“Jepta 10: Menin Bwilõn eo Moktata ilo Kabuñ in: Eprõl 1830,” Bwebwenato Ko Jen Katak im Kalimur Ko [DOCTRINE AND COVENANTS STORIES] (2002), 43–44
“Jepta 10,” Bwebwenato Ko Jen Katak im Kalimur Ko [DOCTRINE AND COVENANTS STORIES], 43–44
Jepta 10
Menin Bwilõn eo Moktata ilo Kabuñ in
(Eprõl 1830)
Kwelok eo tok juõn an Kabuñ in An Jisõs Kraist ear ilo Jabõt, 11 Eprõl 1830. Ro uwan Kabuñ in rar itok ñõn kwelok eo. Ro uwan rar na etair Armij Ro Rekwojarjar.
Ebar lõñ armij rar itok ñõn kwelok eo. Rar jab uwan Kabuñ in. Oliver Cowdery ear katakin ir gospel eo An Jisõs Kraist. Jet ian armij ro rar tõmak Oliver im kõnan kobatok ilo Kabuñ in. Rar baptais elikin kwelok eo.
Setan ejab kõnan bwe armij ro ren kobalok ilo Kabuñ in. Setan ej kajeoñ kõmõn bwe jet armij ro remõn en nana air mour. Juõn ian armij rein ear juõn eman etan in Newel Knight. Newel Knight ear jab juõn ian ro uwan Kabuñ in. Setan ejab kõnan bwe en baptais.
Joseph ear kajitõk bwe Newel en jar ilo kwelok eo. Newel ear ba enaj jar.
Setan ejab kõnan bwe Newel en bokake Joseph. Newel ear etal ñõn kwelok eo, ak ear jab jar. Ear ba emijak in kelap ainikien ilo an jar.
Tokelik Newel Knight ear etal ñõn bukin wijki ko. Ekõnan bwe en jar make ian. Setan ejab kõnan bwe en jar. Newel ear kajeoñ jar, ak ejab maroñ in konono. Ear nañinmij. Ear burõmõj im mijak. Newel ear jeblak ñõn mweo imõn.
Lio iben Newel ear inebata kin e. Ear kajitõk iben Joseph Smith bwe en jibañ Newel. Joseph Smith ear kõjerbal kajur in Priesthood eo an im kõjerammõn Newel. Inem ebar emõn an mour. Ejako an nañinmij. Setan ear jab kakkure e. Tokelik Newel Knight ear baptais.