“Eprōļ 19–25. Katak im Bujen ko 41–44: ‘Aō Kien n̄an Tōl Kabun̄ in Aō,’” Itok, Ļoor Eō—N̄an Kajjojo Armej im Baam̧le ko: Katak im Bujen ko 2021 (2020)
“Eprōļ 19–25. Katak im Bujen ko 41–44,” tok, Ļoor Eō—N̄an Kajjojo Armej im Baam̧le ko: 2021
Eprōļ 19–25
Katak im Bujen ko 41–44
“Aō Kien n̄an Tōl Kabun̄ in Aō”
“Eļan̄n̄e kom̧ naaj kajjitōk,” Irooj eaar kallim̧ūr, “kom̧ naaj bōk revelesōn ioon revelesōn, jeļāļo̧kjeņ ioon jeļāļo̧kjeņ” (Katak im Bujen ko 42:61). Ta kajjitōk ko kwomaron̄ kajjitōk n̄an maron̄ bōk revelesōn eo kwoj aikuji?
Je En̄jaake ko Rej Im̧we Eok
Mōkajj in eddōkļo̧k eo an Kabun̄ in ilo 1830 eo im 1831 eo—eļaptata m̧ōkaj in an rioktak ro rekāāl itok n̄an Kirtland, Ohio—eaar kaitoktok limo im kōketak n̄an Armej ro Rekwojarjar. Bōtaab ebōrāinwōt kwaļo̧k jet apan̄ ko. Ekōjkan am̧ kakobaik juon eddōkļo̧k eo em̧ōkaj an kumi in ritōmak ro, eļap tata ke rej bōktok ippāer katak im iminene ko jān kabun̄ ko aer im̧aanļo̧k? N̄an waanjon̄ak, ke Josep Smith eaar tōkākļo̧k ilo Kirtland ilo jino in Pāpode ilo1831 eo, eaar lo membōr ro rekāāl mour kōn juon iminene ilo lukkuun kajjieon̄ arin Rikirijin ro ilo Kallim̧ur Ekāāl (lale Jerbal 4:32–37). Irooj eaar kōm̧m̧ane jet kajjim̧we ko raorōk im kalikkar ko ilo menin im unin kōnono ko jet, eļaptata kōn juon revelesōn kar je ilo Katak im Bujen ko 42, me Ekar ņa etan “aō kien n̄an tōl kabun̄ in aō” (eoon 59). Ilo revelesōn in, jej ekkatak m̧ool ko me rej pedped in jutak eo an Kabun̄ eo an Irooj ilo raan ko āliktata, ekoba juon kallim̧ur eļap kalikkare bwe ewōr iien otemjej eļapļo̧k n̄an ekkatak: “Eļan̄n̄e kom̧ naaj kajjitōk, kom̧ naaj bōk revelesōn ioon revelesōn, jeļāļo̧kjeņ ioon jeļāļo̧kjeņ” (Katak im Bujen ko 42:61).
Lale bōrāinwōt Saints, 1:114–19.
Ļōmņak ko n̄an Ekkatak Jeje ko Rekwojarjar Ippam̧ Make
“E eo ej bōk kien eo Aō im kōm̧m̧an e, ejja in wōt Aō rikaļoor.”
Ilo jino in 1831 eo, Armej ro Rekwojarjar raar jino aiin doonļo̧k n̄an Ohio, kijooror n̄an bōk kien eo me Anij eaar kallim̧ur n̄an kwaļo̧k ijōņ (lale Katak im Bujen ko 38:32). Bōtaab m̧oktata, Irooj eaar katakin ekōjkan an rikaļoor ro An aikuj kepojak n̄an bōk kien eo An. Ta pedped in katak ko kwoj loi ilo eoon 1–5 me renaaj kar jipan̄ Armej ro Rekwojarjar bōk kien eo an Anij? Ekōjkan an pedped in katak kein maron̄ jipan̄ eok bōk naan in kōmeļeļe eo jān E?
Kien ko an Anij n̄an tōl Kabun̄ in An im maron̄ tōl mour ko ad.
