Annan̄ in peij ko an Bok in Mormon.

Pāpode 1–7

Katak im Bujen Ko 10–11

“Bwe Kwōn Maron̄ Rianjo̧”

Jar ilo am̧ riiti Katak im Bujen Ko 10–11, im lūn̄uri elmen am̧ maron̄ jipan̄ ajri ro kwoj katakin er meļeļe kōn m̧ool ko ilo jekjen in. Ļōmņak ko ilo ļaajrak in—n̄an ajri ro redikļo̧k im rūttoļo̧ jimo̧r—emaron̄ jipan̄.

Je En̄jake ko Rej Im̧we Eok

Kajjitōk bwe ren Kwaļo̧k

Kajjitōk ippān ajri ro bwe ren kwaļo̧k ta eo rej keememej jān katak eo ļo̧k kōn Martis Harris im peij in ukook ko an Bok in Mormon raar jako. Kwaļo̧k jet meļeļe ko rejjab keememej. Komaron̄ kōņaan bar rool n̄an “Jebta 4: Martin Harris im Peij ko Rejako” (Bwebwenato in Katak im Bujen Ko, 18–21).

Katakin Katak ko: Ajri ro Reddikļo̧k

Katak im Bujen Ko 10:5

N̄e ij jar aolep iien, Jemedwōj Ilan̄ ej kōjeraam̧m̧an eō.

Jet iien ajri ro rej ļōmņak bwe jemaron̄ jar ilo wōt jet iien im jet jikin, im n̄e jej jubukwe im kiil mejad wōt. Ekōjkan am̧ maron̄ jipan̄ er ekkatak kilen “jar aolep iien”?

M̧akūtkūt ko Maron̄ Kōm̧m̧ani

• Ekkwaļo̧k pija in men ko ekkā ad kōm̧m̧ani, āinwōt m̧ōn̄ā, kiki, ak ikkure. Ekōjkan an men kein jipan̄ kōj? Kwaļo̧k juon pijaan juon ajri ej jar ilo am̧ riit n̄an ajri ro jān Katak im Bujen Ko 10:5 naan eo “jar aolep iien.” Kajjitōk ippān ajri ro bwe ren ālije naan kein elōn̄ kattōn. Ekōjkan an nej jar jipan̄ kōj?

• Kōjerbal peij in m̧akūtkūt eo an wiik in n̄an jipan̄ ajri ro ļōmņak kōn jikin ko im iien ko jemaron̄ jar ie.

• Kajjitōk ippān ajri ro bwe ren jin̄aik pijaer make ak baam̧le ko aer ilo aer jar ilo iien ko im jikin ko reoktak, āinwōt m̧ōnjar, m̧okta jān im ālkin jikuuļ, ak ilo iien kiki. Kōmeļeļe bwe jar aolep iien emaron̄ bar meļeļe ke ikutkut aolep raan eo. Ekōjkan an maron̄ jar mekarta n̄e jej jebooļ kōn armej ro jet, āinwōt ilo jikin jikuuļ ak ippān ro m̧ōttad?

  

  Irooj enaaj jipan̄ kōj n̄e jej jar.

Katak im Bujen Ko 11:12–13

Jetōb Kwojarjar eo ej tōl eō bwe in kōm̧m̧an em̧m̧an.

Men̄e ilo iiō ko redik, ajri remaron̄ jino kile n̄e Jetōb ej kōnono n̄an er.

M̧akūtkūt ko Maron̄ Kōm̧m̧ani

• Ņoojee juon tōm̧a ak teen̄ki im juon pija in mejān lem̧ōņōņō ilo rūūm̧ eo. Kajjitōk ippān ajri ro n̄an kapukkōt men kein. Riiti Katak im Bujen Ko 11:13, im jipan̄ ajri ro kwaļo̧ke naan ko me rej ekkejel ippān men ko raar loi. Ta ko naan kein rej katakin kōj elmen an Jetōb Kwojarjar eo jipan̄ kōj?

