liaj teb thaum hnub tuaj

Ciaj Ciaj Av Daviess, Missouri

Rau Hli Ntuj 14–20

Lus Qhuab Qhia thiab Kev Khi Lus 64–66

“Tus Tswv Yeej Yuav Tsum Muaj Neeg lub Siab thiab Kev Txaus Siab Ua”

Thawj Tswj Hwm Henry B. Eyring hais tias: “Ntau zaus kuv nyeem vaj lug kub thaum kuv muaj lus nug xws li ‘Vajtswv xav kom kuv ua dab tsi?’ los sis ‘Nws xav kom kuv xav li cas?’ Feem ntau kuv nrhiav tau tej tswv yim thiab tej kev xav tshiab uas kuv ib txwm tsis tau xav los” (“How God Speaks to Me through the Scriptures,” Ob Hlis Ntuj 6, 2019, blog.ChurchofJesusChrist.org)

Sau Ntawv txog Koj tej Kev Tshoov Siab

Thaum lub caij ntuj sov lub Yim Hli Ntuj 1831, muaj ob peb tug txwj laug uas rov qab mus rau Kirtland tom qab lawv mus saib thaj av Xi-oos nyob hauv Missouri raws li tus Tswv qhia lawv. Yeej tsis yog ib txoj kev mus uas zoo. Cov neeg uas tau mus—Joseph Smith, Oliver Cowdery, Sidney Rigdon, Ezra Booth, thiab lwm tus—los yeej sov lawv thiab lawv nkees heev, es kev tsis sib haum xeeb tau los ua rau lawv sib cav sib ceg. Tej zaum ua rau lawv xav tias kev txhim tsa Xi-oos, ib lub nroog ntawm kev hlub, kev koom siab, thiab kev thaj yeeb, ntshe yuav siv sij hawm ntev.

Tiam sis, kev txhim tsa Xi-oos—nyob hauv Missouri thaum xyoo 1831 los sis nyob hauv peb lub siab thiab peb pawg ntseeg niaj hnub no—los peb tsis tas ua zoo tag nrho tam sim no. Tiam sis, tus Tswv hais tias “nej yuav tsum zam txim rau txhua tus neeg” (Lus Qhuab Qhia thiab Kev Khi Lus 64:10). Nws xav kom peb muab peb “lub siab thiab kev txaus siab ua” (nqe 34). Thiab Nws xav kom peb ua siab ntev thiab rau siab, vim Xi-oos lub hauv paus yog “tej yam me” uas cov neeg ua, cov uas “tsis … nkees ua tej yam zoo” (nqe 33).

Kuj saib Saints, 1:133–34, 136–37.

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Lus Qhuab Qhia thiab Kev Khi Lus 64:1–11

Kuv yuav tsum zam txim rau txhua leej txhua tus.

Thaum koj nyeem Lus Qhuab Qhia thiab Kev Khi Lus 64:1–11, cia li xav txog ib lub sij hawm thaum tus Tswv tau zam txim pub rau koj. Tej zaum koj kuj yuav xav txog ib tug uas koj yuav tsum zam txim. Tus Cawm Seej txoj kev khuv leej ua li cas rau koj txoj kev xav txog koj tus kheej thiab txog lwm tus? Vim li cas tus Tswv txib peb kom “zam txim rau txhua tus neeg”? (nqe 10). Yog tias nyuaj rau koj zam txim pub rau lwm tus, cia li xav txog tej yam uas qhia tias tus Cawm Seej pab tau koj li cas: Jeffrey R. Holland, “Kev Txhawb Pab Los ntawm Kev Rov Qab Sib Raug Zoo,” Ensign los sis Liahona, Kaum Ib Hlis Ntuj 2018, 77–79; Guide to the Scriptures, “Forgive,” scriptures.ChurchofJesusChrist.org.

Lus Qhuab Qhia thiab Kev Khi Lus 64:31–34

Vajtswv yeej yuav tsum muaj kuv lub siab thiab txoj kev txaus siab ua.

