Springhill, Daviess County, Missouri, jān Garth Robinson Oborn

Juun 7–13

Katak im Bujen Ko 63

“Men eo ej Itok jān Lan̄ Ekwōjarjar”

M̧ool ko kar katakin ilo Katak im Bujen Ko 63 remaron̄ jipan̄ ajri ro kwoj katakin er kalōk tōmak eo aer ilo Jemedwōj Ilan̄ im Jisōs Kraist. Kōnke edik am̧ iien ippāer, ļōmņak kōn m̧ool ko me enaaj ļap tata aer aorōk n̄an er, pedped ioon aikuj ko aer.

Je En̄jake ko Rej Im̧we Eok

Kajjitōk bwe ren Kwaļo̧k

Ļōmņak kōn wāween ko reļem waan, mejādik n̄an leļo̧k n̄an ajri ro iien ko rem̧m̧an n̄an kwaļo̧k ta eo rej ekkatak. N̄an waanjon̄ak, kōpooj peba owaidikdik ko jaij ko aer rookoktaktak, im kōm̧m̧an bwe kajjojo ajri en jabdetakwōt kāālet juon. Kajjitōk ippān ajri eo ewōr ippān peba eo aitok tata n̄an m̧okta kwaļo̧k.

Katakin Katak eo: Ajri ro Reddikļo̧k

Katak im Bujen ko 63:23

Jemedwōj Ilan̄ ekōņan bwe in ekkatak gospel eo.

Ajri ro ejjab m̧ūjkōk aer ekkatak. Jipan̄ er lo bwe Jemedwōj Ilan̄ enaaj jipan̄ er ekkatak kōn E eļan̄n̄e rej pokake kien ko An.

M̧akūtkūt ko Maron̄ Kōm̧m̧ani

• Riiti Katak im Bujen Ko 63:23 n̄an ajri ro, im kajjitōk ippāer n̄an ron̄jake ta eo Anij enaaj letok n̄an kōj eļan̄n̄e jej kōjparok kien ko. Jipan̄ ajri ro meļeļe bwe “ittino ko” rej men ko me Anij emaron̄ katakin kōj eļapļo̧k kaki, āinwōt ekōjkan n̄an eromļo̧k āinwōt Jisōs Kraist.

• Bōktok n̄an kūlaaj eo pija ko me rej jutak kōn unin kōnono ko an gospel eo ajri ro remaron̄ ekkatak eļapļo̧k kaki, ko āinwōt, peptaij, Rilo̧mo̧o̧r eo, tampeļ ko, im ko eierļo̧k. Kapedoik pija ko ioon laļ, im kōm̧m̧an bwe ajri ro ren bōk koņaer kōjedtak juon. Kajjitōk ippāer n̄an kwaļo̧k ta eo rejeļā im jabdewōt kajjitōk ko ewōr ippāer kōn kajjojo unin kōnono.

Katak im Bujen Ko 63:49

Inaaj jerkakpeje.

Emaron̄ kiiō ak ilju jekļaj, ajri ro kwoj katakin er renaaj ineem̧m̧an n̄an jeļā bwe kōnke kōn Pinmuur eo an Rilo̧mo̧o̧r eo, aolep ro raar mej renaaj juon raan jekakpeje.

M̧akūtkūt ko Maron̄ Kōm̧m̧ani

• Kwaļo̧k n̄an ajri ro juon pija in juon iaan ro kwoj iakwe er me eaar mej, im kwaļo̧k juon bwebwenato kōn armej jab eo. Riiti Katak im Bujen Ko 63:49 n̄an ajri ro, im kam̧ool bwe juon raan armej eo naaj “jerkak jān ro remej” im jamin bar mej. Kajjitōk ippān ajri ro eļan̄n̄e rejeļā juon eo ekar mej. Kam̧ool bwe jenaaj aolep jerkakpeje kōnke kōn Jisōs Kraist.

