak im Bujen Ko 68:25–28

Imaron̄ in peptaij n̄e ij ruwalitōk iiō detta.

Ilo Katak im Bujen Ko 68:25–28, Irooj ekar jiron̄ Josep Smith bwe ajri ro ej aikuj ekkatak n̄an wōr tōmak ilo Jisōs Kraist, ukweļo̧k, im peptaij n̄e rej ruwalitōk iiō dettaer. Eaar barāinwōt ba bwe rej aikuj in ekkatak n̄an jar im kōjparok kien ko an Anij.

M̧akūtkūt ko Maron̄ Kōm̧m̧ani

• Kajjitōk ippān ajri ro an bōnbōn n̄an ruwalitōk kōjerbal addi in peier. Ta eo ej aorōk kōn erorm ruwalitōk iiō dettan? Jipan̄ ajri ro kile bwe n̄e rej ruwalitōk iiō dettaer, remaron̄ in peptaij. Kōjerbal naan ko im eoon ko loi ilo Katak im Bujen Ko 68:25–28, kwaļo̧ke ippāer jet iaan men ko Irooj ekōņan bwe eren ekkatak kaki m̧okta jen aer ruwalitōk iiō dettaer (lale barāinwōt Laajrak in Tōmak ko 1:4). Jipan̄ er meļeļe ļōmņak ko me remaron̄ jab jeļā kaki n̄an er.

• Al ippān ajri ro kōn peptaij, eo āinwōt “Baptism” ak “When I Am Baptized” (Children’s Songbook, 100–101, 103). Kajjitōk ippān ajri ro n̄an kwaļo̧k ekōjkan aer en̄jake kōn aer kar peptaij im ta eo remaron̄ kōm̧m̧ane n̄an m̧aanjabpopo.

Katakin Katak ko: Ajri ro Rerūttoļo̧k

Katak im Bujen Ko 67:4, 9

Revelesōn ko kar litok kōn Josep Smith rej m̧ool.

Eļap wōt iaan naan in kōmeļeļe eo ilo Katak im Bujen Ko 67–70 ekar wōr kilaan ilo kijejeto an Armej ro Rekwojarjar n̄an je revelesōn ko an Josep Smith. Iien in em̧m̧an emaron̄ in n̄an jipan̄ ajri ro kile bwe ilo revelesōn kein, kiiō kar je ilo Katak im Bujen Ko, jemaron̄ lo ainikien Irooj.

Ilo am̧ m̧aanjabpopo n̄an katakin, komaron̄ etale Saints, 1:140–43 ak “Chapter 23: The Doctrine and Covenants” (Doctrine and Covenants Stories, 90–92).

M̧akūtkūt ko Maron̄ Kōm̧m̧ani

• Kwaļo̧k n̄an ajri ro Baibōļ eo, Bok in Mormon, Katak im Bujen Ko, im Bōōr eo Eļap Wōņāān. Jipan̄ ajri ro kōm̧m̧ane juon laajrak ioon boot eo kōn ta eo rej kōm̧m̧an an kajjojo bok in jeje ko rekwojarjar oktak im ta ej kōm̧m̧an aer eier wōt juon. Eļan̄n̄e rej aikuj jipan̄, kwaļo̧k ippāer kōmeļeļe ko an bok kein ilo Unin Tōl eo n̄an Jeje Ko Rekwōjarjar. Kajjitōk ippān ajri ro ekōjkan ad maron̄ jeļā bwe jeje ko rekwojarjar rej m̧ool. Ta eo jej ekkatak jān Katak im Bujen Ko 67:4, 9 kōn revelesōn ko Irooj eaar liļo̧k n̄an Josep Smith?

• Kwaļo̧k juon eoon jān Katak im Bujen Ko me ej kōkajoorļo̧k am̧ “naan in kam̧ool kōn m̧ool eo an kien kein” (eoon 4). Leļo̧k n̄an ajri ro iien ko rem̧m̧an n̄an kwaļo̧k eoon eo aer make em̧m̧an tata. Kōmeļeļeik n̄an ajri ro bwe ritōl ro an Kabun̄ in ilo tōre in kar jokāālet n̄an je naan in kam̧ool eo aer kōn revelesōn ko Josep Smith ekar būki. Ke raar kōm̧m̧ane, juon iaan ritōl ro, Levi Hancock, ekar je iturin tok etan, “Ejjamin aikuj in ejjeor” (lale “Testimony, circa 2 November 1831,” Revelation Book 1, 121, josephsmithpapers.org). Etke Levi Hancock emaron̄ kar kōņaan bwe etan “ejjamin aikuj in ejjeor” jān naan in kam̧ool eo kar je? Leļo̧k n̄an ajri ro juon iien em̧m̧an n̄an je naan in kam̧ool ko aer kōn ta eo raar ekkatak jān m̧okta n̄an kiiō ilo Katak im Bujen Ko.

