Tus Dej Missouri

Rauv Taws ntawm Ntug Dej Missouri, los ntawm Bryan Mark Taylor

Tsib Hlis Ntuj 31–Rau Hli Ntuj 6

Lus Qhuab Qhia thiab Kev Khi Lus 60–62

“Txhua tus Tib Neeg Nyob hauv Kuv Txhais Tes”

Thawj Tswj Hwm Ezra Taft Benson qhia tias thaum peb kawm vaj lug kub, “tib neeg tej zaj lus tim khawv yuav muaj zog. Lawv yuav haj yam xav rau siab ntseeg. Tsev neeg yuav muaj zog. Yuav muaj tej kev tshwm sim los” (“The Power of the Word,” Ensign, Tsib Hlis Ntuj 1986, 81).

Sau Ntawv txog Koj tej Kev Tshoov Siab

Thaum lub Rau Hli Ntuj xyoo 1831, Joseph Smith coj ib lub rooj sab laj rau cov txwj laug ntawm lub Koom Txoos nyob hauv Kirtland. Nyob ntawd, tus Tswv muab cov txwj laug faib ua ib khub ib khub thiab xav lawv mus rau Ciaj Ciam Av Jackson County, Missouri, thaum hais lus txib no hais tias: “Tshaj tawm txoj moo zoo … thaum taug kev mus” (Lus Qhuab Qhia thiab Kev Khi Lus 52:10). Cov txwj laug feem ntau twb rau siab ua li ntawd, tiam sis lwm tus tsis tau ua. Yog li ntawd thaum txog sij hawm rov qab los rau Kirtland, tus Tswv hais tias, “Kuv tsis txaus siab rau ib co [txwj laug], vim lawv tsis qhib lawv qhov ncauj, tiam sis lawv zais choj nyiaj uas kuv tau muab rau lawv, vim rau qhov txoj kev ntshai neeg” (Lus Qhuab Qhia thiab Kev Khi Lus 60:2). Peb feem coob txawj xav ib yam li cov txwj laug no xav—tej zaum peb kuj ntshai qhib peb qhov ncauj thiab tshaj tawm txoj moo zoo. Tej zaum peb kuj raug cuam tshuam vim peb “ntshai neeg.” Tej zaum peb xav tias peb tsis tsim nyog los sis peb tsis txawj. Txawm li cas los, tus Tswv “paub neeg txoj kev qaug zog thiab paub pab lawv” (Lus Qhuab Qhia thiab Kev Khi Lus 62:1). Nyob hauv tej kev tshwm sim rau cov tub txib uas nyob yav tas los muaj tej kev nplij peb lub siab kom pab peb kov yeej peb txoj kev ntshai qhia txoj moo zoo—los sis lwm yam kev ntshai uas peb raug: “Kuv, tus Tswv, kav nyob saum ntuj.” “Kuv muaj peev xwm ua kom nej dawb huv.” “Txhua tus tib neeg nyob hauv kuv txhais tes.” Thiab “cia li zoo siab, cov me nyuam yaus; vim kuv nyob nrog nraim nej.” (Lus Qhuab Qhia thiab Kev Khi Lus 60:4, 7; 61:6, 36.)

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Lus Qhuab Qhia thiab Kev Khi Lus 60; 62

Tus Tswv zoo siab thaum kuv qhib kuv qhov ncauj kom tshaj tawm txoj moo zoo.

Peb txhua tus twb muaj cib fim qhia txog txoj moo zoo es xyov yog vim li cas tiam sis, peb tsis tau ua li ntawd. Thaum koj nyeem tus Tswv tej lus rau cov tub txib thaum ub uas tsis tau “qhib lawv qhov ncauj” cia li xav txog koj tej lub cib fim qhia txoj moo zoo rau lwm tus. Vim li cas koj zaj lus tim khawv txog txoj moo zoo yeej yog ib yam uas muaj nqis los ntawm Vajtswv, los sis zoo li “choj nyiaj”? Tej lub sij hawm peb ua li cas kom “zais [peb] choj nyiaj”? (Lus Qhuab Qhia thiab Kev Khi Lus 60:2; kuj saib Mathais 25:14–30).