• Kwaļo̧k pija ko kōn kallib im Jerkakpeje eo an Rilo̧mo̧o̧r eo (lale Bok in Gospel Pija, nō. 58, 59). Kajjitōk ippāer n̄an kōnono kōn ta eo ej waļo̧k ilo pija ko. Kajjitōk ippān ajri ro n̄an babu ilo am̧ bwebwenato kōn kallib eo an Jisōs im jerkak lōn̄tak ilo am̧ bwebwenato kōn Jerkakpeje eo An. Riiti Katak im Bujen Ko 63:49, im kwaļo̧k naan in kam̧ool eo am̧ bwe jenaaj aolep jerkak jān mej juon raan ejja āinwōt an Jisōs kar.

  

  Garden Tomb, jān Jon McNaughton

Katak im Bujen Ko 63:64

Ij aikuj kōm̧m̧ani men ko rekwojarjar kōn kautiej.

Jej mour ilo juon iien n̄e men ko rekwojarjar emakijkij aer kowaani ak em̧ool kajirere kaki. Komaron̄ jipan̄ ajri ro ejake juon ļōmņak in kautiej n̄an men ko rekwojarjar.

M̧akūtkūt ko Maron̄ Kōm̧m̧ani

• Riit n̄an ajri ro jān katak im Bujen Ko 63:64: “Bwe men eo ej itok jān lan̄ ekwojarjar.” Kajjitōk ippāer n̄an ļōmņak kōn juon aitem me eaorōk n̄an er, eo āinwōt juon kein ikkure ak bok em̧m̧an tata. Ekōjkan aer kaorōke im kōjparoke? Jipan̄ er ļōmņak kōn men ko me rej aorōk—ak ekwojarjar—n̄an Jemedwōj Ilan̄. Ekōjkan ad aikuj ekōnono kōn men ko? Ekōjkan ad aikuj kōm̧m̧an n̄an men ko?

• Al ippān doon kōn juon al kōn kautiej, eo āinwōt “Reverently, Quietly” (Children’s Songbook, 26). Jipan̄ er ļōmņak kōn wāween ko remaron̄ kwaļo̧k kautiej n̄an men ko rekwojarjar.

Katakin Katak ko: Ajri ro Rerūttoļo̧k

Katak im Bujen Ko 63:9–10

Kakōļļe ko rej itok kōn tōmak im ankilan Anij.

Ezra Booth ekar juon rioktak tok n̄an Kabun̄ in ālkin an lo an Josep Smith kemour pein Elsa Johnson. Bōtaab Ezra tok ālkin eaar jerwane tōmak eo an, im kar erom juon eo ekōraate Rikanaan eo.. Katak im Bujen Ko 63 epād ie kakkōļ ko ņae kajjieon̄ in kalōk tōmak eo ad ilo kakōļļe ko, eo āinwōt kemour ko rekabwilōn̄lōj, ijello̧kin ilo kapene eo ilo jetōb kōn m̧ool eo.

M̧akūtkūt ko Maron̄ Kōm̧m̧ani

• Kwaļo̧k pija eo ilo unin tōl eo an wiik in ilo Itok, Ļoor Eō—N̄an Kajjojo Armej im Baam̧le ko, im jiron̄ ajri ro bwe Josep Smith eaar kōjerbal priesthood eo n̄an kemour pein Elsa Johnson, eo ekar jab maron̄ in lukkuun kōjerbale ium̧win ruo iiō ko. Kajjitōk ippān ajri ro n̄an riiti Katak im Bujen Ko 63:9–10, im kajjitōk ippāer n̄an kwaļo̧k juon men Irooj ej ba kōn tōmak im kakōļļe ko (ak kabwilōn̄lōn̄ ko).

• Kajjitōk ippān ajri ro n̄an pijaik juon em̧ ej jijet ioon juon reektān̄kōļ im bar juon em̧ ej j ijet ioon jabōn tata juon tūrain̄kōļ. Jiron̄ ajri bwe im̧ōko rej jutak kōn tōmak eo ad im naan in kam̧ool ko. Kajjitōk ippāer n̄an riiti Katak im Bujen Ko 63:9–10 im Hilamōn 5:12. Innām kōm̧m̧an bwe ren je ilo reektān̄kōļ eo ta eo jej aikuj kalōk tōmak eo ad ioon im ilo tūrain̄kōļ eo ta eo jej aikuj jab kalōk tōmak eo ad ioon. Kalikkare bwe rāāktān̄kōļ eo ej letok juon jikin epen n̄an ekkal bōtaab tūrain̄kōļ eo ejjab em̧m̧an im pen. Etke ej aorōk n̄an kalōk tōmak eo ad ioon Jisōs Kraist ijello̧kin ioon men ko?

