“Jānwōde 4–10. Josep Smith—Bwebwenato 1:1–26: ‘Iaar Lo juon Jurōn Meram,’” Itok, Ļoor Eō—N̄an Kajjojo Armej im Baam̧le ko: Katak im Bujen Ko 2021 (2020)
“Jānwōde 4–10. Josep Smith—Bwebwenato 1:1–26,” Itok, Ļoor Eō—N̄an Kajjojo Armej im Baam̧le ko: 2021
Bukwin Wōjke Ko Rekwojarjar, jān Greg K. Olsen
Jānwōde 4–10
Josep Smith—Bwebwenato 1:1–26
“Iaar Lo juon Jurōn Meram”
Ilo am̧ riiti Josep Smith—Bwebwenato 1:1–26, ta ennaan ko kwoj loi n̄an mour eo am̧? Ta eo eļap an aorōk ippam̧ im baam̧le eo am̧?
Je En̄jaake ko Rej Im̧we Eok
Katak im Bujen Ko ej juon bok in uwaak n̄an jar ko: elōn̄ revelesōn ko rekwojarjar ilo bok in rekar itok ilo uwaak n̄an kajjitōk ko. Kōn menin ejejjet n̄an jino ekkatak Katak im Bujen Ko n̄an ļōmņak kōn kajjitōk eo me ekar jino lutōkleplep revelesōn ilo raan kein āliktata—eo me Josep Smith ekar kajjitōk kake ilo būkwin wōjke ko ilo 1820. Juon “tariņae in naan ko im limotak in ļōmņak kein” (Josep Smith—Bwebwenato 1:10) ekar kapok Josep kōn Kabun̄ im kōn mour in jetōb eo an; bōlen komaron̄ keidi menin. Elukkuun lōn̄ ļōmņak ko rekapokpok im ainikien kareleel ko ilo raan kein ad im n̄e jekōņaan depļo̧ki ennaan kein im lo m̧ool eo, jemaron̄ kōm̧m̧ane ta eo Josep ekar kōm̧m̧ane. Jemaron̄ kajjitōk kajjitōk ko, ekkatak jān jeje ko rekwojarjar, kejōkļo̧kjeņ, im̧ āliktata kajjitōk ippān Anij. Ilo uwaak in jar eo an Josep, juon jurōn meram ekar wanlaltak jān lan̄; Anij Jemān im Jisōs Kraist rekar waļo̧k im rekar uwaake kajjitōk eo an. Naan in kam̧ool an Josep kōn en̄jaake eo ekabwilōn̄lōn̄ ekar lukkuun alikkar ilo an ba bwe jabdewōt armej “eo ejjeļo̧k an mālōtlōt emaron̄ kajjitōk jān Anij, im bōke” (Josep Smith—Bwebwenato 1:26). Jemaron̄ aolep bōk, eļan̄n̄e ejjab juon visōn jān lan̄, juon visōn eo ealikkar, romaak jān meram in lan̄.
Ļōmņak ko n̄an Ekkatak Jeje Ko Rekwojarjar an Juon Make
Josep Smith ej Rikanaan eo an Jepļaaktok eo.
Unleplep in bwebwenato eo an Josep Smith ekar n̄an likūt kōj “ilo aer bōki m̧ool ko” kōnke m̧ool eo kōn Josep ekkā an jab jim̧we (Josep Smith—Bwebwenato 1:1). Ilo am̧ riiti Josep Smith—Bwebwenato 1:1–26, ta eo ej kōkajoorļo̧k naan in kam̧ool eo an kōn kūr eo an ekwojarjar? Je kam̧ool ko kwoj loi me Irooj ekar kōpooj Josep Smith n̄an mijen in kanaan eo an. Ilo am̧ riiti, kwomaron̄ bar je ļōmņak im en̄jaake ko am̧ kōn Josep Smith im naan in kam̧ool eo an.
Bar lale Saints, 1:3–19.
Eļan̄n̄e Ij kajjitōk ilo tōmak, Anij enaaj uwaak.
