txoj kev hauv Independence Missouri

Independence, Missouri, los ntawm Al Rounds

Tsib Hlis Ntuj 24–30

Lus Qhuab Qhia thiab Kev Khi Lus 58–59

“Mob Siab Ua tej Yam Zoo”

Thawj Tswj Hwm Dallin H. Oaks qhia tias, “Cov vaj lug kub yuav pab peb teb peb tej lus nug thaum peb nyeem yog peb ua neeg tsim nyog kom txais tau tus Vaj Ntsuj Plig Dawb Huv tej kev tshoov siab, uas yuav coj peb mus paub qhov tseeb” (nyob hauv David A. Edwards, “Are My Answers in There?” New Era, Tsib Hlis Ntuj 2016, 42).

Sau Ntawv txog Koj tej Kev Tshoov Siab

Thawj zaug uas cov txwj laug ntawm lub Koom Txoos pom qhov chaw uas yuav txhim tsa lub nroog Xi-oos—Independence, Missouri—yeej tsis zoo li lawv xav. Ib txhia xav tias lawv yuav pom ib pawg Neeg Ntseeg uas muaj zog nyob hauv ib co neeg uas vam meej thiab kub siab heev. Tiam sis lawv pom ib lub yeej uas tsis muaj neeg coob, tsis tau muaj kev vam meej raws li lawv nyiam thiab muaj neeg nruj heev es tsis muaj Haiv Neeg Ntseeg coob. Tiam sis tus Tswv tsis hais kom lawv los rau Xi-oos xwb—Nws xav kom lawv txhim tsa Xi-oos.

Thaum qhov peb xav tau tsis yog raws li qhov tseeb, peb yuav tsum nco ntsoov tej yam uas tus Tswv hais rau Haiv Neeg Ntseeg thaum xyoo 1831: “Nej pom tsis tau nej tus Vajtswv lub tswv yim nrog nej lub qhov muag ntawm sab nqaij daim tawv … thiab lub yeeb koob uas yuav muaj tom qab dhau tej kev txom nyem ntau” (Lus Qhuab Qhia thiab Kev Khi Lus 58:3). Muaj tseeb tiag, lub neej no muaj kev txom nyem ntau, muaj kev phem ntau, tiam sis peb yeej muaj peev xwm “coj kom muaj kev ncaj ncees ntau los; vim [peb] twb muaj lub hwj chim” (nqe 27–28),

Kuj saib Saints, 1:127–33.

lub cim txog kev kawm ntawm yus ib leeg

Tej lub Tswv Yim Kawm Vaj Lug Kub ntawm Yus Ib Leeg

Lus Qhuab Qhia thiab Kev Khi Lus 58:1–5, 26–33, 44; 59:23

Cov koob hmoov los thaum txog lub sij hawm Vajtswv pom zoo thiab thaum peb rau siab.

Cov Neeg Ntseeg twb teeb lub hauv paus ntawm Xi-oos nyob hauv Ciaj Ciam Av Jackson County, Missouri, es nyob ntawd lawv twb raug txom nyem ntau. Lawv twb cia siab tias ua ntej lawv tas sim neej cheeb tsam no yuav vam meej tawg paj txi txiv los ua ib qhov chaw rau txhua tus Neeg Ntseeg sau los ua ke. Tiam sis, cov Neeg Ntseeg twb raug ntiab tawm ntawm Ciaj Ciam Av Jackson mus ua ntej dhau ob peb xyoos, thiab tus Tswv qhia Nws cov neeg tias lawv yuav tsum “ tos ib nyuag ntus rau txoj kev txhiv Xi-oos dim” (Lus Qhuab Qhia thiab Kev Khi Lus 105:9).

Thaum koj kawm tej nqe vaj lug kub no, nrhiav vim li cas yuav tsum tos ib ntus kom txais tau cov koob hmoov. Tej zaum tej lus nug nram qab no yuav pab koj xav txog qhov no.

