“Jepta 22: Armij Ro Rekwojarjar in ilo Missouri: Julae–Okõj 1831,” Bwebwenato Ko Jen Katak im Kalimur Ko [DOCTRINE AND COVENANTS STORIES] (2002), 84–88
“Jepta 22,” Bwebwenato Ko Jen Katak im Kalimur Ko [DOCTRINE AND COVENANTS STORIES], 84–88
Jepta 22
Armij Ro Rekwojarjar in ilo Missouri
(Julae–Okõj 1831)
Dri Kanan Joseph Smith, Sidney Rigdon, Edward Partridge, im ro jet rar ilok ñõn Missouri. Rar lukkun mõnõnõ in ilok. Rar kõnan kalek jikin kwelok eo ilo Zion. Rar kõnan bwe Iroij en kwalok ñõn ir ia eo ejimwe.
Jimetan in ial eo air rar ilok ilo wa lok. Ke rar itaklok ilo Missouri, Joseph ekõnan etetal. Ear jelã ke jikin eo Missouri ear ekwojarjar. E ear kõnan lale.
Joseph im ro jeran rar etal 300 mail ñõn Jackson County. Ear bwil, ak rar jab ebwer. Rar kõnan ilok ñõn ijo in kalek Zion.
Dri kanan eo im ro jeran rar ilok ñõn Jackson County, Missouri. Mijinede ro jen Kirtland rar ion ir.
Jet ran tokelik, Armij Ro Rekwojarjar in jen New York rar bareinwõt ilok ñõn Jackson County. Aolep rar emõnõnõ in bed ijo.
Dri Kanan Joseph im Bisop Edward Partridge rar jiroñ armij ro ta eo ren kõmõne. Jet iaeir rej aikuij wia jikin ilo Missouri. Oliver Cowdery im William W. Phelps rej aikuij jino kajutak jikul ko. Rej aikuij jeje buk ko ajiri jidrik ro remaroñ konono jen i.
Joseph ekõnan jelã ia eo jikin kwelok in Zion enaj jutak ie. E ear jar ñõn Jemedwij Ilañ. Jar eo an ear uak.
Iroij ear ba Zion enaj jutak iturin jikin etan Independence ilo Jackson County, Missouri. Iroij ear jiroñ Joseph ia eo juõn tempel enaj jutak ie. Iroij ear ba Zion eban jutak kiõ. Armij Ro Rekwojarjar in enaj wõr abañ ko renaj walok ñõn ir mokta. Ak renaj kajutak Zion elañe elap tõmak ibeir.
Iroij ear ba Joseph Armij Ro Rekwojarjar in rej aikuij bokake kien eo ilo Missouri. Rej aikuij bokake kien ko an Anij. Rej aikuij kõmõni men ko remõn jekdron elañe rej jab jiroñ ir. Armij Ro Rekwojarjar in rej aikuij ukwelok jen jerawiwi ko air. Iroij eban kememej jerawiwi ko elañe armij rej ukwelok.
Iroij ear ba Sidney Rigdon ej aikuij kõjerammõn jikin eo. Sidney Rigdon ear kajitõk iben Armij Ro Rekwojarjar in elañe rej lelok kamolol kin jikin eo. E ear kajitõk elañe rej bokake aolep kien ko an Anij. Armij Ro Rekwojarjar in ear ba, “Aet.” Inem Sidney Rigdon ear jar im kõjerammõn jikin eo.
Ran eo tok juõn Joseph Smith, Oliver Cowdery, Sidney Rigdon, im jet ian ro jerair rar kwelok. Rar kwelok ilo juõn jikin ejenolok ilo Independence. Rar riiti jeje ko rekwojarjar. Inem rar jar. Joseph Smith ear kõjerammõn jikin eo ñõn an jutak juõn tempel ie.
Aolep Armij Ro Rekwojarjar in ilo Missouri rar ilok ñõn juõn kwelok. Rar obrak kin Jitõb Kwojarjar. Joseph ear jiroñ Armij Ro Rekwojarjar in bwe Anij enaj kõjerammõn ir elañe renaj kejbarok kalimur ko air.
Jet ran tokelik Jisõs ear lelok ñõn Joseph bar juõn revelesõn. E ear ba Jabõt ej juõn ran ejenolok. Jabõt ej ran eo jej aikuij kõmõni men ko ñõn jibañ kij kememej Jisõs. Jej jab aikuij jerbal ilo Jabõt. Jej aikuij ilok ñõn jar im bõk kwojkwoj. Jej aikuij ukwelok jen jerawiwi ko ad. Jej aikuij bokake kien ko an Anij ien otemjej.
Armij Ro Rekwojarjar in rej kõmõni men kein enaj wõr ibeir aolep men ko remõn rej aikuij. Enaj wõr kijier mõñã, nuknuk, em, im jikin kallip. Renaj mour indreo.