Tijem̧ba 28–Jānwōde 3

Katak im Bujen Ko 1

“Eo̧ron̄, O Kom̧ Armej”

Ļōmņak kōn Katak im Bujen Ko 1 āinwōt kadkad eo an Irooj make n̄an bok in kōn revelesōn ko an ilo raan kein āliktata. Ta eo Ekōņaan bwe kwōn jeļā kōn Katak im Bujen Ko? Kejōkļo̧kjeņ kake kajjitōk in, im je jabdewōt im̧we ko me rej itok ilo am̧ riit jekjen 1.

Je En̄jaake Ko Rej Im̧we Eok

Ilo Nobōm̧ba 1831, Kabun̄ eo an Jisōs Kraist me em̧ōj an jepļaaktok ej kab kar juon jimātten iiō rūttoon. Men̄e ekar eddōkļo̧k, ekar juon kurup ejjab bun̄bun̄ in ritōmak ro me rej jokwe ilo jeplōklōk ko ilo bukwōn ko, kar tōl er jān rikanaan eo ke ej ron̄oul jim̧a an iiō. Ak Anij ekar watōke ritōmak rein ro Rikarejaren im An ribōktok enaan, im Ekar kōņaan bwe revelesōn ko Ekar leļo̧k n̄an er ren tilmaake n̄an laļ in.

Katak im Bujen Ko jekjen 1 ej ijjino eo an Irooj n̄an kakobaik revelesōn kein, im ealikkar ilo an waļo̧k bwe men̄e ro uwaan kabun̄ in rekar dik, ekar ejjeļo̧k dik ilo enaan eo me Anij ekar kōņaan bwe ro Rikwojarjar ren tilmaake. Ej juon “ainikien kakkōļ” n̄an aolep “ro rej pād ioon laļ in,” katakin er n̄an ukweļo̧k im kaļo̧k “bujen eo ejjeļo̧k jem̧ļo̧kin” an Anij (eoon ko 4, 8, 22). Rikarejar rein rej bōktok bōktak enaan in rej “ro rem̧ōjņo̧ im ļam waan,” ak rikarejar ro rettā rej ta eo Anij aikuji—m̧okta im kiiō—n̄an bōktok Kabun̄ in “jān ņojak im marok jilōn̄lōn̄” (eoon ko 23, 30).

N̄an eļapļo̧k meļeļe kōn bwebwenatoon Katak im Bujen Ko 1, lale Rikwojarjar, 1:140–43.

Ļōm̧ņak ko n̄an Ekkatak Jeje Ko Rekwojarjar Ippam̧ Make

Katak im Bujen Ko 1

Irooj ej kūr eō n̄an “lin̄ōri kien kein.”

Peij eo jinointata ej kwaļo̧k kadkadin juon bok. Ej kwaļo̧k kajeen unin kōnono eo an bok eo im unleplep in im ej jipan̄ ririit ro kōpopo n̄an riit. Ilo am̧ riiti jekjen 1—“naan in ijjino” eo an Irooj n̄an Katak im Bujen Ko (eoon 6)—kappukot unin kōnono ko im unleplep ko me Irooj ekar leļo̧k n̄an revelesōn ko An. Ta eo kwoj ekkatak jān jekjen 1 eo me enaaj jipan̄ eok bōk eļapļo̧k jān am̧ ekkatak jān Katak im Bujen Ko? N̄an waanjon̄ak, komaron̄ kejōkļo̧kjeņ kake ta meļeļein n̄an “ron̄ ainikien Irooj” ilo revelesōn kein (eoon 14) ak n̄an “lin̄ōri kien kein” (eoon 37).

Bar lale kadkad in Katak im Bujen Ko.

Katak im Bujen Ko 1:1–6, 23–24, 37–39

Anij ej kōnono n̄an ro Rikarejeran, im naan ko An renaaj kūrm̧ool.

Jekjeņ 1 ej jino im jem̧lo̧k kōn kean̄ an Anij me Ej kōnono jān ro Rikarejeran ro em̧ōj kāālōt er (lale eoon ko 4–6, 23–24, 38). Je ta eo kwōj ekkatak kake jān revelesōn kōn Irooj im Ainikien. Ta eo kwōj katak kake kōn rikarejeran Irooj? Em̧ōj ke am̧ kar ron̄ ainikien Irooj ilo ainikien ro Rikarejeran? (lale eoon 38).

Rikanaan im rijilōk ro rej katakin kōj kien ko an Anij.

Katak im Bujen Ko 1:3, 24–28, 31–33

Eļan̄n̄e ij ettā, kauwe an Irooj emaron̄ tōl eō n̄an ukweļo̧k.

Kile bwe ilo eoon 3 im eoon ko 24–28, Irooj ekar ba bwe jerawiwi ko an armej im bōd ko renaaj kwaļo̧ki. Ilo juon jekjek menin ej juon men eo ekōmetak, ekaburomōjmōj, im ilo bar juon wāween ej juon katak. Etke jekjek kein relukkuun oktak? Ļōm̧ņak wāween am̧ en̄jaake n̄e kwojeļā kōn jerawiwi ko am̧ im m̧ōjņo̧ ko am̧. Ta ko remenin aikuj kwōj lo ilo eoon ko 24–28 me remaron̄ jipan̄ eok uwaak ilo wāween eo ejim̧we? Ta eo eoon kein, ippān ļo̧k eoon ko 31–33, rej katakin eok kōn wāween an Irooj kalimjōk m̧ōjņo̧ im jerawiwi ko am̧?

