Māe 10–16

Katak im Bujen Ko 49–50

“Men Eo Ej jān Anij Ej Meram”

Ilo am̧ riiti Katak im Bujen Ko 49–50, kappukōt ennaan ko ak pedped in katak ko me kwoj en̄jake renaaj ļap tata an ļap meļeļeier n̄an ajri ro kwoj katakin er. Jejjo emōj elmakoti ilo unin tōl in.

Je En̄jake ko Rej Im̧we Eok

Kajjitōk bwe ren Kwaļo̧k

Kwaļo̧k pija eo jān unin tōl eo an wiik in ilo Itok Ļoor Eō—N̄an Kajjojo Armej im Baam̧le ko, im jipan̄ ajri ro kōnono kōn ekōjkan an Jisōs Kraist āinwōt juon jabōt em̧m̧an.

Katakin Katak eo: Ajri ro Reddikļo̧k

Katak im Bujen Ko 49:12–14

Imaron̄ ļoor Jisōs Kraist

Jipan̄ ajri ro meļeļe bwe remaron̄ ļoor Jisōs Kraist kōn tōmak ilo E, ukweļo̧k, peptaij, im bōk Jetōb Kwojarjar eo.

M̧akūtkūt ko Maron̄ Kōm̧m̧ani

• Kwaļo̧k emen annan̄ in ne peba ko im emen pija ko rej jutak kōn tōmak ilo Jisōs Kraist, ukweļo̧k, peptaij, im bōk Jetōb Kwojarjar eo. Riiti Katak im Bujen Ko 49:12–14, im kajjitōk ippān ajri n̄an jitōn̄ļo̧k pija eo ejim̧we n̄e kajjojo ej kōnono kake ilo eoon ko. Kōm̧m̧an bwe ajri ro ren jipan̄ eok likūt annan̄ in ne ko ioon būļoor eo ippān pija ko iturier, im kajjitōk ippān ajri ro n̄an bōk koņaer etetal ioon annan̄ in ne ko. Kwaļo̧k naan in kam̧ool eo am̧ bwe n̄e jej kōm̧m̧ane men ko ilo pija kein, jej ļoor Jisōs Kraist

• Kōjerbal peij in m̧akūtkūt eo an wiik in n̄an kōm̧m̧ani finger puppet ko me remaron̄ jipan̄ ajri ro ekkatak ekōjkan aer maron̄ ļoor Jisōs Kraist kōn an wōr aer tōmak, ukweļo̧k, peptaij, im bōk menin letok eo an Jetōb Kwojarjar.

Katak im Bujen Ko 50:23–25

Meram in jetōb eo aō emaron̄ meramļo̧k im meramļo̧k.

Ļōmņak ko āinwōt m̧ool im jetōb emaron̄ in pen an ajri ro reddik meļeļe, bōtaab keidi er n̄an meram, āinwōt an Irooj kar kōm̧m̧ane ilo Katak im Bujen Ko 50:23–25, emaron̄ jipan̄.

M̧akūtkūt ko Maron̄ Kōm̧m̧ani

• Kōjerbal juon m̧akūtkūt eo me ej kwaļo̧k ekōjkan an meram in jetōb eo ad maron̄ meramļo̧k im meramļo̧k. Komaron̄ kwaļo̧k pija ko an men ko me rej letok meram (ko āinwōt juon kāāntōļ, juon tōm̧a, im aļ) im kōm̧m̧an bwe ajri ro ren karōki ilo laajrak eo ej ļapļo̧k aer meram. Ak kajjitōk ippān ajri ro n̄an etan ke rej meram ko rej meramļo̧k kōn m̧an laļļo̧k im jidik kake jutak tok im kōkankan peier lōn̄ļo̧k. Jipan̄ er ļōmņak kōn men ko rem̧m̧an remaron̄ kōm̧m̧ani n̄an kōm̧m̧an bwe meram in jetōb eo aer en meramļo̧k.

