“Juun 14–20. Katak im Bujen Ko 64–66: ‘Irooj ej Aikuj Bōro eo im Ļōmņak eo Em̧ōņōņō,’” Itok, Ļoor Eō—N̄an Kajjojo Armej im Baam̧le ko: Katak im Bujen Ko 2021 (2020)
“Juun 14–20. Katak im Bujen Ko 64–66,” Itok, Ļoor Eō—N̄an Kajjojo Armej im Baam̧le ko: 2021
Daviess County, Missouri
Juun 14–20
Katak im Bujen Ko 64–66
“Irooj ej Aikuj Bōro eo im Ļōmņak eo Em̧ōņōņō”
Būreejtōn Henry B. Eyring eaar ba: “Emakijkij aō etal n̄an jeje ko rekwojarjar kōn kajjitōk ko ‘Ta eo Anij enaaj kar kōņaan bwe in kōm̧m̧ane?’ ak ‘Ta eo Ekōņaan bwe in en̄jake?’ Aolep iien ij lo aitia ko rekāāl im ļōmņak ko ijjan̄in kar būki m̧oktaļo̧k” (“How God Speaks to Me through the Scriptures,” Feb. 6, 2019, blog.ChurchofJesusChrist.org).
Je En̄jake ko Rej Im̧we Eok
Ilo O̧kwōj in 1831 eo ekar kanooj ļap an bwil, jejjo elder ro raar bar ro̧o̧lļo̧k n̄an Kirtland ālkin etale āne eo Zaion ilo Missouri āinwōt kar tōl jān Irooj. Ekar jab juon em̧m̧akūt eo em̧m̧an. Ritotak ro—Josep Smith, Oliver Cowdery, Sidney Rigdon, Ezra Booth, im ro jet—ekar bwil im kam̧ōkm̧ōk, im ankeke ko ejjab to raar oktak n̄an aikwelel ko. Emaron̄ in kar āinwōt kalōk Zaion, juon jikin kweilo̧k an iakwe, juon wōt, im aenōm̧m̧an, enaaj kar bōk juon iien eo aitok.
Jeraam̧m̧an, kalōk Zaion—ilo Missouri ilo 1831 eo ak ilo būruōd im ward ko rainin—ejjab aikuji kōj n̄an weppān. Ijello̧kin, “ak jān kom̧ emennin aikuj bwe kom̧in jeorļo̧k an aolep armej bōd,” Irooj eaar ba (Katak im Bujen Ko 64:10). Ej aikuji “aikuj bōro eo im ļōmņak eo em̧ōņōņō” (eoon 34). Im Ej aikuji kijenmej im niknik, bwe Zaion ej ekkal ioon pedped eo an “men ko reddik,” kar kadedeļo̧k jān ro me rejjab erom “jab mōk ilo kōm̧m̧an em̧m̧an” (eoon 33).
Lale barāinwōt Armej ro Rekwojarjar, 1:133–34, 136–37.
Ļōm̧ņak ko n̄an Ekkatak Jeje Ko Rekwojarjar Ippam̧ Make
Ej menin aikuj bwe in jeorļo̧k bōd an aolep.
Ilo am̧ riiti Katak im Bujen Ko 64:1–11, ļōmņak kōn juon iien ke Irooj ekar jeorļo̧k am̧ bōd. Komaron̄ barāinwōt ļōmņak kōn juon eo kwoj aikuj jeorļo̧k an bōd. Ekōjkan an meanwōd eo an Rilo̧mo̧o̧r eo jelōt en̄jake ko am̧ kōn kwe make im kōn ro jet? Etke kwoj ļōmņak Irooj ej kakien kōj “jeorļo̧k an aolep armej bōd”? (eoon 10). Eļan̄n̄e kwoj kakkōt n̄an jeorļo̧k bōd, ļōmņak kōn ta kein jipan̄ kein rej katakin kōn ekōjkan an Rilo̧mo̧o̧r eo maron̄ jipan̄: Jeffrey R. Holland, “Jerbal in Karejar in Kajim̧we,” Ensign ak Liaona, Nob. 2018, 77–79; Unin Tōl Eo N̄an Jeje Ko Rekwōjarjar, “Jeorļo̧k Bōd,” scriptures.ChurchofJesusChrist.org.
