Daviess County, Missouri

Juun 14–20

Katak im Bujen Ko 64–66

“Irooj ej Aikuj Bōro eo im Ļōmņak eo Em̧ōņōņō”

Ilo am̧ m̧aanjabpopo n̄an katakin, ļōmņak kōn ekōjkan am̧ maron̄ ukukōt am̧ katakin n̄an an jetjet n̄an aikuj ko an ajri ro. Keememej bwe komaron̄ kōjerbal jabdewōt iaan m̧akūtkūt ko ilo unin tōl in n̄an ajri ro reddikļo̧k ak rūttoļo̧k.

Je En̄jake ko Rej Im̧we Eok

Kajjitōk bwe ren Kwaļo̧k

Leļo̧k n̄an kajjojo ajri iien n̄an jibwe pija in Rilo̧mo̧o̧r eo im kwaļo̧k juon men rej ekkatak kake kōn E im gospel eo An.

Katakin Katak eo: Ajri ro Reddikļo̧k

Katak im Bujen Ko 64:9–10

Jisōs Kraist ej kajjitōk ippa n̄an jeorļo̧k an ro jet bōd.

Ta menin katak ko ak m̧akūtkūt ko komaron̄ ļōmņak kaki me renaaj jipan̄ ajri ro meļeļe ta meļeļe in n̄an jeorļo̧k bōd? Ilo am̧ ekōnono kōn jeorļo̧k bōd, kakeememej ajri ro bwe jeorļo̧k bōd ejjab meļeļe in kōtļo̧k bwe ro jet ren kōmetak kōj.

M̧akūtkūt ko Maron̄ Kōm̧m̧ani

• Riiti eoon eo “kom̧ij aikuj jeorļo̧k an doon bōd” (Katak im Bujen Ko 64:9), im kajjitōk ippān ajri ro ta meļeļe in n̄an jeorļo̧k an juon bōd. N̄an jipan̄ er meļeļe, kwaļo̧k jejjo waanjon̄ak ko reļem waan. Jipan̄ er kōmālmel kōn waanjon̄ak kein n̄an ekkatak jeorļo̧k bōd.

• Kadikdik riiti Katak im Bujen Ko 64:10 n̄an ajri ro, im kōm̧m̧an bwe ren idik pein ajri eo juon n̄e rej ron̄ naan eo “jeorļo̧k bōd.” Kwaļo̧k naan in kam̧ool eo am̧ kōn aenōm̧m̧an eo im m̧ōņōņō eo me ej itok n̄e jej jeorļo̧k bōd an ro jet.

• Al juon al kōn jeorļo̧k bōd, eo āinwōt “Help Me, Dear FatherChildren’s Songbook,99). Ta eo al in ej katakin kōj kake jeorļo̧k bōd an ro jet?

Katak im Bujen Ko 64:34

Imaron̄ pokake Jisōs kōn būruō im ļōmņak.

Irooj eaar katakin Armej ro Rekwojarjar bwe n̄an kalōk Zaion, rej aikuj in leļo̧k n̄an E būruōer im ļōmņak ko rem̧ōņōņō. Ļōmņak kōn ekōjkan am̧ naaj jipan̄ ajri ro jino n̄an ļōmņak kōn ta meļeļe in menin n̄an er.

M̧akūtkūt ko Maron̄ Kōm̧m̧ani

• Riit n̄an ajri ro jān Katak im Bujen Ko 64:34: “Lo, Irooj ej aikuj bōro eo im ļōmņak eo em̧ōņōņō.” Āliji eoon in jejjo kōttan, jitōn̄ļo̧k būruōm̧ im bōram̧ ilo am̧ riiti naan kein, im kajjitōk ippān ajri ro n̄an kōm̧m̧ane ejja āinwōt. Ekōjkan ad maron̄ leļo̧k būruōd im ļōmņak ko ad n̄an Rilo̧mo̧o̧r eo? (Emaron̄ jipan̄ n̄an kōmeļeļeik bwe būruōd eo ej kōnono kake ej kōnono kōn en̄jake ko ad im iakwe im ļōmņak ej kōnono kōn ļōmņak ko ad).

• Al juon al kōn iakwe im ļoor Rilo̧mo̧o̧r eo, eo āinwōt “I Feel My Savior’s Love” (Children’s Songbook, 74–75; eļap tata eoon 3). Ekōjkan ad kwaļo̧k n̄an Rilo̧mo̧o̧r eo bwe jej iakwe E? Kwaļo̧k en̄jake ko am̧ n̄an Jisōs Kraist.