Lus Qhuab Qhia thiab Kev Khi Lus 58:1–5; 59:23. Muaj tej lub ntsiab twg hauv tej nqe no uas ua rau koj muaj peev xwm ua siab ntev nyiaj kev tsim txom? Koj twb tau txais cov koob hmoov twg tom qab koj raug txom nyem? Vim li cas muaj tej koob hmoov uas los tom qab yus raug txom nyem xwb?

Lus Qhuab Qhia thiab Kev Khi Lus 58:26–33. Qhov uas yus “mob siab ua tej yam zoo” pab li cas kom muaj raws li Vajtswv cov lus cog tseg? Koj txoj kev mloog lus pab li cas?

Lus Qhuab Qhia thiab Kev Khi Lus 58:44. “Kev thov Vajtswv nrog txoj kev ntseeg” thiab tus Tswv lub siab nyiam rau peb sib txuas li cas?

Lus Qhuab Qhia thiab Kev Khi Lus 59, zaj lus piav txog tshooj

Polly Knight yog leej twg?

Polly Knight thiab nws tus txiv, Joseph Knight tus Laus, yog ob tug hauv thawj pawg uas ntseeg Joseph Smith yog ib tug yaj saub. Polly thiab Joseph twb kev txhawb nqa tus Yaj Saub thaum nws ua hauj lwm txhais Phau Ntawv Maumoos. Tsev neeg Knight twb ncaim Colesville, New York mus kom koom nrog Haiv Neeg Ntseeg nyob hauv Ohio thiab tus Tswv txib nkawd tsiv mus rau Ciaj Ciam Av Jackson, Missouri. Thaum nkawd taug kev mus, Polly tsis nyob zoo zuj zus, tiam sis nws tso siab tias nws yuav pom Xi-oos ua ntej nws tuag. Nws twb nyob hauv Missouri ob peb hnub xwb ces nws tau tso lub ntiaj teb no tseg (saib Saints, 1:127–28, 132–33). Tau txais Lus Qhuab Qhia thiab Kev Khi Lus 59 thaum hnub uas nws tas sim neej no, thiab zoo li nqe 1 and 2 hais txog nws.

Lus Qhuab Qhia thiab Kev Khi Lus 59:9–19

Yog koj hwm Hnub Caiv kom dawb huv ces koj yuav tau cov koob hmoov ntawm sab cev nqaij daim tawv thiab sab ntsuj plig.

Tom qab tus Tswv cog lus tias Nws yuav foom koob hmoov rau Haiv Neeg Ntseeg nyob hauv Xi-oos “nrog rau tej lus txib uas tsis yog tsawg,” tus Tswv hais txob ib txoj lus txib tseem ceeb; yog txoj lus txib kom hwm Nws “hnub dawb huv” (Lus Qhuab Qhia thiab Kev Khi Lus 59:4, 9). Thaum koj kawm phau Lus Qhuab Qhia thiab Kev Khi Lus 59:9–19, cia li xav seb vim li cas kev hwm Hnub Caiv yuav tseem ceeb rau Haiv Neeg Ntseeg thaum lawv xav txhim tsa Xi-oos.

Tej zaum koj yuav xav txog tej lus nug zoo li no: Kuv puas siv Hnub Caiv raws li tus Tswv xav kom kuv ua? Hnub Caiv pab kuv li cas kom “ tej yam ntawm lub ntiaj teb txhob ua rau [kuv] ceb”? (nqe 9). Kuv yuav ua li cas kom muab kuv “tej kev hwm pub rau tus uas Siab Tshaj Plaws”? (nqe 10).

Tom qab koj nyeem tej nqe nram qab no, koj txais tej kev tshoov siab twg kom hwm Hnub Caiv ua ib hnub dawb huv ntxiv? Chiv Keeb 2:2–3; Khiav Dim 20:8–11; 31:13, 16; 2 Kev Cai 5:12–15; Yaxayas 58:13–14; Malakaus 2:27; Yauhas 20:1–19; Tes Hauj Lwm 20:7.

