Bukwin Wōjke Ko Kwojarjar

Bukwin Wōjke Ko Rekwojarjar, jān Greg K. Olsen

Jānwōde 4–10

Josep Smith—Bwebwenato 1:1–26

“Iaar Lo juon Jurōn Meram”

Ilo am̧ ekkatak jeje ko rekwojarjar, ļo̧m̧ņak kōn ajri ro kwoj katakin er. Jetōb Kwojarjar eo emaron̄ kōketak eok, kōn im̧we ko kwoj būki, n̄an jeļā ta eo kwon pedped ie ilo kūlaaj eo.

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

Kajjitōk ippān jejjo ajri bwe ren kwaļo̧k ta eo rejeļā kōn Josep Smith im jar eo an ilo bukwin wōjke ko rekwojarjar ( kwaļo̧k juon pia in VIsōn eo Moktata emaron̄ jipan̄). Kajjitōk ippāer ewi wāween an en̄jake n̄e rej ron̄ ke Jemedwōj Ilan̄ im Jisōs Kraist raar loļo̧k Josep Smith. N̄e Josep Smith enkar lotok kūlaaj eo ad, ta eo jen kar kajjitōk ippān kōn ta eo eaar waļo̧k n̄ane?

pija ej bōk jikin katakin

Katakin Katak ko: Ajri ro Reddikļo̧k

Josep Smith—Bwebwenato 1:3–20

Josep Smith eaar pojak n̄an juon rikanaan an Anij.

Ekkatak kōn Josep Smith ke ej juon jodikdik emaron̄ jipan̄ ajri ro ekkejel ippān im kōppopo n̄an katak jān ta eo eaar waļo̧k n̄ane. Bōlen komaron̄ jipan̄ er loe wāween ta ko raar waļo̧k n̄an Josep ke ej ļaddik wot kar kepooj e n̄an juon rikanaan an Anij.

M̧akūtkūt ko Maron̄ Kōm̧m̧ani

• Kajjitōk bwe juon ajri en jibwe juon pija in Josep Smith (lale Gospel Art Book, no. 87) ilo am̧ kwaļo̧k jet m̧ool kōn Josep jān Josep Smith—Bwebwenato 1:3–14 (bar lale “Jepta 1: Josep Smith im Baam̧le eo An,” Bwebwenato in Katak im Bujen Ko, 6–8, ak pija in alooj eo ilo ChurchofJesusChrist.org). Jipan̄ er keidi tipdik in mour eo an im baam̧le eo an ippān ko aer make. Kwaļo̧k naan in kam̧ool eo am̧ ke Josep eaar kālet jān Anij im kar pojak n̄an juon rikanaan (lale “Ainikien Jepļaaktok eo: Baam̧le eo an Josep Smith,” ilo Itok, Ļoor Eō—N̄an Kajjojo Armej im Baam̧le ko). N̄e ekkar, katakin ajri ro bwe rikanaan ej juon eo ej kōnono n̄an Anij.

• Kajjitōk ippān juon likao jān ward eo n̄an lowaj kūlaaj bwe en tarrin ke e Josep Smith. Kepooj jejjo kajjitōk n̄an ajri ro bwe ren kajjitok ippān ļein me uwaakier reppād ilo Josep Smith—Bwebwenato 1:3–20 (komaron̄ aikuj kwaļo̧k kadede kajjitōk kein n̄an likao eo.). Innem kajjitōk bwe likao eo en riiti jet iaan naan ko an Josep Smith make ilo Visōn eo Moktata (n̄an wanjo̧n̄o̧k, Josep Smith—Bwebwenato 1:25).

Josep Smith—Bwebwenato 1:10–17

Jemedwōj Ilan̄ ej ron̄jake im uwaake jar ko ad.

Ta eo eaar waļo̧k n̄an Josep Smith emaron̄ kaim̧we ajri bwe ren jar ilo tōmak ke Anij enaaj ron̄jake er.

M̧akūtkūt ko Maron̄ Kōm̧m̧ani

• Ba n̄an ajri ro kōn kajjitōk ko an kar Josep Smith (lale Josep Smith—Bwebwenato 1:10). Ta eo jemaron̄ kōm̧m̧ane n̄e ewōr ad kajjitōk kōn Anij? Kwaļo̧k juon kape in Baibōļ eo n̄an ajri ro, im kōmeļeļe ke Josep eaar riiti Baibōļ eo, eaar ekkatak ke emaron̄ “kajjitōk ippān Anij” (Jemes 1:5; bar lale Gospel Art Book, no. 89). Kwaļo̧k am̧ naan in kam̧ool bwe jemaron̄ kajjitōki kajjitōk ko ad ippān Anij ilo wāween jar.

