“Jepta 16: Joseph Smith im Sidney Rigdon Rar Katak kin Zion: 1830,” Bwebwenato Ko Jen Katak im Kalimur Ko [DOCTRINE AND COVENANTS STORIES] (2002), 61–63
“Jepta 16,” Bwebwenato Ko Jen Katak im Kalimur Ko [DOCTRINE AND COVENANTS STORIES], 61–63
Jepta 16
Joseph Smith im Sidney Rigdon Rar Katak kin Zion
(1830)
Ke Oliver Cowdery im ro jeran rar bed ilo mijen eo air, rar bõjrak iturin Kirtland, Ohio. Rar ion juõn eman etan in Sidney Rigdon. E ear dri tel in juõn Kabuñ.
Mijinede ro rar lelok ñõn Sidney Buk in Mormon. Sidney Rigdon ear riiti Buk in Mormon. E ear jar im kajitõk kin buk eo. Jemedwij Ilañ ear jiroñ e bwe gospel eo ej mol. Sidney Rigdon ear baptais.
Sidney Rigdon ear jiroñ ro uwan kabuñ eo an bwe ren roñjake mijinede ro. Elõñ iaeir rar baptais. Ejab etto tokelik juõn taujin armij rar baptais ilo Kirtland.
Sidney Rigdon ekõnan wõnmae Joseph Smith. E ear ilok ñõn New York in lolok dri kanan eo. Jisõs ear lelok ñõn Joseph Smith juõn revelesõn kin Sidney Rigdon. Jisõs ear ba Sidney Rigdon enaj kõmõne men ko ewõr tokjeir. E enaj katakin gospel eo ñõn elõñ armij. E enaj baptaisi ir im lelok menin letok eo an Jitõb Kwojarjar.
Jisõs ear jiroñ Joseph im Sidney bwe jet mõttan ko ilo Baibõl rar oktak elõñ yiõ ko remotlok. Jet bwebwenato ko ewõr tokjeir rejako ilo Baibõl. Jisõs ear jiroñ Joseph Smith kin bwebwenato ko rejako ilo Baibõl. Sidney Rigdon enaj aikuij jei.
Juõn ian bwebwenato ko ear kwalok kin Enoch. Enoch ear juõn dri kanan eo elap. E ear katakin armij ro an bwe ren jimwe. Iroij ear na etan Enoch armij weppen ilo Zion. Armij ro an Enoch rar kalek juõn jikin. Rar na etan jikin kwelok in Zion. Ilo Zion, armij ro rar yokwe dron. Rar kejbarok dron. Ejelok juõn ear jeramõl ak jab mõnõnõ.
Aolep ro ilo Zion rar bokake kien ko an Jemedwij Ilañ. Armij ro rar jimwe im Jisõs ear itok im jokwe ibeir. Inem Anij ear bõk armij in Zion ro ñõn lañ bwe ren jokwe iben.
Jisõs ear jiroñ Joseph Smith bwe en katakin armij ro an bwe ren jimwe. Rej aikuij in kajeoñ bar kaleke juõn jikin etan Zion. Jikin in ej aikuij aibuijuij. Aolep ro ijo renaj yokwe iben Jemedwij Ilañ. Aolep rein renaj yokwe dron. Aolep ro ilo Zion renaj lukkun mõnõnõ. Jisõs enaj itok im jokwe ibeir.