rijeje ej jeje ioon peba

Jānwōde 25–31

Katak im Bujen Ko 6–9

“En̄in Jetōb in Revelesōn”

Jino kepopo n̄an katakin ilo am̧ riit Katak im Bujen Ko 6-9. Itok, Ļoor Eō—N̄an Kajjojo Armej im Baam̧le ko ilo laajrak in emaron̄ kwaļo̧k ļōmņak kōn ekōjkan am̧ katakin ajri ro ilo kūlaaj eo.

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

Ajri ro rejeļā ke kōn bwebwenato in an kar Oliver Cowdery bōk uwaak in jar? (lale Saints 1:58–60). Bōlen er ekar barāinwōt wōr aaer en̄jake kōn jar me remaron̄ kwaļo̧k kake.

pija ej bōk jikin katakin

Katakin Katak eo: Ajri ro Reddikļo̧k

Katak im Bujen Ko 6:5; 8:2; 9:7–9

Jemedwōj Ilan̄ emaron̄ kōnono n̄an kōj kōn Jetōb Kwojarjar.

Jipan̄ ajri ro meļeļe ke ewōr Jem̧āer Ilan̄ eo ej ron̄jake im uwaake jar ko aer jān Jetōb eo An.

M̧akūtkūt ko Maron̄ Kōm̧m̧ani

• Kōjerbal “Jebta 5: Josep Smith im Oliver Cowdery” (Bwebwenato ko an Katak im Bujen Ko, 22–25, ak pija in alooj eo ilo ChurchofJesusChrist.org) im kwaļo̧k n̄an ajri ro kōn Oliver Cowdery im ta eo eaar ekkatak kōn wāween an Jemedwōj Ilan̄ kōnono n̄an kōj. Kajjitōk ippān ajri ro bwe ren kwaļo̧k n̄an eok m̧ōttan eo em̧m̧antata ippāer ilo bwebwenato eo, im kōtļo̧k bwe ren kajjojo ba n̄an eok kōn Oliver Cowdery.

• Ba n̄an ajri ro ke Oliver Cowdery eaar kajjieon̄ tōn ukōt Bok in Mormon eo ak eaar jab maron̄, kiiō Josep eaar kajjtōk ippān Irooj etke. Riit ļo̧k n̄an ajri ro uwaak eo an Irooj: “Ekkatak kake ilo ļōmņak eo am; innām kwōj aikuj kajjitōk ippa eļan̄n̄e e jim̧we” (Katak im Bujen Ko 9:8). Kūr er n̄an kōtanke rej ekkatak im jar. Jipan̄ ajri ro m̧eļeļe bwe en̄in ej wāween ad bōk uwaak jān Irooj—ilo ekkatak im kajjitōk An jipan̄.

  Oliver Cowdery

  Oliver Cowdery, jān Lewis A. Ramsey

• Kajjitōk ippān ajri ro bwe ren jibwe bōraer im ubbeer ilo am̧ riiti naan kein “ļōmņak eo am̧” im “būruōm̧” ilo Katak im Bujen Ko 8:2. Jipan̄ er meļeļe bwe Jemedwōj Ilan̄ ej kōnono n̄an kōj kōn Jetōb Kwojarjar, eo ej letok n̄an kōj ļōmņak im en̄jake. Al ippān doon juon al kōn Jetōb Kwojarjar, āinwōt “The Holy Ghost” (Children’s Songbook, 105). Ta eo al in ej katakin kōn elmen an Jetōb kōnono n̄an kōj? Kwaļo̧k juon am̧ en̄jake ke kwaar en̄jake Jetōb Kwojarjar lo ļōmņak eo am̧ im ilo būruōm̧.

Katak im Bujen Ko 6:33–36

Kōn jipan̄ eo an Rilo̧mo̧o̧r eo, jejjab aikuj mijak.

Elōn̄ un ko bwe Josep Smith im Oliver Cowdery ren mijak—kōjdāt im jeram̧ōl rej jet iaan apan̄ ko raar jelm̧ae. Ennaan eo an Irooj n̄an Josep im Oliver emaron̄ bar kōkajoorļo̧k ajri ro n̄e rej en̄jake mijak.