• Kwaļo̧k kōn juon iien kwaar pok, im kar kajjitōk ippān Anij kōn jipan̄, im kar bōk juon uwaak. Jipan̄ ajri ro ļo̧m̧ņak kōn jet iien me jar ko aaer raar uwaak. Komaron̄ bar kwaļo̧k juon bwebwenato jān māākjiin ko an Kabun̄ kōn an jar eo an juon ajri kar uwaak.

Josep Smith—Bwebwenato 1:17–19

Josep Smith eaar lo Jemedwōj Ilan̄ im Nejin, Jisōs Kraist.

Komaron̄ jipan̄ ajri ro kajjutak juon pedped in kam̧ool kōn Visōn eo Moktata an Josep Smith. Kwaļo̧k n̄an ajri ro elmen am̧ kar bōk am̧ naan in kam̧ool ke iien in eaorōk.

M̧akūtkūt ko Maron̄ Kōm̧m̧ani

• Kwaļo̧k pija in Visōn eo Moktata jān kōlaajrak eo an wiik in ilo Itok, Ļoor Eō—N̄an Kajjojo Armej im Baam̧le ko, im kwaļo̧k ilo naan ko am̧ make ta eo eaar waļo̧k ke Josep eaar jar. Kajjitōk ippān ajri ro bwe ren jin̄aik juon aer make jin̄a kōn bwebwenato eo.

• Kajjitōk ippān ajri ro bwe ren kōļare peij in m̧akūtkūt eo an wiik in im kōjerbale n̄an kwaļo̧k bwebwenato in Visōn eo Moktata (bar lale “Jebta 2: Visōn eo Moktata an Josep Smith,” Bwebwenato in Katak im Bujen Ko, 9–12, ak pija eo āinļo̧k ilo ChurchofJesusChrist.org).

• Riiti Josep Smith—Bwebwenato 1:17, im jitōn̄ļo̧k n̄an ajri ro naan ko Jemedwōj Ilan̄ eaar ba n̄an Josep Smith.

pija ej bōk jikin katakin

Katakin Katak ko: Ajri ro Rerūttoļo̧k

Josep Smith—Bwebwenato 1:10–13

Anij emaron̄ uwaaki kajjitōk ko aō ilo jeje ko rekwojarjar.

Josep Smith eaar im̧we kōn juon eoon eaar riiti ilo Baibōļ eo, im menin eaar tōl n̄an Visōn eo Moktata im Jepļaaktok eo an Kabun̄ eo an Kraist. Jipan̄ ajri ro loe ekōjkan an katak jeje ko rekwojarjar maron̄ jipan̄ er loi uwaak ko an kajjitōk ko aer ilo jetōb.

M̧akūtkūt ko Maron̄ Kōm̧m̧ani

• Kwaļo̧k n̄an ajri ro jet bok ko reoktak (āinwōt juon encyclopedia ak bok in kōmat), im jipan̄ er ļōmņak kōn kajjitōk ko bok kein remaron̄ uwaaki. Innem kwaļo̧k n̄an er juon kape in jeje ko rekwojarjar. Ta kajjitōk ko bok kein remaron̄ uwaaki? Komaron̄ leļo̧k juon wanjo̧n̄oak in juon kajjitōk me uwaak ilo jeje ko rekwojarjar. Riit ippān doon Josep Smith—Bwebwenato 1:10–11 n̄an lale kajjitōk ta ko an Josep Smith kar loi im ta uwaaki er ilo jeje ko rekwojarjar.

• Jipan̄ ajri ro kappok naan ilo eoon 12 me ej kōmeļeļe kōn elmen an kar Jemes 1:5 jelet Josep Smith. Kwaļo̧k juon am̧ kar en̄jake kōn jeje ko rekwojarjar—n̄an wanjo̧n̄o̧k, ke kwaar loe uwaak in juon iaan kajjitōk ko am̧ jān am̧ kar riiti jeje ko rekwojarjar. Al ippān doon “Search, Ponder, and Pray” (Children’s Songbook, 109).

Josep Smith—Bwebwenato 1:10–19

Jemedwōj Ilan̄ ej ron̄jake im uwaake jar ko ad.