Em̧ōj ke an kar “ejjeļo̧k am̧ mālōtlōt” ak en̄jaake tarpok kōn juon jokālet eo kwaar aikuj kōm̧m̧ane? (Josep Smith—Bwebwenato 1:13). Ta eo kwoj ekkatak kake jān en̄jaake in an Josep Smith ilo eoon ko 5–20? Ļōmņak kōn aikuj eo am̧ make kōn mālōtlōt im jeļā eļapļo̧k, im ļōmņak ewi wāween am̧ naaj kappukōt m̧ool eo.
Bar lale 1 Nipai 10:17–19; 15:6–11; Russell M. Nelson, “Revelesōn n̄an Kabun̄ in, Revelesōn n̄an Mour ko Ad,” Ensign ak Liaona, Māe 2018, 93–96.
Jemaron̄ kajjitōk ippān Anij kajjitōk ko ad ilo jar.
Josep Smith—Bwebwenato 1:15–20
Etke elōn̄ bwebwenato ko rokotaktak kōn Visōn eo M̧oktata?
Ilo mour eo an, Josep Smith ekar je en̄jaake eo an ilo Būkwin Wōjke Ekwojarjar emān kōttan, ekkā an kōjerbal juon rijeje. N̄an kakobaba, jejjo bwebwenato ko me kar je kein karuo jān jet armej ro me rekar ron̄ an Josep kōnnaan kōn visōn eo an. Men̄e bwebwenato kein rekar oktak ilo jet meļeļe, pedped wōt ioon armej ro im jekjek ko rekar pād ie, rej jejjet. Im kajjojo bwebwenato ekoba meļeļe ko me ej jipan̄ kōj meļeļe ļo̧k kōn en̄jaake eo an Josep Smith, āinwōt an kajjojo iaan Gospel ko emān jipan̄ kōj meļeļe kōn iien kwaļo̧k naan eo an Rilo̧mo̧o̧r.
N̄an riit bwebwenato eo juon an Josep, lale “First Vision Accounts” (Gospel Topics, topics.ChurchofJesusChrist.org). Ta eo kwoj ekkatak kake jān am̧ riiti aolepān bwebwenato kein?
Josep Smith—Bwebwenato 1:15–20
Visōn eo Kein Kajuon ekar ijjinoin Jepļaaktok eo an Gospel eo an Jisōs Kraist.
Josep Smith ekar lōke bwe Anij enaaj uwaake jar eo an, ak ekar jab kōtmene bwe wāween an uwaak enaaj ukōt mour eo an—im laļ in. Ilo am̧ riiti en̄jaake eo an Josep, kejōkļo̧kjeņ kake wāween an Visōn eo M̧oktata kar ukōt mour eo am̧. N̄an waanjon̄ak, komaron̄ kadedeikļo̧k jentōj in ilo wāween ko reoktak: “Kōnke Visōn eo Kein Kajuon ekar bōk jikin, Ijeļā bwe …” Ewi wāween am̧ kar jeram̧m̧an kōn Visōn eo M̧oktata?
Bar lale “Ask of God: Joseph Smith’s First Vision,” pijaan alooj, ChurchofJesusChrist.org; Saints, 1:14–19; Russell M. Nelson, “Ron̄jake E,” Ensign ak Liaona, Māe 2020, 88–92.
Josep Smith—Bwebwenato 1:21–26
Imaron̄ dāpdep wōt ilo m̧ool in me ijeļā kake, men̄e ro jet rej jum̧ae eō.
Juon iaan kōjeraam̧m̧an ko an jeje ko rekwojarjar ej bwe repād ie waanjon̄ak ko kōn em̧m̧aan im kōrā ro reperan ro me rekar jelm̧ae apan̄ ko kōn tōmak ilo Jisōs Kraist. Ke Josep Smith ekar jelm̧ae jum̧ae kōn visōn eo an, ekar keidi e n̄an Rijilōk Paul, eo me rekar kakkure e kōn an ba ekar lo juon visōn. Ilo am̧ riiti bwebwenato eo an Josep, ta eo ej im̧we eok n̄an dāpdep wōt ilo m̧ool n̄an naan in kam̧ool eo am̧? Ta waanjon̄ak ko jet—jān jeje ko rekwojarjar ak armej ro kwojeļā kake er—leļo̧k n̄an er peran n̄an m̧ool wōt kōn en̄jake ko kwaar en̄jaki?