M̧akūtkūt ko Maron̄ Kōm̧m̧ani

• Kajjitōk ippān ajri ro bwe ren āliji naan eo “jab mijak, bwij jidikdik in sip” (Katak im Bujen Ko 6:34) jejjo kattōn. Kōmeļeļeiki bwe bwij jidikdik in sip ke ej juon kurup in mennin mour, āinwōt sip. Kwaļo̧k juon pija in Rilo̧mo̧o̧r eo āinwōt juon rilale sip (lale Gospel Art Book, no. 64), im kam̧ool bwe E ej lale kōj āinwōt an rilale sip eo lale sip ko An. Kōnke Ej iakwe kōj, jejjab aikuj mijak.

• Kōm̧m̧an bwe ajri ro ren kōtanke er sip ko remijak. Ta ko jet iien sip remaron̄ mijaki? Kōm̧m̧an bwe juon ajri en kōtanke ej rilale sip im kōjparok er. Ta ko jej mijaki jet iien? Kwaļo̧k naan in kam̧ool eo am̧ bwe Jisōs Kraist ej ad rilale sip im E emaron̄ kaenōm̧m̧an kōj jān mijak. Al ippān doon juon al kōn Rilo̧mo̧o̧r eo, āinwōt “Little Lambs So White and Fair” (Children’s Songbook, 58).

• Riit ippān doon Katak im Bujen Ko 6:36 n̄an ajri ro, im kūr er n̄an āliji naan eo “jab pere, jab mijak.” Jipan̄ ajri ro ļōmņak kōn wāween ko remaron̄ in “reilo̧k n̄ane,” ak keememej, Rilo̧mo̧o̧r eo ilo wiik in ej pedo tok (bar lale peij in m̧akūtkūt eo an wiik in).

pija ej bōk jikin katakin

Katakin Katak eo: Ajri ro Rerūttoļo̧k

Katak im Bujen Ko 6:5, 15–16, 22–23; 8:2; 9:7–9

Jetōb Kwojarjar ej kōnono ilo ļōmņak eo aō im ilo būruō.

Ajri ro kwoj katakin remaron̄ kar bōk mennin letok eo an Jetōb Kwojarjar. Kwoj ke meļeļe ekōjkan n̄an kile revelesōn an juon make jān Jetōb?

M̧akūtkūt ko Maron̄ Kōm̧m̧ani

• Jin̄a ilo boot eo juon bar im juon bōro. Jipan̄ ajri ro riiti eoon kein im kalkikar ewi wōt iaar ej kōmeļeļe kōn an Jetōb kōnono ilo ļōmņak ko ad, ilo būruōd, ak jim̧or: Katak im Bujen Ko 6:15, 23; 8:2; 9:8; 9:9. Kwaļo̧k n̄an ajri ro, jān en̄jake eo am̧ make, elmen n̄e Jetōb Kwojarjar ej kōnono ilo ļōmņak eo am̧ im būruōm̧.

• Riit ippān doon Katak im Bujen Ko 6:5, im kūr ajri ro n̄an kwaļo̧k en̄jake ko em̧ōj aaer en̄jaki kōn jar im bōk uaak. Jipan̄ er kōļmenļo̧kjen kōn waanjon̄ok in juon armej ilo jeje ko rekwojarjar eo eaar jar im bōk uwaak in an kajjitōk 1 Nipai 2:16; Inōs 1:1–6; Ether 2:18–3:6).

• Je ioon boot eo Ekōjkan an Jetōb Kwojarjar kōnono n̄an kōj? Kūr ajri ro n̄an etale ilo Katak im Bujen Ko 6:15–16, 22–23; 8:2; 9:7–9 n̄an uaak in kajjitōk ko aaer. Kwaļo̧k juon am̧ en̄jake ke kwar en̄jake an Jetōb Kwojarjar kōnono ilo būruōm̧.

Katak im Bujen Ko 6:33–37

“Jab mijak n̄an kōm̧m̧an em̧m̧an.”

Ajri ro kwoj katakin er jet iien remaron̄ mijak in jutak kōn meram eo. Katak im Bujen Ko 6:33–37 emaron̄ kaim̧we n̄an peran, jekdoon ilo jekjek ko reppen.

