“Jepta 4: Martin Harris im Peij ko Rejako: 1824–1828,” Bwebwenato Ko Jen Katak im Kalimur Ko [DOCTRINE AND COVENANTS STORIES] (2002), 17–21
“Jepta 4,” Bwebwenato Ko Jen Katak im Kalimur Ko [DOCTRINE AND COVENANTS STORIES], 17–21
Jepta 4
Martin Harris im Peij ko Rejako
(1824–1828)
Bamle eo an Joseph Smith ear jeramõl. Rar aikuij jããn. Joseph ear kõnan jibañ bamle eo an. Ear etal ñõn bukõn eo Pennsylvania in jerbal. Ear jokwe iben juõn eman etan Hale.
Lein Hale ear wõr juõn nejin ledrik etan Emma. Joseph ear ion Emma. Rar yokwe dron im marre. Rar etal im jokwe iben bamle eo an Joseph. Joseph ear jibañ jemen jerbal ilo jikõn kallip eo.
Elõñ armij rar jelã ke pileij gold ko ko rar bed iben Joseph. Rar kajeoñ in kwoti. Armij ro rar kõmõn jorren ñõn Joseph. Rar riab nae Joseph im bamle eo an.
Jorren ko rar lukkun nana im Joseph im Emma rar lõmnak in emakit. Rar kõnan etal ñõn Pennsylvania. Renaj jokwe iturin bamle eo an Emma. Ak Joseph im Emma ear jab bwe jããn ibeir ñõn etal.
Joseph Smith—History 1:61
Juõn eman etan Martin Harris ear jokwe iturin Joseph Smith. Ear wõr juõn an Martin Harris jikin kallip elap. Elõñ an jõãn. Martin Harris ear joij ñõn Joseph im Emma. Ear lelok jõãn ñõn ir im jibañ ir ñõn emakit. Joseph im Emma rar ilok ñõn Pennsylvania.
Joseph ear jino ukõte jeje ko ilo pileij gold ko. Joseph ear jab jelã ta ko jeje ko rej ba. Anij ear jibañ e. Joseph ear kõjerbale Urim im Thummim ñõn melele nan ko. Jemaroñ konono ta ko ear ukõte. Jej na etair Buk in Mormon.
Martin Harris ear etal ñõn Pennsylvania. Ear jibañ Joseph ukok. Joseph ear konono nan jen pileij gold ko. Martin ear je ion pepa. Joseph im Martin rar ukõte 116 peij ko ilo Buk in Mormon.
Martin Harris ear kõnan bõki 116 peij ñõn mweo imõn. Ekõnan bwe bamle eo an en loi. Joseph ear kajitõk iben Iroij elañe Martin emaroñ bõki peij ko. Iroij ear ba jab. Joseph ear bar kajitõk juõn alen. Iroij ear bar ba jab.
Martin ear lukkun kõnan bõki peij ko ñõn mweo imõn. Joseph ear bar kajitõk juõn alen. Ilo ien in Iroij ear ba Martin emaroñ bõki peij ko ñõn mweo imõn. Iroij ear ba Martin emaroñ kwalok peij ko ñõn bamle eo an. Ak ejjab maroñ kwaloki ñõn armij ro jet.
Martin ear kalimur ñõn bokake Iroij. Ear bõke peij ko ñõn mweo imõn. Ear kwaloki ñõn bamle eo an. Ak ear jab kejbarok kalimur eo an. Ear kwaloki peij ko ñõn bar armij ro jet. Inem ear kokni peij ko.
Tokelik Martin ear etal in bõki peij ko. Ear kabukõte ilo aolep jikin. Ear jab maroñ loi. Peij ko rar jako.
Joseph ear lukkun inebata kin peij ko rejako. Ear jab maroñ kiki.
Jisõs ear konono ñõn Joseph. Ear ba Martin Harris ear kõmõne juõn men elukkun nana. Martin ear kalimur ke enaj bokake Iroij. Ak ear jab kejbarok kalimur eo an. Kiõ peij ko ilo Buk in Mormon rar jako. Martin Harris ear jab maroñ bar ukok tokelik.
D&C 3:12–14
Jisõs ear ba Setan ekõnan bwe 116 peij ko renjako. Armij ro renana ebed peij kein ibeir. Setan im armij ro renana rekõnan kabõjrak jerbal eo an Anij. Rejab kõnan bwe armij ren tõmak Buk in Mormon. Jisõs ear ba Setan eban kabõjrak jerbal eo an Anij. Armij ro renana rejab maroñ kabõjrak jerbal an Anij.
D&C 10: Kemlele eo mokta, 8, 12, 22–29, 33, 43
Jisõs ear jiroñ Joseph bwe en jab inebata kin bwebwenato ko ilo peij ko rejako. Ejja bwebwenato ko wõt emwij bar jei ilo bar jet jikin ilo pileij gold ko. Jisõs ear ba Joseph eaikuij bar ukõte mõttan ko jet jen pileij ko. Inem armij ro remõn renaj maroñ konono jen Buk in Mormon. Renaj tõmak bwe Buk in Mormon emol. Renaj katak gospel eo.