Armej ro Rekwojarjar raar ļōmņak kōn revelesōn eo loe ilo Katak im Bujen ko 42:1–72 āinwōt juon iaan men ko raorōk tata Rikanaan eo eaar bōke. Ekar ilubwiljin ko im̧aantata raar jeje, waļo̧k ilo ruo nuuj peba ko ilo Ohio, im kar jeļā kake āinwōt “kien eo.” Elōn̄ iaan pedped in katak ko ilo jekjōn in kar kwaļo̧ki jān Irooj m̧oktaļo̧k. Men̄e jekjōnin ejjab kobaik aolep kien ko Irooj ekar kōņaan bwe Armej ro Rekwojarjar An ren pokake, eaorōk n̄an kōļmenļo̧kjeņ etke pedped in katak kein raar aorōk n̄an āliji n̄an Kabun̄ eo ekāāl kar kōjepļaaktok.
Emaron̄ in jipan̄ n̄an riiti jekjōn 42 ilo m̧ōttan ko reddikļo̧k āinwōt kein im kile pedped in katak ko kar katakin ilo kajjojo iaer. Ilo am̧ kōm̧m̧ane, ļōmņak kōn ekōjkan an kien in n̄an tōl Kabun̄ in maron̄ bōrāinwōt jipan̄ tōl mour eo am̧ make.
Lale bōrāinwōt 3 Nipai 15:9.
Ekōjkan an Armej ro Rekwojarjar kar “wūjlepļo̧k men ko [m̧weier]” n̄an jipan̄ rijeram̧ōl?
Juon m̧ōttan kien eo eaorōk kar kwaļo̧ke ilo jekjōn 42 ej ta eo eaar itok n̄an jeļā kake āinwōt kien wūjlepļo̧k im eddo. Kien in eaar katakin Armej ro Rekwojarjar ekōjkan aer maron̄, āinwōt rikaļoor ro an Kriast kar etto, kar wōr “men otemjej ilo ejjeļo̧k kalijekļo̧k” (Jerbbal 2:44; 4 Nipai 1:3), kōn “ejjeļo̧k rijeram̧ōl ilubwiljer” (Moses 7:18). Armej ro Rekwojarjar raar wūjlepļo̧k m̧en ko m̧weier kōn leļo̧k n̄an Irooj, n̄an bisop eo (lale Katak im Bujen ko 42:30–31). Bisop eo eaar kōro̧o̧li ļo̧k n̄an er ta eo raar aikuji (lale eoon 32)—ekkā ta eo raar wūjlepļo̧k im elōn̄ļo̧k. Membōr ro raar jipan̄(donate) bwe ko aer n̄an jipan̄ rijeram̧ōl (lale eoon 33–34). Kien in eaar juon kōjeraam̧m̧an eļap n̄an Armej ro Rekwojarjar, eļap tata ro me raar likūt men otemjeļo̧k n̄an itok n̄an Ohio. Elōn̄ Armej ro Rekwojarjar raar jouj ilo menin jipan̄ ko aer.
Men̄e eoktak ad kōm̧m̧ane rainin, Armej ro Rekwojarjar ilo Raan-ko Āliktata rej mour wōt kōn kien wūjlepļo̧k. Ilo am̧ riiti Katak im Bujen ko 42:30–42, kejōkļo̧kjeņ kōn ekōjkan am̧ maron̄ wūjlepļo̧k ta eo Anij eaar lewaj n̄an eok n̄an kalōk aelōn̄ in kiin̄ eo an im kōjeraam̧m̧an ro rej pād ilo aikuj.
Lale bōrāinwōt Linda K. Burton, ““Iaar Juon Ruwamāejet”,” Ensign ak Liaona, Māe 2016, 13–15; “The Law,” Revelations in Context, 93–95, history.ChurchofJesusChrist.org.
Kraist im Rim̧wie eo Edik, jān Heinrich Hofmann
Katak im Bujen ko 42:61, 65–68; 43:1–16
Anij ej letok revelesōn n̄an tōl Kabun̄ in An.