Katak im Bujen Ko 66

Irooj ejeļā wōn n̄a im iakwe eō.

William E. McLellin eaar wōr an ļalem kajjitōk ko remakeļo̧k n̄an Irooj. Josep Smith eaar bōk uwaak ko n̄an er ilo juon revelesōn em̧ool men̄e eaar jab jeļā kar ta kajjitōk ko an William. En̄jake in emaron̄ jipan̄ eok katakin ajri bwe Anij ejeļā kōn er im emaron̄ uwaake kajjitōk ko aer.

M̧akūtkūt ko Maron̄ Kōm̧m̧ani

• Ba kake ekōjkan an Irooj kar uwaaki kajjitōk ko an William E. McLellin kōn juon revelesōn jān Rikanaan Josep Smith (lale Katak im Bujen Ko 66, taitōl an jekjōn eo). Kam̧ool bwe Jemedwōj Ilan̄ ejelā kajjied im ekōņaan jipan̄ kōj. Kajjitōk ippān ajri ro n̄an kwaļo̧k ekōjkan aer jeļā bwe Anij ej iakwe er.

• Riiti n̄an ajri ro Katak im Bujen Ko 64:4. Jiron̄ ajri ro kōn juon iien me Irooj eaar kwaļo̧k n̄an eok ta eo Eaar kōņaan bwe kwon kōm̧m̧ane. Riiti eoon eo bar juon alen, iien in kadeļo̧n̄ etan juon iaan ajri ro. Āliji n̄an kajjojo ajri ro.

  

  Jisōs Kraist ej iakwe kōj kajjojo.

Katakin Katak ko: Ajri ro Rerūttoļo̧k

Katak im Bujen Ko 64:7–10

Irooj ekōņaan bwe in jeorļo̧k bōd an aolep.

Ilo an eoon kein kwaļo̧k, em̧ool rikaļoor ro an Jisōs Kraist jet iien epen aer jeorļo̧k bōd an doon. Ļōmņak kōn ekōjkan am̧ naaj jipan̄ ajri ro meļeļe kean̄ eo an Irooj “n̄an jeorļo̧k bōd an aolep” (Kalikkare bwe jeorļo̧k bōd ejjab meļeļein kōtļo̧k an armej kōmetak kōj; rej aikuj iien otemjej jiron̄ļo̧k juon rūtto eo rej lōke eļan̄n̄e juon ej kōmetak er.)

M̧akūtkūt ko Maron̄ Kōm̧m̧ani

• Kajjitōk ippān kajjojo ajri ro n̄an pijaikļo̧k bwe kar kajjitōk ippāer n̄an katakin juon jaitier edikļo̧k kōn jeorļo̧k bōd an ro jet. Ekōjkan aer naaj kar kōm̧m̧ane? Kajjitōk ippāer n̄an riiti Katak im Bujen Kok 64:7–10 ilo ruo iaan ruo im n̄an pukōt eoon ko renaaj kōjerbali ilo katakin eo aer. Remaron̄ barāinwōt kōmālmel katakin doon.

• Al ippān doon “Help Me, Dear Father” (Children’s Songbook, 99). Ekōjkan an Jemedwōj Ilan̄ jipan̄ kōj jeorļo̧k bōd an ro jet?

• Ļōmņak kōn juon waanjon̄ak me emaron̄ jipan̄ ajri ro meļeļe ekōjkan ad “metak” n̄e jejjab jeorļo̧k bōd (eoon 8). N̄an waanjon̄ak, kwaļo̧k n̄an ajri ro juon pāāk in pedkat ak bwidej; kajjitōk ippāer n̄an pijaikļo̧k an juon kar kadkad kōn pedkat ioer. Ekōjkan an likjab in jeorļo̧k bōd maron̄ āinwōt kōjparok wōt pedkat eo im iien otemjej ineeke ippād? Etke enaaj kar em̧m̧anļo̧k n̄an kadkadļo̧k kake pedkat eo? Jipan̄ ajri ro ļōmņak kōn waanjon̄ak ko jet me rej katakin etke ej aorōk n̄an jeorļo̧k bōd.

Katak im Bujen Ko 64:33–34

Irooj ej aikuji “būruō im ļōmņak eo em̧ōņōņō.”