• Leļo̧k n̄an ajri ro jet jekjek ko me rej aikuj kōm̧m̧an jo̧kālet ikōtaan jim̧we im bōd—āinwōt jookālet eo n̄an kwāļo̧k m̧ool ak riab, ak jookālet eo n̄an jouj ak jab jouj. Ewi wāween ad jeļā ewi wōt eo ejim̧we? Riit ippān doon Katak im Bujen Ko 11:12, im kam̧ool ke Jetōb Kwojarjar eo enaaj jipan̄ kōj kōm̧m̧ane jookalet eo ejim̧we n̄e jej ron̄jake E.

• Al juon al kōn tōl eo an Jetōb Kwojarjar, āinwōt “Listen, Listen” (Children’s Songbook, 107). Kajjitōk ippān ajri ro ta eo al eo ej katakin er kōn ekōjkan an Jetōb Kwojarjar jipan̄ kōj.

Katakin Katak ko: Ajri ro Rerūttoļo̧k

Katak im Bujen Ko 10:5

N̄eij jar aolep iien, Imaron̄ eļļā jān kapo ko an jetan.

Komaron̄ jipan̄ ajri ro melele me ikutkut in jar ej leļo̧k n̄an er kajoor bwe ren eļļā jān kapo.

M̧akūtkūt ko Maron̄ Kōm̧m̧ani

• Jeje naan ak eoon jān Katak im Bujen Ko 10:5 ilo jidik peba, im kajjitōk bwe ajri ro ren kōraki ilo jekjek eo ejim̧we. Kōketak er n̄an kappok eoon n̄e rej aikuj. Ekkar n̄an eoon in, ta kōjeraam̧m̧an ko rej itok n̄e jej jar aolep iien? Ekōjkan an maron̄ keememej in jar aolep raan eo ad n̄an jipan̄ kōj, eļaptata n̄e jej ioon kapo n̄an kōm̧m̧ane juon men ebōd?

• Kajjitok bwe ajri ro ren kōm̧m̧ane juon laajrak in jet iien ko me jemaron̄ jar im jikin ko jemaron̄ jar ie. N̄an ļōmņak ko rellōn̄ļo̧k, kōketak er n̄an lale Alma 34:17–27.

• Jipan̄ ajri ro kōm̧m̧ane juon kōkaļļe ak pija me enaaj kakeememej er n̄an jar aolep iien. Kajjitōk bwe ren kaddepi kōkaļļe ko aer ilo m̧o̧ko̧ ijo renaaj loe aolep raan.

Katak im Bujen Ko 11:12–13

Jetōb Kwojarjar ej tōl eō n̄an kōm̧m̧an em̧m̧an.

Armej ro reddik ekkā aer ļōmņak elmen en̄jake eo n̄e Jetōb Kwojarjar ej tōl. Komaron̄ kōjerbal Katak im Bujen Ko 11 n̄an katakin ajri ro wāween kile “ilo Jetōb eo ej tōlļo̧k n̄an kōm̧m̧an em̧m̧an” (eoon 12).

M̧akūtkūt ko Maron̄ Kōm̧m̧ani

• Jipan̄ ajri ro kōm̧m̧an juon laajrak in armij ro me remaron̄ etal ippāer n̄e rej aikuj jipan̄ ak wōr aer kajjitōk. Etke jej ļōke ke armij rein renaaj jipan̄ kōj? Kajjitōk bwe ajri ro ren riiti Katak im Bujen Ko 11:12 im kappukōt ta eo kar jiron̄ Hyrum Smith bwe en lōke. Ta eo jej ekkatak jān eoon in kōn etke jej aikuj ļōke tōl eo an Jetōb Kwojarjar?

• Kajjitōkin ajri ro ta eo renaaj ba n̄an juon m̧ōttaer eo ej kajjitōk ippāer elmen aer en̄jake n̄e Jetōb Kwojarjar ej kōnono n̄an er. Kajjitok bwe ajri ro ren riiti Katak im Bujen Ko 11:12–13 n̄an kappukōt jet uwaak.

