Ekar Kūr E kōn Eta, jān Micheal Malm

Jānwōde 11–17

Katak im Bujen Ko 2; Josep Smith—Bwebwenato 1:27–65

“Būruōn ro Nejier Renaaj Oktakļo̧k n̄an ro Jemāer”

Jetōb Kwojarjar emaron̄ katakin eok aolep iien am̧ riiti jeje ko rekwojarjar—jekdoon eoon ko me em̧ōj am̧ kar riiti elōn̄ alen m̧oktaļo̧k. Kōn menin kwon kōpeļļo̧k būruōm̧ n̄an en̄jaake im im̧we ko rekāāl.

Je En̄jake ko Rej Im̧we Eok

Em̧ōj an jilu iiō em̧ootļo̧k jān iien eo Anij Jemed im Nejin, Jisōs Kraist, rekar waļo̧k n̄an Josep Smith ilo bukwin wōjke ko, ak Josep ejjan̄in ebbōk jabdewōt revelesōn jān tōre eo. Ekar jino an ekkōl kōn mour eo an im̧aan mejān Irooj. Āinwōt kōj aolep, ekar kōm̧m̧an bōd ko, im ekar en̄jaake kaje jān er. Ak jekdoon ekar wōr juon an Anij jerbal n̄an e bwe en kōm̧m̧ane. Im jerbal eo me kar kūr Josep n̄an kōm̧m̧ane ej iookļo̧k n̄an ta eo Anij ej kajjitōk bwe jen kōm̧m̧ane. Josep en kar bōktok Bok in Mormon; ta eo em̧ōj kar kajjitōkin kōj bwe jen kōm̧m̧ane kake Bok in? Josep ekar bōki kii ko an priesthood n̄an ukōt būruōn ro nejier n̄an ro jemāer; ewi wāween ad ukōt būruōd n̄an ro jim̧m̧aad etto? Ekar m̧ōj jiron̄ e Josep kōn kanaan eo me enaaj kar kūrm̧ool ejjab to; ta ijo koņaad n̄an jipan̄ kakūrm̧ooli? Ke jej bōk koņaad ilo jerbal an Anij, jej kōtmene ke jenaaj jelm̧ae jum̧ae ko im kakkure, āinwōt kar Rikanaan eo. Ak emaron̄ wōr ad tōmak bwe Irooj enaaj kōm̧m̧an bwe jen kein jerbal ilo Pein, āinwōt An kar kōm̧m̧ane n̄an Josep.

Bar lale Saints, 1:20–48.

Ļōm̧ņak ko n̄an Ekkatak Jeje Ko Rekwojarjar Ippam̧ Make

Josep Smith—Bwebwenato 1:27–33

Ewōr juon An Irooj jerbal n̄an n̄a n̄an kōm̧m̧ane.

Ilo am̧ riiti Josep Smith—Bwebwenato 1:27–33, ļōmņak bwe Anij ewōr juon an jerbal n̄an kōj bwe jen kōm̧m̧ane, āinwōt kar Josep Smith. Kejōkļo̧kjeņ kōn kūr in jān Russell M. Nelson: “Kajjitōk ippān Jemedwōj Ilan̄, ilo etan Jisōs Kraist, ta en̄jaake eo An kōn kwe im mijen eo am̧ ioon laļ in. Eļan̄n̄e kwonaaj kajjitōk kōn bōro em̧ool, elōn̄ iien Jetōb enaaj unoojdikdik n̄an eok kōn m̧ool eo me enaaj ukōt mour eo am̧. … Ij kallim̧ūr n̄an eok bwe n̄e kwoj jino en̄jaake jidikin an Jemedwōj Ilan̄ kalimjōk tok eok im ta eo Ej kōņaan bwe kwōn kōm̧m̧ane n̄an E, mour eo am̧ enaaj oktak!” (“Becoming True Millennials” [worldwide devotional for young adults, Jan. 10, 2016], broadcasts.ChurchofJesusChrist.org).

Komaron̄ jet iien en̄jaake wāween eo Josep ekar en̄jaake ilo eoon ko 28–29. Ta eo komaron̄ ekkatak jān waanjon̄ak eo an Josep kōn ta eo kwoj aikuj kōm̧m̧ane n̄e kōm̧m̧an ko am̧ rejjab jejjet ippān jerbal eo me Anij ekar kūr eok n̄an kōm̧m̧ane?

Josep Smith—Bwebwenato 1:34–65

Bok in Mormon epād ie “tarlep in Gospel eo ejjeļo̧k jem̧ļo̧kin.”

Ilo am̧ riiti Josep Smith—Bwebwenato 1:34–65, ļōmņak kōn dipdikin enaan ko ilo eoon kein me remaron̄ iookwaj eok eļan̄n̄e kwojjan̄in kar ron̄ kōn Bok im Mormon m̧okta. Āinwōt juon ritōmak, etke bwebwenato in eaorōk n̄an naan in kam̧ool eo am̧ kōn Bok in Mormon?

Ļōmņak kōn wāween an Bok in Mormon kakūrm̧ool Kanaan ko ilo Aisea 29:4, 11–18.

Josep Smith—Bwebwenato 1:36–41

Jepļaaktok eo an gospel eo ekar kakūrm̧ool kanaan ko etto.

Moronai ekar kouti jet iaan Kanaan ko ilo Kalim̧m̧ur Mokta im Ekāāl n̄an Josep, āinwōt in Aisea 11; Jerbal 3:22–23; im Joel 2:28–32. Etke kanaan kein remaron̄ kar aorōk n̄an Josep bwe en jeļā? Etke eaorōk n̄an kwe n̄an jeļā men kein?