Kalōk Zaion—ak jipan̄ kaddōkļo̧k Kabun̄ in—ej “juon jerbal eļap.” N̄an kadedeikļo̧k, Irooj ej aikuji ad leļo̧k n̄an E būruōd im ļōmņak ko ad rem̧ōņōņō. Ro me rej mour ilo Zaion rej “juon wōt ilo bōro im juon wōt ilo ļōmņak” (Moses 7:18).

M̧akūtkūt ko Maron̄ Kōm̧m̧ani

• Kwaļo̧k n̄an ajri ro jet men ko me raar kōm̧m̧an jān elōn̄ m̧ōttan ko reddik, āinwōt juon bajōļ ak juon rak. Jipan̄ er ļōmņak kōn waanjon̄ak ko jet. Kajjitōk ippān ajri ro n̄an riiti Katak im Bujen Ko 64:33. Ta eo Anij ekōņaan bwe jen kōm̧m̧ane n̄an jipan̄ E kadedeļo̧k “jerbal eo eļap” An? Ta ko rej “men ko reddik” jemaron̄ kōm̧m̧ani me enaaj jipan̄ kadedeļo̧k jerbal in?

• Kajjitōk ippān ajri ro n̄an kadedeļo̧k juon jerbal me ej aikuji ruo men ko, bōtaab leļo̧k n̄an er juon wōt (n̄an waanjon̄ak, je ioon jo̧o̧kboot eo kōn ejjeļo̧k jo̧o̧k ak m̧wijiti juon m̧ōttan peba kōn ejjeļo̧k jijej ko). Kajjitōk ippān ajri ro n̄an riiti Katak im Bujen Ko 64:34 n̄an kappukōt ta ruo men ko Irooj ej kajjitōk ippād. Etke jej aikuj in leļo̧k jim̧or būruōd im ļōmņak eo ad n̄an Irooj? Ekōjkan ad kōm̧m̧ane menin?

Katak im Bujen Ko 65

Imaron̄ jipan̄ kōpooj laļ in n̄an an bōk Jisōs Kraist.

Mijen eo an Kabun̄ in—aelōn̄ in kiin̄ ioon laļ an Anij—ej n̄an kōpooj laļ in bar ro̧o̧tok eo an Rilo̧mo̧o̧r eo. Ajri ro kwoj katakin er rej juon m̧ōttan aorōk ilo mijen in. Ta eo komaron̄ kōm̧m̧ane n̄an jipan̄ er bōk koņaer?

M̧akūtkūt ko Maron̄ Kōm̧m̧ani

• Āinwōt juon kūlaaj, ak ilo ruo iaan ruo, riiti Katak im Bujen Ko 65, im bwini jete kōttan an naan eo “kōpooj” kar je. Ta eo Irooj ej kajjitōk ippād n̄an kōpooje? Ta eo jemaron̄ kōm̧m̧ane n̄an kōpooj kōj make im laļ in?

• Kwaļo̧k pija in Itok Eo Kein Karuo an Rilo̧mo̧o̧r (lale Bok In Gospel Pija, nō. 66), im kajjitōk ippān ajri ro n̄an kōmeļeļeik ta eo rej loe ak ta eo rejeļā kōn iien in. Leļo̧k n̄an ajri ro naan ko raorōk im eoon ko n̄an kappukōti ilo Katak im Bujen Ko 65 (ko āinwōt “kobrak aolepān laļ” im “jerbal ko rem̧m̧an”). Ta eo naan kein im eoon kein rej katakin kōj kōn Itok Eo Kein Karuo im jerbal eo ad ilo m̧aanjabpopo n̄an e?

Kōketak Ekkatak ilo M̧weo

Jipan̄ ajri ro pukōt juon eoon ilo Katak im Bujen Ko 64–66 me em̧m̧an ippāer im rekōņaan kwaļo̧ke ippān juon uwaan baam̧le eo aer ak eo m̧ōttaer.

Kōkōm̧anm̧anļo̧k Ad Katakin

Ekkatak n̄an kile revelesōn. Ilo am̧ jar im kejekļo̧kjeņ kōn jeje ko rekwojarjar, kwonaaj lo bwe ļōmņak ko im im̧we ko remaron̄ itok jabdewōt iien im jabdewōt jikin—“ilo am̧ etal n̄an jerbal, kōm̧m̧ani jerbal ko ilo m̧weo, ak iaio ippān baam̧le eo im ro m̧ōttam̧” (Teaching in the Savior’s Way, 12).