Pijaikļo̧k bwe kwoj bwebwenato ippān juon eo ekāāl uwaan Kabun̄ in me ej lo̧udin̄din̄ n̄an jeļā bwe Kabun̄ in ej tōl kōn revelesōn. Ekōjkan am̧ maron̄ kōjerbal Katak im Bujen ko 43:1–16 n̄an kōmeļeļeik ļeo ak lieo jon̄ak eo an Irooj kōn tōl Kabun̄ in An kōn rikanaan ro An? Ekōjkan am̧ maron̄ kōjerbal Katak im Bujen ko 42:61, 65–68 n̄an katakin kōn revelesōn an juon make?
Lale bōrāinwōt “All Things Must Be Done in Order,” Revelations in Context, 50–53, history.ChurchofJesusChrist.org.
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota
-
Katak im Bujen ko 41:1–5.Ta jet iaan waanjon̄ak ko an kein ko an laļ eo, im ekōjkan an kien kein kōjeraam̧m̧an kōj? Ekōjkan an kakien ko ak kien ko an Jemedwōj Ilan̄ kōjeraam̧m̧an kōj? Ro uwaan baam̧le eo emaron̄ jin̄aik pija ko kōn er make pokake kien ko an Anij.
-
Katak im Bujen lo 42:45, 88.Ta eo enaaj jipan̄ baam̧le eo am̧ “mour ippān doon ilo iakwe”? (lale bōrāinwōt Mosaia 4:14–15). Ļōmņak in je ak ba men ko rem̧m̧an kōn bar juon ak al juon al kōn iakwe ilowaan baam̧le eo, eo āinwōt “Ewōr Aibujuij Ibelakin” (Al Ko Al In Ajri, nō. 34.
-
Katak im Bujen ko 42:61.Bōlen komaron̄ riiti eoon in ilo am̧ likūt bajōļ in ippān doon. Kōjerbal bajōļ eo n̄an katakin ekōjkan an Anij kwaļo̧k ittiņo̧ ko An—“revelesōn ioon revelesōn, jeļāļo̧kjeņ ioon jeļāļo̧kjeņ.” Ro uwaan baam̧le remaron̄ kwaļo̧k ekōjkan an Anij kar kwaļo̧k m̧ool eo n̄an er jidik ilo juon iien.
-
Katak im Bujen ko 43:25.Bōlen ewōr juon men baam̧le eo am̧ emaron̄ kōjerbale n̄an ejaaki ainikien ko an juon lan̄ in ejourur āinwōt juon wāween kwaļo̧k kadkad in juon ekōnono kōn eoon 25. Ekōjkan an ainikien Irooj juon “ainikien jourur ko”? Etale eoon eo ippān doon kōn wāween ko Irooj emaron̄ kūr kōj n̄an ukweļo̧k. Ekōjkan ad maron̄ ļapļo̧k ad uwaake ainikien Irooj?
Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Al eo kar elmakote: “I Want to Live the Gospel,” Children’s Songbook, 148; lalae “Ļōmņak ko n̄an Kōkōm̧anm̧anļo̧k Ekkatak Jeje ko Rekwojarjar an Baam̧le eo Am̧.”
Kōkōm̧anm̧anļo̧k Ad Katakin
Kalōk juon mejatoto eo em̧m̧an. Waween eo ro uwaan baam̧le rej en̄jaake kōn im kōm̧m̧an n̄an ro jet remaron̄ in kajoor aer kareel jetōb eo an m̧weo im̧ōm̧. Jipan̄ aolep ro uwaan baam̧le eo kōm̧m̧ane ijo kuņaer n̄an kalōk juon im̧ōn iakwe, kautiej bwe aolep renaaj en̄jake ineem̧m̧an ilo kwaļo̧k en̄jake ko, kajjitōk ko, im naan in kam̧ool ko. (Lale Teaching in the Savior’s Way,15.)
Josep Smith ej Kwaļo̧k naan ilo Nauvoo, jān Sam Lawlor