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota
-
Josep Smith—Bwebwenato 1:6.Ewi wāween ad jelm̧ae jum̧ae ko ilo ad jab akwāāl āinwōt armej ro me kar kōmeļeļeik er ilo eoon in?
-
Josep Smith—Bwebwenato 1:11–13.Riiti eoon kein emaron̄ im̧weik ro uwaan baam̧le eo n̄an kwaļok en̄jaake ko kar un̄ur buruwāer im im̧weik er n̄an m̧akitkit.
-
Josep Smith—Bwebwenato 1:16–20.Ilo an baam̧le eo am̧ riiti eoon kein, ļōmņak n̄an kwaļo̧k pija in kar jin̄n̄aiki me ej m̧ōttanļo̧k katak in ak bar juon pija in Visōn eo Kein Kajuon (bōlen baam̧le eo am̧ enaaj itok limoin n̄an jin̄n̄aiki kōn meļeļe eo aer make). Komaron̄ bar alooje pija eo “Ask of God: Joseph Smith’s First Vision” (ChurchofJesusChrist.org). Kajjojo iaami emaron̄ kōlaajrake juon laajrak in m̧ool ko jej ekkatak kake jān visōn in, innām kwaļo̧k laajrak ko am̧ ippān bar juon. Menin enaaj juon iien em̧m̧an n̄an ro uwaan baam̧le ko n̄an kwaļo̧k wāween aer kar bōk naan in kam̧ool ko aer kōn Visōn eo Kein Kajuon an Josep Smith.
-
Josep Smith—Bwebwenato 1:17.Ke Anij ekar waļo̧k n̄an Josep Smith, Ekar kūr Josep kōn Etan. Ewōr ke iien ro uwaan baam̧le eo am̧ rekar en̄jaake ke Jemedwōj Ilan̄ elukkuun jeļā kōn er?
-
Josep Smith—Bwebwenato 1:21–26.Ewi wāween ad uwaak n̄e armej rej melejon̄e naan in kam̧ool ko ad?
N̄an ļōmņak ko relōn̄ļo̧k n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Al eo kar elmakote: “Joseph Smith’s First Prayer,” Hymns, no. 26.
Ainikien ko an Jepļaaktok eo
Baam̧le eo an Josep Smith
Mour an baam̧le ko ad relukkuun jelōt kōj kajjojo, im ejjeļo̧k oktak jān Josep Smith. Tōmak im katak ko an ro jinen im jemān rekar katok ine in tōmak ko me ekar kōm̧m̧an bwe Jepļaaktok eo en bōk jikin. Jōōnaļ eo an Josep ej jeje naan in: “Naan ko im kajin [rej] jab bwe n̄an kam̧m̧olool Anij ilo an kar letok n̄an ro jinō im jema reutiej.”1
Naan eo tok juon jān jinen, Lucy Mack Smith; būratōr eo an William Smith; im Rikanaan eo emake ekar letok n̄an kōj jidikin im̧we in Kabun̄ ilo m̧weo imōn Smith.