Tus Tswv tau qhuab qhia cov tub txib thaum ub no, tiam sis Nws kuj sim tshoov lawv lub siab. Koj nrhiav tau Nws tej zaj twg uas txhawb nqa koj nyob hauv tshooj 60 thiab 62? Tej zaj no ua li cas ua rau koj ntseeg koj tus kheej thaum koj qhia txog txoj moo zoo? Nrhiav cib fim kom qhib koj lub qhov ncauj thiab qhia tej yam uas Vajtswv tau tso siab muab rau koj.

Kuj saib Lus Qhuab Qhia thiab Kev Khi Lus 33:8–10; 103:9–10; Dieter F. Uchtdorf, “Cov Tub Txib txoj Hauj Lwm: Qhia tej Yam hauv Nej lub Siab,” Ensign los sis Liahona, Tsib Hlis Ntuj 2019, 15–18.

cov tub txib caij npav

Vajtswv xav kom kuv qhia txoj moo zoo rau lwm tus.

Lus Qhuab Qhia thiab Kev Khi Lus 61:5–6, 14–18

Tus Tswv puas tau foom tsis zoo rau tag nrho cov dej?

Ib feem ntawm tus Tswv tej lus ceeb toom nyob hauv Lus Qhuab Qhia thiab Kev Khi Lus 61 yog kev ceeb toom txog tej xwm txheej uas Nws cov neeg yuav raug thaum lawv mus rau Xi-oos hauv tus Dej Missouri, uas thaum ntawd yog ib tug dej uas ua rau neeg raug xwm txheej ntau heev. Lus ceeb toom no tsis yog txhais hais tias peb yuav tsum tsis txhob caij nkoj mus hauv cov dej. Tus Tswv muaj “hwj chim tag nrho,” tsis hais muaj hwj chim kav cov dej (nqe 1).

Lus Qhuab Qhia thiab Kev Khi Lus 61–62

Tus Tswv muaj hwj chim tag nrho thiab txawj tsom kwm kuv.

Thawm lawv rov qab mus rau Kirtland, Joseph Smith thiab lwm tus thawj coj ntawm lub Koom Txoos raug xwm txheej uas ua rau lawv yuav luag tas sim neej nyob hauv tus Dej Missouri (saib Saints, 1:133–34). Tus Tswv siv lub cib fim no kom ceeb toom thiab qhia Nws cov tub qhe. Koj nrhiav tau dab tsi nyob hauv Lus Qhuab Qhia thiab Kev Khi Lus 61 uas yaum koj kom koj tso siab rau tus Tswv thaum koj raug koj tej teeb meem? Piv txwv hais tias, vim li cas qhov uas koj paub tias Vajtswv “kav ib txhiab mus kav ib txhis” yog ib qho tseem ceeb? (nqe 1).

Muaj lwm lub tswv yim li no nyob hauv tshooj 62. Tus Tswv qhia dab tsi rau koj txog Nws tus kheej thiab Nws lub hwj chim nyob hauv kev tshwm sim no?

Cia li xav txog tej yam uas txhawb nqa koj txoj kev ntseeg thaum tus Tswv tau pab koj kov yeej tej teeb meem ntawm sab ntsuj plig los sis sab cev nqaij daim tawv.

Lus Qhuab Qhia thiab Kev Khi Lus 62

Tus Tswv xav kom kuv txiav txim siab “raws li [kuv] pom zoo.”