• Ba n̄an ajri ro kōn jet am̧ en̄jake ke Jetōb Kwojarjar eaar tōl eok n̄an kōm̧m̧an em̧m̧an. Kajjitōk bwe ajri ro ren kōlmenļo̧kjen kon iien me eaar wōr aer en̄jake āinwōt in innām kwaļo̧k en̄jake ko aer n̄e rekōņaan. Kam̧ool bwe Jemedwōj Ilan̄ ekōņaan tōl kōj ilo wāween Jetōb Kwojarjar. Kōketak ajri ro bwe ren kile ilo wiik eo n̄e ewōr aer en̄jake rōt eo me kōmeļeļeiki ilo Katak im Bujen Ko 11:12–13.

Katak im Bujen Ko 11:21, 26

Ij aikuj jeļā kōn gospel eo bwe in maron̄ jipan̄ ro jet lo m̧ool eo.

Ajri ro kwoj katakin enaaj lōn̄ aer iien em̧m̧an n̄an kwaļo̧k gospel eo. Eoon kein remaron̄ katakin er ewi wāween kōppopo n̄an iien em̧m̧an kein.

M̧akūtkūt ko Maron̄ Kōm̧m̧ani

• Kajjitōk bwe ajri ro ren kōmālmel elmān aer nej kōnono kōn gospel eo ippān juon eo ejjan̄in kar ron̄ kake. N̄an waanjo̧n̄o̧k, elmen aer naaj uwaaki kajjitōk ko kōn Bok in Mormon? Elmen aaer nej kōmeļeļeiki wōn in Jisōs Kraist? Riit ippān ajri ro Katak im Bujen Ko 11:21, 26. Ta eo Irooj eaar ba n̄an Hyrum Smith ke eaikuj in kōm̧m̧an bwe en maron̄ katakin kōn gospel Ta meļeļe in “bōk” naan an Anij, im elmen ad kōm̧m̧ane menin? Elmen ad “kaorōk” naan an Anij ilo būruōd?

• Kajjitōk bwe ajri ro ren kwaļo̧k juon eoon me em̧m̧an ippāer im kōmelele ejaam emman ippāer. Kōtļo̧k bwe ren ļōmņak kōn elmen an jeje ko rekwojarjar kōjeramm̧an mour ko aer im̧ ta eo rej kōm̧m̧ane n̄an ekkatak naan an Anij ilo m̧o̧ko̧. Kōketak er bwe ren kōm̧m̧an kōttōpar n̄an ikutkut riiti naan an Anij.

• Al ippān doon juon al kōn kwaļo̧k gospel, āinwōt “I Want to Be a Missionary Now” (Children’s Songbook, 168). Ta eo al in ej katakin kōn ewi wāween jemaron̄ mijenede aolep raan?

• Kwaļo̧k juon men jān “Hope of Israel” jān President Russell M. Nelson im Sister Wendy W. Nelson (worldwide devotional for youth, June 3, 2018, ChurchofJesusChrist.org) n̄an kaim̧we ajri ro n̄an jipan̄ kakobaiktok ajri ro nejin Anij ilo kwaļo̧k gospel eo.

Kōketak Ekkatak ilo M̧weo

Kajjitok bwe ajri ro ren kōnono ippān juon eo uwaan baam̧le eo aer kōn juon men me raar ekkatak jān Katak im Bujen Ko 10 ak 11 rainin. N̄an waanjon̄ak, remaron̄ kwaļo̧k ta eo rej kōrake bwe ren jar aolep iien.

Kōkōm̧anm̧anļo̧k Ad Katakin

Pukōt revelesōn aolep raan. Ilo am̧ kōppopo n̄an katakin, jar im lūn̄ūri jeje ko rekwojarjar aolep wiik eo. Konaaj lo an Jetōb naaj “kōmeram am ļōmņak”Katak im Bujen Ko 11:13). ļōmņak ko im im̧weko kōn wāween katakin remaron̄ itok n̄an eok jabdewōt iien kab jabdewōt jikin—ilo am̧ em̧akūtkūt im jerbal, kōm̧mani jerbal ko m̧o̧ko̧, ak kōnono ippān ro jet.