Anij ej aikuji būruō im juon ļōmņak em̧ōņōņō.
Kwonan̄in ke kar en̄jake “m̧ōk” kōnke kōn aolep “kōm̧m̧an em̧m̧an” kwoj kajjieon̄ in kadedeļo̧k? Kappukōt ennaan eo an Irooj n̄an kwe ilo Katak im Bujen Ko 64:31–34. Ta meļeļe in n̄an leļo̧k am̧ “bōro eo im ļōmņak eo em̧ōņōņō” n̄an Anij? (eoon 34).
Zaion enaaj “juon kakōļļe n̄an armej raņ.”
Ensign ej “juon būļāāk ak jon̄ak ipeļaakin me armej ro rej aindoon ilo juon wōt ilo kōttōpar ak m̧wil” (Guide to the Scriptures, “Ensign,” scriptures.ChurchofJesusChrist.org). Ekōjkan an Zaion kar—ak Kabun̄ eo an Irooj—āinwōt juon ensign (kakōļļe) n̄an kwe? Ļōmņak kōn waanjon̄ak kein jet kōn men ko me kar kajutaki, āinwōt juon ensign (kakōļļe), n̄an kōjeraam̧m̧an armej ro: Bōnbōn 21:6–9; Matu 5:14–16; Alma 46:11–20. Ta eo eoon kein rej katakin kōj kōn ekōjkan am̧ maron̄ jipan̄ Kabun̄ in erom juon ensign (kakōļļe) ijo kwoj mour ie? Kappukōt wāween ko jet Irooj ej kōmeļeļeik Zaion Katak im Bujen Ko 64:41–43.
Kiāptin Mornonai ej Kotak Taitōl eo an Anemkwoj, jān Gary E. Smith
“Kom̧in kōpooj iaļ eo an Irooj.”
Matu ekar kwaļo̧k kadkad in Jon Ripeptaij āinwōt juon eo ekar kwaļo̧k, “Kom̧win kōpooj iaļ an Irooj” (Matu 3:3; lale barāinwōt Aiseia 40:3). Ilo Katak im Bujen Ko 65, Irooj ej kōjerbal kajin eo ejjeļo̧k oktak n̄an kōmeļeļeik jerbal eo An ilo raan-ko aliktata. Ta men ko rej eier wōt juon kwoj loe ikōtaan ta eo Jon Ripeptaij ekar kōm̧m̧ani (lale Matu 3:1–12) im ta eo Irooj ekōņaan bwe jen kōm̧m̧ani rainin? Ta eo kwoj loe ilo revelesōn in me ej im̧we eok n̄an jipan̄ kakūrm̧ool kanaan ko rej pād ie? Kōļmenļo̧kjeņ kōn wāween ko komaron̄ “kabun̄bun̄ļo̧k jerbal ko an [Anij] rem̧m̧an ilubwiljin armej raņ” (eoon 4).
Irooj ejeļā ļōmņak ko an būruō.
Ejjab to ālkin an kobatok ilo Kabun̄ in, William E. McLellin ekar kajjitōk ippān Josep Smith n̄an kwaļo̧k ankilan Anij n̄an e. Josep ekar jab jeļā, bōtaab William ekar wōr an ļalem kajjitōk ko eaar kōjatdikdik Irooj enaaj kar uwaaki kōn Rikanaan eo An. Jejjab jeļā ta kar ta kajjitōk ko an William, bōtaab jejeļā bwe revelesōn eo ekar kōnono n̄an e, kiiō Katak im Bujen Ko 66, kar kajjojo uwaak n̄an “bun̄ bōro eo edipio im aolepān” an William (“William McLellin’s Five Questions,” Revelations in Context, 138).
