baam̧le eo ej riiti jeje ko rekwojarjar

Tijem̧ba 28–Jānwōde 3

Katak im Bujen Ko 1

“Eo̧ron̄, O Kom̧ Armej”

Bun̄ten eo am̧ jinoin tata n̄an kōppopo n̄an katakin ej n̄an jar ilo am̧ ekkatak Katak im Bujen Ko 1. Ilo am̧ kōm̧m̧an mennin, ron̄jak enoojdikdik ko kōn aikuj ko an ajri ro, im kappukōt ta eo enaaj aorōk n̄an er. Im̧we kein renaaj jipan̄ eok karōk m̧akūtkūt ko n̄an katakin katak kein.

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

Jibwe ņailōn̄ Katak im Bujen Ko, im kajjitōk ippān ajri ro n̄an kwaļo̧k jabdewōt ta eo rejeļā kōn bok in. Wōn eaar je? Ta eo ilowaan? Etke eaorōk? N̄an kwe, komaron̄ lale “Jebta 23: Katak im Bujen Ko” (Bwebwenato in Katak im Bujen Ko, 90–92). Kwaļo̧k iakwe eo am̧ kōn Katak im Bujen Ko im ikdeelel eo am̧ n̄an katak eļapļo̧k jāne ilo iiō in.

pija ej bōk jikin katakin

Katakin Katak ko: Ajri ro Reddikļo̧k

Katak im Bujen Ko 1:4

Jān aolep rikanaan ro An, Irooj ej kakkōl kōj kōn jōrrāān ko ilo jetōb.

Irooj eaar kwaļo̧k ke Ainikien ej juon “ainikien kakkōl.” Elmen am̧ naaj im̧we ajri ro n̄an ron̄jak im pokake kakkōl ko E ej litok?

M̧akūtkūt ko Maron̄ Kōm̧m̧ani

• Leļo̧k bwe ajri ro ren jibwi jain in kakkōl ko—āinwōt traffic hazard ko, nana mejatoto, ak baijin— im kōnono kōn elmen aaer kakkōl kōj kōn jōrrāān. Ak kwaļo̧k juon bwebwenato kōn juon iien me kwaar pokake kakōlkōl. Keide kakōlkōl kein ippān kakōlkōl ko Irooj ej litok n̄an kōj jān rikanaan ro An. Kam̧ool bwe E ej kakkōl kōj kōnke E ej iakwe kōj im kōņaan bwe jen jo̧kne (bar lale peij in m̧akūtkūt eo an wiik in).

• Riit n̄an ajri ro jān Katak im Bujen Ko 1:4: “Im ainikien kakkōl naaj n̄an armej otemjej.” Kwaļo̧k juon men ekāāl rikanaan eo eaar katakin me emaron̄ kōjpārok kōj. Kwaļo̧k pijaj ko, n̄e ekkar. Kōnono kōn ewi wāween am̧ ļoor kapilōk eo an rikanaan eo.

Katak im Bujen Ko 1:17, 29

Josep Smith ej juon rikanaan an Anij.

Ilo am̧ im ajiri ro jino ekkatak Katak im Bujen ko, jipan̄ er kōlapļo̧k naan in kam̧ool ko aer kōn kūr eo an Josep Smith.

M̧akūtkūt ko Maron̄ Kōm̧m̧ani

• Kwaļo̧k juon pija in Josep Smith (Lale Itok, Ļoor Eō—N̄an Kajjojo Armej im Baam̧le ko; bar lale Gospel Art Book, no. 87). Kajjitōk ippān ajri ro bwe ren jutak turin pija eo im kwaļo̧k ta ko rejeļā kōn Josep Smith.

• Kōtļo̧k bwe ajri ro ren jibwe juon pija in Rilo̧mo̧o̧r im juon pijaan Josep Smith. Kōnono n̄an er kōn ta ko Rilo̧mo̧o̧r eaar letok n̄an kōj jān Josep Smith, āinwōt kien ko (lale eoon 17) im Bok in Mormon (lale eoon 29). Kwaļo̧k n̄an ajri ro bwe ilo Katak im Bujen Ko renaaj ekkatak kōn kien ko Irooj eaar letok n̄an Kabun̄ in jān Josep Smith.