Bar lale Jabōn Kōnnaan 3:11–12; Ether 12:27; Moronai 6:8.

Katak im Bujen Ko 1:12–30, 35–36

Irooj ekar kōjepļaaktok gospel eo An n̄an jipan̄ jelm̧ae apan̄ ko ilo raan ko āliktata.

Men̄e jekjen 1 ej kakkōļ kōn raan ko rekaburomōjmōj rej itok, ej bōrāinwōt pād ie juon enaan ealikkar: “N̄a Irooj, kōn Aō jeļā kōn ko̧kkure eo enaaj itok ioon ro rej pād ioon laļ, Iaar kūr rikarejera Josep Smith, Jun., im kar kōnono n̄an e jān lan̄” (eoon 17).

Je jorrāān ko me Irooj ekar kakkōļ kaki (lale, n̄an waanjon̄ak, eoon ko 13–16, 35). Ta jorrāān ko jet me kwōj loi ilo laļ in rainin—ak ilo mour eo am̧ make? Eoon ko 17–30 ej ej kōmeļeļeik ta eo Irooj ekar kōm̧m̧ane n̄an kwe ilo jorrāān kein jej kōtmeni. Kōm̧m̧ane juōn laajrak in ta eo kwoj loe.

Ļōm̧ņak Ko n̄an Ekkatak Jeje Ko Rekwojarjar an Baam̧le im Nokon in Jota eo an Baam̧le

Katak im Bujen ko 1:1–6, 37–39.N̄an jino juon kōmeļeļe kōn kakkōļ ko jān Irooj, komaron̄ kōnono kōn kakkōļ ko jej bōki jān ro jet kōn kauwōtata ko me jejjab maron̄ loi—āinwōt juon būļoor ejjjir, juon ļan̄ ekaamijak, ak juon wa ej ettōr tok. Ta eo waanjon̄o̧k kein rej katakin kōj kōn kakkōl ko an Rilo̧mo̧o̧r eo ? Ekkar n̄an Katak im Bujen Ko 1:1–6, 37–39, ewi wāween an Irooj kakkōl kōj? Ta eo Ekar kakkōl kōj kake ilo raan kein? Bolen komaron̄ kar alooj ak riit m̧ōttan enaan ko an kweilo̧k eo eļap im kappukot waanjon̄o̧k in “ainikien kakkōļ” an Anij.

Katak im Bujen Ko 1:16.Ta meļeļein n̄an “kajutak [ an Irooj] wānōk”? Ewi wāween ad lukkuun lale bwe jen kōm̧m̧ane āindein, ijjeļo̧kin etetal “ilo iaļ ko [ad] make”?

Katak im Bujen Ko 1:30.Ta meļeļein ilo ad ba bwe Kabun̄ in “em̧ool im emour”? N̄an kōm̧m̧an bwe baam̧le eo am̧ en kejōkļo̧kjeņ kōn kajjitōk in, bolen komaron̄ kwaļo̧k n̄an er pija in men ko rej emenono im men ko rejjab emenono. Komaron bar kōnono kōn ta kwomaron̄ kōm̧m̧an āinwōt juon baam̧le n̄an jipan̄ “bōktok [Kabun̄ in] jān ņojak im jān marok jilōn̄lōn̄.”

Katak im Bujen Ko 1:37.Ļōm̧ņak n̄an kōm̧m̧an karōk āinwōt juon baam̧le ewi wāween am̧ naaj “lin̄ōri kien ko” ilo Katak im Bujen Ko ilo iiō in. Ewi wāween am̧ kōm̧m̧ane ekkatak eo am̧ jān jeje ko rekwojarjar en juon m̧ōttan eo eaorōk aolep iien ilo mour an baam̧le eo am̧? Ta ļōm̧ņak ko n̄an ekkatak me remaron̄ jipan̄ eok ekkatak jān jeje ko rekwojarjar? (Lale “Ļo̧m̧ņak Ko n̄an Kōkm̧anm̧anļo̧k Ekkatak Jān Jeje Ko Rekwojarjar An Baam̧le Eo Am̧” ilo jinoin kein jipan̄ in.)

N̄an ļōm̧ņak ko reļļapļo̧k n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Al eo kar kāālōte: “Follow the Prophet,” Children’s Songbook, 110–11, eļaptata eoon eo āliktata.

Kōkm̧anm̧anļo̧k Am̧ Ekkatak Ippam̧ Make

Kappukōt Jisōs Kraist. Unin jeje ko rekwojarjar ej n̄an kam̧ool kōn Rilo̧mo̧o̧r im Gospel eo An. Ilo am̧ riiti Katak im Bujen Ko 1, ļōmņak n̄an kōkaļļeiki ak je eoon ko me ej katakin eok kōn men ko kōn Jisōs Kraist.

Revelesōn ko Kein Kajuon n̄an Kabun̄ in me em̧ōj kōjepļaaktok rekar kobaikier ilo Bok in Kien Ko.