Ilo am̧ riiti jekjōn 66, ļōmņak kōn ta eo Irooj ekar jeļā kōn William McLellin im n̄ūrbōktak ko im kōttōpar ko an būruōn. Ekōjkan an Irooj kar kwaļo̧k bwe Ejeļā kwe? Eļan̄n̄e ewōr juon am̧ kōjeraam̧m̧an an petriak, ļōmņak in ekkatak kake. Ilo am̧ kōm̧m̧ane, ta eo Jetōb Kwojarjar eo ej jipan̄ eok meļeļe kake kōn ankilan Anij n̄an kwe?
Lale barāinwōt Armej ro Rekwojarjar, 1:138–40; Gospel Topics, “Patriarchal Blessings,” topics.ChurchofJesusChrist.org.
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota
-
Katak im Bujen Ko 64:8–10.Kadkad ko an baam̧le rej letok elōn̄ iien ko rem̧m̧an n̄an ekkatak n̄an jeorļo̧k bōd. Bōlen ro uwaan baam̧le eo remaron̄ kōnono kōn ekōjkan an jeorļo̧k bōd an doon kar kōjeraam̧m̧an baam̧le eo ami. Ekōjkan an Rilo̧mo̧o̧r eo kar jipan̄ kōj jeorļo̧k bōd an doon? Ekōjkan ad kar “kauwe” (eoon 8) n̄e jejjab jeorļo̧k bōd an ro jet?
-
Katak im Bujen Ko 64:33Ta eo Jemedwōj Ilan̄ ekōņaan bwe baam̧le eo am̧ en kōm̧m̧ane n̄an bōktok “jerbal eo eļap” An? Bōlen ej etal n̄an tampeļ eo, kwaļo̧k gospel eo ippān juon eo iturid, ak anjo̧ ioon iakwelel. Bōlen kajjojo ro uwaan baam̧le eo remaron̄ ae men ko reddik, āinwōt ļā ko ak batin ko ak m̧ōttan bajōļ ko, im kōjerbali n̄an bōk jikin “men ko reddik” jemaron̄ kōm̧m̧ani aolep raan n̄an “[likūt] pedped eo” n̄an jerbal eo eļap an Anij. Āinwōt juon baam̧le, kāālet juon iaan men kein reddik n̄an jerbale ilo wiik in.
-
Katak im Bujen Ko 66:3.Ekōjkan am̧ naaj katakin aorōk eo an ukweļo̧k? Komaron̄ ajije jet m̧ōn̄ā ioon juon pileij me jidik in erreo im riiti naan ko an Irooj n̄an William McLellin: “Kwo erreo, ak ej jab aolep.” Innām komaron̄ karreoik pileij eo im ajije m̧ōn̄ā ko ilo am̧ ekōnono kōn ekōjkan an Jisōs Kraist kōm̧m̧an bwe en pidodo n̄an kōj n̄an erreo ilo jetōb.
-
Katak im Bujen Ko 66:10.Ekōjkan an baam̧le eo am̧ maron̄ ļoor kapilōk eo an Irooj n̄an “kappukot jaab n̄an eddo,” ak inene kōn elōn̄ men ko n̄an kōm̧m̧ani? Komaron̄ kōnono kōn bwebwenato eo an Mary im Martha (lale Luk 10:38–42), im ekōnono kōn ekōjkan an baam̧le eo am̧ maron̄ dāpij wōt jān erom eddo kōn men ko me aorōkier rejjab n̄an indeeo.
Kōn ļōmņak ko jet n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Al eo kar elmakote: “Help Me, Dear Father,” Children’s Songbook, 99.
Kōkōm̧anm̧anļo̧k Ad Ekkatak
Kwōn pād im pidodo tōpare. Jet iaan iien katakin ko rem̧m̧an tata rej ijjino āinwōt kajjitōk ko ak n̄ūrbōktak ko ilo bōro ko an ro uwaan baam̧le eo. Kōm̧m̧an bwe ro uwaan baam̧le eo ren jeļā kōn naan ko am̧ im kōm̧m̧an ko bwe kwoj kijooror in ron̄ jān er. (Lale Teaching in the Savior’s Way, 16.)
Jeorļo̧k Bōd, jān Greg K. Olsen. Kar kōjerbal mālim. www.GregOlsen.com