Puas muaj tej lub sij hawm thaum koj “nkees” vim koj pheej sim “ua tej yam zoo”? Cia li nrhiav tus Tswv zaj lus rau koj uas nyob hauv Lus Qhuab Qhia thiab Kev Khi Lus 64:31–34. Kev muab “lub siab thiab txoj kev txaus siab ua” rau Vajtswv txhais li cas? (nqe 34).

Lus Qhuab Qhia thiab Kev Khi Lus 64:41–43

Xi-oos yuav yog “ib tug chij mus rau tej neeg.”

Yog “ib tug chij los sis ib lub cim uas tib neeg sib koom siab los muaj ib lub ntsiab los sis ua ib xeem neeg” (Phau Qhia txog Vaj Lug Kub, “Chij,” scriptures.ChurchofJesusChrist.org). Vim li cas Xi-oos—los sis tus Tswv lub Koom Txoos—zoo li ib tug chij rau koj? Cia li xav txog lwm yam no uas yus tsa tau, zoo li ib tug chij, kom foom koob hmoov rau tib neeg: Teev Npe 21:6–9; Mathais 5:14–16; Amas 46:11–20. Tej nqe no qhia dab tsi rau koj txog tej yam uas koj ua tau kom pab lub Koom Txoos ua ib tug chij rau qhov chaw uas koj nyob tam sim no? Cia li nrhiav lwm yam uas tus Tswv hais kom piav txog Xi-oos nyob hauv Lus Qhuab Qhia thiab Kev Khi Lus 64:41–43.

Thawj Tub Rog Maulaunais

Thawj Tub Rog Maulaunais Tsa tus Chij ntawm Kev Ywj Pheej, los ntawm Gary E. Smith

Lus Qhuab Qhia thiab Kev Khi Lus 65

“Nej cia li npaj tus Tswv txoj kev.”

Mathais piav txog Yauhas tus uas Muab Neeg Ua Kev Cai Raus Dej hais tias nws yog tus uas hais tias, “Nej cia li npaj tus Tswv txoj kev” (Mathais 3:3; kuj saib Yaxayas 40:3). Nyob hauv Lus Qhuab Qhia thiab Kev Khi Lus 65, tus Tswv siv tej lus zoo li no piav txog Nws txoj hauj lwm hauv hnub nyoog kawg no. Koj pom tej yam twg uas zoo ib yam hais txog tej uas Yauhas tus Muab Neeg Ua Kev Cai Raus Dej tau ua (saib Mathais 3:1–12) thiab tej yam uas tus Tswv xav kom peb ua niaj hnub no? Koj kawm dab tsi hauv kev tshwm sim no uas tshoov koj lub siab kom koj xav pab muaj raws li tej lus hais txog tej yuav muaj los yav tom ntej? Cia li xav txog tej yam uas koj ua tau kom “qhia txog nws tej hauj lwm zoo kawg nkaus ua rau cov neeg paub” (nqe 4).

Lus Qhuab Qhia thiab Kev Khi Lus 66

Tus Tswv paub tej kev xav hauv kuv lub siab.

Tsis ntev tom qab nws koom lub Koom Txoos, William E. McLellin thov Joseph Smith qhia Vajtswv lub siab nyiam rau nws. Joseph tsis tau paub li no, tiam sis William muaj tsib txoj lus nug uas nws cia siab tias tus Tswv yuav teb los ntawm tej uas Nws tus Yaj Saub hais. Peb tsis paub William tau nug li cas, tiam sis peb paub tias kev tshwm sim uas tau muab rau nws, uas tam sim no yog phau Lus Qhuab Qhia thiab Kev Khi Lus 66, tau teb txhua txoj lus nug kom William txaus siab tag nrho (“William McLellin’s Five Questions,” Revelations in Context, 138).

