thaj teb hauv Missouri

Spring Hill, Daviess County, Missouri, los ntawm Garth Robinson Oborn

Rau Hli Ntuj 7–13

Lus Qhuab Qhia thiab Kev Khi Lus 63

“Tej Yam uas Los Saum Ntuj Los Yeej Dawb Ceev”

Tus Tswv hais tias, “Nej txais tus Ntsuj Plig los ntawm kev thov Vajtswv” (Lus Qhuab Qhia thiab Kev Khi Lus 63:64). Tej zaum koj yuav xav thov Vajtswv kom tus Ntsuj Plig coj koj txoj kev kawm vaj lug kub.

Sau Ntawv txog Koj tej Kev Tshoov Siab

Twb tau xaiv qhov chaw rau lub nroog Xi-oos lawm. Lub Koom Txoos cov thawj coj tau tuaj xyuas qhov chaw no thiab tau muab fij tseg ua ib qho chaw rau Haiv Neeg Ntseeg los sib sau ua ke. Raws li Joseph Smith zaj keeb kwm, nws hais tias “thaj av Xi-oos yog qhov uas tseem ceeb tshaj plaws ntawm sab cev nqaij daim tawv” (Lus Qhuab Qhia thiab Kev Khi Lus 63, zaj lus piav txog tshooj). Tiam sis tib neeg tej kev xav txog thaj av Xi-oos los ib leeg xav txawv ib leeg. Ntau tus Neeg Ntseeg xav pib sau los ua ke nyob hauv Missouri. Tiam sis, muaj neeg xws li Ezra Booth uas poob siab thaum lawv pom thaj av Xi-oos thiab lawv hais rau txhua tus. Muaj tseeb tiag, thaum Joseph rov qab mus rau Kirtland los ntawm Missouri, nws kawm tias muaj ib co neeg hauv lub Koom Txoos tau ntxeev siab thiab tso qhov tseeb tseg thaum nws tsis nyob. Twb muaj li no thaum txais kev tshwm sim nyob hauv phau Lus Qhuab Qhia thiab Kev Khi Lus 63. Tus Tswv hais txog kev yuav thaj av thiab Haiv Neeg Ntseeg txoj kev tsiv mus rau Missouri. Tiam sis nrog rau tej yam zoo li no muaj ib yam kom lawv nco ntsoov tias: “Kuv, tus Tswv, muab kuv lub suab hais, thiab cov neeg yuav tsum ua raws li kuv hais” (nqe 5). Nws lub suab, Nws lub siab nyiam, Nws cov lus txib—tag nrho txhua yam uas “los saum ntuj los”—lawv yuav tsum tsis txhob lam ua los sis tsis rau siab. Nws tej lus “yeej dawb ceev, thiab yuav tsum ua tib zoo hais lus txog tej ntawd” (nqe 64).

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Lus Qhuab Qhia thiab Kev Khi Lus 63:1–6, 32–37

Tus Tswv npau taws rau cov neeg phem thiab cov neeg ntxeev siab.

Thaum tau txais kev tshwm sim no, muaj ob peb tug mej zeej ntawm lub Koom Txoos uas tau ntxeev siab rau Joseph Smith es lawv cem nws heev (saib “Ezra Booth and Isaac Morley,” Revelations in Context, 130–36). Tus Tswv tau hais lus ceeb toom twg nyob hauv Lus Qhuab Qhia thiab Kev Khi Lus 63:1–6, 32–37 hais txog “cov neeg phem thiab cov neeg ntxeev siab”? Vim li cas tej lus ceeb toom no qhia tias Vajtswv hlub peb?

Lus Qhuab Qhia thiab Kev Khi Lus 63:7–12

Tej lub cim los ntawm kev ntseeg thiab Vajtswv lub siab nyiam.

Tej lub cim los sis tej txuj ci tseem ceeb xwb tsis ua kom tib neeg muaj kev ntseeg uas kav ntev. Thaum xyoo 1831 Ezra Booth, ib tug xib hwb Methodist nyob hauv Kirtland, txiav txim siab ua kev cai raus dej tom qab nws pom Joseph Smith ua txuj ci tseem ceeb kho Booth tus phooj ywg Elsa Johnson caj npab.