Baam̧le eo an Josep Smith, jān Dan Baxter
Lucy Mack Smith
“[Ilo tarrin 1802], Ikar lukkuun nan̄inmej. … Ikar ba n̄an n̄a make, Ijjab pojak n̄an mej bwe Ijjab jeļā wāween ko an Kraist im āinwōt ilo aō kalimjōke āinwōt juon marok im ajimakeke ikōtaaō im Kraist bwe ijjab kōņaan en̄jake. …
“Ikar reilōn̄ļo̧k n̄an Irooj im akweļap ippān Irooj bwe en dāpij mour eo aō bwe in bōktok ajri ro nejū im kaeņōm̧m̧an buruōn ļeo pāleeō; kōn menin Ij babu aolepān bon̄ōn eo. … Ikar kallim̧ūr ippān Anij [bwe] eļan̄n̄e enaaj kōtļo̧k eō bwe in mour inaaj kate eō bwe in kappukōt kabun̄ eo me enaaj kamaron̄ eō bwe en jim̧we aō jerbal n̄an e, men̄e ekar pād ilo Baibōl ak jabdewōt ijoko epād ie, men̄e ekar bōke jān lan̄ kōn jar im tōmak. Ilo jem̧ļo̧kin juon ainikien ekar kōnono n̄an eō im ba, ‘Kappukōt im kwonaaj lo, kōlaļlaļ im enaaj pelļo̧k n̄an eok. Kōtļo̧k bwe buruōm en aenōm̧m̧an. Kwoj tōmak ilo Anij; tōmak barāinwōt ilo n̄a.’ …
“Jān iien eo m̧aantak ikar bōk kajoor ejjeļo̧k jem̧ļo̧kin. Ikar kōnono jidik kōn kabun̄ men̄e ekar kobrak aolepān kōļmenļo̧kjeņ eo aō, im ikar ļōmņak bwe inaaj kōm̧m̧ane aolep men ko retiljek ālkin wōt aō kar kappukōt jet iaan armej ro retiljek ro rekar jeļā wāween ko an Anij n̄an katakin eō men ko an Lan̄.”2
William Smith
“Jinō, eo ekar lukkuun wūjlepļo̧k an ilo kabun̄ im eļap an itok limo ilo mour an ajri ro nejin, jimor kiiō im ālkin mour in, ekar kōm̧m̧ani aolep men ko emaron̄e kōn iakwe an juon mama, n̄an kōm̧m̧an bwe jen bōk koņaad ilo kappukōt n̄an lo̧mo̧o̧ren jetōb ko ad, ak (āinwōt an kar naan eo) ‘n̄an kappukōt kabun̄ eo.’ Ekar kipel er n̄an pād ilo iien jar ko im eiten aolepān baam̧le eo rekar itok limoer ilo menin, im ro rej kappukōt m̧ool eo.”3
“Aolep iien jej kōm̧m̧an jar an baam̧le jān iien eo imaron̄ kemeemej. Em̧m̧an aō kemeemej jema ke ekkā an likūt mej eo an ilo bōjo̧ in jiln̄ūj eo an, … im n̄e kōm ļaddik ro kōm ej lo an jibwe tok mej eo an, kōm jeļā ke ekar juon kōkaļļe n̄an kōpopo n̄an jar, im n̄e jejjab jeļā jinem̧ ej ikkūr “William’ ak jabdewōt iaam, ‘kōpopo n̄an jar.’ Alikin jar eo ekar wōr juon al kem kijon̄ al.”4
Josep Sr. im Lucy Smith rekar katakin baam̧le eo are n̄an ekkatak jeje ko rekwojarjar.
Josep Smith
“Ij ba kiiō, bwe [jema] ejjan̄in kar kōm̧m̧ane juon jerbal enana me emaron̄ kar jab jouj, ilo mour eo an, n̄an jeļā e aō. Ikar iakwe jema im an emeemļo̧kjeņ, im emeemļo̧kjeņ in jerbal ko an rem̧m̧an, rej pād ilo kōļmenļo̧kjeņ e aō; im elōn̄ naan in jouj ko an im katakin an juon baba n̄an eō, rej jeje ilo buruō. Rekwojarjar n̄an eō, rej ļōmņak ko me ij kaorōki ilo bwebwenatoon mour eo an, me rej pād ilo kōļmenļo̧kjeņ eo aō im pād wōt ie, jān etale eo aō make jān ke ikar ļotak. … Jinō ekar juon eo ettā, im em̧m̧an tata ilubwiljin aolep kōrā ro.”5
Visōn eo Kein Kajuon an Jepļaaktok eo, jān Michael Bedard