Tej zaum yuav zoo rau koj yog koj saib tej daim video los yog lwm yam kev pab txog Hnub Caiv nyob ntawm sabbath.ChurchofJesusChrist.org.

Kuj saib Russell M. Nelson, “Hnub Caiv Yog Ib Hnub Zoo Siab,” Ensign los sis Liahona, Tsib Hlis Ntuj 2015, 129–32; Bible Dictionary, “Sabbath.”

mov mog thiab tej khob rau lub cim nco txog

Kev txais lub cim nco txog yog ib feem ntawm kev hwm Hnub Caiv kom dawb huv.

lub cim rau tsev neeg txoj kev kawm ua ke

Tej lub Tswv Yim rau Tsev Neeg Kev Kawm Vaj Lug Kub thiab Tsev Neeg Hmo Ua Ke

Lus Qhuab Qhia thiab Kev Khi Lus 58:26–29.Tej zaum nej tsev neeg yuav xav sau ntawv txog tej yam uas lawv “mob siab ua.” Tag nrho tej ntawd puas yog “tej yam zoo”? Vim li cas tus Tswv xav kom peb ua “ntau yam los ntawm [peb] tus kheej txoj kev ywj siab xaiv”? Nug txhua tus hauv nej tsev neeg seb lawv xav tias lawv yuav ua dab tsi lub lim tiam no “coj kom muaj kev ncaj ncees ntau los.” Ces tom qab ntawd lawv mam li qhia lawv tau ua dab tsi.

Lus Qhuab Qhia thiab Kev Khi Lus 58:42–43.Nej tsev neeg xav li cas thaum lawv nyeem tej nqe no? Tej nqe no los yuav ua li cas kom pab ib tug neeg uas yuav tsum hloov siab lees txim?

Lus Qhuab Qhia thiab Kev Khi Lus 59:3–19.Qhov hais tias yuav tau “tej lus txib … [ntoo]” txhais li cas? (nqe 4). Thaum nej nyeem tej lus txib nyob hauv nqe 5–19, cia li sib tham txog cov koob hmoov uas nej tau txais los ntawm kev ua raws li tej lus txib no.

Tej zaum nej yuav nco txog tej lus xws li “xyiv fab,” “zoo siab,” thiab “luag ntxhi” uas tau siv kom piav txog txoj lus txib hais tias yuav tsum hwm Hnub Caiv. Nej yuav ua li cas kom nej Hnub Caiv muaj kev xyiv fab? Tej zaum nej tsev neeg yuav xav ua tej daim ntawv uas muaj duab txog tej yam uas nej ua tau thiaj li hwm Hnub Caiv kom dawb huv ces muab siv ua si txuas ua ke.

Lus Qhuab Qhia thiab Kev Khi Lus 59:18–21.Peb yuav ua li cas kom “lees … txhua yam uas [Vajtswv] txhais tes tau ua”? (nqe 21). Xav seb puas taug kev mus los sis saib tej daim duab, pom tej yam uas “ua kom qhov muag nyiam thiab kom zoo lub siab” (nqe 18). Tej zaum nej yuav xav thaij duab los sis kos duab txog tej yam uas nej nrhiav tau ces sib tham txog tej yam uas nej ua tau kom qhia Vajtswv tias nej ris Nws txiaj rau tej yam no. Peb tau pom Vajtswv txhais tes pab peb lub neej li cas?

Yog xav tau tswv yim ntxiv txog kev qhia cov me nyuam, cia li saib lub lim tiam no tus txheej txheem qhia nyob hauv Come, Follow Me—For Primary.

Zaj nkauj zoo hu: “Choose the Right,” Cov Nkauj Qhuas Vajtswv, zaj 110.

Kev Qhia Zoo Dua Ntxiv

Qhia txog cov vaj lug kub. Muab sij hawm rau nej tsev neeg qhia txog tej nqe vaj lug kub uas muaj nqis rau lawv uas lawv tau kawm thaum lawv kawm lawv ib leeg.

tus me nyuam ntxhais thov Vajtswv thaum txais lub cim nco txog

Tus kos duab yog Marti Major