• Kwaļo̧k en̄jake eo am̧ kōn Josep Smith, im kam̧ool bwe Anij “Iaar kūr rikarejera Josep Smith, Jun., im kar kōnono n̄an e jān lan̄” (eoon 17).

Katak im Bujen Ko 1:38

Naan ko an rikanaan eo rej naan ko an Anij.

Ajri ro kwoj katakin remaron̄ kar ron̄ an Būreejtōn eo an Kabun̄ in kōnono, ak remaron̄ jab kile ke naan ko an rej itok jān Anij. Jipan̄ er ekkatak kile ke naan ko an rikanaan ro rej an Anij.

M̧akūtkūt ko Maron̄ Kōm̧m̧ani

• Ikkure juon ikkure epidodo ilo am̧ leļo̧k meļeļe ko n̄an juon ajri im kajjitok ippen bwe en āliji meļeļe ko n̄an ajri ro jet. Jipan̄ er lo bwe ļoore kōmeļeļe ko an ajri eo ejeļo̧k oktak jān ke rej ļoor kōmeļeļe ko am̧ im bwe ļoore rikanaan eo ejeļo̧k oktak jān ļoore Irooj. Riit n̄an er ļain eo eliktata in Katak im Bujen Ko 1:38: “mekarta jān Ainikiō make ak jān ainikien ro rikarejera, ej āinwōt juon.”

• Al ippān doon juon al kōn rikanaan, eo āinwōt eoon eo āliktata in “Follow the Prophet” (Children’s Songbook, 110–11). Kwaļo̧k naan in kam̧ool eo am̧ ke rikanaan ej kōnono naan ko an Anij.

• Kwāļo̧k juon pija, ainikien reko̧o̧t, ak pija in alooj jidikdik kōn rikanaan. Kwaļo̧k am̧ naan in kam̧ool bwe rikanaan ej kwaļo̧k n̄an kōj ta eo Anij ekōnaan bwe jen jeļā. Kajjitōk ippān ajri ro n̄an kwaļo̧k ta en̄jake eo aaer kōn rikanaan.

  mwen̄an kweilo̧k eo eļap

  Rikanaan eo ej katak kōj ta eo Anij ekōņaan bwe jen jeļā.

pija ej bōk jikin katakin

Katakin Katak ko: Ajri ro Rerūttoļo̧k

Katak im Bujen Ko 1:15–17, 29–30

Irooj ejeļā kōn apan̄ ko jenaaj jelm̧ae, innem E eaar kōjepļaaktok gospel eo jān Josep Smith.

Komaron̄ jipan̄ ajiri ro kōppopo n̄an apan̄ ko ilju jōkļaj ilo am̧ katakin er ekōjkan an Jepļaaktok eo an gospel in letok kōjpārok ilo jetōb.

M̧akūtkūt ko Maron̄ Kōm̧m̧ani

• Jipan̄ ajri ro ļōmņake jet jōrrāān ko ilo laļ in rainin. Etale Katak im Bujen Ko 1:15–16 ippāer, im jipan̄ er kalikkar jet iaan jōrrāān ko me Irooj eaar kanaan bwe renkar waļo̧k. Kajjitōk ippāer bwe ren kappukōt ilo eoon 17 im 29–30 ta eo Irooj eaar kōm̧m̧ane n̄an jipan̄ kōj jelm̧ae apan̄ ko an iien kein ad.

• Kajjitōk ippān ajri ro bwe ren antoone aaer kōppopo n̄an juon tūreep. Ta ko renaaj āti? Ekōjkan an nej jipan̄ er jeļā ke enaaj wōt ilo tūreep eo aer ak bwe wa eo waer enaaj rup neen? Riit ippān doon eoon 17, im kōnono kōn ta eo Irooj ejeļā enaaj waļo̧k n̄an kōj im elmen ad kōppopo n̄ane. (N̄e ekkar, kōmeļeļe bwe “jerata” ej juon iien jōrrāān ak juon men enana.) Ekōjkan an kien ko an Anij jipan̄ kōj jelm̧ae apan̄ ko an iien kein ad?