  

  Anij eear kajjitōk ippād n̄an ekkatak jeje ko rekwojarjar.

Katak im Bujen Ko 68:3–4

N̄e ritōl ro ad ilo Kabun̄ in rej ekōnono kōn im̧we, rej ekōnono “naan eo an Irooj.”

N̄e ro rikarejeran Irooj rej ekōnono kōn kajoor eo an Jetōb Kwojarjar, naan ko aer rej ankilaan, ļōmņak, naan, im ainikien Irooj (lale eoon 4). Jeļā m̧ool in emaron̄ jipan̄ ajri ro kōņaan ron̄jake im ļoor katak ko aer.

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an riiti Katak im Bujen Ko 68:3–4 ilo kumi ko reddik im kwaļo̧k ippān doon ta eo rej ekkatak jān eoon kein. Kajjitōk ippān ajri ro n̄an je juon men raar ekkatak kake ioon boot eo. Etke menin ej juon m̧ool aorōk n̄an jeļā?

• Ālkin riiti Katak im Bujen Ko 68:3–4 ippān doon, leļo̧k n̄an ajri ro kape in jejjo ennaan ko jān kweilo̧k eo eļap kiiō epaak. Kajjitōk ippāer n̄an pukōte ilo ennaan ko m̧ool ko me Irooj eaar katakin kōj kōn ro Rikarejeran.

Katak im Bujen Ko 69:1–2

Imaron̄ in “m̧ool im tiljek”

Ke Oliver Cowdery ekar aikuj in ilo̧k n̄an Missouri, Irooj eaar kūr John Whitmer, juon eo ekar “m̧ool im tiljek” (eoon 1), n̄an ilo̧k ippānļo̧k. Ekōjkan an ajri ro maron̄ in m̧ool im tiljek āinwōt John Whitmer?

M̧akūtkūt ko Maron̄ Kōm̧m̧ani

• Jiron̄ ajri ro bwe n̄e Irooj ekar jilkinļo̧k Oliver Cowdery n̄an Missouri, Eaar ba bwe juon eo e “m̧ool im tiljek” (eoon 1) aikuj etal ippānļo̧k, kōn menin Ekar jikinļo̧k John Whitmer. Ta meļeļe in n̄an m̧ool im tiljek? Ekōjkan ad maron̄ kanooj laļe bwe jej m̧ool im tiljek bwe Irooj en maron̄ kōjerbal kōj n̄an kōjeraam̧man ro jet?

• Kajjitōk ippān jejjo ajri n̄an ba kōn juon eo rejeļā kajjien me rej ļōmņak ej “m̧ool im tiljek.” Ekōjkan ad jeļā bwe juon armej eo ej m̧ool im tiljek? Jipan̄ er lo bwe Irooj ekar lōke Joh Whitmer kōnke eaar, ilo iien eo, em̧ool im tiljek (lale Katak im Bujen Ko 69:1–2). Al ippān doon juon al me ej kōketak ajri ro n̄an m̧ool im tiljek āinwōt Rilo̧mo̧o̧r, eo āinwōt “I’m Trying to Be like Jesus” (Children’s Songbook, 78–79).

Kōketak Ekkatak ilo M̧weo

Kajjitōk ippān ajri ro n̄an kōmeļeļeik n̄an juon ilo m̧weo ta in Katak im Bujen Ko eo, ia eo ekar itok jān e, im etke ej aorōk n̄an er.

Kōkōm̧anm̧anļo̧k Ad Katakin

Ukōt jidik m̧akūtkūt ko n̄an idettan ajri ro kwoj katakin. Ajri ro reddikļo̧k remaron̄ aikuj elapļo̧k tōl n̄e kūr er n̄an kwaļo̧ke. Ajri ro rōrūttoļo̧k eļapļo̧k aer jeļā im maron̄ em̧m̧anļo̧k ilo aer kwaļo̧k ļōmņak ko aer. Dāpij wōt oktak ko āinwōt in ilo am̧ kajjieon̄ karōk m̧akakūtkūt ko.