• Al ippān ajri ro kōn juon al kōn meram in jetōb eo aer, eo āinwōt “Shine On” (Children’s Songbook, 144). Kam̧ool kōn ekōjkan an Jemedwōj Ilan̄ kar jipan̄ kōmeramļo̧k meram eo am̧. Jiron̄ ajri ro kōn meram eo kwoj loe ilo er.

Katak im Bujen Ko 50:41–44

Jisōs Kraist ej iakwe eō.

Jisōs Kraist eaar Jabōt eo Em̧m̧an. Jej jiip ko An, im E ej iakwe kajjojo iaad. Ta eo enaaj jipan̄ ajri ro kwoj katakin er en̄jake iakwe eo An n̄an er?

M̧akūtkūt ko Maron̄ Kōm̧m̧ani

• Kwaļo̧k n̄an ajri ro pija in Jisōs Kraist (lale Bok In Gospel Pija, nō. 47, 84, ak 116), im kajjitōk ippān ajri ro ekōjkan aer jeļā bwe Jisōs ej iakwe ajri ro. Kwaļo̧k ekōjkan am̧ jeļā bwe Jisōs ej iakwe eok im kajjojo ajri ro ilo kūlaaj eo am̧.

• Kōm̧m̧an peba jiip, je ioer etan ajri ro ilo kūlaaj eo am̧, im ņooji ipeļaakin ruum̧ eo. Kwaļo̧k juon pija in Rilo̧mo̧o̧r eo, im riiti Katak im Bujen Ko 50:41–42. Jipan̄ ajri ro meļeļe ta eo eoon kein rej katakin kōn ekōjkan an Jisōs Kraist en̄jake kōn er. Kōm̧m̧an bwe ren kappukōt jiip ko ipeļaakin ruum̧ eo im likūt er ioon boot eo iturin pija in Jisōs bwe “ejjeļo̧k iaer … enaaj jako” (eoon 42).

Katakin Katak ko: Ajri ro Rerūttoļo̧k

Katak im Bujen Ko 49:12–14

Imaron̄ ļoor Jisōs Kraist

Irooj ej aikuji kōj wōj aolep n̄an katakin ro jet bwe ren maron̄ itok n̄an E kōn wōr tōmak, ukweļo̧k, peptaij, im bōk menin letok eo an Jetōb Kwojarjar.

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an keidi Katak im Bujen Ko 49:12–14 ippān ta eo Piter eaar katakin ilo Jerbal 2:38 ippān laajrak in tōmak kein kemen. Ta men ko reier wōt juon rej loi? Etke m̧ool kein rej aorōk?

• Kajjitōk ippān ajri ro n̄an jerbal ilo ruo iaan ruo im etan ke juon iaer ekōņaan jeļā ekōjkan ļoor Jisōs Kraist Ajri ro jet ilo pea eo juon remaron̄ katakin e kōjerbal Katak im Bujen Ko 49:12–14.

Katak im Bujen Ko 49:15–17

M̧are eo ikōtaan juon em̧m̧aan im juon kōrā ej aorōk n̄an karōk eo an Anij.

Ajri ro kwoj katakin er remaron̄ ioon ennaan ko rekapokpok kōn m̧are. Katak im Bujen Ko 49:15–17 emaron̄ jipan̄ er meļeļe ekōjkan an Irooj en̄jake kōn m̧are.

M̧akūtkūt ko Maron̄ Kōm̧m̧ani

• Kōmeļeļeik bwe Shaker ro raar juon kumi me raar tōmak armej rejjab aikuj in m̧are (lale taitōl in jekjōn eo n̄an Katak im Bujen ko 49). Kajjitōk ippān ajri ro n̄an kappukōt men ko Irooj eaar katakin kōn m̧are ilo Katak im Bujen Ko 49:15–17.