Thaum koj nyeem tshooj 66, cia li xav txog qhov uas tus Tswv paub William McLellin thiab paub tias nws lub siab xav li cas thiab nws txhawj txog dab tsi. Tus Tswv tau ua li cas kom koj kawm tias Nws paub koj lawm? Yog koj muaj tus yawg suab txoj koob hmoov lawm, xav seb koj puas kawm. Thaum koj ua li ntawd, tus Vaj Ntsuj Plig Dawb Huv pab koj to taub dab tsi txog Vajtswv lub siab nyiam rau koj.

Kuj saib Saints, 1:138–40; Gospel Topics, “Patriarchal Blessings,” topics.ChurchofJesusChrist.org.

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Lus Qhuab Qhia thiab Kev Khi Lus 64:8–10.Nej tsev neeg ua rau nej muaj cib fim ntau kawm zam txim pub rau lwm tus. Tej zaum nej tsev neeg yuav xav sib tham txog qhov uas lawv ib leeg zam txim rau ib leeg tau foom koob hmoov rau nej tsev neeg. Tus Cawm Seej tau pab peb li cas kom peb ib leeg zam txim rau ib leeg? Peb ho “raug txom nyem” (nqe 8) li cas thaum peb tsis zam txim pub rau lwm tus?

Lus Qhuab Qhia thiab Kev Khi Lus 64:33.Leej Txiv Saum Ntuj Ceeb Tsheej xav kom nej tsev neeg ua dab tsi kom muaj raws li Nws “txoj hauj lwm tseem ceeb”? Tej zaum yog kev mus rau lub tuam tsev, kev qhia txoj moo zoo rau ib tug neeg zej zog, los sis kov yeej kev sib cav sib ceg. Tej zaum txhua tus hauv nej tsev neeg yuav xav khaws tej yam me me, xws li cov pob zeb los sis cov khawm los sis tej daim uas muab sib dhos ua ke, thiab siv tej ntawd piv rau “tej yam me” uas peb ua tau txhua hnub kom “teeb lub hauv paus” rau Vajtswv txoj hauj lwm tseem ceeb. Nrog nej tsev neeg ua ke, xaiv ib yam me me no kom ua tau zoo dua ntxiv lub lim tiam no.

Lus Qhuab Qhia thiab Kev Khi Lus 66:3.Nej yuav ua li cas kom qhia tias kev hloov siab lees txim tseem ceeb heev? Tej zaum nej yuav xav hais ib co zaub mov rau ib lub tais uas huv ib feem xwb thiab nyeem tus Tswv tej lus rau William McLellin: “[Nej] yeej dawb huv, tiam sis tsis yog tag nrho.” Ces nej ntxuav tau lub tais thiab faib cov zaub mov thaum nej sib tham txog qhov uas Yexus Khetos tau ua li cas kom peb thiaj li yuav ua neeg huv ntawm sab ntsuj plig.

Lus Qhuab Qhia thiab Kev Khi Lus 66:10.Nej tsev neeg yuav ua li cas kom ua raws li tus Tswv tej lus ntuas kom “tsis txhob nrhiav kev kom tau nra hnyav,” los sis tsis txhob muaj ntau yam uas nej yuav tsum ua? Tej zaum nej yuav xav hais zaj txog Maivliag thiab Mathas (saib Lukas 10:38–42), thiab sib tham txog tej yam uas nej tsev neeg ua tau kom tsis txhob ris tej yam hnyav uas tsis muaj nqis mus ib txhis li.

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Help Me, Dear Father,” Children’s Songbook, 99.

Kev Qhia Zoo Dua Ntxiv

Cia li ua yooj yim rau lawv nrog nej sib tham. Tej lub sij hawm zoo tshaj plaws qhia lwm tus mas ib feem yog thaum ib tug hauv nej tsev neeg muaj lus nug los yog muaj kev txhawj xeeb. Cia nej tsev neeg paub los ntawm tej yam nej hais thiab ua tias nej xav hnov lawv. (Saib Teaching in the Savior’s Way, 16.)

Tus poj niam txhos caug ntawm Yexus ko taw

Txais Kev Zam Txim, los ntawm Greg K. Olsen Tau cai siv. www.GregOlsen.com