M̧akūtkūt ko Maron̄ Kōm̧m̧ani

• Riit ippān doon Katak im Bujen Ko 6:33, im kōmeļeļe etke juon emaron̄ mijak in kōm̧m̧an em̧m̧an (bar lale eoon 28–29). Jipan̄ ajri ro kappok naan ilo eoon 33–37 me ejipan̄ leļo̧k peran n̄an aer kōm̧m̧an em̧m̧an.

• Jipan̄ ajri ro kōm̧m̧an jin̄a remaron̄ kwaļo̧k ilo m̧o̧ko m̧weer n̄an kakeememej er in “reilo̧k n̄an [Jisōs Kraist] ilo aolep ļōmņak” (eoon 36). Ilo aer kōm̧m̧ani jin̄a ko aer, kōnono kōn ta melelein reilo̧k n̄an Rilo̧mo̧o̧r ekōjkan an naj kōjparok er.

• Al juon al ippān doon kōn peran, āinwōt “Dare to Do Right” (Children’s Songbook, 158) “ak “Jen Wōnm̧anļo̧k” (Al ko, no.243) Kajjitōk ippān ajri ro bwe ren kappukōt ilo al eo jet un etke jejjab aikuj “mijak” (eoon 36).

Katak im Bujen Ko 8:10

Imaron̄ kajjitōk ilo tōmak.

Ilo aolepān jeje ko rekwojarjar, Irooj ej kakeememej kōj n̄an tōmak ilo E. Ekōjkan am̧ maron̄ jipan̄ ajri ro kwoj katakin n̄an bōk eļapļo̧k tōmak ilo Jisōs Kraist?

M̧akūtkūt ko Maron̄ Kōm̧m̧ani

• Je ioon boot eo Ijjelo̧kin kwojjab maron̄ kōm̧m̧an jabdewōt . Kajjitōk ippān ajri ro bwe ren kajjieo̧n̄ ļōmņak kōn juon naan me emaron̄ ekkar n̄an būļāān̄ ko jim̧or. Innām riit ippān doon Katak im Bujen Ko 8:10 n̄an pukōt uwaak eo. Ta jet men ko jemaron̄ kōm̧m̧ani n̄e ej wōr ad tōmak?

• Ālkin riit ippān doon Katak im Bujen Ko 8:10, jipan̄ ajri ro ļōmņak kōn ta remaron̄ kajjitōk ippān Irooj bwe en jipan̄ er kaki. Kajjitōk ippān ajri ro n̄an jin̄aik juon pija me ej pinej-jenkwan ta eo rej aikuj kajjitōk kake. Ilo aaer kwaļo̧k jin̄a eo aaer nan kūlaaj eo, kōtļok bwe ajri ro jet rej lale ta eo jina eo ej pinej jenkwan.

pija ej bōk jikin ekkatak

Kōketak Ekkatak ilo M̧weo

Jipan̄ ajri ro kālet juon naan ekadu jān Katak im Bujen Ko 6–9 me remaron̄ kōņņaan kwaļo̧k n̄an juon eo ilo m̧weo, āinwōt “jab mijak n̄an kōm̧m̧an em̧m̧an” (6:33), “jab pere, jab mijak” (6:36), ak “ijello̧kun tōmak kwo ban kōm̧m̧an jabdewōt” (8:10).

Kōkōm̧anm̧anļo̧k Ad Katakin

Kōjerbal bwebwenato ko. Bwebwenato ko rej jipan̄ ajri ro meļeļe pedped in gospel in kōnke rej kwaļo̧k elmen an ro jet mour kōn pedped in katak ko. Ilo am̧ katakin, kappok wāween ko n̄an koba waj bwebwenato—jān jeje ko rekwojarjar, jān Bwebwenato ko an Kabun̄, ak jān mour eo am̧ make—me ej pijaik ļo̧k katak ko ilo jeje ko rekwojarjar.

peij in m̧akūtkūt: Jisōs Kraist emaron̄ jipan̄ kōj n̄e jej en̄jake mijak.