Tiam sis, ob peb hlis tom qab ntawd xwb, Booth tso nws txoj kev ntseeg tseg thiab cem tus Yaj Saub. Vim li cas ho muaj li no, yog nws twb pom tau ib qho txuj ci tseem ceeb? Cia li xav txog qhov no thaum koj nyeem phau Lus Qhuab Qhia thiab Kev Khi Lus 63:7–12. Tej zaum koj yuav xav txog vim li cas ib txhia neeg txais tej lub cim “rau txoj kev pab tib neeg kom [Vajtswv] tau yeeb koob” (nqe 12) thiab lwm tus txais tej lub cim “kom … raug txim xwb” (nqe 11). Raws li koj tau nyeem, tus Tswv xav kom koj xav li cas txog tej lub cim?

Kuj saib Mathais 16:1–4; Yauhas 12:37; Maumoos 9:10–21; Ethaws 12:12, 18.

Lus Qhuab Qhia thiab Kev Khi Lus 63:13–23

Kev ntseeg Khetos txhais tias kuv tej kev xav thiab tej yam kuv ua yuav tsum dawb huv.

Neeg feem coob yuav lees hais tias kev deev luag poj luag txiv yog kev txhaum. Tiam sis nyob hauv Lus Qhuab Qhia thiab Kev Khi Lus 63:13–19, tus Cawm Seej qhia meej tias kev xav tsis zoo xwb kuj ua rau yus raug xwm txheej ntawm sab ntsuj plig loj heev. “Vim li cas kev nyiam kev plees kev yi yog ib txoj kev txhaum loj?” Txwj Laug Jeffrey R. Holland nug. “Kev nyiam kev plees kev yi ua rau peb tus ntsuj plig puas tsuaj, tsis tas li ntawd xwb, kuv xav hais tias yog ib txoj kev txhaum vim hais tias nws ua rau txoj kev sib raug zoo dawb huv tshaj plaws uas Vajtswv cia peb muaj hauv lub neej no puas tsuaj—qhov dawb huv ntawd yog txoj kev sib hlub ntawm ib tug txiv neej thiab ib tug poj niam thiab txoj kev xav tau cov me nyuam hauv ib tsev neeg uas yuav nyob mus ib txhis” (“Place No More for the Enemy of My Soul,” Ensign los sis Liahona, Tsib Hlis Ntuj 2010, 44).

Tus Tswv tau qhia txog tej yam twg nyob hauv Lus Qhuab Qhia thiab Kev Khi Lus 63:13–19 uas cov neeg yuav raug yog lawv tsis hloov siab lees txim txog lawv tej kev xav thiab tej yam lawv ua tsis dawb huv? Nco txog cov koob hmoov uas nyob hauv nqe 20 thiab 23 uas tus Cawm Seej cog lus tias cov uas rau siab ntseeg yuav txais tau. Nyob hauv koj lub neej koj tau txais cov koob hmoov twg los ntawm kev ua raws li kev cai coj dawb huv? Tus Cawm Seej ua li cas kom pab koj ua neeg dawb huv?

Kuj saib Lus Qhuab Qhia thiab Kev Khi Lus 121:45; Linda S. Reeves, “Ua Neej Tsim Nyog Txais Peb tej Koob Hmoov uas Cog Lus Tseg,” Ensign los sis Liahona, Kaum Ib Hlis Ntuj 2015, 9–11.

txiv neej thiab poj niam nyob ntawm lub tuam tsev

Peb tau koob hmoov thaum peb xav thiab ua tej yam dawb huv.

Lus Qhuab Qhia thiab Kev Khi Lus 63:24–46

Tus Tswv coj Nws Haiv Neeg Ntseeg tej xwm ntawm sab ntsuj plig thiab sab cev nqaij daim tawv.