• Jipan̄ ajri ro meļeļe ta meļeļe in eoon eo “m̧are ej ekkapit jān Anij”. Kajjitōk ippān ajri ro n̄an le ruo iaan ruo n̄an keidi Katak im Bujen Ko 49:15–17 ippān perokūrāp ko jilu im̧aan an “Baam̧le Eo: Juon Naan in Kean̄ n̄an Laļ in.” Etke m̧are ej lukkuun aorōk n̄an Jemedwōj Ilan̄?

• Al ippān doon eoon ruo in “Families Can Be Together Forever” (Children’s Songbook, 188) ak bar juon al kōn baam̧le ko. Jipan̄ ajri ro ļōmņak kōn wāween ko remaron̄ m̧aanjabpopo n̄an m̧are ilo tampeļ juon raan im bōk juon baam̧le indeeo.

  

  M̧are ikōtaan juon em̧m̧aan im juon kōrā ej ekkapit jān Anij.

Katak im Bujen Ko 50:40–46

Jisōs Kraist ej Jabōt eo Em̧m̧an.

Katak im Bujen Ko 50:40–46 epād ie kōmeļeļe ko me emaron̄ jipan̄ ajri ro kwoj katakin er meļeļe ekōjkan an Rilo̧mo̧o̧r eo en̄jake kōn er.

M̧akūtkūt ko Maron̄ Kōm̧m̧ani

• Kōm̧m̧ane juon ikkure in kōmāājej kōjerbal eoon ko jān Katak im Bujen Ko 50:40–46. N̄an waanjon̄ak, komaron̄ je “Jab mijak, ajri reddik” ioon kaat eo juon me enaaj jetjet ippān bar juon kaat me ej ba “bwe kom̧ij aō” (eoon 41). Riit Katak im Bujen Ko 50:40–46 ippān doon. Innām kapok jaļjaļe kaat ko ioon būļoor eo, juon tebōļ, ak boot eo, im kajjitōk ippān ajri ro n̄an māāje eoon ko. Ta eo eoon kein rej katakin kōj kōn Jisōs Kraist?

• N̄an jipan̄ ajri ro meļeļe ekōjkan an Rilo̧mo̧o̧r eo āinwōt juon jabōt eo em̧m̧an, kajjitōk ippāer n̄an riiti Katak im Bujen Ko 50:40–46 ippān doon. Innām kwaļo̧k pija in alooj eo “Jesus Declares the Parable of the Lost Sheep” (ChurchofJesusChrist.org), ak kajjitōk ippāer n̄an pukōt juon men ilo pija in alooj eo me ej kakeememej er kōn ta eo raar riiti. Ekōjkan an Jisōs lo̧mo̧o̧ren kōj? Ekōjkan ad maron̄ erom jabōt ro rem̧m̧an n̄an ro jet?

Kōketak Ekkatak ilo M̧weo

Kōpooj juon ennaan n̄an kajjojo ajri kōn naan kein: Kajjitōk ippa kōn . Kōm̧m̧an bwe ajri ro ren kanne ilo ijo ejjeļo̧k kobban kōn juon men eo raar ekkatak (leļo̧k n̄an er jipan̄ n̄e aikuj) im pini ennaan eo n̄an nuknuk ko aer n̄an jino juon ekōnono ilo m̧weo.

Kōkōm̧anm̧anļo̧k Ad Katakin

Ukukōt m̧akūtkūt ko n̄an dettan iiō eo an ajri ro kwoj katakin er. Ilo an ajri ro rūttoļo̧k, eļapļo̧k ijo remaron̄ leļo̧k n̄an kūlaaj eo. Eļapļo̧k iminene eo aer im emaron̄ em̧m̧anļo̧k aer kwaļo̧k ļōmņak ko aer. N̄e katakin ajri ro reddikļo̧k, komaron̄ aikuj in kōmeļeļeik eļapļo̧k jān ippān ajri ro rōrūttoļo̧k. Iien otemjej leļo̧k n̄an ajri ro juon iien em̧m̧an n̄an bōk koņaer kōn er make, innām jipan̄ er n̄e aikuj.