Katak im Bujen Ko 2

Ta eo Ilijah ekar kōjepļaaktok?

Būreejtōn Henry B. Eyring ekar ba: “Eaorōk bwe jen jeļā etke Irooj ekar kallim̧ur bwe enaaj kōjepļaaktok Ilijah. Ilijah ekar juon rikanaan eo em̧m̧an kōn kajoor eļap em̧ōj leļo̧k n̄an e jān Anij. Ekar kabwijer kajoor eo eļap me Anij ej leļo̧k n̄an ro Nejin: ekar kabwijer kajoor in liāp, kajoor n̄an liāp ioon laļ im bar liāp ilo lan̄” (“Hearts Bound Together,” Ensign or Liahona, May 2005, 78).

Barāinwōt lale Katak im Bujen Ko 110:13–16; David A. Bednar, “Mwiin En Ekkal n̄an Āt eo Eta,” Ensign ak Liaona, Māe 2020, 84–87.

Palmyra New York Tampeļ. Baam̧le ko rej liāp ilo tampeļ kōn kajoor eo me Ilijah ekar kōjepļaaktok.

Katak im Bujen Ko 2

Ilijah ekar itok bwe en ukōt buruō n̄an ro jim̧m̧a etto.

Ta eo naan ko āinwōt “katōk,” “bōro ko,” im “ukōt” ilo jekjeņ in ej katakin eok kōn mijen eo an Ilijah im kōjeram̧m̧an ko an kii ko an priesthood me rekar jepļaaktok? Em̧ōj ke am̧ kar en̄jaake an būruōm̧ oktakļo̧k n̄an ro jim̧m̧aam̧ etto? Ļōmņak kōn wāween ko komaron̄ ikutkut ļo̧k am̧ iooni en̄jaake rōt kein. Bōlen komaron̄ kar kajjitōkin juon nukum̧ n̄an kwaļo̧k juon bwebwenato kōn juon iaan ro jim̧m̧aam̧ etto—aaet em̧m̧anļo̧k, kwon rekoot e. Bōlen komaron̄ jeļā juon iaan ro jim̧m̧aam̧ etto emej me ejjan̄in kar bōk kain̄i ko an gospel innām kōm̧m̧ane jerbal eo an ilo tampeļ.

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le

Josep Smith—Bwebwenato 1:28–29Ewi wāween an Josep Smith en̄jaaki kōn bōd ko an? Ta eo ekar kōm̧m̧ane kōn en̄jaake ko an? Ta eo jej ekkatak kake jān e kōn ta eo jej aikuj kōm̧m̧ane n̄e jej kōm̧m̧an bōd?

Josep Smith—Bwebwenato 1:33–54.Komaron̄ kajjitōkin juon uwaan baam̧le eo n̄an kōļap ainikien an riiti jidikin ak aolepān ennaan eo Moronai jān Josep Smith—Bwebwenato 1:33–42 emān kattōn (kōnke Moronai ekar āliji enaan eo an emān kattōn). Ikōtaan kajjojo iien riit, kajjitōkin ro jet uwaan baam̧le eo n̄an kwaļo̧k ta eo rej keememej jān ennaan eo an, ilo aer jab kalimjōk eoon ko. Etke Irooj emaron̄ āliji ennaan ko raorōk elōn̄ alen? Ta jet iaan wāween ko jet Irooj ej katakin kōj ilo an āliji?

Katak im Bujen Ko 2:2.N̄an jipan̄ ajri ro nejim̧ meļeļe “kallim̧ur ko kar kōm̧m̧an ippān ro jemāer,” komaron̄ riiti Ebream 2:9–11 ippān doon ak alooje pija in alooje eo “Special Witnesses of Christ—Būreejtōn Russell M. Nelson” (ChurchofJesusChrist.org). Kappukōt kallim̧ur ko me Anij ekar kōm̧m̧ani āinwōt m̧ōttan bujen eo An ippān Ebream. Ewi wāween ad “katōk” kallim̧ur kein ilo būruōd?

Katak im Bujen Ko 2:2–3.N̄an jipan̄ ro uwaan baam̧le eo ukōt būruōer n̄an ro jemāer (ak ro jim̧m̧aer etto), komaron̄ kūr er n̄an ekkatak kōn juon iaan ro jim̧m̧aer im n̄an kwaļo̧k ta eo rej ekkatak kake ippān aolepān baam̧le eo. Etke Irooj ekōņaan bwe jen ekkatak kōn ro uwaan baam̧le ko ad im kōm̧m̧ani kain̄i ko ilo tampeļ n̄an er? Ewi wāween ad jeraam̧m̧an n̄e jej bōk koņaad ilo jerbal in bwebwenato ko an baam̧le im jerbal ko an tampeļ? (lale Dale G. Renlund, “Bwebwenato ko an Baam̧le im Jerbal im Jerbal ko an Tampeļ: Liāp im Kōmour,” Ensign ak Liaona, Māe 2018, 46–49).

N̄an ļōmņak ko reļļapļo̧k n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar kāālōte: “Family History—I Am Doing It,” Children’s Songbook, 94.

Kōkōm̧anm̧anļo̧k Am̧ Ekkatak Ippam̧ Make

Kōjerbal Jeje Ko Rekwojarjar ilo Ekkatak Ejipan̄ Kein jipan̄ ko āinwōt footnotes, Topical Guide, Bible Dictionary, Tōl n̄an Jeje ko Rekwojarjar, im ChurchofJesusChrist.org remaron̄ jipan̄ eok meļeļe em̧m̧anļo̧k kōn armej, makūtkūt ko, im naan ko ilo eoon ko.

Josep ej Bōk Pileij ko, jān Gary E. Smith