“Jānwōde 18–24. Katak im Bujen ko 3–5: ‘Jerbal eo Aō Enaaj Wōnm̧aanļo̧k,’” Itok, Ļoor Eō—N̄an Kajjojo Armej im Baam̧le ko: Katak im Bujen ko 2021 (2020)
“Jānwōde 18–24. Katak im Bujen ko 3–5,” Itok, Ļoor Eō—N̄an Kajjojo Armej im Baam̧le ko: 2021
E iien Madmōd ilo France, jān James Taylor Harwood
Jānwōde 18–24
Katak im Bujen ko 3–5
“Jerbal eo Aō Enaaj Wōnm̧aanļo̧k”
Je ta eo kwoj ekkatak im en̄jaake ilo am̧ ekkatak jeje ko rekwojarjar. Menin enaaj jipan̄ kakeememej eok kōn en̄jaake ko rej im̧we eok im jeere n̄an ro jet.
Je En̄jake ko Rej Im̧we Eok
Ilo iiō ko jinoin āinwōt rikanaan an Irooj, Josep Smith ejjan̄in kar jeļā aolep men kōn “juon jerbal ekabwilōn̄lōn̄” me em̧ōj kūr e n̄an kōm̧m̧ane. Ak juon men ilo en̄jaake ko an jinoin ekar katakin ej kōn kūr n̄an jerbal an Anij, mej ko mejān rej aikuj ilo m̧ool “erreļo̧k eo wōt n̄an aiboojoj eo an Anij” (Katak im Bujen ko 4:1, 5). N̄an waanjon̄ak, eļan̄n̄e Irooj ekar leļo̧k naan in kapilōk in me en kar jum̧ae ikdeleel eo an make, ekar menin aikuj bwe en ļoor kapilōk in an Irooj. Im men̄e ekar wōr ippān “elōn̄ revelesōn ko, im … kajoor n̄an kōm̧m̧ane elōn̄ jerbal ko reļļap,” eļan̄n̄e akilaan enaaj kar aorōk ippān make ijjeļo̧kin ankilaan Anij, e “eaikuj wōtlo̧k” (Katak im Bujen ko 3:4). Ak Josep ekar ekkatak bar juon men me ebar aorōk ilo kōm̧m̧ane jerbal eo an Anij: “Anij e tūriam̧o,” im eļan̄n̄e Josep ekar lukkuun m̧ool ilo an ukweļo̧k, naaj kar baj “kāālet wōt” e (eoon 10). Jerbal eo an Anij ej, jekdoon aolep men ko, juon jerbal in lo̧mo̧o̧r. Im jerbal in “ejamin likjab” (eoon 1).
Ļōmņak ko n̄an Ekkatak Jeje ko Rekwojarjar Ippam̧ Make
Ij aikuj lōke Anij ijjeļo̧k aō mijak armej.
Jinoin ilo iien kwaļo̧k naan eo an Josep Smith, ro m̧ōttan rem̧m̧an ekar pen aer loļo̧k—eļaptata ro m̧ōttan āinwōt Martin Harris, juon eo eutiej, em̧weie, eo ekar pād ilo juon jekjek n̄an kwaļok jipan̄ ko reļļap. Im Martin ekar m̧ōņōņō in jutak likin Josep, jekdoon n̄e ekar aikuj jeļā ņae eo an ro m̧ōttan im naaj kar aikuj kōjekdoon eļap jāān.
Kōn menin ealikkar etke Josep ekar kōņaan n̄an kauteej kajjitōk eo an Martin n̄an bōk m̧ōttan peij ko jinointata ilo Bok in Mormon me em̧ōj ukōti n̄an kwaļo̧k n̄an kōrā eo pāleen, eo ekar kariab e m̧ool eo an Bok in Mormon. Josep ekar wōnm̧aanļo̧k n̄an kajjitōk ippān Irooj kōn kajjitōk in, jekdoon n̄e Ekar jab kōtļo̧k e, m̧ae āliktata, ālkin Josep ekar kajjitōk kein kajilu, Irooj ekar ba aaet. Kabūrom̧ōjm̧ōj eo, m̧ōttan peij ko rekar jako ke rekar pād ilo um̧win pein Martin, im Josep im Martin kar bōk kauwe eļap jān Irooj (lale Saints, 1:51–53).
Ilo am̧ riiti Katak im Bujen ko 3:1–15, kejōkļo̧kjeņ kake ļōmņak ko an armej ro jet me emaron̄ jelōt eok. Komaron̄ bar lo bwe ilo kakobaba n̄an luuki Josep Smith, Irooj ekar kōnono n̄an e naan in tūriam̧o̧. Ta eo kwoj ekkatak kake jān wāween eo Irooj ekar jim̧or kajim̧we im kapilōk Josep? Ta kapilōk eo me kwoj lo me emaron̄ jipan̄ eok n̄e kwoj po ilo kapo n̄an mijak armej ro jet eļapļo̧k jān Anij?
Bar lale “The Contributions of Martin Harris,” Revelations in Context, 1–9, history.ChurchofJesusChrist.org.
Irooj ej kajjitōkin eō n̄an jerbal n̄an E kōn aolepān buruō.
Jekjeņ 4 ekkā an iookļo̧k mijenede ro rej jerbal aolep raan. Mekarta, ekar kabwilōn̄lōn̄ n̄an lo bwe revelesōn in kar leļo̧k n̄an e jinountata n̄an Josep Smith Sr., eo me ejjan̄in kar kūr e n̄an juon mijen ak ekar wōr an “ikdeleel n̄an jerbal n̄an Anij” (eoon 3).