Katak im Bujen Ko 1:30

Kabun̄ eo an Jisōs Kraist im Armej ro Rekwojarjar ilo Raan–ko Āliktata ej “kabun̄ eo em̧ool im mour” an Irooj.

Ewi wāween am̧ maron̄ jipan̄ ajri ro kamm̧oolol kōn kōjeram̧m̧an eo eļap in uwaan “kabun̄ eo emake wōt m̧ool im mour”?

M̧akūtkūt ko Maron̄ Kōm̧m̧ani

• Kajjitōk ippān ajri ro bwe ren kōlaajrake jet men remour im jet men me rejjab (n̄e ekkar, boktok pija ak waanjo̧n̄o̧k). Ta oktak in men ko remour jān men ko remej? Riit ippān doon eoon 30. Ta meļeļe in ke Kabun̄ in e “em̧ool”? im bwe e “mour”?

• Kwaļo̧k juon pija, āinwōt juon jin̄a in Rilo̧mo̧o̧r, im kajjitōk ippān ajri ro bwe ren kōmeļeļeiki ilo an kūn meram̧ eo ilo ruum̧ eo. Kōjerbal wanjo̧n̄o̧k in n̄an jipan̄ ajri ro lo bwe n̄an elōn̄ armij, Kabun̄ eo em̧ool an Rilo̧mo̧o̧r eo ej pād ilo “jameļeļe” im “marok.” Ewi wāween ad jipan̄ ro jet jeļā kōn Kabun̄ in?

Katak im Bujen Ko 1:37–38

Naan eo an Irooj ej n̄an indeeo.

Komaron̄ jipan̄ ajri ro kōlapļo̧k tōmak ko aer ilo Jisōs Kraist ilo am̧ katakin er bwe naan eo An emm̧ool im jemaron̄ ļōke.

M̧akūtkūt ko Maron̄ Kōm̧m̧ani

• Jipan̄ ajri ro keidi men ko an jidik wōt iien, āinwōt būļūļļūļ ak jiņo, ippān men ko me n̄an ban, āinwōt juon tōļ ak allōn̄. Kajjitōk ippāer bwe en kappukōt ilo eoon 37–38 juon men me Irooj eaar ba ej n̄an ban. Etke ejaam juon mennin kōjeram̧m̧an n̄an jeļā ke naan eo an Anij “ejjamin ilo̧k”?

• Jipan̄ ajri ro meļeļe bwe “ainikien ro rikōrājera” ekoba ainikien rijjilōk im rikanaan ro ad. Jipan̄ ajri ro kappukōt “kanaan im kalim̧m̧ur ko” ilo juon kar kōnono jān juon iaan rijerbal o an Irooj ilo kweilo̧k eo eļap. Kwaļo̧k naan in kam̧ool eo am̧ bwe naan kein rej jān Irooj im “renaaj aolep kūrm̧ool.”

pija ej bōk jikin ekkatak

Kōketak Ekkatak ilo M̧weo

Etale ippān ajri ro ta eo raar ekkatak rainin, im kūr er bwe ren kālet juon men me rej en̄jake ke aolep rej aikuj jeļā kake. Kōkajoor er n̄an kwaļo̧k n̄an juon m̧ōttaer ak nukier.

Kōkm̧anm̧anļo̧k Ad Katakin

Ajri ro rej ekkatak ilo elōn̄ kain wāween ko. “Ejjab aolep ajri reāinwōt juon, im kajojo ajri em̧ōkaj aer eddōkļo̧k. Kijejeto ko am̧ n̄an katakin er enaaj lukkuun em̧m̧an ilo am̧ kōjerbal bun̄tōn ko reoktak jān doon,” ekoba bwebwenato, pija ko, im al (Teaching in the Savior’s Way, 25).

peij in m̧akūtkūt: rikanaan eo ej kakkōl kōj kōn kauwōtata ko ilo jetōb.