Tom qab tus Tswv qhia tias yuav txhim tsa Xi-oos nyob qhov twg, tseem yuav tsum qhia Haiv Neeg Ntseeg nyob hauv Ohio kom paub thaum twg yuav pib tsiv tsev mus thiab yuav tau nyiaj qhov twg kom yuav thaj av. Thaum koj nyeem phau Lus Qhuab Qhia thiab Kev Khi Lus 63:24–46, nrhiav tej lus uas tus Tswv qhia txog Xi-oos kom coj lawv sab ntsuj plig thiab sab cev nqaij daim tawv. Tus Tswv qhia dab tsi rau koj kom coj koj sab ntsuj plig thiab sab cev nqaij daim tawv?

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Lus Qhuab Qhia thiab Kev Khi Lus 63:7–12.Zaj dab neeg txog Ezra Booth thaum nws tso lub Koom Txoos tseg txawm yog nws pom txoj kev kho Elsa Johnson zoo (saib tej lus nyob hauv “Tej lub Tswv Yim Kawm Vaj Lug Kub ntawm Yus Ib Leeg” thiab daim duab uas txuas rau tus txheej txheem qhia no) los tej zaum yuav ua rau nej xav sib tham txog tej txuj ci tseem ceeb. Tej zaum nej tsev neeg yuav xav sib tham txog tej txuj ci tseem ceeb uas txhawb lawv txoj kev ntseeg, tsis hais tej zaj los ntawm nej tsev neeg los sis nej tsev neeg zaj keeb kwm. Lawv tau ua li cas kom muab siab rau ntseeg txaus thiaj txais tau tej txuj ci tseem ceeb no? Phau Lus Qhuab Qhia thiab Kev Khi Lus 63:7–12 qhia dab tsi txog kev sib txuas ntawm kev ntseeg thiab tej txuj ci tseem ceeb?

Lus Qhuab Qhia thiab Kev Khi Lus 63:13–19.Peb yuav ua li cas pov hwm peb tus kheej los ntawm tej yam tsis tsim nyog, xws li kev saib duab liab qab? (Tej zaum koj yuav nrhiav tau tej yam uas pab tau nej tsev neeg nyob ntawm AddressingPornography.ChurchofJesusChrist.org.) Nej tau koob hmoov twg los ntawm kev ua raws li kev cai coj dawb huv?

Lus Qhuab Qhia thiab Kev Khi Lus 63:23.Nej yuav ua li cas kom pab nej tsev neeg to taub “tej txuj ci uas neeg tsis paub txog … lub nceeg vaj,” los sis tej yam tseeb ntawm txoj moo zoo, yeej zoo li “cov dej uas muaj sia nyob ”? Piv txwv hais tias, tej zaum nej yuav xav mus rau ib tug dej nyob ze (los sis saib video los yog ib daim duab txog ib tug dej). Vim li cas cov dej zoo li qhov tseeb ntawm txoj moo zoo?

Lus Qhuab Qhia thiab Kev Khi Lus 63:58.Peb nyeem tej lus ceeb toom twg nyob hauv tshooj 63? Niaj hnub nim no peb hnov tej lus ceeb toom twg los ntawm peb lub Koom Txoos cov thawj coj?

Lus Qhuab Qhia thiab Kev Khi Lus 63:58–64.Muab ib yam uas muaj nqis heev rau nej tsev neeg saib. Peb ua li cas rau yam no txawv peb ua rau tej yam uas tsis muaj nqis npaum li qhov no? Phau Lus Qhuab Qhia thiab Kev Khi Lus 63:58–64 qhia dab tsi rau peb txog peb txoj kev hwm tej yam dawb ceev?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Reverence Is Love,” Children’s Songbook, 31.

Kev Kawm Zoo Dua Ntxiv ntawm Yus Ib Leeg

Ua neej raws li tej yam uas koj kawm. “Thaum koj muaj kev xyiv fab uas los ntawm kev to taub txoj moo zoo, koj yuav xav ua raws li koj kawm. Rau siab ua neej raws li nej to taub. Ua li ntawd koj txoj kev ntseeg, txoj kev txawj ntse, thiab zaj lus tim khawv yuav muaj zog” (Qhia Kuv txoj Moo Zoo, 19).

Joseph Smith tuav ib tug poj niam tes

Kev Kho Elsa Johnson Xub Pwg, los ntawm Sam Lawlor