Tej lub sij hawm tus Tswv qhia kev rau peb, thiab lwm yam Nws cia peb xaiv raws li peb xav xwb. Koj puas kawm lub ntsiab cai no los ntawm Lus Qhuab Qhia thiab Kev Khi Lus 62? (kuj saib Lus Qhuab Qhia thiab Kev Khi Lus 60:5; 61:22). Koj tau pom lub ntsiab cai no li cas hauv koj lub neej los lawm? Vim li cas yuav zoo rau peb muaj tej yam uas peb txiav txim siab txog thaum Vajtswv tsis tau qhia rau peb tias peb yuav tsum ua dab tsi?

Kuj saib Ethaws 2:18–25; Lus Qhuab Qhia thiab Kev Khi Lus 58:27–28.

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Lus Qhuab Qhia thiab Kev Khi Lus 60:2–3.Vim li cas muaj ib co tub txib thaum ub uas tsis xav qhia txog txoj moo zoo? Vim li cas tej lub sij hawm peb tsis tshua xav ua thiab? Xav seb nej tsev neeg puas xav ua yeeb yam txog kev qhia txoj moo zoo.

Lus Qhuab Qhia thiab Kev Khi Lus 61:36–39.Nyob hauv tej nqe no vim li cas muaj tej lus hais tias “cia li zoo siab”? (kuj saib Yauhas 16:33). Tej zaum nej tsev neeg xav sau ntawv los sis kos duab txog tej yam uas ua rau lawv muaj kev xyiv fab thiab tso tej ntawd hauv ib lub hub rau “kev zoo siab.” (Ua tib zoo tso duab txog tus Cawm Seej haud thiab tej yam uas ua rau peb nco txog Nws txoj kev hlub rau peb.) Tas lub lim tiam no thaum nej tsev neeg xav nco qab vim li cas lawv yuav tsum muaj kev zoo siab, ces lawv xaiv tau ib yam los ntawm lub hub ntawd.

Lus Qhuab Qhia thiab Kev Khi Lus 61:36.Nej yuav ua li cas pab nej tsev neeg nco qab tias tus Cawm Seej “nyob nrog nraim [peb]”? Tej zaum nej yuav xav txiav txim siab tias nej yuav tso ib daim duab txog Nws nyob qhov twg hauv nej tsev? Peb yuav ua li cas kom caw tus Cawm Seej koom nrog peb txhua hnub?

Lus Qhuab Qhia thiab Kev Khi Lus 62:3.Tej zaum nej tsev neeg yuav xav hais lus tim khawv tom qab nej nyeem nqe no. Xwv kom piav tias ib zaj lus tim khawv yog dab tsi, tej zaum nej yuav xav qhia tej yam los ntawm Thawj Tswj Hwm M. Russell Ballard zaj lus “Pure Testimony” (Ensign los sis Liahona, Kaum Ib Hlis Ntuj 2004, 40–43). Vim li cas kev sau ntawv txog peb zaj lus tim khawv yog ib yam zoo?

Lus Qhuab Qhia thiab Kev Khi Lus 62:5, 8.Vim li cas tus Tswv tsis txib peb ua txhua yam hauv peb lub neej? Raws li nqe 8 hais, peb yuav tsum ua li cas kom txiav txim siab?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Lus Tim Khawv,” Cov Nkauj Qhuas Vajtswv, zaj 54.

Kev Kawm Zoo Dua Ntxiv ntawm Yus Ib Leeg

Cia tus Ntsuj Plig coj koj txoj kev kawm vaj lug kub. Cia tus Vaj Ntsuj Plig Dawb Huv coj koj mus. Ua tib zoo mloog Nws tej lus ntxhi thaum Nws coj koj mus rau tej yam uas koj yuav tsum kawm txhua hnub, txawm yog Nws ntxhis lus tias koj yuav tsum nyeem los sis kawm ib yam ntsiab lus uas txawv qhov koj xav tias koj yuav ua los sis hais kom koj kawm txawv dhau los.

Yexus ev ib tug me nyuam yaj

Tus Tswv Yug Yaj Zoo, los ntawm Del Parson