Anij ejeļā wōn Josep Smith, im ke eaar jar, Anij eaar ron̄jake. Ilo an en̄jake ko an ajri ro kwoj katakin er nej oktak jān eo an Josep, komaron jipan er en̄jake ke Anij ejeļā kajeer im ej ron̄jake er n̄e rej jar.

M̧akūtkūt ko Maron̄ Kōm̧m̧ani

• Kajjitōk ippān juon iaan jinen im jeman ajri ro bwe en jutak inamōj in kūlaaj eo im uwaaki kajjitōk ko an ajri ro ilo wāween kōjerbal text message, ko̧o̧ļ, jeje leta, ak jilkinļo̧k juon ribbōk naan. Ta jet wāween ko me Jemedwōj Ilan̄ ej kōnono n̄an kōj? (lale “Revelation,” Guide to the Scriptures, scriptures.ChurchofJesusChrist.org). Ekkar n̄an Josep Smith—Bwebwenato 1:16–19, elmen an kar Jemedwōj Ilan̄ uwaake jar eo an Josep Smith? Ekōjkan kar An uwaake jar ko ad?

• Al ippān doon “A Child’s Prayer” (Children’s Songbook, 12–13).

  juon jiron̄ ej jar

  Anij ej ron̄jake im uwaake jar ko ad.

Josep Smith—Bwebwenato 1:14–19, 25

Jemedwōj Ilan̄ im Jisōs Kraist rekar waļo̧k n̄an Josep Smith.

Kajjojo iaan ajri ro kwoj katakin rej aikuj juon kam̧ool kōn ta eo eaar waļo̧k n̄an Josep Smith ilo bukwin wōjke ko kwojarjar. Ewi wāween am̧ maron̄ jipan̄ er bōk im kōkajoorļo̧k naan in kam̧ool ko aaer?

M̧akūtkūt ko Maron̄ Kōm̧m̧ani

• N̄an bar etale bwebwenato in Visōn eo Moktata, je jet kōkadudu ko an kajjojo eoon jān Joseph Smith—Bwebwenato 1:14–19 ilo peba ko rejeno̧lo̧k. Likūt peba ko ilo juon nieōr, im kūr ajri ro bwe ren juon ilo̧k juon ekāleel im likūt peba ko ioon boot eo ilo ekkar eo ejim̧we.

• Kajjitōk bwe ren kiil mejaer im antoone ekōjkan nej n̄an kar Josep Smith ilo am̧ riiti m̧ōttan ko kāleti ilo Josep Smith—Bwebwenato 1:14–17. Kajjitōk ippāer bwe ren kwaļo̧k ļōmņak im en̄jake ko aer kōn ta eo eaar waļo̧k n̄an Josep Smith.

• Kwaļo̧k pija eo “Ask of God: Joseph Smith’s First Vision” (ChurchofJesusChrist.org), im kajjitōk ippān ajri ro bwe ren kwaļo̧k juon men me raar ekkatak kōn visōn eo an Josep kōn Jemedwōj Ilan̄ im Jisōs Kraist.

• Riiti ippān doon naan in kam̧ool eo an Josep ilo Josep Smith—Bwebwenato 1:25. Kajjitōk ippān ajri ro bwe ren kappok naan ak eoon me ej kwaļo̧k an Josep tōmak. Ekōjkan ad maron̄ pād wōt ilo tōmak n̄an Anij im naan in kam̧ool ko ad n̄e armej ro jet rej jab errā ippād?

pija ej bōk jikin ekkatak

Kōketak Ekkatak ilo M̧weo

Kajjitōk ippān ajri ro bwe ren kwaļo̧k bwebwenato in Visōn eo Moktata an Josep Smith n̄an juon armej—n̄e emaron̄, ippān juon eo ejan̄un kar ron̄ kake. Remaron̄ kōjerbal peij in m̧akūtkūt eo an wiik in n̄an jipan̄ er kwaļo̧k bwebwenato eo.

Kōkōm̧anm̧anļo̧k Ad Katakin

Rōjan̄ n̄an kautiej. N̄an kakeememej ajri ro bwe ren kautiej, komaron̄ al ak in̄ūrn̄ūri juon al, kwaļo̧k juon pijaan Jisōs, ak kōjerbal kōkaļļe in pā ko me ajri ro rej kūle.

peij in m̧akūtkūt: Josep Smith eaar lo Jemedwōj Ilan̄ im Jisōs Kraist.