“Jepta 46: Joseph Smith ilo Kalibuj eo ilo Liberty: Maaj 1839,” Bwebwenato Ko Jen Katak im Kalimur Ko [DOCTRINE AND COVENANTS STORIES] (2002), 173–75
“Jepta 46,” Bwebwenato Ko Jen Katak im Kalimur Ko [DOCTRINE AND COVENANTS STORIES], 173–75
Jepta 46
Joseph Smith ilo Kalibuj eo ilo Liberty
(Maaj 1839)
Joseph Smith im ro jeran rar bed ilo kalibuj elõñ ran ko. Inem rar bõk ir ñõn bar juõn kalibuj eo. Ekar bed ilo Liberty, Missouri.
Kalibuj eo ilo Liberty ear lukkun mõlo im etton. Joseph im ro jeran rar lukkun lab air eñtan. Jet ien rej lukõje ir kin jeen. Rej kiki ion bedbed eo ilal.
Mõñã ko rar jab emõn. Jet ien rej jorren im kõmõn bwe ren nañinmij.
Joseph ear burumõj. E im ro jeran rar bed ilo kalibuj im eto air bed ie. Joseph ejab jelã elañe renaj driwõj. Ekar lukkun inebata kin Kabuñ in.
Joseph ear jar nõn Jemedwij Ilañ. Ekar kajitõk ewi toon an e im Armij Ro Rekwojarjar in mõttan ro eñtan. Ekar kajitõk iben Jemedwij Ilañ bwe en jibañ ir. Joseph ear kajitõk iben Jemedwij Ilañ bwe en kajeiki dri kõjrat ro.
Jisõs ear jiroñ Joseph bwe enaj eñtan jidrik wõt ien. Ear jiroñ Joseph bwe en beran wõt. Inem Anij enaj kõjerammõne. Jisõs ear ba Joseph enaj bed iben ro jeran ejab eto. Ro jeran Joseph rej yokwe e im naj mõnõnõ in loe.
Jisõs ejelã ta eo armij ro renana rej kõmõne. Ear jiroñ Joseph ekõjkan an naj kajeik ir. Armij ro renana ejamin wõr air priesthood. Ajiri ro nejier ejamin wõr air priesthood. Armij ro renana renaj eñtan im mij.
Jisõs ear jiroñ Joseph bwe elõñ men remõn renaj walok ñõn Armij Ro Rekwojarjar in. Ejelok men enaj kabõjrak Anij jen an kõjerammõn ir. Jitõb Kwojarjar enaj jiroñ ir men ko rekabwilõñlõñ kin kajur an Anij. Renaj katak kin lañ im lõl.
Jisõs ear ba Joseph ejab aikuij in mijak elañe ear aikuij eñtan. Joseph ear jab inebata elañe ej wõr jorren ko ñõn e. Jisõs ear ba jorren ko rej ñõn emõn ko ad. Jorren ko rej jibañ kij katak. Jisõs ear lukkun eñtan elaplok jen jabdrewõt armij.