Katak im Bujen ko 63:23

Ilo aō kōjparok kien ko, Anij enaaj katakin eō m̧ool ko An.

“Ittiņo̧ ko an aelōn̄ in kiin̄ eo an [Anij]” rej pād wōt n̄an ro me rej kōjparok kien ko an Anij. En̄in ej etke rej menin ittiņo̧ n̄an elōn̄ armej. Pedped in katak in enaaj jipan̄ ajri ro ilo aer kappukōt m̧ool eo.

M̧akūtkūt ko Maron̄ Kōm̧m̧ani

• Kwaļo̧k n̄an ajri ro juon pija in aibōj laļ, im kajjitōk ippāer n̄an jin̄aik juon pija in. Ālkin riiti ippān doon katak im Bujen Ko 63:23, jipan̄ er ļōmņak kōn m̧ool ko rejeļā kaki kōn gosepl eo, im kajjitōk ippāer n̄an je m̧ool kein peļaakin aibōj laļ eo aer. Ekōjkan an m̧ool kein āinwōt “dān in mour”?

Katak im Bujen Ko 63:58–64

Ijjab aikuj bōk etan Anij ilo waan.

Ajri ro kwoj katakin er remaron̄ ron̄ an ro jet kōjerbal etan Anij ilo wāween ko rej jab kautiej im kanijnij. Ekōjkan am̧ maron̄ jipan̄ er meļeļe bwe āt ko etan Jemedwōj Ilan̄ im Jisōs Kraist “aikuj in ekkōnono kaki ilo kōjparok”Katak im Bujen Ko 63:64).

M̧akūtkūt ko Maron̄ Kōm̧m̧ani

• Riit n̄an ajri ro jān Katak im Bujen Ko 63:58: “En̄in ej juon raan in kakkōl.” Kajjitōk ippāer n̄an kōnono kōn kakkōl ko rej ron̄ jān ro jiner im jemeer, rūkaki ro, im ritōl jet an Kabun̄ in. Innām jipan̄ er kappukōt kakkōl ko jān Irooj ilo eoon 58–64. Ta jet iaan wāween ko rejetjet n̄an “kōjerbal etan Irooj”? (eoon 62).

• Bar etale ippān doon “Kajin eo” ilo N̄an Kōkajoorļo̧k Jodikdik ro (peij 20–21). Kajjitōk ippān ajri ro n̄an kōm̧m̧ani poster jiddik ko kakeememej er kōn jet men ko raar ekkatak kōn ekōjkan kōjerbal āt ko etan Jemedwōj Ilan̄ im Jisōs Kraist.

• Al ippān doon kōn juon al kōn kautiej, eo āinwōt “Reverence Is Love” (Children’s Songbook, 31). Ekōjkan ad maron̄ kanooj lale bwe jej kautiej n̄e jej ekōnono kōn Jemedwōj Ilan̄ im Jisōs Kraist?

Kōketak Ekkatak ilo M̧weo

Eļan̄n̄e ejjeļo̧k am̧ iien n̄an kōm̧m̧ane peij in m̧akūtkūt eo an wiik in ilo kūlaaj, ļōmņak in leļo̧k n̄an juon ajri juon kape n̄an bōk n̄an m̧weo n̄an kadedeļo̧k ippān baam̧le ko aer.

Kōkōm̧anm̧anļo̧k Ad Katakin

Kalōk lōke eo an ajri ro. Jet ajri remaron̄ jab em̧m̧an aer ekkatak kōn gospel in ippāer make. Juon wāween n̄an jipan̄ er kalōk lōke eo ej n̄an nōbar er n̄e rej bōk koņaer ilo kūlaaj. Kallim̧uri ajri ro bwe Jetōb Kwojarjar eo enaaj jipan̄ er ilo aer ekkatak.