Juon wāween n̄an riiti jekjen in ej n̄an pijaikļo̧k āinwōt juon kōmeļeļein juon jerbal n̄an juon eo me ekōņaan kōm̧m̧ane jerbal eo an Irooj. Ta kapeel ko remenin aikuj? Etke kapāāl kein ak m̧wil ko remenin aikuj? Bōlen komaron̄ jar n̄an kāālōt juon men eo komaron̄ kōm̧m̧ane em̧m̧anļo̧k bwe kwōn “ekkar [eok make] n̄an jerbal in” (eoon 5).
Imaron̄ bōk juon aō naan in kam̧ool make kōn Bok in Mormon.
Martin Harris, jān Lewis A. Ramsey
Eļan̄n̄e kar kūr eok n̄an kwaļo̧k kam̧ool ilo court kōn m̧ool eo an Bok in Mormon, ta kein kam̧ool eo komaron̄ kwaļo̧k? Ejjeļo̧k oktak jān kajjitōk eo ekar pād ilo kōļmenļo̧kjeņ eo an Martin Harris ke kōrā eo pāleen, Lucy, ekar bōklōn̄tak ruōn Josep Smith bwe ekar m̧ōņe armej ro ilo an kar riabe ukōt pileij gold ko (lale Saints, 1:56–58). Kōn menin Martin ekar kajjitōk ippān Josep n̄an kwaļo̧k kam̧ool ko ke pileij gold ko rem̧ool. Katak im Bujen ko 5 ej juon revelesōn n̄an uwaake kajjitōk eo an Martin.
Ta eo kwoj ekkatak kake jān Katak im Bujen ko 5 kōn laajrak in:
-
Ewi wāween an Irooj en̄jaake kōn ro me rejjab tōmak ilo m̧ool ko an jetōb m̧ae ej kab wōr kein kam̧ool (lale eoon ko 5–8; bar lale Jon 20:24–29).
-
Eddo eo an rikam̧ool ro ilo jerbal eo an Irooj (lale eoon ko 11–15; bar lale 2 Korint 13:1).
-
Ewi wāween n̄an bōk juon naan in kam̧ool kōn Bok in Mormon ippam̧ make (lale eoon 16; bar lale Moronai 10:3–5).
Epepen in enaaj bōk naan ko an Anij kōn Josep Smith.
Ta eo Katak im Bujen ko 5:1–10 ej katakin eok kōn aorōk in eddo eo an Josep ilo epepen in ad—im ilo mour eo am̧? Kejōkļo̧kjeņ kōn wāween am̧ bōk naan an Anij kōn Rikanaan eo Josep Smith. Ļōmņak n̄an rekoote ilo juon jōōņōļ ak kwaļo̧k n̄an juon armej am̧ kam̧m̧olool kōn m̧ool ko me rekar kōjepļaaki ak kalikkari kōn e.
Bar lale 2 Nipai 3:6–24.
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le
-
Katak im Bujen ko 3:1–4Kajjitōk ippān juon uwaan baam̧le eo n̄an etetal ilo juon ļain “eip” ineem ilo juon ļain “ekajim̧we.” Ta meļeļein n̄an baam̧le eo ad n̄an jeļā bwe iaļ ko “[an Anij]” rekajim̧we”?
-
Katak im Bujen ko 3:7–10.N̄e juon ej kalluik kōj n̄an jab pokake Anij, ta m̧ool ko ilo eoon ko remaron̄ jipan̄ eok dāpdep wōt ilo tōmak? Bōlen ro uwaan baam̧le eo emaron̄ kōm̧m̧an tieta kōn juon jekjek eo me juon armej ej dāpdep wōt ilo tōmak jekdoon kapo ko n̄an jab pokake Anij.
-
Katak im Bujen ko 4.Ilo am̧ kōnono āinwōt juon baam̧le ta meļeļein n̄an jerbal ilo meļaaj an Anij, remaron̄ kōm̧m̧ane jet jerbal ilo juon jikin kallip (ak emmeļaketok). Ta kein jerbal ko me remenin aikuj n̄an kōm̧m̧ani jerbal ko an jikin kallip? Ta eo Anij kōmeļeļeik ilo jekjen 4 me emaron̄ kōnono kōn kein jerbal ko me remenin aikuj n̄an kōm̧m̧ane jerbal eo An? Baam̧le eo am̧ emaron̄ kōnono etke kajjojo kein jerbal reaorōk ilo kōm̧m̧ane jerbal in an Anij.
-
Katak im Bujen ko 5:7.Ta jet iaan waanjon̄ak ko kōn m̧ool ko jej tōmaki ak jejjab maron̄ loi? Ewi wāween ad uwaake juon eo m̧ōttad eo ej kōņaan kein kam̧ool bwe Bok in Mormon em̧ool?
N̄an ļōmņak ko reļļapļo̧k n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Al eo kar Kāālōte: “I Will Be Valiant,” Children’s Songbook, 162.
Kōkōm̧anm̧anļo̧k Am̧ Ekkatak Ippam̧ Make
Kakilōklōke juon eoon. “N̄an kakkilōklōke juon eoon ej n̄an ejaake juon jemjerā ekāāl. Ej āinwōt n̄e kwoj jeļa juon armej eo ekāāl eo me emaron̄ jipan̄ eok ilo iien aikuj, lewaj im̧we im kaeņōm̧m̧an, im erom juo kein kōketak n̄an oktak eo emenin aikuj” (Richard G. Scott, “Kajoor eo an Jeje ko Rekwojarjar,” Ensign ak Liaona, Nob. 2011, 6).
Inepata Eļap kōn Peij ko 116, jān Kwani Povi Winder